ម្ចាស់មេដាយមាសកីឡាអាស៊ានប៉ារ៉ាហ្គេម វ៉ាន វ៉ុន បានក្លាយជាកីឡាកររកម្ពុជាដំបូងគេ ដែលដណ្តើមបានមេដាយជូនកម្ពុជា ក្នុងការប្រកួតកីឡាអាស៊ីប៉ារ៉ាហ្គេម លើកទី៥ ឆ្នាំ២០២៦ នៅទីក្រុងណាហ្គោយ៉ា ប្រទេសជប៉ុន បន្ទាប់ពីកម្ពុជាបានទន្ទឹងរង់ចាំអស់រយៈពេលជាង១៥ឆ្នាំ ហើយគ្រប់គ្នាបានសាទរខ្លាំង ព្រោះនេះជាមេដាយដ៏មានតម្លៃរបស់ក្រុមអត្តពលិកប៉ារ៉ាហ្គេមកម្ពុជា សម្រាប់ការខិតខំប្រឹងប្រែងអស់រយៈពេលជាច្រើនឆ្នាំមកនេះ។
តាំងតែពីព្រឹត្តិការណ៍កីឡាអាស៊ីប៉ារ៉ាហ្គេម ត្រូវបានបង្កើតឡើង និងរៀបចំឱ្យមានការប្រកួតជាផ្លូវការ ជាលើកទី១ ឆ្នាំ២០១០ នៅប្រទេសចិន កម្ពុជាតាមរយៈគណៈកម្មាធិការជាតិប៉ារ៉ាឡាំពិកកម្ពុជា (NPCC) តែងតែបញ្ជូនប្រតិភូកីឡាទៅចូលរួមការប្រកួត ដែល៤ឆ្នាំមានម្តងនេះ ជាបន្តបន្ទាប់ ប៉ុន្តែការចូលរួម៤លើកកន្លងមកនេះ កម្ពុជា មិនធ្លាប់ដណ្តើមបានមេដាយនោះទេ គឺអត្តពលិកប៉ារ៉ាហ្គេមកម្ពុជាភាគច្រើន ធ្លាក់នៅក្នុងវគ្គជម្រុះ។
តែទោះបីជាយ៉ាងណា សម្រាប់ការចូលរួមព្រឹត្តិការណ៍កីឡាអាស៊ី ឆ្នាំ២០២៦ នៅប្រទេសជប៉ុនលើកនេះ កីឡាករអត្តពលកម្មផ្នែករទេះរុញ វ៉ាន វ៉ុន បានធ្វើឱ្យគ្រប់គ្នាមានការភ្ញាក់ផ្អើល ខណៈរូបគេបែរជាអាចយកឈ្នះកីឡាករចិន (២នាក់) កីឡាករឥណ្ឌូនេស៊ី (១នាក់) និងថៃ (២នាក់) ដើម្បីទទួលបានចំណាត់ថ្នាក់លេខ១ ក្នុង Heat 2 សម្រាប់ការប្រកួតជម្រុះលើវិញ្ញាសាប្រណាំងរទេះចម្ងាយ ១០០ម៉ែត្រ ប្រភេទកម្រិតពិការ T54 នោះ។
ការប្រើថិរវេលា ១៤.៣១វិនាទី ដើម្បីទទួលបានលេខ១ ក្នុង Heat 2 នេះ បានជួយឱ្យ វ៉ាន វ៉ុន ទទួលបានឱកាសឡើងទៅប្រកួតផ្តាច់ព្រ័ត្រជាមួយកីឡាករខ្លាំងចំនួន៧នាក់ មកពី Heat ផ្សេងៗទៀត ហើយតាមរយៈការប្រកួតយ៉ាងស្វិតស្វាញនោះ វ៉ាន វ៉ុន ធ្វើបានកាន់តែល្អ ដោយប្រើថិរវេលាត្រឹម ១៤.១០ ដើម្បីទទួលបានចំណាត់ថ្នាក់លេខ៣ និងឈ្នះបានមេដាយសំរឹទ្ធ ជូនកម្ពុជាជាលើកដំបូង។
