សមាគមសម្ព័ន្ធអ្នកសារព័ត៌មានកម្ពុជា

លោកនាយករដ្ឋមន្រ្ដីចេញបញ្ជាឱ្យធ្វើតេស្ដលើមន្រ្ដីរាជការទាំងអស់ បើពាក់ព័ន្ធនឹងគ្រឿងញៀនត្រូវបណ្តេញចេញពីក្រមខណ្ឌ

លោកនាយករដ្ឋមន្រ្ដី ហ៊ុន ម៉ាណែត ពិធីសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់អាជ្ញាធរជាតិប្រយុទ្ធប្រឆាំងគ្រឿងញៀន នៅថ្ងៃទី២០ ខែកុម្ភៈ ឆ្នាំ២០២៤។ (រូបភាព៖ តេឡេក្រាមរបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា)
លោកនាយករដ្ឋមន្រ្ដី ហ៊ុន ម៉ាណែត ពិធីសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់អាជ្ញាធរជាតិប្រយុទ្ធប្រឆាំងគ្រឿងញៀន នៅថ្ងៃទី២០ ខែកុម្ភៈ ឆ្នាំ២០២៤។ (រូបភាព៖ តេឡេក្រាមរបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា)

លោកនាយករដ្ឋមន្រ្ដី ហ៊ុន ម៉ាណែត នៅថ្ងៃទី២០ ខែកុម្ភៈ បញ្ជាឱ្យធ្វើតេស្ដលើ​មន្រ្ដីរាជការ​ទាំង​អស់​​ជុំវិញបញ្ហា​គ្រឿង​ញៀន និងមិនឱ្យមានការវិនិយោគលើការដាំដើម​កញ្ឆាក្នុង​ទឹកដី​កម្ពុជា ខណៈមន្រ្ដីថ្នាក់ជាតិ និងថ្នាក់ក្រោម​ជាតិ​គាំទ្រ និងអនុវត្ដតាមបទ​បញ្ជានោះ។

ក្នុងពិធីសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់អាជ្ញាធរជាតិប្រយុទ្ធប្រឆាំងគ្រឿង​ញៀន និងផ្សព្វផ្សាយយុទ្ធនាការ​ប្រយុទ្ធប្រឆាំងគ្រឿង​ញៀនខុសច្បាប់ លោកនាយករដ្ឋមន្រ្ដី ហ៊ុន ម៉ាណែត បានថ្លែងថា បញ្ហាគ្រឿងញៀនបាន​បង្ក​បញ្ហា​ជា​ច្រើន​ដល់ប្រជាពលរដ្ឋខ្មែរឱ្យមានការព្រួយបារម្ភ ជាពិសេសលោកតម្រូវ​ឱ្យស្ថាប័ន​ពាក់​ព័ន្ធ​ទាំងអស់ត្រូវធ្វើតេស្ដលើគ្រប់មន្រ្ដីរាជការ ដើម្បីធានាថា មន្រ្ដីជាអ្នកអនុវត្ដច្បាប់​មិន​ពាក់​​ព័ន្ធនឹងគ្រឿងញៀន។

លោកបន្ដថា លោកធ្លាប់បានមានប្រសាសន៍នៅលើផេកផ្លូវការរបស់លោកម្ដងរួចទៅហើយ ហើយបញ្ហាគ្រឿងញៀនក៏បានស្ងប់ស្ងាត់ផងដែរ ប៉ុន្ដែពេលនេះបែរជាកក្រើកឡើងវិញ​ និង​ជាបញ្ហាត្រូវដោះស្រាយជាបន្ទាន់។  

លោកថ្លែងថា៖ «ពាក់ព័ន្ធទៅនឹងការបង្រ្កាបគ្រឿងញៀន គឺត្រូវបន្សុទ្ធកម្លាំងរបស់យើង។ ត្រូវ​បោស​សំអាតគ្រឿងញៀនចេញពីកងកម្លាំងប្រដាប់អាវុធ អាហ្នឹងត្រូវតែធ្វើមុនគេ ព្រោះ​អ្នក​អនុវត្ដច្បាប់ត្រូវស្អាតមុនគេ»

លោកនាយករដ្ឋមន្រ្ដីក៍បានលើកឡើងថា សម្រាប់កម្ពុជាមិន​ស្វាគមន៍​​លើ​ការវិនិយោគ​ពាក់ព័ន្ធ​នឹងការដាំដើមកញ្ឆានោះទេ ដោយលោកបានសង្កត់ធ្ងន់ថាកម្ពុជាមិនទទួលបានផលចំណេញ​អ្វីពីការវិនិយោគនេះទេ​ ដូច្នេះលោកមិនតម្រូវឱ្យកម្ពុជាមានការអនុញ្ញាតលើការវិនិយោគ។ លោកបន្ដថា កន្លងមកមានបុគ្គលខ្លះបានមកសួរលោក ជុំវិញការវិនិយោគដាំដើមកញ្ឆា​ដើម្បី​បម្រើ​ឱ្យវិស័យសុខាភិបាលក្នុងការផលិតថ្នាំផ្សេងៗ ប៉ុន្ដែលោកមិនយល់ព្រម​លើការវិនិយោគ​នេះ។

លោកមានប្រសាសន៍ថា៖ «សម្រាប់ខ្ញុំ ដរាបណាហ៊ុន ម៉ាណែតនៅជានាយករដ្ឋមន្រ្ដី ច្បាប់​នេះ​​ខ្ញុំអត់ឯកភាពទេ។ ខ្ញុំជូនសារទៅផង អ្នកដែលចង់វិនិយោគមកពីក្រៅប្រទេស កុំចំណាយ​ពេលជិះយន្ដហោះមកអត់ប្រយោជន៍ទេ មិនបាច់មកទេ»

នៅថ្ងៃទី២០ ខែកុម្ភៈដដែល លោកនាយករដ្ឋមន្រ្ដី ហ៊ុន ម៉ាណែត បានចេញបទបញ្ជាស្ដីពីការ​ដាក់​ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ។

ក្នុងលិខិតបានបញ្ជាក់ថា គ្រោះថ្នាក់ដែលមានបណ្ដាលមកពីឧក្រិដ្ឋគ្រឿងញៀន​នៅតែបន្ដ​រីករាល​ដាលគួរឱ្យព្រួយបារម្ភ​ទាំងក្នុងតំបន់ និងលើពិភពលោក រួមទាំងកម្ពុជាផងដែរ។

លោក ហ៊ុន ម៉ាណែត ថ្លែងក្នុងលិខិតថា៖ «គ្រប់ក្រសួង ស្ថាប័ន និងរដ្ឋបាលថ្នាក់ក្រោមជាតិ ត្រូវបង្កើនការត្រួតពិនិត្យជាប្រចាំចំពោះមន្រ្ដីរាជការស៊ីវិល មន្រ្ដីនគរបាលជាតិ និងយោធិន ព្រមទាំងមន្រ្ដីជាប់កិច្ចសន្យាដែលស្ថិតនៅក្រោមឱវាទរបស់ខ្លួនលើការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿងញៀនខុសច្បាប់»

នៅក្នុងសន្និបាតនោះដែរមានការចូលរួមពីលោក ស សុខា ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ និងលោក នេត សាវឿន ឧបនាយករដ្ឋមន្ត្រី លោក ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌  និងមន្ត្រីជាន់ខ្ពស់ជា​ច្រើននាក់ទៀត។

ចំណែកលោក មាស វិរិទ្ធ អគ្គលេខាធិការនៃអគ្គលេខាធិការដ្ឋានអាជ្ញាធរជាតិ​ប្រយុទ្ធប្រឆាំង​គ្រឿង​​ញៀនបានថ្លែងប្រាប់ ខេមបូចា តាមប្រព័ន្ធតេឡេក្រាមថា ការដាក់ចេញនៅបទបញ្ជា​របស់​​លោកនាយករដ្ឋមន្ត្រី ហ៊ុន ម៉ាណែត ជារឿងត្រឹមត្រូវ ហើយអង្គភាពលោកនឹង​បន្ដ​អនុវត្ដ​ឱ្យបានម៉ឹងម៉ាត់ដើម្បីបង្រ្កាបគ្រឿងញៀននេះ។ លោកបានបន្តថា បទបញ្ជានេះ​គឺវាឆ្លើយតប​នឹងបញ្ហាដែលកម្ពុជាកំពុងតែប្រឈមខ្លាំង ដូច្នេះលោកថា ក្នុងនាមជាមន្រ្ដីរាជការ​ក្រោមការ​ដឹកនាំ​របស់រដ្ឋាភិបាលថ្មីនេះ លោកនឹងខំប្រឹងប្រែងបង្រ្កាបបញ្ហាគ្រឿងញៀនដើម្បីឱ្យ​កម្ពុជា​លែងមានគ្រឿងញៀន។

