សមាគមសម្ព័ន្ធអ្នកសារព័ត៌មានកម្ពុជា

សមាជបក្សឆន្ទៈខ្មែរបានជ្រើសតាំងអតីតមន្រ្តីបក្សភ្លើងទៀនជាប្រធាន និងអនុប្រធានបក្ស

សមាជិកថ្នាក់ដឹកនាំគណបក្សឆន្ទៈខ្មែរចូលរួមពិធីសមាជរបស់បក្ស នៅសណ្ឋាគារមួយនៅរាជធានីភ្នំពេញ។ រូបថតនៅថ្ងៃទី ២០ ខែមករា ឆ្នាំ២០២៤។ (រូបភាព៖ ហ្វេសប៊ុកផេកគណបក្សឆន្ទៈខ្មែរ)
សមាជិកថ្នាក់ដឹកនាំគណបក្សឆន្ទៈខ្មែរចូលរួមពិធីសមាជរបស់បក្ស នៅសណ្ឋាគារមួយនៅរាជធានីភ្នំពេញ។ រូបថតនៅថ្ងៃទី ២០ ខែមករា ឆ្នាំ២០២៤។ (រូបភាព៖ ហ្វេសប៊ុកផេកគណបក្សឆន្ទៈខ្មែរ)

គណបក្សឆន្ទៈខ្មែរ កាលពីថ្ងៃសៅរ៍បានរៀបចំសមាជរបស់ខ្លួនដើម្បីជ្រើសរើសថ្នាក់ដឹកនាំថ្មី បន្ទាប់​ពីបក្សប្រឆាំងមួយនេះបានចាប់ផ្ដើម​ធ្វើសកម្មភាពឡើងវិញដោយការចុះបញ្ជីគណបក្ស ​និង​បេក្ខជន​ឈរឈ្មោះបោះឆ្នោតជ្រើសតាំងសមាជិក​ព្រឹទ្ធសភានីតិកាល​ទី៥។

គណបក្សប្រឆាំងចំនួន២ក្នុង «សម្ព័ន្ធភាពឆ្ពោះទៅអនាគត» បានរៀបចំការ​ធ្វើ​សមាជរបស់ខ្លួនដោយជ្រើសរើសថ្នាក់ដឹកនាំបន្ថែម ក្រោយពីមន្រ្តីជាន់ខ្ពស់ជាច្រើនរូប​របស់​បក្សភ្លើងទៀនបានសម្រេចចូលរួមជាមួយបក្សឆន្ទៈខ្មែរដើម្បីអាចឈរឈ្មោះជាបេក្ខជនប្រកួតប្រជែងការបោះឆ្នោតជ្រើសតាំងសមាជិកព្រឹទ្ធសភានៅថ្ងៃទី២៥ ខែកុម្ភៈ ខាងមុខ។

នៅពេលដែលបក្សប្រឆាំងកំពុងរៀបចំក្បាលម៉ាស៊ីនដឹកនាំថ្មី លោក ហ៊ុន សែន ប្រធាន​គណបក្ស​ប្រជាជនកម្ពុជាឯនោះវិញ បានរៀបចំពិធីជួបជុំអង្គបោះឆ្នោតសមាជិកព្រឹទ្ធសភា​របស់​ខ្លួននៅភូមិភាគទី១ រាជធានីភ្នំពេញ និងភូមិភាគទី៣ ខេត្តកណ្ដាល។

ក្នុងពិធីសមាជរបស់បក្សឆន្ទៈខ្មែរ ក៏មានការចូលរួមពីអ្នកនយោបាយមក​ពី​គណបក្សក្រៅនិងក្នុងសម្ព័ន្ធភាពផងដែរ ក្នុងនោះមាន លោក អ៊ូ ចាន់រ័ត្ន អនុប្រធាន​គណបក្ស​កំណែ​ទម្រង់​កម្ពុជា, លោក លី សុធារ៉ាយុទ្ធ អគ្គលេខាគណបក្សភ្លើងទៀន លោក ទាវ វណ្ណុល ប្រធានបក្សភ្លើងទៀន និងលោក សេក សុខា ប្រធានគណៈកម្មាធិការនាយកនៃគណបក្ស ប្រជាធិបតេយ្យមូលដ្ឋាន និងលោក យ៉ែម បុញ្ញឫទ្ធិ អតីតអ្នកនយោបាយមកពី​គណបក្ស​សង្រ្គោះជាតិដែលត្រូវតុលាការរំលាយ។

