ខេត្តព្រះសីហនុ៖ អាជ្ញាធរក្រុងកោះរ៉ុង បានឱ្យដឹងថា ការងារចុះបញ្ជីដីធ្លីជាលក្ខណៈប្រព័ន្ធ ឈានទៅផ្តល់ប្លង់កម្មសិទ្ធិស្របច្បាប់ ជូនប្រជាពលរដ្ឋរស់នៅលើកោះរ៉ុងមានចំនួន២១០ក្បាលដី គឺក្រុមការងារជំនាញស្ថាប័នពាក់ព័ន្ធ បានបិទបញ្ចប់ជាស្ថាពរហើយនៅចុងខែមេសា ឆ្នាំ២០២៣។
អភិបាលរងក្រុងកោះរ៉ុង លោក ជា ពិសិដ្ឋនរ ទទួលបន្ទុកការងារចុះស្រង់ស្ថិតិ និងចុះបញ្ជីផ្តល់ប្លង់កម្មសិទ្ធិជាលក្ខណៈប្រព័ន្ធជូនប្រជាពលរដ្ឋនៅសង្កាត់កោះរ៉ុងសន្លឹម បានឱ្យខេមបូចា ដឹងនៅថ្ងៃទី២៦ ខែមេសានេះថា ការងារចុះបញ្ជីធ្វើប្លង់កម្មសិទ្ធិជូនពលរដ្ឋដែលមានដី ឬរស់នៅអចិន្ត្រៃយ៍ នៅលើសង្កាត់កោះរ៉ុងសន្លឹម គឺមានដំណើរការដោយរលូន។
លោកបន្តថា ចំពោះការងារចុះបញ្ជីដីធ្លីជាលក្ខណៈប្រព័ន្ធជូនប្រជាពលរដ្ឋ រស់នៅលើសង្កាត់កោះរ៉ុង ដែលមានលេខក្បាលដីចំនួន២១០ក្បាលដី គឺបានបិទបញ្ចប់ជាស្ថាពរហើយ នៅរសៀលថ្ងៃទី២៦ ខែមេសា ឆ្នាំ២០២៣នេះ។
លោកអភិបាលរងក្រុងកោះរ៉ុងលើកឡើងទៀតថា ប្រជាពលរដ្ឋ ដែលមានដី ឬរស់នៅក្នុងទីតាំងដី ដែលគ្រប់គ្រងដោយរដ្ឋាភិបាល និងទីតាំងដីដែលរដ្ឋាភិបាលបានផ្តល់សិទ្ធិវិនិយោគជូនក្រុមហ៊ុនវិនិយោគចំនួន៣នោះ គឺក្រុមការងារជំនាញបានដោះស្រាយរួចហើយ។
លោកបន្តថា ពលរដ្ឋដែលមានដីប៉ះពាល់ជាមួយក្រុមហ៊ុនទាំងបីនោះ គឺក្រុមហ៊ុន Koh Rong Sanleom Island Resort គឺមានចំនួន៣៦៦ក្បាលដី។ រីឯប្រជាពលរដ្ឋរស់នៅក្នុងទីតាំងវិនិយោគរបស់ក្រុមហ៊ុន Emario Shonan Marine និង ក្រុមហ៊ុន U Properties management សរុបមានចំនួន២០៥ក្បាលដី គឺបានដោះស្រាយ បែកចែកសំណងក្បាលដីជូនពួកគាត់ចប់សព្វគ្រប់ហើយដែរ។
លោក ពិសិដ្ឋ ថ្លែងថា សម្រាប់ប្រជាពលរដ្ឋមួយចំនួនដែលបានមកទិញដី និងរស់នៅប្រកបមុខរបរក្នុងមូលដ្ឋានសង្កាត់កោះរ៉ុងសន្លឹម ដែលមិនមានឈ្មោះក្នុងបញ្ជីទទួលបានចំណែកក្បាលដី ដែលអាជ្ញាធរបែងចែកជូន គឺពលរដ្ឋទាំងនោះទើបមកទិញដី ឬសង់ផ្ទះរស់នៅក្រោយឆ្នាំ២០១៨ទេ។ លោកបន្ថែមថា រាល់ការទិញលក់ដី របស់ពលរដ្ឋតៗគ្នា នៅលើសង្កាត់កោះរ៉ុងសន្លឹមទាំងនោះ គឺធ្វើឡើងដោយខុសច្បាប់ នៅលើទីតាំងដីរបស់រដ្ឋគ្រប់តែប៉ុណ្ណោះ។ ដូច្នេះ អាជ្ញាធរមិនមានគោលការដោះស្រាយសំណង ឬបែងចែកក្បាលដីជូនពលរដ្ឋទាំងអស់នោះទេ។
