លោកនាយករដ្ឋមន្ត្រី ហ៊ុន ម៉ាណែត នៅថ្ងៃពុធបានប្រកាសដាក់ឱ្យអនុវត្តកម្មវិធីពិសេសបីចំណុចរួមជាមួយនឹងអត្ថប្រយោជន៍វិនិយោគ ដើម្បីដោះស្រាយសំណង់អគារជាប់គាំងនៅក្នុងខេត្តព្រះសីហនុ ព្រមទាំងទាក់ទាញវិនិយោគិន និងជំរុញសេដ្ឋកិច្ចនៅក្រោយការជាប់គាំងជាច្រើនឆ្នាំ។ កម្មវិធីនេះស្របតាមផែនការប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសពហុគោលបំណង។
ថ្លែងនៅក្នុងពិធីប្រកាសដាក់ឱ្យអនុវត្តកម្មវិធីពិសេសនេះ លោក ហ៊ុន ម៉ាណែត ក៏បានណែនាំឱ្យអភិបាលខេត្តព្រះសីហនុ លោក គួច ចំរើន បិទក្លិបបាញ់កាំភ្លើងទាំងអស់នៅក្នុងខេត្តព្រះសីហនុ ដើម្បីលើកកម្ពស់សន្តិសុខ ។
លោក ហ៊ុន ម៉ាណែត បានប្រកាសដូច្នេះថា៖ «ខ្ញុំបានបញ្ចាក់ជាមួយអភិបាលខេត្តមានកន្លែងបាញ់កាំភ្លើងស៊ីវិលប៉ុន្មាន។ មានពីរកន្លែងដែលបើកឱ្យជនស៊ីវិលចូល ក្នុងនោះរួមទាំងមូលដ្ឋានទ័ពដែរ […] ឥឡូវ ខ្ញុំថា អ្នកទេសចរដែលមកលេងខេត្តព្រះសីហនុមិនចាំបាច់ត្រូវរៀនបាញ់កាំភ្លើងទេ។ ដើរមើលកោះល្អជាង។ ចឹង សូមបិទតែម្តង ហើយមិនឲ្យបើកថ្មីទៀតទេ»។
លោក ហ៊ុន ម៉ាណែត បានលើកឡើងថា មូលដ្ឋានយោធាដែលមានទីតាំងបាញ់កាំភ្លើង នឹងលែងអនុញ្ញាតឱ្យជនស៊ីវិលចូលរៀនបាញ់កាំភ្លើងទៀតហើយ ដោយលោកបន្ថែមថា គេគួរតែទុកឱ្យទាហានរៀនបាញ់កាំភ្លើងវិញប្រសើរជាង ។
លោកបានថ្លែងយ៉ាងដូច្នេះថា៖ «ខ្ញុំបានស្នើឱ្យធ្វើសេចក្ដីព្រាង ស.ជ.ណ មួយសម្រាប់ទូទាំងប្រទេស ឈប់ឲ្យចេញលិខិតអនុញ្ញាតឱ្យបើកទីតាំងបាញ់ស៊ីបថ្មី ពីព្រោះវាមិនចាំបាច់ទេ»។ អ្វីដែលមានស្រាប់ត្រូវធ្វើបច្ចុប្បន្នភាពតើមានលក្ខណៈត្រូវបច្ចេកទេសឬអត់។
យោងតាមលោកនាយករដ្ឋមន្ត្រី ភាពយន្តឯកសាររបស់ BBC ព្រមទាំងការចុះផ្សាយរបស់ប្រព័ន្ធផ្សព្វផ្សាយអន្តរជាតិអំពីប្រតិបត្តិការឆបោកនិងការជួញដូរមនុស្សនៅខេត្តព្រះសីហនុក្នុងរយៈពេលប៉ុន្មានឆ្នាំកន្លងមកនេះ មិនឆ្លុះបញ្ចាំងការពិតជាក់ស្ដែងទេ ប៉ុន្តែ វាបានប៉ះពាល់ដល់មុខមាត់កម្ពុជា ជាពិសេស នៅខេត្តព្រះសហនុ ។
បន្ទាប់ពីនោះមក សហរដ្ឋអាមេរិក និងកាណាដាបានប្រកាសទណ្ឌកម្មមួយឈុតប្រឆាំងនឹងបុគ្គល និងស្ថាប័នមួយចំនួនរបស់កម្ពុជា ។
លោក ហ៊ុន ម៉ាណែត បានលើកឡើងថា វាមិនមែនមានន័យថា នៅកម្ពុជាក៏មិនមែនអត់មានដែរ ដែលថាបញ្ហាអសកម្មឫមួយក៏រឿងចោរលួច ប៉ុន្តែអ្វីដែលបង្ហាញនៅលើកញ្ចក់ទូរទស្សន៍នៅក្រៅប្រទេសវាមិនឆ្លើយតបស្ថានភាពជាក់ស្តែង។
លោកលើកឡើងថា៖ «កម្ពុជាជាប្រទេសគឺជាប្រទេសមួយមានសន្តិសុខនៅគ្រប់តំបន់ទាំងអស់។ ខ្ញុំមិននិយាយថាឱ្យប្រទេសណាមួយនោះទេ ប៉ុន្តែ ប្រទេសខ្លះ ប្រទេសមហាអំណាច [ក៏មានបញ្ហាសន្តិសុខដែរ] […] និយាយរឿងចោរឆក់ច្រើនជាងនៅភ្នំពេញផង»។
លោកបានជំរុញកងកម្លាំងសន្តិសុខនៅក្នុងខេត្តព្រះសីហនុឱ្យ«ចាត់វិធានការបន្ថែម»ដើម្បីរក្សាសណ្ដាប់ធ្នាប់សាធារណៈ និងបង្ក្រាបសកម្មភាពបទល្មើសនានាដើម្បីឱ្យវិនិយោគទុន ក្រុមហ៊ុនឧស្សាហកម្ម និងអ្នកទេសចរចូលមកក្នុងខេត្តនេះ ។
អ្នកនាំពាក្យខេត្តព្រះសីហនុ លោក ឡុង ឌីម៉ង់ បានបដិសេធមិនធ្វើអត្ថាធិប្បាយលម្អិតជុំវិញការបិទទីតាំងបាញ់កាំភ្លើងឯកជន និងទីតាំងបាញ់កាំភ្លើងដែលដំណើរការដោយយោធាឡើយ។
លោកបាននិយាយថា៖ «កន្លែងទីតាំងបាញ់ស៊ីបស៊ីវិលដែលអាជីវកម្មដោយឯកជនមានពីរកន្លែង ប៉ុន្តែ ខ្ញុំមិនអាចនិយាយពីទីតាំងនៅក្នុងមូលដ្ឋានយោធាបានទេ ពីព្រោះទីតាំងរបស់ពួកគេទាក់ព័ន្ធទៅនឹងកិច្ចការងារសន្តិសុខជាតិ»។
មេបញ្ជាការមូលដ្ឋានកងទ័ពជើងទឹក រាម លោក ម៉ី ឌីណា បានបដិសេធមិនផ្ដល់អត្ថាធិប្បាយទេ ។
ស្របពេលជាមួយគ្នានេះ កម្មវិធីពិសេសជំរុញការវិនិយោគ និងគម្រោងធុរកិច្ច នឹងចាប់ផ្ដើមអនុវត្តនៅឆ្នាំនេះ។ កម្មវិធីពិសេសទាំងនោះពាក់ព័ន្ធនឹងអគារដែលជាប់គាំង និងវិស័យផ្សេងៗទៀត ព្រមទាំងការពង្រីកគម្រោងវិនិយោគដែលមានស្រាប់នៅក្នុងខេត្ត។
អគារជាប់គាំងត្រូវបានវិនិយោគិនបរទេសបោះបង់ចោល ដែលភាគច្រើនបំផុតគឺជាជនជាតិចិន ដែលបានចាកចេញពីប្រទេសកម្ពុជានៅក្រោយការហាមឃាត់ល្បែងស៊ីសងអនឡាញ និងក្នុងអំឡុងពេលនៃការផ្ទុះឡើងនូវជំងឺរាតត្បាត។ វិនិយោគិនថ្មីនៃអគារជាប់គាំងនឹងទទួលបានការលើកលែងពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល និងពន្ធអប្បបរមាសម្រាប់រយៈពេល៣ឆ្នាំបន្ថែម សម្រាប់គម្រោងវិនិយោគដែលបំពេញតាមលក្ខខណ្ឌ និង សហគ្រាសធុនតូចនិងមធ្យម (SME) ដែលបានចុះបញ្ជីពន្ធ៕
ប្រែសម្រួលពីអត្ថបទភាសាអង់គ្លេស៖ Special Investment Program Launched in Sihanoukville, Shooting Ranges Ordered Shut