ជាលទ្ធផល អង្គសមាជរបស់បក្សឆន្ទៈខ្មែរបានសម្រេចជ្រើសរើសថ្នាក់ដឹកនាំចំនួន៩រូប ក្នុង​នោះ​បានតែងតាំង លោក សុក ហាច ជាប្រធានបក្ស ខណៈលោក ហុង សុខហួរ, លោក សុន ឆ័យ និងលោក សេង ម៉ារឌី ជាអនុប្រធាន។ លោក គង់ មុនីកា, លោក អ៊ី មុយលី, លោក យូ ស៊ាងហេង ជាអគ្គលេខាធិការ និងអគ្គលេខាធិការរង។

លោក មាស ខេង ជាអគ្គហេរញ្ញិក និងលោក គឹមសួរ​ ភិរិទ្ធ ជាប្រធានក្រុមប្រឹក្សាវិន័យ និងជាអ្នកនាំពាក្យ​គណបក្សផងដែរ។ អង្គសមាជក៏បានជ្រើសតាំងសមាភាព​សមាជិក​គណៈកម្មាធិការនាយកចំនួន៣២រូប និងកែប្រែនូវប្រកាមួយចំនួននៃលក្ខន្តិកៈ​របស់​គណបក្ស។

អគ្គលេខាធិការគណបក្សឆន្ទៈខ្មែរ លោក គង់ មុនីកា ថ្លែងថា៖«ការធ្វើសមាជថ្ងៃនេះរបស់​គណបក្ស​ឆន្ទៈខ្មែរ​សំដៅលើការរៀបចំឱ្យមានរៀបរយឡើងវិញនូវ​ថ្នាក់ដឹកនាំរបស់គណបក្ស​ឆន្ទៈខ្មែរ យើងដឹងមូលហេតុថា គណបក្សឆន្ទៈខ្មែរកំពុងតែចូលរួមការបោះឆ្នោត​អសកល​ជ្រើសតាំង​សមាជិកព្រឹទ្ធសភាដែលនឹងធ្វើនៅខែកុម្ភៈខាងមុខនេះ»

លោក មុនីកា បន្តថា អង្គសមាជដែលមានសមាជិកចូលរួមជាង១០០នាក់​បានកែប្រែបទបញ្ជា​ផ្ទៃក្នុងមួយចំនួនរបស់គណបក្សដើម្បីងាយ​ស្រួលក្នុងការធ្វើការនៅពេលខាងមុខ ហើយលោក​បន្តទៀតថា ក្នុងឆ្នាំនេះ បក្សឆន្ទៈខ្មែរនឹងរៀបចំការធ្វើសមាជម្ដងទៀត ដោយបន្ថែមនូវ​សមាជិក​ថ្នាក់​ដឹកនាំ ការរៀបចំរចនាសម្ព័ន្ធគណបក្ស និងគោលនយោបាយសម្រាប់អនុវត្ត។

ទន្ទឹមនេះ លោក មុនីកា អំពាវនាវ ឱ្យអង្គបោះឆ្នោតរបស់បក្សភ្លើងទៀនគោរពតាមសេចក្ដីសម្រេចរបស់បក្សភ្លើងទៀនដោយធ្វើការបោះឆ្នោតជូន បក្សឆន្ទៈខ្មែរ សម្រាប់ការបោះឆ្នោតជ្រើសតាំងសមាជិកព្រឹទ្ធសភា។

ជាអ្នកខេត្តបាត់ដំបង សមាជិកបក្សឆន្ទៈខ្មែរមួយរូបអ្នកស្រី សឿន រដ្ឋា អាយុ៣៤ឆ្នាំ និយាយ​ថា ការបោះឆ្នោតជ្រើសរើសអ្នកនយោបាយទាំងនោះឱ្យក្លាយជាថ្នាក់ដឹកនាំ ដោយសារ​អ្នកស្រី​សង្ឃឹមថា អ្នកទាំងនោះនឹងធ្វើនយោបាយឱ្យស្របតាមឆន្ទៈរបស់រាស្រ្តនិងគោរពលទ្ធិ​ប្រជាធិបតេយ្យ។

អ្នកស្រីបញ្ជាក់ថា៖ «ក្នុងពេលនេះយើងលើកដៃអនុវត្តឱ្យចូលរួមបោះឆ្នោតឱ្យពួកគាត់ឡើងជា អគ្គ [លេខាធិការ] ជាប្រធាន ជាលេខា តែបើសិនជាថ្ងៃក្រោយពួកគាត់ធ្វើអ្វី​ដែលមិន​តាម​ឆន្ទៈ​របស់ប្រជាពលរដ្ឋ ឬក៏មិនគោរពសិទ្ធិប្រជាធិបតេយ្យយើងក៏អាចនឹងទាមទារទម្លាក់គាត់​បាន»