យ៉ាងនេះក្តី ប្រជាពលរដ្ឋមួយចំនួនបានបង្ហាញការសោកស្តាយ នៅពេលអាជ្ញាធរក្រសួងស្ថាប័នពាក់ព័ន្ធ ជាពិសេសរដ្ឋបាលខេត្តព្រះសីហនុ បានតម្រូវឱ្យពួកគាត់ចាកចេញពីដីដែលធ្លាប់រស់នៅ និងប្រកបមុខរបរចិញ្ចឹមជីវិតច្រើនឆ្នាំ ដើម្បីផ្តល់ដីជូនក្រុមហ៊ុនវិនិយោគ ខណៈរូបគាត់ បានមករស់នៅក្នុងមូលដ្ឋានសង្កាត់កោះរ៉ុងសន្លឹម មុនមានវត្តមានក្រុមហ៊ុនទៅទៀត។
ស្ត្រីឈ្មោះ ប៉ូលីន ស្ថិតក្នុងចំណោមពលរដ្ឋច្រើនទៀត មានលំនៅឋានបច្ចុប្បន្ន រស់នៅក្រុងព្រះសីហនុ និងតាមខេត្តមួយចំនួនទៀត ដែលបានទិញដីនៅក្នុងមូលដ្ឋានសង្កាត់កោះរ៉ុងសន្លឹម ក្រុងកោះរ៉ុង បាននិយាយរៀបរាប់ទាំងអួលដើមក មកកាន់អ្នកយកព័ត៌មានថា៖ «កាលពីឆ្នាំ២០១៩ រូបគាត់បានចំណាយលុយជាង១ម៉ឺនដុល្លារអាមេរិក ដើម្បីទិញដី៣កន្លែងទុកសម្រាប់សង់លំនៅឋាន និងប្រកបអាជីវកម្ម នៅថ្ងៃអនាគត់។ ប៉ុន្តែបែរជាពេលនេះ ទីតាំងដីដែលពួកគាត់ បានទិញនោះ ត្រូវបានអាជ្ញាធរមកអះអាងថា ស្ថិតក្នុងទីតាំងដីក្រុមហ៊ុនវិនិយោគ និងដីឧទ្យានជាតិជាដើម ដោយមិនបានផ្តល់សំណងដីធ្លី នៅតំបន់ផ្សេងជូនទេ»។
ទោះយ៉ាងណា ស្ត្រីដែលណែនាំខ្លួនឯងថា ជាស្ត្រីម៉េម៉ាយរូបនេះ ថ្លែងទាំងទឹកភ្នែករលីងរលោងថា រូបគាត់មិនហ៊ានតវ៉ាជាមួយអាជ្ញាធរទេ ព្រោះអាចជាកំហុស របស់គាត់ ដែលទៅទិញដីខុសច្បាប់ប៉ះចំទីតាំងដីដែលរដ្ឋបានហាមឃាត់ ឬបម្រុងទុក។ ហើយម្យ៉ាង កន្លងមក រូបគាត់ ក៏មិនបានដឹងថា អាជ្ញាធរបានចុះស្រង់ស្ថិតិស្រង់ទិន្នន័យ អ្នកមានក្បាលដី នៅលើសង្កាត់កោះរ៉ុងសន្លឹមនេះដែរ ព្រោះមិនទទួលបានព័ត៌មានទាល់តែសោះ ទើបរូបគាត់មិនបានទៅចុះឈ្មោះ ឲ្យបានទាន់ពេលវេលា។
ស្ត្រីរូបនេះចាត់ទុកសកម្មភាពចុះស្រង់ស្ថិតិរបស់អាជ្ញាធរខេត្តព្រះសីហនុ ក៏ដូចជាអាជ្ញាធរពាក់ព័ន្ធ ថា៖ «ធ្វើឡើងមានភាពអាថ៌កំបាំង ឬមិនបានផ្សព្វផ្សាយឱ្យបានទូលំទូលាយជូនប្រជាពលរដ្ឋ នោះទេ ពោលគឺធ្វើឡើងស្ងាត់ៗតែប៉ុណ្ណោះ»។
ពលរដ្ឋម្នាក់ក្នុងចំណោមពលរដ្ឋជាង១០នាក់ដែលមិនទទួលបានសំណង សុំមិនបញ្ចេញឈ្មោះដោយប្រារម្ភពីសុវត្ថិភាពផ្ទាល់ខ្លួន បានលើកឡើងថា៖ «អាជ្ញាធរខេត្តព្រះសីហនុបានបង្ខំឱ្យពួកគាត់រុះរើផ្ទះ ឬសំណង់អគារ ដែលធ្លាប់រស់នៅ និងប្រកបអាជីវកម្មជាច្រើនឆ្នាំមកហើយនោះ ដើម្បីប្រគល់ដីជូនក្រុមហ៊ុនវិនិយោគចំនួន ៣ ដើម្បីអភិវឌ្ឍន៍វិស័យទេសចរណ៍។ ហើយបង្ខំឱ្យពួកគាត់ទទួលយកដីមានទំហំតូច នៅទីតាំងផ្សេង ដែលឆ្ងាយពីឆ្នេរសមុទ្រមិនអាចប្រកបមុខរបរចិញ្ចឹមជីវិតបានទេ»។
កាលពីថ្ងៃទី២៤ ខែមេសា នាឆ្នេរកោះរ៉ុងសន្លឹម ក្រុមប្រជាពលរដ្ឋ ដែលមានលំនៅឋាន ឬដីធ្លីស្ថិតក្នុងទីតាំងដីសម្បទានវិនិយោគរបស់ក្រុមហ៊ុន ហើយមិនមានឈ្មោះក្នុងបញ្ជីទទួលបានដីពីអាជ្ញាធរ បានចាត់ទុកការបង្ខំឱ្យពួកគាត់ចាកចេញពីលំនៅឋាន និងទីតាំងប្រកបអាជីវកម្មយូរឆ្នាំពីអាជ្ញាធររដ្ឋបាលខេត្តព្រះសីហនុដើម្បីប្រគល់ដីជូនក្រុមហ៊ុនវិនិយោគថាជារឿងអយុត្តិធម៌ពួកគាត់។
ពលរដ្ឋម្នាក់នោះបានបញ្ជាក់ទៀតថា៖ «ជារឿងអយុត្តិធម៌បំផុតនៅក្នុងសង្គមកម្ពុជាបច្ចុប្បន្ន។ ខណៈការបង្ខំពលរដ្ឋឱ្យចាកចេញពីលំនៅឋាន គឺពួកគាត់ធ្លាប់តែជួប និងបានឆ្លងកាត់តែនៅក្នុងរបបប្រល័យពូជសាសន៍ប៉ុលពត ឬរបបអាវខ្មៅ ខ្មែរក្រហម ៣ឆ្នាំ ៨ខែ និង២០ថ្ងៃ ដែលរបបនេះ បានកន្លងហួសរាប់សិបឆ្នាំមកហើយនោះ»។
ក្រុមពលរដ្ឋមិនទទួលបានសំណងអះអាងថា ទីតាំងដែលពួកគាត់បានមកសង់លំនៅឋាន រស់នៅ និងប្រកបមុខរបរក្នុងសង្កាត់កោះរ៉ុងសន្លឹមនេះ គឺមានអ្នកខ្លះមិនក្រោមពី១០ឆ្នាំទៅ២០ឆ្នាំនោះទេ។ ហើយក៏មានពលរដ្ឋខ្លះទើបមកទិញដីសង់ផ្ទះរស់នៅ និងហ៊ុំព័ទ្ធរបងទុកចោល ដោយមិនមានក្រុមហ៊ុនវិនិយោគណាមួយបង្ហាញវត្តមាន នៅមូលដ្ឋាននេះឡើយ។
ពលរដ្ឋទាំងនោះបន្តថា ពេលពួកគាត់មកអភិវឌ្ឍបានប្រែក្លាយតំបន់ឆ្នេរ២៣ តំបន់ឆ្នេរកោះរ៉ុងសន្លឹម និងឆ្នេរផ្សេងៗទៀត មានសោភណ្ឌភាព ឈានដល់អាចទាក់ទាញកំណើនភ្ញៀវទេសចរជាតិ-អន្តរជាតិ ឱ្យធ្វើដំណើរមកកម្សាន្ត មូលដ្ឋាននេះច្រើនកុះករជាបន្តបន្ទាប់ ក៏ស្រាប់តែឃើញ អាជ្ញាធរខេត្តខេត្តព្រះសីហនុ បានមកតម្រូវ ឬបង្ខំពួកគាត់ឱ្យរុះរើសំណង់នានា ដែលសង់រស់នៅ និងធ្លាប់ប្រកបអាជីវកម្មរួមមាន ផ្ទះសំណាក់ បឹងកាឡូ ភោជនីយដ្ឋាន លំនៅឋាន និងទីតាំងកម្សាន្តផ្សេងៗទៀត ដើម្បីប្រគល់ដីជូនក្រុមហ៊ុនវិនិយោគទៅវិញ?។
យ៉ាងណាក៏ដោយចុះ ក្រុមប្រជាពលរដ្ឋរងគ្រោះបានសំណូមពរដល់ថ្នាក់ដឹកនាំក្រសួងស្ថាប័នពាក់ព័ន្ធដូចជា ក្រសួងដែនដី នគរូបនីយកម្ម និងសំណង់ និងថ្នាក់ដឹកនាំរដ្ឋបាលខេត្តព្រះសីហនុ ជាពិសេសលោកនាយករដ្ឋមន្ត្រី ហ៊ុន សែន ជួយពិនិត្យពិចារណាផ្តល់ដីមួយចំណែកណាមួយជូនពួកគាត់ ដើម្បីសង់លំនៅឋានរស់នៅ ក៏ដូចជាទុកសម្រាប់ប្រកបអាជីវកម្មទៅថ្ងៃខាងមុខ។ ព្រោះពួកគាត់បានចំណាយថវិកា ដើម្បីទិញដីនៅតំបន់កោះរ៉ុងសន្លឹមនេះ បានខាតបង់ប្រាក់អស់រាប់ម៉ឺនដុល្លារ។
ពលរដ្ឋរងគ្រោះម្នាក់ទៀតដែលសុំមិនបញ្ចេញឈ្មោះដោយប្រារម្ភពីសុវត្ថិភាព បានរៀបរាប់ទាំងអួលដើមកថា លុយដែលគាត់បានសន្សំទុកយូរឆ្នាំ គឺត្រូវខាតបង់ទៅលើការទិញដីក្នុងសង្កាត់កោះរ៉ុងសន្លឹម។ ពលរដ្ឋរូបនេះបន្តថា គាត់បានចំណាយលុយអស់ជាង១ម៉ឺន៥ពាន់ដុល្លារអាមេរិកកាលពីឆ្នាំ២០១៧ ដើម្បីទិញដីចំនួនពីរប្លង់ពីពលរដ្ឋម្នាក់រស់នៅសង្កាត់កោះរ៉ុង មានទំហំផ្ទៃដី៤២០ម៉ែត្រការ៉េ ប៉ុន្តែពេលនេះ ដីដែលគាត់បានទិញបម្រុងទុកសម្រាប់សង់ផ្ទះ និងធ្វើអាជីវកម្មនៅថ្ងៃអនាគតនោះ គឺត្រូវអាជ្ញាធរដកហូតយក។ ហើយអាជ្ញាធរចាត់ទុកការទិញដូរដីរបស់គាត់ធ្វើឡើងខុសច្បាប់ ឬការទិញពីជនអណាធិបតេយ្យ នៅលើដីរដ្ឋគ្រប់គ្រងដោយមិនមានការទទួលស្គាល់ ឫឯកសារត្រឹមត្រូវពីអាជ្ញាធរទេ។
ពលរដ្ឋរូបនេះ ថ្លែងទាំងអស់សង្ឃឹមថា៖ «ដោយសារតែរូបគាត់ មិនចង់មានបញ្ហាអ្វីវែងឆ្ងាយ ជាមួយអាជ្ញាធរ ហើយម្យ៉ាងដីដែលគាត់ទៅទិញនោះ ត្រូវបានអាជ្ញាធរចាត់ទុកជាទីតាំងអណាធិបតេយ្យ ផងនោះ រូបគាត់មិនហ៊ានតវ៉ានោះទេ គឺបានត្រឹមសោកស្តាយលុយដែលបានសន្សំទុកយូរឆ្នាំត្រូវបានរលាយខាតបង់អស់»។
យ៉ាងនេះក្តី បច្ចុប្បន្ននេះ ប្រជាពលរដ្ឋភាគច្រើន បានព្រមចាកចេញពីទីតាំងធ្លាប់រស់នៅ និងប្រកបអាជីវកម្មចេញពីទីតាំងអភិវឌ្ឍន៍របស់ក្រុមហ៊ុនទៅកាន់ទីតាំងផ្សេង ដែលអាជ្ញាធរត្រៀមចេញប្លង់កម្មសិទ្ធិស្របច្បាប់អស់ហើយ។ ទោះទំហំដីដែលអាជ្ញាធរ បែងចែកជូននោះ មានទំហំតូចជាងទំហំផ្ទៃដី ដែលពួកគាត់មាន ហើយនៅឆ្ងាយពីឆ្នេរសមុទ្រមិនអាចប្រកបអាជីវកម្មបានបែបណាក្តី។
ទាក់ទិនបញ្ហានេះ លោក ប៊ួន ណារិទ្ធ ជាពលរដ្ឋម្នាក់ មានលំនៅដ្ឋានអចិន្ត្រៃយ៍ នៅទីក្រុងព្រះសីហនុ ដែលបានទៅទិញដី និងសង់ផ្ទះនៅក្នុងមូលដ្ឋានសង្កាត់កោះរ៉ុងសន្លឹម បានបង្ហាញភាពរីករាយ និងថ្លែងអំណរគុណដល់រដ្ឋបាលខេត្តព្រះសីហនុ ដែលបានចែកដីជូនគាត់មួយឡូ នៅទីតាំងផ្សេងនៃទីតាំងដីដែលរូបលោកកាន់កាប់ ទោះបីរូបគាត់មិនទាន់ដឹងថា ដីដែលរដ្ឋបាលខេត្តបែងចែកឱ្យនោះ មានទំហំផ្ទៃដីចំនួនប៉ុន្មានក្តី។
លោកឱ្យដឹងថា យ៉ាងណា រូបលោក និងភរិយា មានការសប្បាយចិត្ត ចំពោះការរកដំណោះស្រាយរបស់រដ្ឋបាលខេត្តព្រះសីហនុ ដែលដឹកនាំដោយ លោក អ៊ី សុខឡេង អភិបាលរងខេត្តព្រះសីហនុ និងក្រុមការងា។ ខណៈទីតាំងដីរបស់គាត់ដែលបានទិញពីពលរដ្ឋរស់នៅលើកោះរ៉ុងសន្លឹមនោះ គឺជាដីស្ថិតក្រោមការគ្រប់គ្រងរបស់រដ្ឋ។
ចំណែក លោក សែ រស្មី ក៏ជាប្រជាពលរដ្ឋម្នាក់ទៀត មានទីលំនៅក្នុងក្រុងព្រះសីហនុ ហើយបានទៅទិញដីសង់ផ្ទះនៅលើសង្កាត់កោះរ៉ុងសន្លឹមដែរ។ លោកគាំទ្រចំពោះការរកដំណោះស្រាយដីធ្លីជូនប្រជាពលរដ្ឋដែលអាជ្ញាធរតម្រូវឱ្យចាកចេញពីដីដែលរដ្ឋគ្រប់គ្រង និងដីដែល ស្ថិតក្នុងទីតាំងរបស់ក្រុហ៊ុនវិនិយោគ។
លោក សែ រស្មី បន្តថា គាត់ព្រមទទួលយកចំណែកដី ដែលអាជ្ញាធររៀបចំបែងចែកជូននៅទីតាំងផ្សេង ទោះទីតាំងនោះមានទំហំតូចជាងផ្ទៃដីរបស់គាត់ ដែលបានកាន់កាប់ ឬអាស្រ័យផលបែបណាក្តី។
លោកបន្ថែមថា គាត់បានទទួលលេខក្បាលដីរួចហើយ ដោយរង់ចាំតែអាជ្ញាធរក្រសួងមន្ទីរស្ថាប័នពាក់ព័ន្ធបិទបញ្ជីឈ្មោះ ដើម្បីពិនិត្យផ្ទៀងផ្ទាត់ឈានទៅចែកបណ្ណកម្មសិទ្ធិតែប៉ុណ្ណោះ។
ទាក់ទិនបញ្ហានេះ លោក ឈឺន ចន្ថា ចៅសង្កាត់កោះរ៉ុងសន្លឹម បានបញ្ជាក់យ៉ាងខ្លីថា សង្កាត់កោះរ៉ុងសន្លឹម មានតែមួយភូមិទេ គឺភូមិកោះរ៉ុងសន្លឹម ដោយចែកជាពីរតំបន់ គឺតំបន់ឆ្នេរ២៣ ឬភូមិ២៣ និងឆ្នេរកោះរ៉ុងសន្លឹម។ លោកបន្តថា មូលដ្ឋាននេះ មានអត្រាប្រជាជនរស់នៅអចិន្ត្រៃយ៍សរុបចំនួន២៣៨គ្រួសា និងមានចំនួនពលរដ្ឋ៧៨៩នាក់ ហើយពលរដ្ឋមានអាយុចាប់ពី១៨ឆ្នាំឡើងទៅមានចំនួន៥២០នាក់ស្រី២៤៣នាក់។
ដោយឡែក លោក អ៊ី សុខឡេង អភិបាលរងខេត្តព្រះសីហនុ ទទួលបន្ទុករួមលើការងារចុះស្រង់ស្ថិតិដីធ្លី ដែលរងផលប៉ះពាល់ពីគម្រោងវិនិយោគរបស់ក្រុមហ៊ុន នៅលើសង្កាត់កោះរ៉ុងសន្លឹម មានប្រសាសន៍ថា សម្រាប់ពលរដ្ឋទាំងឡាយណាដែលបានសហការចុះឈ្មោះបំពេញទិន្នន័យ ឬបង្ហាញឯកសារពាក់ព័ន្ធស្របច្បាប់ ជាមួយក្រុមការងារចុះស្រង់ស្ថិតិ ដែលដី ឬផ្ទះរបស់ពួកគាត់សង់នៅលើទីតាំងដីវិនិយោគរបស់ក្រុមហ៊ុន ឬដីរដ្ឋគ្រប់គ្រងកាលពីដើមឆ្នាំ២០២៣នេះ គឺមានឈ្មោះក្នុងបញ្ជីទទួលបានចំណែកក្បាលដី ដែលអាជ្ញាធរចែកជូន និងផ្តល់ប្លង់កម្មសិទ្ធិឆាប់ៗនេះ។
លោកបន្ថែមថា សម្រាប់ពលរដ្ឋ ដែលទើបកាន់ឯកសារទិញលក់ដី ដែលមិនមានអាជ្ញាធរទទួលស្គាល់ មកជួបជាមួយ អាជ្ញាធរចុងក្រោយនេះ គឺមិនមានឈ្មោះទទួលបានចំណែកក្បាលដីនោះទេ គឺយឺតពេលហើយ ព្រោះបញ្ជីឈ្មោះត្រូវបានអាជ្ញាធរខេត្តផ្ញើជូនទៅក្រសួងស្ថាប័នថ្នាក់ជាតិ រួចអស់ហើយៗ រង់ចាំតែថ្ងៃចេញប្លង់កម្មសិទ្ធិជូនប្រជាពលរដ្ឋតែប៉ុណ្ណោះ។
ទាក់ទិនបញ្ហានេះដែរ លោកស្រី ជាប សុធារី អ្នកសម្របសម្រួលសមាគមអាដហុក ប្រចាំខេត្តព្រះសីហនុ បានស្នើដល់អាជ្ញាធរគួរបន្តពិនិត្យទៅលើឯកសារនៃការកាន់កាប់ឯកសារទាក់ទងការផ្ទេរសិទ្ធិ ឬក៏ការទិញលក់របស់ពលរដ្ឋដែលរងផលប៉ះពាល់ជាបន្តទៀត។ ព្រោះពលរដ្ឋមួយចំនួនដែលមិនសូវមានជីវភាពធូរធារ គឺពួកគាត់មានបំណងផ្លាស់ប្តូរទីលំនៅ ឬចង់ទៅប្រកបមុខរបរនៅលើសង្កាត់កោះរ៉ុងដែរ ព្រោះ ពេលបច្ចុប្បន្ននេះ នៅលើសង្កាត់កោះរ៉ុង គឺជាទីតាំងងាយរកប្រភពចំណូល ដែលទទួលបានពីវិស័យទេសចរណ៍។
អ្នកឃ្លាំមើលសង្គមរូបនេះ ស្នើឱ្យអាជ្ញាធរមេត្តាផ្តល់នូវភាពយុត្តិធម៌សម្រាប់ពលរដ្ឋដែលរងផលប៉ះពាល់ឱ្យបានទាំងអស់គ្នា។ ហើយការផ្តល់យុត្តិធម៌នេះ គឺមានតែអាជ្ញាធរខេត្តព្រះសីហនុ និងមន្ត្រីជំនាញផ្នែកសុរិយោដីទេ ដែលអាចជួយពិនិត្យលើឯកសារ និងសម្របសម្រួលបញ្ហាដីធ្លីជូនប្រជាពលរដ្ឋ ព្រោះថាយោងតាមរដ្ឋធម្មនុញ្ញនៃព្រះរាជាណាចក្រកម្ពុជា បានចែងថា ដីធ្លីទាំងអស់នៅក្នុងប្រទេសកម្ពុជា គឺអ្នកមានសិទ្ធិកាន់កាប់ប្រើប្រាស់ គឺជាប្រជាពលរដ្ឋខ្មែរ និងមានសញ្ជាតិជាខ្មែរ។
លោកស្រី សុធារី បន្តទៀតថា៖ «តាមដឹង ក្រុមហ៊ុនដែលទទួលបានសិទ្ធិវិនិយោគ នៅលើកោះរ៉ុងសន្លឹមខាងលើនេះ ក៏សុទ្ធតែជាក្រុមហ៊ុនមានអត្តសញ្ញាណជាក្រុមហ៊ុនរបស់ខ្មែរយើងដែរ។ អញ្ចឹងសម្រាប់ប្រជាពលរដ្ឋដែលពួកគាត់បានចូលទៅរស់នៅទីតាំងនេះ តាំងពីមុនមានការអភិវឌ្ឍន៍របស់ក្រុមហ៊ុន គឺពួកគាត់ក៏មានសិទ្ធិអាស្រ័យផល និងប្រើប្រាស់ដីរបស់ព្រះរាជាណាចក្រកម្ពុជា ដូចគ្នាក្រុមហ៊ុនអភិវឌ្ឍន៍ដែរ»។
លោកស្រីបន្ថែមថា ក្នុងនាមសង្គមស៊ីវិលលោកស្រី បានស្នើដល់អាជ្ញាធរខេត្តព្រះសីហនុ ក៏ដូចជាក្រសួងដែនដី មេត្តាជួយសម្របសម្រួលធ្វើយ៉ាងឱ្យប្រជាពលរដ្ឋដែលចង់ ឬចូលមករស់នៅ និងប្រកបមុខរបរនៅក្នុងមូលដ្ឋានសង្កាត់កោះរ៉ុងសន្លឹម ដូចគ្នាក្រុមហ៊ុនវិនិយោគទាំងអស់ហ្នឹងដែរ។ ព្រោះថាប្រជាពលរដ្ឋទាំងអស់ដែលរស់នៅក្នុងព្រះរាជាណាចក្រកម្ពុជា គឺពួកគាត់មានសិទ្ធិទទួលបានសិទ្ធិអាស្រ័យផល និងការចិញ្ចឹមជីវិតជាអត្ថប្រយោជន៍កាន់កាប់លើដីធ្លីទាំងអស់ហ្នឹងដែរ៕