លោក យី វាសនា អគ្គលេខាធិការគណៈកម្មាធិការជាតិប៉ារ៉ាហ្គេមឡាំពិកកម្ពុជា បានចាត់ទុក វ៉ាន វ៉ុន ជា «វីរបុរស» ដែលបានឈ្នះមេដាយឱ្យកម្ពុជា នៅកីឡាអាស៊ីប៉ារ៉ាហ្គេម ជាប្រវត្តិសាស្រ្តលើកដំបូងនេះ ដោយការប្រកួតកីឡាអាស៊ីប៉ាហ្គេម លើកទី៥ ឆ្នាំ២០២៦នេះ កម្ពុជា បានបញ្ជូនក្រុមអត្តពលិកចំនួន១៧នាក់ទៅចូលរួមប្រកួតប្រជែង ជាមួយកីឡាករកីឡាការិនីប៉ារ៉ាហ្គេមជាង ៣ ០០០នាក់មកពីទូទាំងទ្វីបអាស៊ី។
លោក យី វាសនា ដែលកំពុងដឹកនាំក្រុមអត្តពលិកជនមានពិការភាពនៅប្រទេសជប៉ុននោះ បានបញ្ជាក់តាមការះនុមេ១ រប្រកួតកីឡាអាស៊ីបោះក់ផើតប្រវត្តិសាស្រ្តបង្ហោះសារថា៖ «បងប្អូនបានមេដាយ១ហើយ អស្ចារ្យណាស់ អបអរសាទរទាំងអស់គ្នា វ៉ាន វ៉ុន ជាវីរបុរសរកបានមេដាយទី១មុនគេ សម្រាប់កីឡាអាស៊ីប៉ារ៉ាហ្គេម លើកទី៥របស់កម្ពុជាយើង។ ខ្ញុំស្រក់ទឹកភ្នែកមិនដឹងខ្លួនដោយក្តីរំភើប និងគោរពដឹងគុណជាទីបំផុត នូវការបង្កើតនិងផ្តល់កិត្តិយសសម្រាប់ជនពិការ ប្រជាជន និងប្រទេសជាតិយើង»។
ចំណែកលោក សំហេង បុរស អនុប្រធានគណៈកម្មាធិការជាតិប៉ារ៉ាហ្គេមឡាំពិកកម្ពុជា ដែលត្រូវបានចាត់តាំងជាប្រធានប្រតិភូដឹកនាំក្រុមកីឡាប៉ារ៉ាហ្គេមកម្ពុជា ទៅចូលរួមការប្រកួតកីឡាអាស៊ីប៉ារ៉ាហ្គេម ឆ្នាំ២០២៦នេះ តំណាងឱ្យលោកឧបនាយករដ្ឋមន្រ្តី ហ៊ុន ម៉ានី បានកោតសរសើរខ្លាំងពីសមត្ថភាពរបស់ វ៉ាន វ៉ុន ដែលបានប្រើអស់ថាមពល និងបច្ចេកទេស ដើម្បីវ៉ាគូប្រកួត រហូតទទួលបានមេដាយសំរឹទ្ធ។
បើទោះបីជា វ៉ាន វ៉ុន នៅមិនទាន់អាចដណ្តើមបានមេដាយខ្ពស់ជាងនេះ គឺមេដាយមាស ដែលបានទៅកីឡាករថៃ Paeng Nuea ជាមួយថិរវេលា ១៣.៤៩វិនាទី និងមេដាយប្រាក់បានទៅកីឡាករ Alqarni ដោយប្រើពេល ១៣.៩៨វិនាទី ប៉ុន្តែលោក សំហេង បុរស ដែលនៅជាប់នឹងការប្រកួតនោះ បានអះអាងថា វ៉ាន វ៉ុន ធ្វើបានល្អបំផុតហើយ ក្នុងការនាំយកមោទនភាពមកជូនប្រទេសជាតិ។
លោកបានបញ្ជាក់តាមការបង្ហោះសារបែបនេះថា៖ «មេដាយសំរឹទ្ធដំបូងគេ នៅកម្រិតអាស៊ី! អបអរសាទរ លោក វ៉ាន វ៉ុន ដែលដណ្តើមបានមេដាយសំរឹទ្ធ ក្នុងវិញ្ញាសាប្រណាំងរទេះចម្ងាយ ១០០ម៉ែត្រ ក្នុងការប្រកួតកីឡាអាស៊ីប៉ារ៉ាហ្គេម លើកទី៥ ឆ្នាំ២០២៦ នៅទីក្រុងណាហ្គោយ៉ា ប្រទេសជប៉ុន។ លទ្ធផលនេះ គឺជាមោទនភាពសម្រាប់កម្ពុជា និងជាសក្ខីភាពនៃការខិតខំប្រឹងប្រែង ការតស៊ូ និងការប្តេជ្ញាចិត្តរបស់កីឡាករកម្ពុជាលើឆាកអន្តរជាតិ។ សូមអបអរសាទរចំពោះសមិទ្ធផលដ៏អស្ចារ្យមួយនេះ»។
ពិតណាស់ មុនការឈានទៅដណ្តើមបានមេដាយសំរឹទ្ធកីឡាអាស៊ីប៉ារ៉ាហ្គេមនេះ វ៉ាន វ៉ុន បានឆ្លងកាត់ការលំបាកជាច្រើន ដើម្បីសម្រួចសមត្ថភាពខ្លួនឯង។ បើទោះបីជារូបគេ ធ្លាប់បានឈ្នះមេដាយមាស ប្រាក់ និងសំរឹទ្ធជាច្រើន នៅលើឆាកអន្តរជាតិ ជាពិសេសការបង្កើតប្រវត្តិសាស្រ្តឈ្នះមេដាយមាសចំនួន៣ ក្នុងការប្រកួតស៊ីហ្គេម ឆ្នាំ២០១៣ និងការបន្តឈ្នះមេដាយស៊ីហ្គេមជាច្រើនទៀត ប៉ុន្តែ វ៉ាន វ៉ុន ពិតជាបានដាក់ចិត្ត និងហ្វឹកហាត់ខ្លាំង សម្រាប់ត្រៀមការប្រកួតកីឡាអាស៊ីប៉ារ៉ាហ្គេម ឆ្នាំ២០២៦នេះ។
កីឡាករវ័យ៤០ឆ្នាំរូបនេះ តែងមានវត្តមាន សម្រាប់ការហ្វឹកហាត់ជាមួយមិត្តរួមអាជីព នៅពហុកីឡដ្ឋានជាតិអូឡាំពិក។ ពួកគេបានហ្វឹកហាត់ និងប្រកួតសាកល្បងសមត្ថភាពគ្នាជាប្រចាំ ដើម្បីពង្រឹងសមត្ថភាពខ្លួនឯង ហើយការខិតខំនេះ ពិតជាបានជួយឱ្យរូបគេ សម្រេចគោលដៅ ក្នុងការឈ្នះមេដាយសំរឹទ្ធ ពីការប្រកួតកីឡាអាស៊ីប៉ារ៉ាហ្គេមនេះ។
តែទោះបីជាយ៉ាងណា វ៉ាន វ៉ុន បានអះអាងថា សមិទ្ធផលជោគជ័យយ៉ាងធំធេងនេះ វាមិនមែនកើតឡើង ដោយសារតែការខំប្រឹងប្រែងរបស់គេម្នាក់ឯងនោះទេ ប៉ុន្តែជាការរួមចំណែកពីថ្នាក់ដឹកនាំ និងប្រជាជនកម្ពុជា ជាពិសេសលោកនាយករដ្ឋមន្រ្តី ហ៊ុន ម៉ាណែត ជាប្រធាន និងលោក ហ៊ុន ម៉ានី ជាអនុប្រធានគណៈកម្មាធិការជាតិប៉ារ៉ាឡាំពិកកម្ពុជា ដែលផ្តល់ទាំងសម្ភារ និងឱកាសសម្រាប់ក្រុមអត្តពលិកប៉ារ៉ាហ្គេមទាំងអស់ បានចេញទៅប្រកួត ដណ្តើមយកមេដាយជូនជាតិ។
វ៉ុន និយាយថា៖ «ការទទួលបានជោគជ័យនេះ កើតចេញពីការខិតខំប្រឹងប្រែងរបស់ខ្ញុំមួយជំហាន ហើយមួយជំហានទៀត គឺការផ្តល់នូវសម្ភារ រួមទាំងការជួយទំនុកបម្រុងពីឯកឧត្តម ហ៊ុន ម៉ានី ជាពិសេសសម្តេចបវរធិបតី ជាប្រធាន ដែលតែងតែជួយលើកស្ទួយវិស័យកីឡាជនពិការរបស់យើងរហូត គឺមិនថាការប្រកួតនៅក្នុងស្រុក និងក្រៅប្រទេស សម្តេចតែងយកចិត្តទុកដាក់ និងបញ្ជូនក្រុមអត្តពលិកជនពិការរបស់យើងទៅចូលរួម»។
វ៉ាន វ៉ុន បានបន្ថែមថា៖ «អ៊ីចឹងភាពជោគជ័យនេះ បានកើតឡើងដោយសារការប្រឹងប្រែងរបស់ខ្ញុំ និងថ្នាក់ដឹកនាំទាំងអស់ ដែលបានជួយទំនុកបម្រុង និងផ្តល់ជាកម្លាំងចិត្ត ធ្វើឱ្យយើងមានការប្រឹងប្រែងហ្វឹកហាត់ និងប្រកួតរហូតទទួលបានជ័យជម្នះដ៏ធំនេះ។ ខ្ញុំមានការរំភើបខ្លាំងណាស់ ព្រោះមេដាយដ៏មានន័យនេះ មិនមែនតែខ្ញុំម្នាក់ឯងធ្វើបាននោះទេ តែទាំងអស់គ្នា រួមទាំងប្រជាជនកម្ពុជាទាំងអស់ ដែលបានគាំទ្រដល់វិស័យកីឡាជនពិការឱ្យមានការរីកចម្រើន និងដណ្តើមបានមេដាយជូនជាតិ»។
តាមរបាយការណ៍លោក យី វាសនា មុនចេញទៅប្រកួតកីឡាអាស៊ីប៉ារ៉ាហ្គេម លើកទី៥ ឆ្នាំ២០២៦នេះ បានឱ្យដឹងថា គណៈកម្មាធិការជាតិប៉ារ៉ាឡាំពិកកម្ពុជា ធ្លាប់បានដឹកនាំប្រតិភូ និងអត្តពលិកប៉ារ៉ាហ្គេមកម្ពុជា ចូលរួមការប្រកួតខ្នាតអន្ដរជាតិសំខាន់ៗចំនួន ៣កម្រិត រួមមានកម្រិតអាស៊ាន អាស៊ី និងពិភពលោក។
សម្រាប់កម្រិតអាស៊ី កម្ពុជាបានចូលរួមការប្រកួតអាស៊ីប៉ារ៉ាហ្គេម ចំនួន ៤លើក ចាប់តាំងពីឆ្នាំ២០១០ និងការប្រកួតយុវជនអាស៊ីប៉ារ៉ាហ្គេម (Asian Youth Para Games) ចំនួន ២លើក។ ជាលទ្ធផលនៃការចូលរួមប្រកួតលើឆាកអន្តរជាតិនានា ក្រុមអត្តពលិកប៉ារ៉ាហ្គេមកម្ពុជា បានសម្រេចស្នាដៃដណ្តើមមេដាយជូនជាតិសរុបចំនួន ២៨១ ក្នុងនោះមានមេដាយមាស៤៦ ប្រាក់១១៣ និងសំរឹទ្ធ១២២។
ចំណែកការប្រកួតកីឡាអាស៊ីប៉ារ៉ាហ្គេម លើកទី៥ ឆ្នាំ២០២៦នេះ កម្ពុជា បានបញ្ជូនកីឡាករកីឡាការិនីប៉ារ៉ាហ្គេមចំនួន១៧នាក់ទៅចូលរួម។ ពួកគេត្រូវប្រកួតប្រជែងនៅប្រភេទកីឡាចំនួន៥ រួមមានអត្តពលិក ហែលទឹក វាយកូនឃ្លីលើតុ បូស្យា និងបាល់បោះជិះរទេះនារី ចាប់ពីថ្ងៃទី ១៨ ដល់ទី ២៤ ខែតុលា ហេតុនេះកម្ពុជា នៅមានអត្តពលិកជាច្រើនទៀត ដែលត្រូវប្រកួតដណ្តើមយកមេដាយ ដោយលោក យី វាសនា រំពឹងថា អាចនឹងដណ្តើមបានមេដាយបន្ថែមទៀត។
យ៉ាងណាមិញ កីឡាការិនីពិការជើងស្តាំ វិត ចន្ថា ដែលធ្លាប់ឈ្នះមេដាយមាសជាច្រើន ក្នុងការប្រកួតអាស៊ានប៉ារ៉ាហ្គេមនោះ នឹងត្រូវប្រកួតផ្តាច់ព្រ័ត្រ លើវិញ្ញាសារត់ល្បឿនចម្ងាយ ១០០ម៉ែត្រ T64 នៅល្ងាចថ្ងៃពុធនេះ បន្ទាប់ពីនាងរបូតឱកាសប្រជែងមេដាយលើវិញ្ញាសាលោតចម្ងាយ ក្នុងព្រឹត្តិការណ៍កីឡាអាស៊ីប៉ារ៉ាហ្គេម លើកទី៥ ឆ្នាំ២០២៦ នៅជប៉ុននេះ។
កីឡាការិនី វិត ចន្ថា របស់កម្ពុជា នឹងត្រូវប្រជែងយកមេដាយ ក្នុងវិញ្ញាសាមួយរត់ល្បឿន ១០០ម៉ែត្រនេះ ជាមួយអត្ដពលិក ៤នាក់ទៀត គឺកីឡាការិនីកាហ្សាក់ស្ថាន Suleimenova Aisulu, កីឡាការិនី Takakuwa saki និងកីឡាការិនី Yamashitaa Chie របស់ម្ចាស់ផ្ទះជប៉ុន និងកីឡាការិនីមីយ៉ាន់ម៉ា Lar Win Law ខណៈការបង្ហាញខ្លួននៅកីឡាអាស៊ីប៉ារ៉ាហ្គេម លើកនេះ ចន្ថា ចង់បំបែកំណត់ត្រាខ្លួនឯង ដែលធ្លាប់ធ្វើបាន ក្នុងការប្រកួតអាស៊ានប៉ារ៉ាហ្គេម កន្លងមកព្រោះនេះក៏អាចជាពេលវេលាចុងក្រោយ សម្រាប់ការបង្ហាញខ្លួន នៅលើឆាកអន្តរជាតិផងដែរ ខណៈនាងមានវ័យ៤៤ឆ្នាំទៅហើយនោះ។
គួររំឭកថា វិត ចន្ថា ធ្លាប់មានកំណត់ត្រាមេដាយអន្ដរជាតិជាច្រើន ក្នុងនោះមានដូចជា ព្រឹត្តិការណ៍អាស៊ានប៉ារ៉ាហ្គេម លើកទី៩ ឆ្នាំ២០១៧ ឈ្នះមេដាយប្រាក់១ និងសំរឹទ្ធ១, ព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ ឆ្នាំ២០២២ ឈ្នះមេដាយមាស២ និងប្រាក់១ ហើយចុងក្រោយព្រឹត្តិការណ៍អាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជា ដោយឈ្នះបានមេដាយមាស៣តែម្នាក់ឯង៕