លោកថ្លែងថា៖ «ការទប់ស្កាត់គ្រឿងញៀនបាន គឺអាចឱ្យសង្គមកម្ពុជាយើង​មិនមានការ​គំរាម​កំហែង និងគ្មានពលរដ្ឋកម្ពុជាក្លាយជាជនរងគ្រោះដោយសារគ្រឿងញៀន​នោះទេ។ ក្នុងនាម​ជាមន្រ្ដីរាជការ​ខិតខំយកចិត្ដទុកដាក់ និងការប្ដេជ្ញាចិត្ដក្នុងការអនុវត្ដនូវវិធានការរបស់​រដ្ឋាភិបាលឱ្យមានប្រសិទ្ធភាព។ ការដាក់បទបញ្ជានេះពិតជាមានសារៈសំខាន់សម្រាប់​សង្គមយើង»

យ៉ាងណាលោកបានបញ្ជាក់ថា ក្នុង​២០២៣​​​នេះ​បរិមាណគ្រឿងញៀនដែលរឹបអូសបាន​មាន​ការ​​ថយ​ចុះជាង២០២២ ប៉ុន្ដែ​ករណី​មាន​ការ​កើនឡើង តែការរឹបអូសគ្រឿងញៀន​មានការថយ​ចុះ។​ លោកបន្ដថា ក្នុងការបង្រ្កាបនេះ គឺ​មាន​ចម្រុះជាតិសាសន៍ ប៉ុន្ដែក្នុងនោះភាគច្រើន​ជាជនជាតិ​ចិន។

លោកមានប្រសាសន៍ទៀតថា តាមរយៈរបាយការណ៍​បូក​សរុប​ការងារ​​បង្រ្កាបបទល្មើស​ចែក​ចាយ និងប្រើប្រាស់​គ្រឿនញៀន​ទូទាំងប្រទេសបង្ហាញ​ថា ក្នុងឆ្នាំ២០២៣ សមត្ថកិច្ចបាន​​​បង្ក្រាប​​ករណី​​គ្រឿងញៀន​ដោយ​រឹប​អូសវត្ថុតាងបាន​ជិត​៣តោន​ ក្នុងចំណោម ៨ ០៦២​ករណី ប៉ុន្ដែករណីធំៗមានចំនួន១០ករណី។

លោកបញ្ជាក់ថា៖ «ករណីចាប់បានមានច្រើន ប៉ុន្ដែបរិមាណគ្រឿងញៀនមានការថយចុះ​ជាង​២០២២។ ករណីធំៗមាន១០ ក្នុងនោះមានមេខ្លោងជនជាតិចិន។ យើងនៅ​បន្ដ​ប្រើ​យុទ្ធសាស្រ្ដ​​ដដែល ប៉ុន្ដែយើងត្រូវពង្រឹងចំណុចណាខ្សោយដើម្បីអាច​បង្រ្កាបញ្ហាគ្រឿងញៀន​ឱ្យបាន។ វាអាស្រ័យ​លើស្ថាប័នពាក់ព័ន្ធទាំងអស់ចូលរួមសហការទើបប្រទេសយើងបានល្អ​ប្រសើរ»។​

លោកបានឱ្យដឹងទៀតថា ករណី​ដែល​ចាប់​បាន​ដូចជា​នៅខេត្ដស្វាយរៀង​កន្លង​មក លោកថា គ្រឿងញៀនបានជាង១តោន ប៉ុន្ដែ​​មេខ្លោង​ត្រូវ​បាន​គេចខ្លួនបាត់។ ការណ៍នេះលោកថា អង្គភាព​​លោក​នឹងបន្ដសហការ​ជាមួយ​​ស្ថាប័ន​ពាក់ព័ន្ធ​​​ដើម្បី​ចាប់មេខ្លោងឱ្យបាន។

លោក អ៊ីន សុង អនុប្រធានមន្ទីរប្រឆាំងគ្រឿងញៀននៃក្រសួងមហាផ្ទៃ និងជាអ្នកនាំ​ពាក្យ​​បានថ្លែងបន្ថែមថា លោកគាំទ្រ និងបន្ដនឹងអនុវត្ដទៅតាមបទបញ្ជារបស់លោកនាយករដ្ឋមន្រ្ដី ហ៊ុន ម៉ាណែត។  លោកបានបន្តថា កន្លងមកបញ្ហាគ្រឿងញៀនបានបង្កបញ្ហាជាច្រើន​ដល់​កម្ពុជា រហូតជនឧក្រិដ្ឋគ្រឿងញៀនបានយកធ្វើជាទីតាំងដើម្បីទៅប្រទេសទី៣។ លោកថា ការបង្រ្កាបគ្រឿងញៀននេះ អង្គភាពបានរឹបអូសបានជាច្រើនតោនតាមតំបន់នានា ដោយ​លោកថា លោកបង្រ្កាបបានឧក្រិដ្ឋជនគ្រឿងញៀនធំៗផងដែរ។

លោកថ្លែងថា៖ «ខ្ញុំគិតថា ល្អ! និងសូមគាំទ្រ។ខ្ញុំនឹងអនុវត្ដតាមបញ្ជាសម្ដេច ហ៊ុន ម៉ាណែត ដើម្បី​ឱ្យប្រទេសយើងក្លាយជាប្រទេសលែងមានបញ្ហាគ្រឿងញៀន»

អាជ្ញាធរកំពុងរៀបចំដុតបំផ្លាញគ្រឿងធាតុញៀនខុសច្បាប់ ក្នុងឱកាសទិវាអន្តរជាតិ​ប្រឆាំង​ការជួញដូរសារធាតុញៀនខុសច្បាប់ ក្នុងរាជធានីភ្នំពេញ។ រូបភាពថតកាលពីថ្ងៃទី២៦ ខែមិថុនា ឆ្នាំ២០១៩។ (ខេមបូចា/ព្រីង សំរាំង)

នៅដើមឆ្នាំ២០២៤សមត្ថកិច្ចប្រយុទ្ធប្រឆាំងគ្រឿងញៀនបានបង្រ្កាបបទលើ្មសគ្រឿងញៀនធំៗពីរសរុបជិត៣តោនដោយនៅព្រឹកថ្ងៃទី២៤ខែមករាកន្លងទៅ នាយកដ្ឋានប្រឆាំងគ្រឿង​បាន​បង្ហាញមុខក្រុមឧក្រិដ្ឋនចំនួន៥នាក់ ជាជនជាតិចិន រួមទាំងគ្រឿងញៀនជាង១តោន​ និង​កង​រាជ​អាវុធហត្ថខេត្តព្រះវិហារបង្ក្រាប និងដកហូតគ្រឿងញៀនបានជាង១តោន កាល​ពីយប់​ថ្ងៃ​ទី២០ ខែមករា ឆ្នាំ២០២៤ អំឡុងឧក្រិដ្ឋជនដឹកតាមរថយន្តប្រភេទម៉ាស្តា​មួយ​គ្រឿង នាំ​ចេញពី​ប្រទេសឡាវ​ឆ្លងកាត់ខេត្តព្រះវិហារ។

បើតាមលោក ម៉ៅ ច័ន្ទមធុរិទ្ធ   ស្នងការនគរបាលខេត្តកំពត បានថ្លែងថា លោកនឹង​អនុវត្ដ​តាម​បញ្ជារបស់លោកនាយករដ្ឋមន្រ្ដី ហ៊ុន ម៉ាណែត ក្នុងការធ្វើតេស្ដ​លើនគរបាលខេត្ដ​របស់​លោក​ដើម្បីឱ្យថាពួកគេមិនបានពាក់ព័ន្ធនឹងគ្រឿងញៀន។ លោកបន្ដថា កន្លងមកលោក​តែងតែ​បង្ក្រាប​ករណីគ្រឿងញៀនក្នុងខេត្ដរបស់លោក ហើយលោកនៅតែបន្ដសកម្មភាព​បង្ក្រាប​គ្រឿង​ញៀន​នេះដដែល ព្រោះបញ្ហាគ្រឿងញៀនបានបង្កភាពវឹកវរជាច្រើនដល់សង្គមនឹង​ធ្វើ​ឱ្យ​​ពលរដ្ឋ​មាន​ការ​ព្រួយបារម្ភ។

លោកបន្ថែមថា៖ «ខ្ញុំគាំទ្រ! ខ្ញុំធ្វើការអនុវត្ដភ្លាមៗលើមន្រ្ដីនគរបាល​ដើម្បីឱ្យដឹងថា​ពួកគាត់​មិនពាក់ព័ន្ធនឹងរឿងគ្រឿងញៀននេះ»

ចំណែកឯលោក ឡេង សុខរុន អធិការស្រុកកណ្ដាលស្ទឹង បានលើកឡើងថា លោកគាំទ្រ និង​អនុវត្ដតាមបទបញ្ជារបស់លោកនាយករដ្ឋមន្រ្ដី។ លោកបន្ដទៀតថា​ ការលុបបំបាត់បញ្ហា​គ្រឿង​​ញៀន គឺជាយុទ្ធសាស្រ្ដដំបូងរបស់លោក ដើម្បីឱ្យតំបន់លោកគ្មានបញ្ហាគ្រឿងញៀន ជាពិសេសការធ្វើតេស្ដគ្រឿងញៀនលើមន្រ្ដីនគរបាលរបស់លោក។

លោកថ្លែងថា៖ «ខ្ញុំគាំទ្រ!។ក្រោយពីចេញបទបញ្ជា ខ្ញុំកំពុងអនុវត្ដលើកូនចៅខ្ញុំទាំងអស់»

ជុំវិញរឿងនេះលោក ប៉ិច ពិសី នាយកប្រតិបត្ដិនៃអង្គការតម្លាភាពកម្ពុជា បានថ្លែងថា ការដាក់​ចេញ​នៅបទបញ្ជារបស់លោកនាយករដ្ឋមន្រ្ដី ហ៊ុន ម៉ាណែត ជារឿងល្អ ហើយលោកគាំទ្រ។ លោកបានពន្យល់ថា ការដាក់ចេញនេះគឺអាចដោះស្រាយបញ្ហាដល់ឫសគល់បញ្ហាតែម្ដង ព្រោះ​កន្លងមកមន្រ្ដីរាជការមួយចំនួនធំបានពាក់ព័ន្ធនឹងបញ្ហាគ្រឿងញៀននេះ។

លោកបានសម្ដែងការសាទរថា៖ «វាជាយុទ្ធសាស្រ្ដល្អមែនទែន ព្រោះយើង​អាចដោះស្រាយ​បញ្ហា​ជាប្រព័ន្ធបាន។ វាអាចលុបបំបាត់មន្រ្ដីជាប់ពាក់ព័ន្ធនឹងបញ្ហាគ្រឿងញៀន ព្រោះមន្រ្ដីខ្លះ​គាត់បានយកតួនាទីទៅប្រកបមុខរបរគ្រឿងញៀន។ ខ្ញុំគាំទ្រសម្រាប់បទបញ្ជានេះ ហើយខ្ញុំ​សប្បាយនឹងយុទ្ធសាស្រ្ដនេះ»

បើតាមការបញ្ជាក់របស់លោក អ៊ីន សុង អនុប្រធានមន្ទីរប្រឆាំងគ្រឿងញៀននៃ ក្រសួង មហាផ្ទៃ និងជាអ្នកនាំ​ពាក្យ បានបញ្ជាក់ពីរបាយការណ៍បញ្ហាគ្រឿងញៀនថា ឆ្នាំ២០២៣​មាន​ការថយ​នៃការរឹបអូសបានគ្រឿងញៀន ក្នុង២០២២បង្ក្រាប ៨ ០៦៣ក្នុងចំណោម ៦ ៣៩០​ករណី​(កើន ១៦៧៣ ករណី) និងឃាត់​ខ្លួន​មនុស្ស ២០ ០០២ក្នុងចំណោម ១៥ ០០២​នាក់(កើន ៥ ០០០​នាក់​)ក្នុងនោះមានស្រី ១ ៣៦៧​នាក់​។ លោកបន្ដថា ឆ្នាំ២០២៣ ចាប់បាន​គ្រឿងញៀន​២តោន​៩៨៨គីឡូក្រាម។ ហើយក្នុង​ឆ្នាំ​២០២២ មាន១៤តោន៩១៩គីឡូក្រាម មាន​ការ​ថយ​ចុះ​១១​តោន៩៣០គីឡូក្រាម​សម្រាប់​ឆ្នាំ​២០២៣។

កាលពីថ្ងៃទី១៨ ខែធ្នូ ឆ្នាំ២០២៣កន្លងទៅ លោក ស សុខា ឧបនាយករដ្ឋមន្ដ្រី រដ្ឋមន្ដ្រី​ក្រសួង​មហាផ្ទៃ បានបញ្ជាឱ្យបណ្ដេញចេញពីក្របខណ្ឌតែម្ដង ចំពោះមន្ដ្រីនគរបាល​រូបណា​ដែល​តេស្ដរកឃើញមានសារធាតុញៀន។ ការដាក់​បទបញ្ជាក្នុងក្របខណ្ឌមន្ដ្រី​នគរបាល​ក្រសួង​មហាផ្ទៃ ពីលោក ស សុខា បានធ្វើឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការ ទីតាំង​មណ្ឌល​សំចតប៉ោយប៉ែត នៅក្រុងប៉ោយប៉ែត ខេត្តបន្ទាយមានជ័យ។

លោក ស សុខា បានព្រមានជាថ្មីម្ដងទៀត ចំពោះជនទាំងឡាយណាដែល​ពាក់ព័ន្ធជាមួយ​បទល្មើសគ្រឿងញៀន សូមដកខ្លួនចេញឱ្យឆ្ងាយ ខណៈអ្នកដែលដឹងថា ខ្លួនមានសារធាតុ​ញៀន ក៏ត្រូវស្វែងរកវិធីសាស្ដ្រដើម្បីផ្ដាច់ចោល៕

469 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម