សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋមានវិវាទដីធ្លីមិនទាន់ជឿជាក់ថា អាជ្ញាធររបស់រដ្ឋាភិបាលថ្មីនឹងផ្តល់យុត្តិធម៌ដល់ពួកគាត់

ប្រជាសហគមន៍បឹងតាមោក ប្រមូលផ្តុំគ្នានៅក្បែរអេស្កាវ៉ាទ័រ បន្ទាប់ពីការតវ៉ាប្រឆាំងនឹងការកាយដីសម្រាប់ទុកបង្ហូរទឹកកខ្វក់ចូលកន្លែងនេសាទក្រោយផ្ទះពួកគាត់ កាលពីថ្ងៃទី៧ ខែវិច្ឆិកា ឆ្នាំ២០២៣។ (ខេមបូចា /សុវណ្ណ ស្រីពេជ្រ)
ប្រជាសហគមន៍បឹងតាមោក ប្រមូលផ្តុំគ្នានៅក្បែរអេស្កាវ៉ាទ័រ បន្ទាប់ពីការតវ៉ាប្រឆាំងនឹងការកាយដីសម្រាប់ទុកបង្ហូរទឹកកខ្វក់ចូលកន្លែងនេសាទក្រោយផ្ទះពួកគាត់ កាលពីថ្ងៃទី៧ ខែវិច្ឆិកា ឆ្នាំ២០២៣។ (ខេមបូចា /សុវណ្ណ ស្រីពេជ្រ)

ពល​រដ្ឋ​មកពីសហគមន៍មួយចំនួនដែលមានវិវាទដីធ្លីមិនមានសុទិដ្ឋិនិយមចំពោះអាជ្ញាធរ​ដោះ​ស្រាយ​វិវាទក្រៅប្រព័ន្ធ​តុលាការដែល​ទើប​បង្កើត​ថ្មីរបស់រដ្ឋាភិបាលនោះទេ។ លោក​នាយក​រដ្ឋមន្ត្រី ហ៊ុន ម៉ាណែត បានប្រកាសកាលពីខែមុនថា ស្ថាប័នរដ្ឋាភិបាលនេះ អាចដោះស្រាយ​រឿង​ក្តី​រដ្ឋប្បវេណីបានលឿនជាងតុលាការកម្ពុជា ប៉ុន្តែអ្នកមាន​វិវាទដីធ្លីមិន​សូវ​ទុកចិត្ត​ចំពោះ​ប្រព័ន្ធ​ដែលអនុវត្ត​ដោយអាជ្ញាធរ​មូលដ្ឋានដែលពួកគាត់​មិនទុកចិត្តរួចហើយនោះ​។

អ្នកស្រី ស៊ា​ ដាវី ពលរដ្ឋ​នៅ​ភូមិ​សំរោង​ត្បូង ក្នុង​រាជធានី​ភ្នំពេញ មិន​មាន​ទំនុក​ចិត្ត​​ថា អាជ្ញាធរ​ថ្មី​នឹង​អាច​ដោះស្រាយ​វិវាទ​ដីធ្លី​ក្នុង​សហគមន៍​ប្រកប​ដោយ​ប្រសិទ្ធភាព​នោះ​ទេ។ សន្តិសុខ​​ខណ្ឌ ​បានរឹតត្បិត​សហគមន៍របស់អ្នក​ស្រីមិន​ឲ្យ​នេសាទ និងបេះ​បន្លែនៅ​តំបន់​មួយចំនួន​ក្នុង​បឹង​​តាមោក។ អ្នកស្រី​បន្ត​ថា មន្ត្រី​ក៏​បាន​បំផ្លាញ​មង​របស់​ពួក​គាត់​ផង​​ដែរ។ បច្ចុប្បន្ន សកម្មជន​ក្នុង​​មូលដ្ឋាន​កំពុង​ប្រឈម​នឹង​ការ​ចោទ​ប្រ​កាន់​​ បន្ទាប់​ពី​មាន​ការ​ប៉ះ​ទង្គិច​ជាមួយ​អាជ្ញាធរ​ខណ្ឌ។

អ្នក​ស្រី ស៊ា ដាវី បាន​និយាយថា៖ «ប្រព័ន្ធថ្មីនេះអនុញ្ញាតឱ្យអាជ្ញាធរមូលដ្ឋានដោះស្រាយ [វិវាទ​]។ ប៉ុន្តែ​សម្រាប់​សហគមន៍​ខ្ញុំ តើ​អាជ្ញាធរ​មូលដ្ឋាន​អាច​ផ្តល់​ដំ​ណោះស្រាយ​ដល់​យើង​ដោយ​របៀប​ណា​ បើ​​អាជ្ញាធរសង្កាត់​ និង​ខណ្ឌ​គឺ​​ជា​អ្នក​ធ្វើ​បាប​យើង?»

ទីស្តីការគណៈរដ្ឋមន្ត្រីបានអនុម័តទាំងស្រុងលើសេចក្តីព្រាងព្រះរាជក្រឹត្យបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការកាលពីខែមុន ហើយព្រះមហាក្សត្រ​នរោត្តម សីហមុនី បាន​ឡាយព្រះហស្តលេខាលើព្រះរាជក្រឹត្យកាលពីថ្ងៃទី២ ខែវិច្ឆិកា។

លោក​នាយក​រដ្ឋមន្ត្រី ហ៊ុន ម៉ាណែត បាន​ប្រកាស​បង្កើត​អាជ្ញាធរ​ថ្មី​នេះ ​នៅ​ថ្ងៃ​ទី​៣០ ខែ​តុលា ក្នុង​ពេល​លោកថ្លែង​សុន្ទរកថា​នៅ​ខេត្ត​កំពង់ស្ពឺ។ លោកមាន​ប្រ​សា​សន៍​ថា អាជ្ញាធរនឹងធ្វើការ​ដើម្បី​ដោះស្រាយ «វិវាទរដ្ឋប្បវេណី» «វិវាទពាណិជ្ជកម្ម» និង«វិវាទផ្សេងទៀត»តាមរយៈ​ការ​សម្រុះ​សម្រួលផ្សះផ្សា ហើយកិច្ចព្រមព្រៀងដែលបានធ្វើឡើងតាមរយៈដំណើរ​ការដោះ​ស្រាយ​​នេះ នឹងត្រូវបានចាត់ទុកថាជាដំណោះ​ស្រាយ​ស្ថាពរ​។

លោក​មាន​ប្រសាសន៍ថា៖ «ខ្ញុំសុំបញ្ជាក់ថាការបង្កើតយន្តការនេះ មិនមែនយន្តការបង្ខំ​បងប្អូន​ឱ្យទៅទេ ពេលមានវិវាទបងប្អូនអាចមានជម្រើសដែលមានស្រាប់ ទៅតុលាការ រកចាស់ទុំ ឬ​នរណាឱ្យជួយដោះស្រាយ ឬមួយពឹងផ្អែកទៅលើអាជ្ញាធរថ្មីនេះ អត់បង្ខំទេ ជាជម្រើសរបស់​បងប្អូន»។

នាយក​រដ្ឋមន្ត្រី​បាន​មាន​ប្រសាសន៍​​ថា អាជ្ញាធរ​ថ្មី​នេះ នឹង​ជួយ​កាត់​បន្ថយ​ការ​កកស្ទះ​សំណុំ​រឿង​​​នៅ​តាម​​តុលាការ។ ប៉ុន្តែ​អ្នកស្រី​ អ៊ុំ សុភី តំណាង​សហគមន៍​ឡពាង មិន​​គិត​ថា អាជ្ញាធរ​ថ្មី​នេះ​នឹង​មាន​ភាព​ខុស​ប្លែក​ពី​ប្រព័ន្ធ​តុលាការ​នោះ​ទេ ដោយ​និយាយ​ថា ស្ថាប័ន​ទាំង​ពីរ​គឺ «ដូច​ឪពុក​កូន» ។ សកម្មជនដីធ្លីរូបនេះ ត្រូវបាន​កាត់ទោសពីបទញុះញង់កាល​ពី​ឆ្នាំ២០២០ ប៉ុន្តែ​ត្រូវបានព្យួរទោស​។

អ្នកស្រី​បាន​និយាយ​ថា ​អ្នកស្រី​បាន​ដាក់​បណ្តឹង​រដ្ឋប្បវេណី​ជាច្រើនមកហើយ​​ទៅ​តុលាការ និង​ទីស្តីការ​គណៈរដ្ឋមន្ត្រី​តាំងពី​ឆ្នាំ២០១២ ទាក់ទង​នឹង​វិវាទ​ដីធ្លី​ដ៏​រ៉ាំរ៉ៃ​ក្នុង​ខេត្ត​កំពង់ឆ្នាំង ប៉ុន្តែ​មិន​ទទួល​បាន​ដំណោះស្រាយ​ដែល​គួរ​ឲ្យ​ពេញ​ចិត្ត​ពី​កិច្ច​ខិតខំ​ប្រឹងប្រែង​ទាំង​នេះទេ​។

អ្នកស្រី អ៊ុំ​ សុភី ជា​សកម្មជនដីធ្លី និងអ្នកភូមិផ្សេងទៀតមកពីសហគមន៍ឡ​ពាងដាក់ញត្តិទៅ​ក្រសួងមហាផ្ទៃ ដើម្បីឲ្យ​អនុម័តដាក់​បឹងពោធិ៍ជាតំបន់ការ​ពារ​។ រូបថត​នៅ​ថ្ងៃទី១០ ខែកញ្ញា ឆ្នាំ២០២១។ (ខេមបូចា/ ព្រីង សំរាំ​ង)

អ្នក​ស្រី​បន្ត​ថា កន្លង​មក មន្ត្រី​ជាន់​ខ្ពស់​ជឿ​តែ​អ្វី​ដែល​អាជ្ញាធរ​ថ្នាក់​ក្រោម​ប្រាប់​គាត់​តែប៉ុណ្ណោះ ​អំពី​ជម្លោះ​ដីធ្លី​រវាង​សមាជិក​សហគមន៍​របស់​អ្នកស្រី​ និង​ក្រុមហ៊ុន​កសិឧស្សាហកម្ម KDC។

អ្នកស្រីបាននិយាយថា៖ «គាត់ជឿតែអាជ្ញាធរថ្នាក់ក្រោមប្រាប់ អត់ព្រមចុះមកដល់កន្លែង​ទំនាស់​ផ្ទាល់តែម្ដង ជឿតែអ្នកក្រោមបញ្ចូនរបាយការណ៍ទៅ។ ខ្ញុំថា បើសង្គមយើងបច្ចុប្បន្ន​នេះ​នៅតែមានការដឹកនាំបែបនេះដដែល ពួកយើងនៅតែវេទនាដដែលហ្នឹង។ ហើយដំណោះ​ស្រាយរបស់ពួកយើងវានៅតែមើលផ្លូវពុំឃើញ និយាយរួមទៅពន្លឺភ្លើងយុត្តិធម៌វាដូចជា​នៅ​ឆ្ងាយ​មែនទែនសម្រាប់ពួកខ្ញុំ»

ជំនួសឲ្យការ​បង្កើត​អាជ្ញាធរដោះស្រាយវិវាទ​ថ្មីនេះ​ អ្នកស្រី​ អ៊ុំ​ សុភី ចង់​ឃើញ​លោក ហ៊ុន ម៉ាណែត ផ្តោតការយក​ចិត្ត​ទុកដាក់​លើការផ្លាស់ប្តូរ​អាជ្ញាធរមូលដ្ឋាន ដែលខកខានមិន​បាន​ផ្តល់​ដំណោះស្រាយជូនប្រជាពលរដ្ឋនាពេលកន្លងមក។

អ្នកស្រី សុភី បាន​និយាយ​ថា៖ «ពួកខ្ញុំអត់ចង់រស់នៅក្នុងសភាពរ៉ាំរ៉ៃបែបនេះទេ ព្រោះថា​ជីវភាព​ពួកយើងហ្នឹងគឺក្រីក្រទៅៗ ដោយសារតែការអូសបន្លាយពេល​នៃការដោះស្រាយ​ហ្នឹងគឺវាយូរឆ្នាំពេក»

អ្នកស្រី ផាវ ញឿង តំណាងសហគមន៍១៧៥ក្នុងខេត្តកោះកុង មានប្រសាសន៍ថា អ្នក​ស្រីមិន​មាន​ជំនឿ​ច្រើនទេថា អាជ្ញាធរថ្មីនេះនឹងផ្តល់ដំណោះស្រាយដល់សហគមន៍របស់អ្នកស្រី​ បើ​ផ្អែកលើបទពិសោធន៍កន្លងមកជាមួយអាជ្ញាធរមូលដ្ឋាន​។ កាល​ពី​ខែ​មិថុនា អ្នកស្រី ផាវ ញើង ​ត្រូវ​បាន​មន្ត្រី​ខេត្ត​កោះកុង​ចាប់​ឃុំ​ខ្លួន ​ខណៈ​កំពុង​ព្យាយាម​ដាក់​​ញត្តិ​តស៊ូ​មតិ ​ដើម្បី​សិទ្ធិ​ដីធ្លី​ក្នុង​មូលដ្ឋាន​។

អ្នកស្រី​និយាយថា៖ «ពេល​យើង​បាត់​បង់​ដីរបស់​យើង​ ហើយ​ទៅ​ដាក់​ញត្តិ [មន្ត្រី​មូលដ្ឋាន] មិន​ព្យាយាម​ជួយ​យើង​ក្នុង​រឿង​វិវាទ​ដីធ្លី​ទេ។ គេ​ចោទ​យើង​ពី​បទ​ញុះ​ញង់ គេ​ចោទ​យើង​ប្រើ​​អំពើ​ហិង្សា គេ​ចោទ​យើង​ថា ​រំលោភ​យក​ដី​អ្នក​ដទៃ»

អ្នក​ភូមិ​មក​ពី​ខេត្ត​កោះកុង ប្រមូល​ផ្តុំ​គ្នា​នៅ​មុខ​ក្រសួង​មហាផ្ទៃ ក្នុង​រាជធានី​ភ្នំពេញ ដើម្បី​ស្វែង​រក​កិច្ច​អន្តរាគមន៍​ក្នុង​ជម្លោះ​ដីធ្លី​ជាមួយ​លោក ហេង ហ៊ុយ។ រូបថតថ្ងៃទី ២៨ ខែមីនា ឆ្នាំ ២០២២។ (ខេមបូចា/ ព្រីង សំរាំ​ង)

លោក អំ សំអាត នាយកប្រតិបត្តិ​អង្គការ​ លីកាដូ បាន​មាន​ប្រសាសន៍​ថា មួយ​ផ្នែក​នៃ​មូល​ហេតុ ​ដែល​តុលាការ​កម្ពុជា​មាន​ការកក​ស្ទះ​សំណុំ​រឿងដ៏​ច្រើន​បែប​នេះ គឺ​ដោយសារ​ប្រជាពលរដ្ឋ​មិន​ចង់​ប្រើ​ដំណើរការ​សម្រុះសម្រួល​ដែល​មាន​ស្រាប់​។

លោក​បាន​មាន​ប្រសាសន៍​ថា៖«កន្លងមកដោយសារតែភាពជឿទុកចិត្ត គាត់មិនសូវមាន​ជំនឿ​ទុកចិត្តទៅលើការសម្របសម្រួលរបស់អាជ្ញាធរមូលដ្ឋាន ដែលវាបណ្ដាលឱ្យគាត់ជ្រើសរើស​យកផ្លូវតុលាការ»។

លោកបានបន្ថែមថា រដ្ឋាភិបាលគួរតែជំរាប​ជូន​សាធារណជន​ឲ្យ​បាន​ច្បាស់​លាស់​​ជាងនេះ ជុំវិញ​​បញ្ហាដែលអាចនិងមិនអាចដោះស្រាយបាននៅក្រៅប្រព័ន្ធ​តុលាការ ហើយត្រូវប្រាកដ​ថា អ្នកទទួលខុសត្រូវអនុវត្តប្រព័ន្ធថ្មីនេះ មានជំនាញ និងត្រូវ​បាន​បណ្តុះបណ្តាលក្នុងក្រប​ខ័ណ្ឌ​ច្បាប់។

លោក ស៊ឹង សែនករុណា មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុក មាន​ប្រសាសន៍ថា មន្ត្រីដែលមានសមត្ថកិច្ចថ្មីត្រូវតែហ៊ានរកយុត្តិធម៌ជូនជនរងគ្រោះ​ដោយ​មិន​​ខ្លាចអ្នក​មានទ្រព្យសម្បត្តិ និងអ្នកមានអំណាច ប្រសិនបើពួកគេចង់បានការជឿ​ទុកចិត្ត​ពី​សាធារណជន។

លោកមានប្រសាសន៍ថា៖ «បើសិនការបង្កើតឡើងហ្នឹងគ្រាន់ឱ្យតែមានឈ្មោះ ហើយបញ្ហា​ទាំង​ឡាយ​ដែលកើតមានឡើងពាក់ព័ន្ធនឹងអ្នកមានអំណាច បក្ខពួកនិយមអ្វីទាំងអស់ហ្នឹង ធ្វើ​កិច្ចការងារដោយគ្មានភាពយុត្តិធម៌ វាមិនខុសពីការរិះគន់របស់ប្រជាពលរដ្ឋនោះទេ គឺអាច​ថា​នៅតែដដែលហ្នឹ»

បើតាមលោក ប៉ែន បូណា ​អ្នកនាំពាក្យ​រដ្ឋាភិបាលបាន​ឲ្យ​ដឹងថា ប្រព័ន្ធ​ថ្មី​នេះ​នឹង​ដោះស្រាយ​បញ្ហា​រដ្ឋប្បវេណី​នានា រួមទាំង​ជម្លោះ​ដែល​កំពុង​កើតមាន​ដូចជា​ជម្លោះដីធ្លី​ជាដើម។

លោកមាន​ប្រសាសន៍ថា៖ «ខ្ញុំប្រាប់ហើយថា រឿងអ្វីក៏ដោយឱ្យតែបងប្អូនយើងគាត់មានវិវាទ គាត់​ត្រូវការសម្របសម្រួលដោះស្រាយនោះគាត់អាចប្រើប្រាស់យន្តការហ្នឹងបាន»

លោក ប៉ែន បូណា មាន​ប្រសាសន៍​ថា រដ្ឋាភិបាលគ្រោងនឹងផ្សព្វផ្សាយការយល់ដឹង​អំពី​នីតិ​វិធី​នៃប្រព័ន្ធ​ថ្មីនេះ​ និងរបៀបដាក់ញត្តិជាមួយមន្ត្រីមូលដ្ឋាន នៅពេលដែលអាជ្ញាធរចាប់ផ្តើម​ដំណើរ​ការ ប៉ុន្តែបានអះអាង​ថា ផែនការទាំងនោះកំពុង​ដំណើរការនៅឡើយ៕

ប្រែសម្រួលពីអត្ថបទភាសាអង់គ្លេស៖ Land Disputants Doubtful That New Government Authority Will Bring Justice

237 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម