ប្រជាពលរដ្ឋដែលមានបញ្ហាដីធ្លីនៅព្រលានយន្តហោះថ្មីបានតវ៉ាសុំឱ្យមានការដោះស្រាយពីអាជ្ញាធរស្រុកកណ្តាលស្ទឹងកាលពីថ្ងៃទី២៩សីហា ដោយសារអាជ្ញាធរមានការសន្យាថាក្រោយការបោះឆ្នោតនឹងមានការដោះស្រាយជូនពួកគាត់ ប៉ុន្តែមកដល់ពេលនេះមិនទាន់ទទួលបានដំណោះស្រាយនៅឡើយ។
អ្នកស្រី រុន សុភា ជាកសិករ បានឱ្យដឹងថា មានតំណាងពលរដ្ឋជាង១៣០គ្រួសារក្នុងចំណោម៤១៤គ្រួសារ បានទៅតវ៉ានៅសាលាស្រុកកណ្តាលស្ទឹងសុំការដោះស្រាយដីដែលប៉ះពាល់នៅតំបន់ព្រលានយន្តហោះភ្នំពេញថ្មី ស្ថិតនៅភូមិអំពៅព្រៃ ឃុំអំពៅព្រៃ ស្រុកកណ្តាលស្ទឹង ខេត្តកណ្តាល ។
អ្នកស្រី សុភា និយាយថា មូលហេតុដែលអ្នកស្រីទៅតវ៉ានេះគឺដោយសារកាលពីថ្ងៃអាទិត្យមានគ្រឿងចក្រចំនួន៦គ្រឿងធ្វើការឈូសឆាយដីដែលជាចំណែករបស់អ្នកស្រី និងពលរដ្ឋផ្សេងទៀត នៅពេលអ្នកស្រី និងពលរដ្ឋផ្សេងទៀទៅមើលដល់ទីតាំងដីនោះ មានចម្ងាយជាង ២គីឡូម៉ែត្រពីផ្ទះអ្នកស្រី ប៉ុន្តែត្រូវបានសន្តិសុខព្រលានយន្តហោះយាមកាមតឹងតែងមិនឱ្យពលរដ្ឋចូលនោះទេ។
អ្នកស្រីឱ្យដឹងថា មួយសន្ទុះក្រោយមក សន្តិសុខព្រលានបានទាក់ទង់ទៅកាន់អភិបាលស្រុកកណ្តាលស្ទឹង និងមានការឆ្លើយតបថាពលរដ្ឋអាចទៅជួបអភិបាលស្រុកនៅព្រឹកថ្ងៃអង្គារបាន អ្នកស្រីថា ពលរដ្ឋបានយល់ព្រមទៅតាមការឆ្លើយតបរបស់អាជ្ញាធរ ប៉ុន្តែនៅព្រឹកថ្ងៃអង្គារ ពលរដ្ឋបានទៅជួបជុំតែមិនបានជួបលោកអភិបាលស្រុកនោះទេ។
អ្នកស្រីបន្តថា ព្រោះមានការពន្យាពេលទៅម៉ោង២វិញ តែរហូតដល់ល្ងាចវេលាម៉ោង៤ រសៀលទើបពលរដ្ឋបានចូលជួប ដោយសារអាកាសធាតុក្តៅផង និងអ្នកខ្លះរវល់ផងក៏មានពលរដ្ឋមួយចំនួនបានត្រឡប់ទៅផ្ទះវិញខ្លះ។
អ្នកស្រី សុភា បន្ថែមថា ក្រោយមកពលរដ្ឋដែលនៅត្រូវបានហៅចូលទៅជួបជជែកពីបញ្ហាដីរបស់ពួកគេប្រមាណកន្លះម៉ោង ហើយអាជ្ញាធរបានសន្យាសាជាថ្មីទៀតថានឹងដោះស្រាយជូនពលរដ្ឋ និងបានសុំពន្យាពេលពលរដ្ឋដើម្បីសិក្សាពីដីដែលប៉ះពាល់ទាំងអស់នោះបន្ថែមសិន ហើយលោកមិនបានបញ្ជាក់ពីពេលវេលាជាក់លាក់នោះទេ។
ពលរដ្ឋម្នាក់ទៀត អ្នកស្រី មាស លាប អាយុ៥៧ឆ្នាំ បានលើកឡើងថា អ្នកស្រីចង់បានដំណោះស្រាយឱ្យបានឆាប់ដោយសារការដោះស្រាយដីធ្លីនេះបន្តអូសបន្លាយអស់រយៈពេលជិត៤ឆ្នាំមកហើយ។
អ្នកស្រី លាប លើកឡើងថា៖ «ខ្ញុំខំប្រឹងអស់លទ្ធភាពហើយ។ ស្នើសុំតាំងពីអាជ្ញាធរថ្នាក់មូលដ្ឋានរហូតដល់ថ្នាក់លើហើយតែមិនមានការសន្យាជាក់លាក់ណាមួយឱ្យពួកខ្ញុំមានទំនុកចិត្តនោះទេ ពន្យាពេលរហូត។ តើឆាប់ៗនេះហ្នឹងពេលណា?»។
អ្នកស្រី លាប បន្តថា ពលរដ្ឋប្រៀបបានជាកូនជាចៅរបស់ថ្នាក់ដឹកនាំ មានតែលោកដែលជាអាណាព្យាបាលទេដែលអាចដោះស្រាយជូនកូនចៅបាន។
អ្នកស្រីបន្ថែមថា៖ «ខ្ញុំសំណូមពរឱ្យថ្នាក់ដឹកនាំ និងអ្នកជំនាញ ផ្តោតការយកចិត្តទុកដាក់ ជាពិសេសលោកនាយករដ្ឋមន្រ្តីថ្មីសូមជួយរកដំណោះស្រាយនូវទុក្ខលំបាករបស់ពលរដ្ឋឱ្យបានសមរម្យផង»។
លោក អ៊ូច សៅវឿន អភិបាលស្រុកកណ្តាលស្ទឹង មានប្រសាសន៍ថា ការប្រជុំកាលពីល្ងាចថ្ងៃអង្គារកន្លងទៅនេះ គឺឱ្យពួកគាត់បង្ហាញទីតាំងជាក់លាក់របស់គាត់ដោយសារអ្នកខ្លះមិនមានឯកសារមកបង្ហាញនោះទេ។
លោក សៅវឿន បញ្ជាក់ថា៖ «យើងទទួលស្គាល់ថាដីរបស់ពួកគាត់ពិតជាប៉ះពាល់ពិតមែន»។
លោកបន្តថា កិច្ចការនេះត្រូវការពេលសម្រាប់ឱ្យអ្នកជំនាញជួយសិក្សាបន្ថែម ថាដីពួកគាត់ណាខ្លះជាប់ពាក់ពន្ធ័និងប្រមូលទិន្នយ័ស្រាវជ្រាវ។
លោកអភិបាលស្រុកថា៖ «ខ្ញុំមិនទាន់អាចថាយ៉ាងណានោះទេគឺចាំទទួលលទ្ធផលពីអ្នកជំនាញនៅសប្តាហ៍ក្រោយថាអាចនឹងដោះស្រាយយ៉ាងណាបន្តទៀត»។
លោក ជីវ កុកសាយ តំណាងអ្នកទទួលខុសត្រូវទិញដីសម្រាប់គម្រោងព្រលានយន្តហោះថ្មីប្រាប់ខេមបូចាកាលពីល្ងាចថ្ងៃពុធនេះថា គ្រួសារដែលមិនទាន់ទទួលយកសំណងដែលក្រុមហ៊ុនផ្តល់ជូនមានប្រមាណតែ 8% ទៀតប៉ុណ្ណោះនៃផ្ទៃដីប៉ះពាល់សរុបទាំងលំនៅដ្ឋាន និងដីស្រែចំនួន២៦០០ហិកតា។ ហើយនៅពេលសួរថានៅសល់ប៉ុន្មានគ្រួសារទៀត លោកបដិសេធថា៖ «ខ្ញុំមិនអាចឆ្លើយបានទេ ដោយសារក្តោបព័ត៌មានមិនជុំព្រោះគ្រួសារច្រើនពេក ប្រាប់បានតែចំនួនភាគរយ»។
លោក កុកសាយ បន្តថា ករណីដីដែលប៉ះពាល់នៅឃុំអំពៅព្រៃនេះគឺបានដោះស្រាយកន្លងមកជិតអស់ហើយនៅសល់តិចតួចណាស់ដែលមិនទាន់ព្រមទទួលយកសំណង។
លោកបន្ថែមថា៖ «ខ្ញុំមិនគាំទ្រទេដែលមានមតិសាធារណៈលើកឡើងថាខាងសន្តិសុខព្រលានមានការគំរាមកំហែងទៅកាន់ពលរដ្ឋសម្រាប់ពេលកន្លងមកនេះ»។
ប្រជាពលរដ្ឋជាង៣០០គ្រួសារផ្សេងទៀត នៅស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ បានរងផលប៉ះពាល់រួចហើយ ដោយសារគម្រោងសាងសង់ព្រលានយន្តហោះថ្មីតម្លៃ១,៥ពាន់លានដុល្លារ ដែលវិនិយោគដោយក្រុមហ៊ុន OCIC របស់ឧកញ៉ា ពុង ឃាវសែ។
បើតាមតំណាងសហគមន៍ លោក ភោគ ផាន់នី បានឱ្យដឹងថា ពលរដ្ឋ៤១៤គ្រួសារមានតំណាងជាង១៣០គ្រួសារទៅចាំជួបអភិបាលស្រុកនៅព្រឹកថ្ងៃអង្គារ ដើម្បីសុំការជួយដោះស្រាយបញ្ហាដីដែលប៉ះពាល់ចំនួន ៨៣ ហិកតា ស្ថិតនៅឃុំអំពៅព្រៃ ស្រុកកណ្តាលស្ទឹង ខេត្តកណ្តាល។
លោក ផាន់នី លើកឡើងថា ពលរដ្ឋរងគ្រោះដែលប៉ះពាល់ដីធ្លីទាំងនោះ ពន្យាពេលយូឆ្នាំមកហើយតែមិនទាន់មានការដោះនៅឡើយទេ ស្របពេលដែលពលរដ្ឋកាន់តែមានបញ្ហាប្រឈមនិងខ្វះខាតជីវភាពខ្លាំង ដោយសាពួកគេគ្មានដីសម្រាប់អាស្រយ័ផលដូចពីមុន និងបាត់បង់ដីស្រែមិនទាន់បានសំណង និង ខ្លះគ្មានការងារធ្វើ រួមទាំងទំនិញលើងថ្លៃ និងពិបាករកកាងារធ្វើក្នុងស្ថានភាពវិបត្តិសេដ្ឋកិច្ចសកល។
លោកបន្តថា៖ «ខ្ញុំសង្ឃឹមថាថ្នាក់ដឹកនាំពាក់ពន្ធ័ទាំងអស់ជួយរកដំណោះស្រាយជូនពលរដ្ឋដែលប៉ះពាល់ដីរបស់ពួកគាត់ទាំងនៅឃុំអំពៅព្រៃនិងឃុំផ្សេងទៀតឱ្យបានសមរម្យ និងពន្លឿនការដោះស្រាយព្រោះពលរដ្ឋប្រឈមនិងបញ្ហាខ្លាំង និងខាតពេលវេលាជាយូមកហើយ»។
យោងតាមលិខិតរបស់ក្រសួងមហាផ្ទៃ នៅថ្ងៃទី៥ ខែកក្កដា ឆ្នាំ២០២៣ ដីដែលមាន២ទីតាំង ទីតាំងទី១មានទំហំសរុប៨៣ហិកតា ស្ថិតនៅខាងកើតជាប់ទំនប់៩២ និងទីតាំងទី២ មានទំហំ ២៣ហិកតា ស្ថិតនៅតំបន់បឹងបាច ខាងលិចទំនប់៩៤ ខាងត្បូងទំនប់អ៊ីប៉ាកជាប្រភេទដីស្រែប្រាំងបណ្តេញទឹក។
ក្នុងលិខិតដដែលនោះ ក្រសួងស្នើអភិបាលខេត្ត ដោះស្រាយបញ្ហាទាំងនេះដោយផ្អែកលើគោលការណ៍ច្បាប់។
លោក អំ សំអាត នាយកចាត់ការទូទៅនៃអង្គការ លីកាដូ មានប្រសាសន៍ថា វាជារឿងចាំបាច់ណាស់ដែលអាជ្ញាធរអ្នកពាក់ព័ន្ធនិងក្រុមហ៊ុន គួរតែស្វែងរកដំណោះស្រាយដើម្បីបញ្ចប់បញ្ហានេះប្រកបដោយតម្លាភាព និងឱ្យបានឆាប់រហ័ស។ លោកបន្តថា មិនគួរទុកវាឱ្យបន្តអូសបន្លាយទៀតនោះទេ។
លោកថ្លែងថា៖ «ព្រោះរយៈពេលជិត៤ឆ្នាំមកហើយ តែការដោះស្រាយនៅមិនទាន់ដាច់ស្រេចនៅឡើយ ការអភិវឌ្ឍជារឿងល្អសម្រាប់ពលរដ្ឋ ប៉ុន្តែការតវ៉ាដែលពន្យាពេលយូរនិងមានការគំរាមគំហែងនេះវាមិនមែនជារូបភាពល្អនោះទេ»។
លោក សំអាត បន្ថែមថា៖ «វាប៉ះពាល់ដល់សិទ្ធិរស់នៅរបស់ពលរដ្ឋ ហើយបញ្ហានេះវាបានផ្តល់ផលប៉ះខ្លាំងដល់ជីវភាពប្រជាពលរដ្ឋ ដែលពួកគាត់ត្រូវខាតពេលវេលា ថវិការក្នុងការទាមទារដំណោះស្រាយ ខណៈពេលដែលត្រូវគិតគូរពីជីវភាពគ្រួសារផង និងត្រូវគិតខ្វាយខ្វល់ពីបញ្ហាដីធ្លីរបស់ពួកគរដែលមិនទាក់មានការដោះស្រាយឱ្យបានសមរម្យនៅឡើយ»៕