សមាជិកថ្នាក់ដឹកនាំគណបក្សភ្លើងទៀន និងគណបក្សឆន្ទៈខ្មែរចូលរួមពិធីសមាជ​របស់​បក្សភ្លើងទៀន នៅទីស្នាក់ការបក្សភ្លើងទៀន នៅរាជធានីភ្នំពេញ។ រូបថតនៅថ្ងៃទី ២១ ខែមករា ឆ្នាំ២០២៤។ (ខេមបូចា/ វ៉ាសុភានុត)

នៅព្រឹកថ្ងៃអាទិត្យនេះ គណបក្សភ្លើងក៏បានរៀបចំសមាជរបស់ខ្លួនដោយបានជ្រើសរើស​បន្ថែម​​នូវ អនុប្រធាន សមាជិក​គណៈអចិន្រ្តៃយ៍ សមាជិកគណៈកម្មាធិការនាយក ជាពិសេស​ការបង្កើតក្រុមប្រឹក្សាវាយតម្លៃនិងវិន័យដើម្បីដោះស្រាយរាល់វិវាទដែលកើតមានក្នុង​គណបក្ស។

ជាក់ស្ដែងកាលពីជាងមួយខែមុន សមាជិក និងសកម្មជនជនគណបក្សភ្លើងទៀនជាង​៤០០នាក់​បានប្រមូលផ្ដុំគ្នាតវ៉ា នៅទីស្នាក់ការបក្សនៅរាជធានីភ្នំពេញ ដោយអំពាវនាវឱ្យ​ប្រធាន​គណបក្សភ្លើងទៀន លោក ទាវ វណ្ណុល និងអគ្គលេខាធិការ លោក លី សុធារ៉ាយុទ្ធ លាលែងពីតំណែង និងបញ្ឈប់ការគំរាមកំហែង ព្រមទាំងការព្យាយាម​ដកហូតមុខតំណែង​របស់សមាជិកដោយគ្មានហេតុផលសមរម្យ និងគោរពសិទ្ធិក្នុងការសម្រេចចិត្ត​ផ្ទាល់​ខ្លួន​របស់សមាជិកបក្ស។

សមាជបក្សភ្លើងទៀនបានជ្រើសរើស លោកស្រី គុណ លំអង និងលោក ជា គឹមលី ជា​អនុប្រធានបក្ស ខណៈលោក​ ជា ប៉ូច ជាអគ្គហេរញ្ញិក និងលោក ហេង សាវឿន ជា​ស្នងការគណនេយ្យ និង​​លោក អែម ចន្ថា ជាប្រធានក្រុមប្រឹក្សាវាយតម្លៃ និងវិន័យ (សមាសភាព​សរុប៥នាក់) និងបន្ថែមសមាជិកគណៈកម្មាធិការអចិន្រ្តៃយ៍ចំនួន៣រូប (សរុប១៣នាក់) និងគណៈកម្មាធិការនាយកចំនួន១៣រូប (សរុប៥៦នាក់)។

អគ្គលេខាធិការបក្សភ្លើងទៀន លោក លី សុធារ៉ាយុទ្ធ មានប្រសាសន៍ថា ការធ្វើសមាជននេះ​ជាការឆ្លើយតបចំពោះការទាមទារពីក្រសួងមហាផ្ទៃឱ្យបញ្ចូលថ្នាក់ដឹកនាំ​បន្ថែមទៀត។ 

​លោកបញ្ជាក់ថា៖«នេះជាការបំពេញបន្ថែមនូវថ្នាក់ដឹកនាំដែលបាន​ចាកចេញពីគណបក្ស​ភ្លើងទៀន​ទៅបំពេញបេសកកម្មនៅក្នុងគណបក្សឆន្ទៈខ្មែរ»

អង្គសមាជដែលបានចូលរួមបោះឆ្នោតជ្រើសតាំងនេះ មានចំនួនជិត១០០នាក់ ជាថ្នាក់ដឹកនាំ​បក្ស​​ភ្លើងទៀន​ប្រចាំរាជធានី-ខេត្ត និងជាសមាជិកគណៈកម្មាធិការនាយក។ អគ្គលេខាធិការ​រូបនេះ ក៏បានអះអាងថា​ បក្សភ្លើងទៀនបន្តស្វាគមន៍​ក្នុងការសហការ​ជាមួយបក្សនយោបាយ​ផ្សេង​ទៀត​ដែលមាននិន្នាការប្រជាធិបតេយ្យដូចគ្នា​ដើម្បីរួបរួមកម្លាំងក្នុងសម្ព័ន្ធភាព​ឆ្ពោះទៅ​អនាគត។

អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា បដិសេធក្នុងការអត្ថាធិប្បាយ​ជុំវិញ​ការ​ធ្វើសមាជរបស់បក្សប្រឆាំង ដោយលោកចាត់ទុកថា ករណីនេះជារឿងផ្ទៃក្នុង​របស់បក្ស​នយោបាយ​ទាំងនោះ។

លោក បញ្ជាក់ថា៖ «និយាយចំរឿងរបស់ពួកគាត់សុទ្ធ​ ចឹងខ្ញុំអត់ចង់លូកទេ អត់ចង់និយាយ​ហ្មង អត់មានពាក់ព័ន្ធ​នឹងយើង មានតែប៉ុណ្ណឹង»

អ្នកវិភាគនយោបាយ លោក ឯម សុវណ្ណរ៉ា យល់ថា ប្រសិនបើមេដឹកនាំបក្សឆន្ទៈខ្មែរអាច​ទទួល​​បានអសនៈនៅព្រឹទ្ធសភានោះ អ្នកនយោបាយបក្សជំទាស់នេះនឹងមានសិទ្ធិពេញ​លេញ​ក្នុងការចុះជួបប្រជាពលរដ្ឋ ជាពិសេសក៏បានផ្ដល់ភាពកក់ក្ដៅដល់សកម្មជន​ដែលធ្វើដំណើរ​តាម​ផងដែរ ដោយសារមានអភ័យឯកសិទ្ធិព្រឹទ្ធសភា។

បន្ថែមពីលើនេះ លោក ថា នេះជាចំណុចចាប់ផ្ដើមរបស់អ្នកនយោបាយក្រៅរដ្ឋាភិបាល ដើម្បី​បណ្ដុះ​សកម្មភាពនយោបាយរបស់ខ្លួនឱ្យបន្តទៅមុខទៀតបាន។

លោកលើកឡើងថា៖ « [បក្សប្រឆាំងបច្ចុប្បន្ន] វាមិនមានកម្លាំងខ្លាំងទេ ប៉ុន្តែវាមានចរន្ត​ចលនា​អ្នកនៅ​ក្រៅបក្សកាន់អំណាច វាមានចរន្តធ្វើបាន ធ្វើនយោបាយបានទៀត។ ប៉ុន្តែបើវាខ្លាំង​ អត់​ខ្លាំង​ទេ ទាល់តែគណបក្សឆន្ទៈខ្មែរហ្នឹងបង្រួមគ្នារវាង[បក្ស]កម្លាំងជាតិ​ចូលគ្នា​ដូច​គណបក្ស​ភ្លើងទៀនតែមួយទើបវាមានកម្លាំងខ្លាំង។

លោកបន្ថែមថា៖ «ប៉ុន្តែបើគណបក្សតូចៗហ្នឹង [បក្សក្នុងសម្ព័ន្ធភាព] គាត់ មានសក្ដានុពល​ទៅ​អូស ទៅដាស់ស្មារតី ទៅកៀរគរប្រជាពលរដ្ឋទៅចូលរួមឱ្យកាន់តែច្រើន មានកម្លាំងខ្លាំង​វិញ អាហ្នឹងក៏ជាកម្លាំងខ្លាំងដែរ»

មួយថ្ងៃបន្ទាប់ពីសមាជ បក្សភ្លើងទៀនបានចេញសេចក្ដីថ្លែងការណ៍មួយ ដោយសម្ដែងនូវ​ក្ដី​ព្រួយបារម្ភនិងការខកចិត្តចំពោះការរាំងស្ទះក្នុងការផ្លាស់ប្ដូរសមាជិកក្រុមប្រឹក្សាឃុំសង្កាត់ជាប់ឆ្នោតមកពីគណបក្សភ្លើងទៀន។

គណបក្សប្រឆាំងនេះ ទទូចឱ្យរដ្ឋបាលថ្នាក់ក្រោមជាតិ និងក្រសួងមហាផ្ទៃ ពន្លឿនការផ្លាស់ប្ដូរ​សមាជិក​ក្រុមប្រឹក្សាឃុំសង្កាត់ដែលជាអង្គបោះឆ្នោតរបស់បក្សភ្លើងទៀន តាមការស្នើសុំពី​គណបក្ស​​ឱ្យបានទាន់ពេលវេលាដើម្បីធានាថា ការបោះឆ្នោតព្រឹទ្ធសភា និង ក្រុមប្រឹក្សា​រាជធានី ខេត្ត និងក្រុង ស្រុក ខណ្ឌ នៅឆ្នាំ២០២៤នេះ ប្រព្រឹត្តទៅដោយសេរីនិងយុត្តិធម៌៕

909 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម