សមាគមសម្ព័ន្ធអ្នកសារព័ត៌មានកម្ពុជា

សមត្ថកិច្ចខេត្តកណ្តាលអះអាងថានៅស្រុកកោះធំមិនមានគ្រឿងញៀនច្រើន ដូចការលើកឡើងរបស់ពលរដ្ឋនោះទេ

ដបទឹកដែលអ្នកប្រើប្រាស់គ្រឿងញៀនយកធ្វើជាឧបករណ៍ប្រើប្រាស់រួចទុកចោលនៅក្នុងចម្ការល្មុតរបស់កសិករមួយកន្លែងនៅក្នុងឃុំព្រែកថ្មី ស្រុកកោះធំ ខេត្តកណ្តាល ជាទីដែលពួកគេតែងនាំគ្នាទៅប្រើប្រាស់។ រូបភាពថតនៅថ្ងៃទី១៤ ខែធ្នូ ឆ្នាំ២០២១។ ខេមបូចា/ អាន វិចិត្រ
ដបទឹកដែលអ្នកប្រើប្រាស់គ្រឿងញៀនយកធ្វើជាឧបករណ៍ប្រើប្រាស់រួចទុកចោលនៅក្នុងចម្ការល្មុតរបស់កសិករមួយកន្លែងនៅក្នុងឃុំព្រែកថ្មី ស្រុកកោះធំ ខេត្តកណ្តាល ជាទីដែលពួកគេតែងនាំគ្នាទៅប្រើប្រាស់។ រូបភាពថតនៅថ្ងៃទី១៤ ខែធ្នូ ឆ្នាំ២០២១។ ខេមបូចា/ អាន វិចិត្រ

សមត្ថកិច្ចខេត្តកណ្តាលបដិសេធព័ត៌មានដែលប្រជាពលរដ្ឋមួយចំនួននៅស្រុកកោះធំ លើក​ឡើងថា មានការចែកចាយគ្រឿងញៀនបើកចំហដូចផ្សារបន្លែត្រីសាច់ ហើយថា មន្ត្រីពាក់ព័ន្ធ​ប្រឹងប្រែង​ធ្វើកិច្ចការងារនេះគ្មានពេលឈប់សម្រាកនោះទេ។​

កាលពីថ្ងៃទី៧ ខែវិច្ឆិកា ឆ្នាំ២០២១ ក្រសួងមហាផ្ទៃបានចេញលិខិតមួយផ្ញើទៅស្នងការ​ខេត្តកណ្តាល ឱ្យពិនិត្យរួចធ្វើរបាយការណ៍ជាលាយលក្ខណ៍អក្សរ​ដើម្បីឱ្យក្រសួងមាន​ចំណាត់ការបន្តចំពោះករណីដែលពលរដ្ឋមួយចំនួននៅស្រុកកោះធំលើកឡើងថា មានការ​ចែក​ចាយ និងប្រើប្រាស់គ្រឿងញៀនដូចផ្សារបន្លែត្រីសាច់។​ លិខិតក្រសួងមហាផ្ទៃនេះ​យោង​តាមការចុះផ្សាយរបស់សារព័ត៌មាន ខេមបូចា នៅថ្ងៃទី២៩ ខែកក្កដា ឆ្នាំ២០២១។​

ជុំវិញបញ្ហានេះ ខេមបូចា មិនអាចសុំការឆ្លើយតបពីស្នងការនគរបាលខេត្តកណ្តាល លោក ឈឿន សុចិត្ត បានទេដោយលោកស្តាប់សំនួរហើយចុចបិទទូរស័ព្ទ ចំណែកអភិបាល​ខេត្តកណ្តាល​ លោក គង់ សោភ័ណ្ឌ ប្រាប់ថា រវល់ប្រជុំហើយក្រុមការងារបានផ្ញើសំនួរ​តាម​តេឡេក្រាមក៏លោកមិនមានការឆ្លើយតបដែរ។​

ចំណែកស្នងការរងនៃស្នងការដ្ឋាននគរបាលខេត្តកណ្តាល លោក ឈុន ស៊ីណាត ឱ្យដឹងថា ស្នងការដ្ឋានខេត្តកណ្តាលបានពិនិត្យស្រាវជ្រាវ និងបានធ្វើរបាយការណ៍​ទៅក្រសួងមហាផ្ទៃ​រួចហើយ។​ លោកថា របាយការណ៍រកឃើញថាមិនមានបញ្ហាគ្រឿងញៀន​ច្រើនដូចការ​លើក​ឡើងរបស់ពលរដ្ឋមួយចំនួននោះទេ។​

លោក ឈុន ស៊ីណាត បញ្ជាក់ថា៖ «ការលើកឡើងរបស់គេហ្នឹងគឺមិនត្រឹមត្រូវទេ ព្រោះថា​ការ​មានគ្រឿងញៀនច្រើនហ្នឹងអត់ទេ ដោយសារពួកយើងនេះធ្វើការងារនេះសកម្ម គ្មានពេល​សម្រាក​ផង​មួយឆ្នាំៗ គឺរវល់សឹងងាប់»។

ចំពោះព័ត៌មានលម្អិតបន្ថែមលើសពីនេះ លោក ឈុន ស៊ីណាត ឱ្យសួរមន្ត្រីទទួលបន្ទុក​ផ្នែក​គ្រឿងញៀន។​ ប៉ុន្តែលោក មិន ប៊ុនឆៀង ស្នងការរងទទួលបន្ទុកផ្នែក​ប្រយុទ្ធប្រឆាំង​គ្រឿង​ញៀននៃក្រសួងមហាផ្ទៃ មិនលើកទូរស័ព្ទហើយក៏មិនឆ្លើយសំនួរដែលផ្ញើតាម​តេឡេក្រាម​ដែរ។​​

ប្រជាពលរដ្ឋរស់នៅឃុំសំពៅពូន ក្នុងស្រុកកោះធំ លោកនួន អះអាងថា បញ្ហាគ្រឿងញៀន​នៅក្នុងមូលដ្ឋានរបស់លោកមិនមានការថយចុះនោះទេ ធ្វើឱ្យរូបលោកក៏ដូចជាពលរដ្ឋ​នៅតំបន់នោះមានការព្រួយបារម្ភជាខ្លាំង។

លោក នួន និយាយថា៖ «បើយើងចុះតាមមូលដ្ឋានបានដឹង។ និយាយឱ្យចំដូចបុណ្យកឋិន​ទៅហើយ នេះយើងនិយាយតាមភូមិនីមួយៗជក់ឡើងវ៉ល់ហើយ»។​

លោកឱ្យដឹងទៀតថា សកម្មភាពប្រើប្រាស់ និងចែកចាយ តែងចេញធ្វើសកម្មភាពក្នុងអំឡុង​ម៉ោងប្រមាណ៨យប់ដោយមានការជួបជុំគ្នា ពេលខ្លះក៏លួចទ្រព្យសម្បត្តិអ្នកភូមិផងដែរ។

មន្ត្រីប៉ូលិសម្នាក់ដើរចេញពីស្នងការដ្ឋាននគរបាលខេត្តកណ្តាល កាលពី ថ្ងៃទី២០ ខែធ្នូ ឆ្នាំ២០២១។ ខេមបូចា/ បញ្ញា ឆព័ណ្ណ​
មន្ត្រីប៉ូលិសម្នាក់ដើរចេញពីស្នងការដ្ឋាននគរបាលខេត្តកណ្តាល កាលពី ថ្ងៃទី២០ ខែធ្នូ ឆ្នាំ២០២១។ ខេមបូចា/ បញ្ញា ឆព័ណ្ណ​

ពលរដ្ឋម្នាក់ទៀតនៅឃុំព្រែកស្តី ស្រុកកោះធំ អ្នកស្រី លាងលី ថ្លែងថា បញ្ហាគ្រឿងញៀន​នៅតែមានច្រើនដែលអ្នកប្រើប្រាស់ភាគច្រើនអាយុប្រមាណ៣០ឆ្នាំ។​

អ្នកស្រី លាងលី ឱ្យដឹងថា៖ «គ្រឿងញៀននៅស្រុកកោះធំនេះវាច្រើនទូទៅម៉ងលោកគ្រូខ្លាំង​ម៉ង។​ វានាំគ្នាទៅបឹងណាត់គ្នាជក់ទឹងៗតែម្តងលោកគ្រូ ហើយអ្នកលក់យកទៅលក់នៅក្នុង​បឹង»។​

អ្នកស្រីបង្ហាញការព្រួយបារម្ភពីអនាគតកូនប្រុសស្រីរបស់គាត់ដែលបច្ចុប្បន្នមានអាយុក្រោម២០ឆ្នាំ ដោយខ្លាចថ្ងៃក្រោយត្រូវមិត្តភ័ក្តិអូសទាញឱ្យប្រើប្រាស់គ្រឿងញៀន។​

អ្នកស្រី អំពាវនាវ​សុំឱ្យមន្ត្រីជាន់ខ្ពស់ចុះទៅដល់មូលដ្ឋានឱ្យបានញឹកញាប់ ដើម្បីស្រាវជ្រាវ និងទប់ស្កាត់ករណីនេះឱ្យមានប្រសិទ្ធិភាព។​

អ្នកស្រី លាងលី បន្តថា៖ «ស្នើទៅថ្នាក់លើឱ្យជួយដោះស្រាយក្មេងៗជក់គ្រឿងញៀនហ្នឹង។ ឱ្យពួកគាត់ឧស្សាហ៍ចុះដូចជា មកយាមចឹង។​ បើគាត់អត់ធ្វើដឹងធ្វើឮ ធ្វើប្រងើយៗចឹងក្មេង​វាអត់ខ្លាចទេ»។

ពលរដ្ឋម្នាក់ទៀតនៅក្នុងឃុំព្រែកថ្មី ស្រុកកោះធំ លោក ឆាយ ឱ្យដឹងថា ក្រុមយុវជនដែល​ប្រើប្រាស់គ្រឿងញៀនតែងតែបំផ្លាញដំណាំនៅចំការរបស់លោកនិងចំការអ្នកជិតខាង។​

លោក ឆាយ និយាយថា៖ «ជក់ហើយ មិនមែនគេចំណាយតែគ្នីគ្នាគេទេ គេបំផ្លាញដូចជា កាប់ចេក កាប់ដំណាំអីជាដើម»។​

លោក ឆាយ ឱ្យដឹងថា លោកធ្លាប់យកបញ្ហានេះទៅជជែកជាមួយមេភូមិដែរ ប៉ុន្តែមេភូមិថា មិនដឹងធ្វើយ៉ាងម៉េចព្រោះមិនមានលទ្ធភាពដោះស្រាយ​។​ លោកថា នៅឃុំរបស់លោក​ក៏​ធ្លាប់មានកូនញៀនថ្នាំដេញកាប់ឪពុកម្តាយដែរ។​

ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពលោក យង់ គិមអេង ជំរុញឱ្យ​មន្ត្រីពាក់ព័ន្ធនៅថ្នាក់លើត្រូវចុះស្រាវជ្រាវជួបផ្ទាល់ជាមួយពលរដ្ឋទើបអាចរកឃើញ​បញ្ហាពិត​ហើយអាចដាក់ផែនការដោះស្រាយបាន។​

លោក គិមអេង មានប្រសាសន៍ថា៖ «ពាក្យថា ស្រាវជ្រាវទាល់តែទៅផ្ទាល់ ទៅមើលផ្ទាល់​ទៅសួរប្រជាពលរដ្ឋទៅសួរអ្នកពាក់ព័ន្ធផ្សេងៗទៀតថា វាមានករណីចឹងកើតមានឡើង​មែន​អត់? បញ្ហាគ្រឿងញៀនជាបញ្ហាដ៏រសើបហើយក៏ជាបញ្ហាដែលមានការលើកឡើង​ស្ទើរតែគ្រប់​ទីកន្លែង ហើយក៏ជាបញ្ហាដែលមានកំណត់នៅក្នុងគោលនយោបាយភូមិឃុំមាន​សុវត្ថិភាព​របស់​រដ្ឋាភិបាលដែរ»។​

របាយការណ៍ក្រសួងមហាផ្ទៃបង្ហាញថា រយៈពេល៩ខែឆ្នាំ២០២១ សមត្ថកិច្ចបង្ក្រាប​គ្រឿង​ញៀនបាន ៤៤៦១ករណី ឃាត់ខ្លួនមនុស្សបាន ៩៨២៨នាក់ និងរឹបអូសគ្រឿងញៀន ១០៤៩ គីឡូក្រាម។

ចំណែកព្រឹត្តិការណ៍បង្ក្រាបគ្រឿងញៀនទ្រង់ទ្រាយធំចុងក្រោយដែលមានការចាប់អារម្មណ៍​ខ្លាំង​ពីមហាជននោះគឺនៅក្នុងខែធ្នូឆ្នាំ២០២១នេះ បង្ក្រាបទីតាំងផលិតនិងកែច្នៃ​មួយកន្លែង​នៅក្នុង​ខេត្តកំពង់ស្ពឺ​បណ្តាលឱ្យមនុស្សស្លាប់ម្នាក់ ចាប់បានជាង១០នាក់ និងរឹបអូស​គ្រឿងញៀនបាន២២០១គីឡូ។​

នៅក្នុងរបាយការណ៍របស់អង្គការសហប្រជាជាតិទទួលបន្ទុកបទល្មើសគ្រឿងញៀន និងឧក្រិដ្ឋកម្ម កម្រាស់១២១ទំព័រ ចេញផ្សាយកាលពីខែមិថុនាឆ្នាំ២០២១ បញ្ជាក់ថា កម្ពុជាបានក្លាយជាគោលដៅមួយនៅក្នុងការផលិតគ្រឿងញៀនប្រភេទមេតំហ្វេតាមីន៕

293 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម