អ្នកសារព័ត៌មានអនឡាញជាង១០០នាក់បានប្រមូលផ្ដុំគ្នាដាក់ញត្តិនៅក្រសួងព័ត៌មានដើម្បីស្នើឱ្យចាត់វិធានការច្បាប់ និងដកអាជ្ញាបណ្ណសារព័ត៌មានរបស់លោក ផែង វណ្ណៈ ក្រោយពេលដែលបុគ្គលរូបនេះបាននិយាយប្រមាថដល់កិត្តិយសរបស់អ្នកសារព័តមាននៅលើបណ្ដាញសង្គមហ្វេសប៊ុករបស់ផ្ទាល់ខ្លួនរបស់គាត់។
តាមរយៈញត្តិចុះថ្ងៃទី ២៧ ខែកញ្ញា ឆ្នាំ២០២៣ និងចុះហត្ថលេខាដោយ លោក ជាវ គីមលាង មានតួនាទីជាចាងហ្វាងនៃអង្គភាពសារព័ត៌មានគ្រុឌ០១ និង ជាតំណាងឱ្យសហការីទាំង២៥រាជធានី-ខេត្ត បានស្នើឱ្យក្រសួងព័ត៌មានពិនិត្យ និងចាត់វិធានការលើលោក ផែង វណ្ណៈ ជាចាងហ្វាងការផ្សាយ PHENG VANNAK NEWS ចំពោះការប្រើពាក្យពេចន៍វោហារ ប្រមាថមាក់ងាយមកលើអ្នកសារព័ត៌មាន។
ក្នុងលិខិតនោះ បានឱ្យដឹងទៀតថា កាលពីថ្ងៃទី១៩ ខែកញ្ញា ឆ្នាំ២០២៣ លោក ផែង វណ្ណៈ បានប្រើប្រាស់បណ្ដាញសង្គមហ្វេសប៊ុកឈ្មោះ Pheng Vannak News និងបាននិយាយថា
«ខ្លួនមានទ្រព្យសម្បត្តិស្តុកស្ដម្ភ ជីវិតហាយសូ រស់នៅក្នុងផ្ទះវីឡា ជិះសុទ្ធតែរថយន្តទំនើបតម្លៃជាង៣០ម៉ឺនដុល្លារ មិនដូចពួកអាកាសែតខ្ចប់មមីសមាន់មួយរៀលៗឆ្នូតពាក់កាតដើរ ឡាយតាមចិញ្ចើមផ្លូវ ដើរសំពះសុំលុយគេ រហេមរហាម ខ្វះចំណេះដឹងនោះទេ»។ ដោយពួកគេបន្ថែមថា ការដៀលប្រមាថនេះមិនមែនជាលើកទីមួយនោះទេ។
ក្នុងលិខិតដដែលបញ្ជាក់ថា បណ្ដាអ្នកសារព័ត៌មានដែលចូលរួមថ្កោលទោសបានចាត់ទុកថា ទង្វើរបស់លោក ផែង វណ្ណៈ គឺជាការញុះញង់ឱ្យមានការរើសអើង និងបង្កភាពវឹកវរដល់សង្គមជាតិ ពុំមែនជាការរិះគន់ក្នុងន័យស្ថាបនានោះឡើយ ដែលនាំឱ្យប្រជាពលរដ្ឋមានគំនិតអវិជ្ជមាន និងអស់ជំនឿលើស្ថាប័នព័ត៌មាន ដែលជាស្ថាប័នអ្នកនាំពាក្យរបស់ជាតិ ក៏ដូចជាបងប្អូនអ្នកសារព័ត៌មានផ្ទាល់ដែលកំពុងបំពេញវិជ្ជាជីវៈបម្រើសង្គម។
លោក វណ្ណ ថារឹទ្ធ ជាចាងហ្វាងនៃអង្គភាពសារព័ត៌មាន សាន ព្រហ្ម បានបដិសេធទៅនឹងការចោទប្រកាន់របស់លោក ផែង វណ្ណៈ ដោយលោកថាបុគ្គលរូបនេះពុំមានអ្វីជាសម្អាងនោះឡើយ ប៉ុន្តែបានធ្វើការរាប់បញ្ចូលអ្នកសារព័ត៌មានអនឡាញ ដែលលោកប្រមាថថាជាអ្នកកាសែតតាមចិញ្ចើមផ្លូវនោះ បានប្រកបអាជីពដើរយកតែលុយពីគេ។
លោកបានថ្លែងថា៖«វាជាភាសាមួយដែលធ្ងន់ គឺជាភាសាមួយដែលដៀលនិងប្រមាថ ហើយមានការចោទប្រកាន់ថែមទៀត។ ចោទប្រកាន់ថាពួកគាត់[អ្នកសារព័ត៌មាន]ថាដើរតែយកលុយ យកអីរបស់គេអីចឹងទៅ ប៉ុន្តែធាតុពិតគឺគាត់គ្មានអ្វីជាសំអាងណាមួយដែលថាពួកគាត់ធ្វើអ៊ីចឹងនោះទេ។ ហើយការណ៌ដែលគាត់និយាយរ៉ាប់ហ្នឹងគឺជាភាសាដែលយើងមិនអាចទទួលយកបាន»។
លោកបន្ថែមថា កន្លងមកគាត់មើលឃើញថាស្ថាប័នសារព័ត៌មាន លោក ផែង វណ្ណៈ គឺពុំមានកូនចៅចុះយកព័ត៌មាននោះឡើយ ដោយចាំតែធ្វើការចម្លងយកព័ត៌មានពីស្ថាប័នផ្សេងទៀតតែប៉ុណ្ណោះ។
ជាមួយគ្នា លោក ថារឹទ្ធ បានស្នើឱ្យក្រសួងធ្វើការលុបអាជ្ញាបណ្ណសារព័ត៌មានរបស់ លោក ផែង វណ្ណៈ ជាកំហិត ដោយបើពុំនោះទេវានឹងធ្វើឱ្យប៉ះពាល់ដល់កិត្តិយសរបស់អ្នកសារព័ត៌មានដែលប្រកាន់ខ្ជាប់វិជ្ជាជីវៈ ក៏ដូចជាការនឹងធ្វើឱ្យធ្លាក់ចុះនៃវិស័យសារព័ត៌មានជាដើម។
លោកបន្ថែមថា៖«ដំណើរពួកខ្ញុំមកទីនេះគឺមិនមានអ្វីច្រើននោះទេ គឺសុំតែការលុបអាជ្ញាបណ្ណបុគ្គលនេះចោលតែម្ដង បើសិនជានៅបន្តទៀតវិស័យសារព័ត៌មាននឹងធ្លាក់ចុះ ពីព្រោះអ្នកសារព័ត៌មាននៅទីនេះសុទ្ធសឹងតែបានរៀន និងសុទ្ធតែមានវិជ្ជាជីវៈទាំងអស់ អ្នកណាក៏មានវិញ្ញាបនបត្របញ្ជាក់ការសិក្សានោះដែរ»។
គួរបញ្ជាក់ថា ក្រោយពេលប្រមូលផ្ដុំគ្នាអស់ជាង១ម៉ោង ក្រសួងបានអញ្ជើញអ្នកសារព័ត៌មានដែលមកធ្វើការតវ៉ាទាំងអស់ចូលជួបនៅវេលាម៉ោង៩:១០នាទី ព្រឹក ដែលដឹកនាំដោយលោក ផុស សុវណ្ណ អគ្គនាយកនៃនាយកដ្ឋានព័ត៌មាន និងសោតទស្សន៍។
លោក ប៊ុន ធីម ជាចាងហ្វាងនៃអង្គភាពគេហទំព័រថ្មី បានលើកឡើងនៅក្នុងអង្គប្រជុំថា មិនថាក្រសួងធ្វើការសម្រេចចិត្តបែបណានោះទេ ប៉ុន្តែលោកចង់ឱ្យលោក ផែង វណ្ណៈ ធ្វើការកែប្រែនូវអាកប្បបកិរិយារបស់ខ្លួន និងគិតពីក្រមសីលធម៌វិជ្ជាជីវៈមុននឹងធ្វើការនិយាយ ឬបង្ហោះពីខ្លឹមសារអ្វីមួយលើបណ្ដាញសង្គម។ លោកបន្ថែមថា បើពុំនោះទេវានឹងជះឥទ្ធិពលអាក្រក់ដល់ក្មេងជំនាន់ក្រោយ។
លោកបញ្ជាក់ថា៖«រឿងលុប ឬមិនលុបគឺជាការសម្រេចចិត្តរបស់ក្រសួង ប៉ុន្តែខ្ញុំចង់ឱ្យលោក ផែង វណ្ណៈមុននឹងការLive មុននឹងការនិយាយស្ដីគឺសូមឱ្យគាត់គិតពីក្រមសីលធម៌វិជ្ជាជីវៈ ព្រោះគាត់បានតាំងខ្លួនថាជាអ្នកចេះដឹង មានវិជ្ជាជីវៈត្រឹមត្រូវ ក៏ប៉ុន្តែកន្លងមកលោក ផែង វណ្ណៈ គឺតែងតែLive ជាព័ត៌មានជេរប្រទេច ដែលនេះហើយជាពាក្យពេចន៍មួយដែលមិនល្អ ធ្វើឱ្យក្មេងជំនាន់ក្រោយយកគំរូតាម ឬស្ដាប់ទៅវាមិនសមរម្យ»។
យ៉ាងណាក្ដីអ្នកស្រី ជា ធូរីដា ជាពិធីការិនីTV Online នៃស្ថាប័នក្នុងស្រុកមួយ បានទទូចឱ្យក្រសួងព័ត៌មាន និងស្ថាប័នពាក់ព័ន្ធពិនិត្យនិងចាត់វិធានការឱ្យបានជាបន្ទាន់ទៅនឹងករណីប្រមាថមាក់ងាយរបស់លោក ផែង វណ្ណៈ ទៅកាន់បងប្អូនអ្នកសារព័ត៌មាននេះ។ ដោយអ្នកស្រីបន្តថា បើករណីពុំអាចដោះស្រាយបាននោះទេវានឹងធ្វើឱ្យបុគ្គលរូបនោះនឹងកាន់តែបន្តប្រព្រឹត្តអំពើបែបនេះទៀត។
អ្នកស្រីលើកឡើងថា៖ «នេះជាការស្នើសុំហើយ ស្នើសុំទៀតទៅដល់បណ្ដាថ្នាក់ដឹកនាំនៅតាមបណ្ដាស្ថាប័ន នៅក្នុងក្រសួងព័ត៌មានទាំងអស់ សូមមេត្តាចាត់វិធានការរឿងនេះឱ្យក្ដៅគគុក ដោយសារបើគាត់មើលងាយបានលើកនេះ ខ្ញុំគិតថាលើកក្រោយក៏គាត់នឹងមើលងាយបន្តទៀត ហើយបងៗដែលជាអ្នកសារព័ត៌មានគាត់នឹងលែងមានឥទ្ធិពលហើយ»។
ទាក់ទងនឹងសំណើខាងលើ លោក ផុស សុវណ្ណ មានប្រសាសន៍ឆ្លើយតបទៅកាន់អ្នកសារព័ត៌មានថា ពាក្យស្នើសុំថ្កោលទោស ឬបិទស្ថាប័នសារព័ត៌មានលោក ផែង វណ្ណៈ ក្រសួងព្រមទទួលយកការស្នើនេះហើយក្រសួងនឹងយកទៅពិភាក្សាគ្នាជាមួយនឹងថ្នាក់ដឹកនាំដើម្បីសម្រេចថាបិទ ឬមិនបិទ។ លោកបន្តទៀតថា បើនិយាយតាមបច្ចេកទេសក្រសួងអាចមានសិទ្ធិបិទស្ថាប័នរបស់លោក ផែង វណ្ណៈ បានលុះត្រាតែបុគ្គលរូបនេះមិនព្រមកែតម្រូវ ឬទទួលកំហុសរបស់ខ្លួនទើបក្រសួងមានវិធានការទៅលើរឿងនេះ។
លោក សុវណ្ណ មានប្រសាសន៍ថា៖ «បើក្រសួងព័ត៌មានបានទទួលហើយសារនេះ ទទួលសារហើយផ្ញើជូនទៅ ផែង វណ្ណៈ គាត់មិនធ្វើការកែតម្រូវ បានខ្ញុំមានសិទ្ធិធ្វើការដក[អាជ្ញាបណ្ណ] ប៉ុន្តែបើគាត់ធ្វើការកែតម្រូវអស់ ខ្ញុំអត់ដឹងថាបច្ចេកទេសម៉េចទៀត ចឹងបានខ្ញុំទុកពេលនេះឱ្យថា្នក់ដឹកនាំសម្រេច»។
លោក ផុស សុវណ្ណ បន្ថែមថា កន្លងមកក្រសួងអាចដកស្ថាប័នព័ត៌មានបាន គឺនៅពេលស្ថាប័ននោះមិនកែតម្រូវតាមការសំណូមពររបស់ក្រសួង ឱ្យកែតម្រូវត្រង់ចំណុចដែលក្រសួងពិនិត្យទៅឃើញថាពិតជាមានកំហុស។
លោកមានប្រសាសន៍បន្តទៀតថា លោកមិនទាន់សម្រេចថាបិទ ឬដកស្ថាប័នសារព័ត៌មានរបស់ លោក ផែង វណ្ណៈ ទេ ប៉ុន្តែលោកនឹងស្នើសុំឱ្យមានការកែប្រែ ឬលុបវីដេអូណាមួយដែលមានការប្រតិកម្មខ្លាំង និងធ្វើឱ្យប៉ះពាល់ដល់អ្នកសារព័ត៌មាន។
លោកបន្ថែមទៀតថា៖ «លើកលែងតែធ្ងន់ធ្ងរកម្រិតណាមួយផ្សេងទៀតដែលជាកម្រិតអ្នកនយោបាយគាត់មើលឃើញថាវាអាចនឹងបង្ក(បញ្ហាធំ) បានយើង(ក្រសួង)អាចធ្វើការលុប ឬក៏ដកហូតអាជ្ញាប័ណ្ណតែម្តង»។
ចំពោះករណីនេះលោក ផែង វណ្ណៈ មានប្រសាសន៍ថា លោកមិនបានចាប់អារម្មណ៍ទៅនឹងការតវ៉ារបស់អ្នកកាសែតទាំងអស់នោះទេ ព្រោះលោកមិនបានស្គាល់ពួកគេ។ លោកបន្តថា ដើមហេតុនៃរឿងនេះគឺលោកបានឃើញសេចក្តីជូនដំណឹងមួយលើបណ្តាញសង្គមដែលបានផ្សព្វផ្សាយដោយកាស៊ីណូមួយឈ្មោះ «TOP DIAMOND CASINO»ពាក់ព័ន្ធនឹងអ្នកកាសែតដែលដាក់ខែសុំលុយពីកាស៊ីណូនោះ ដែលទង្វើនេះគឺខុសនឹងច្បាប់ និងបានធ្វើឱ្យប៉ះពាល់អ្នកកាសែតដែលមានវិជ្ជាជីវៈ។
លោកបន្តថា ការនិយាយរបស់លោកគឺចង់សំដៅដល់អ្នកកាសែតដែលមានឈ្មោះដើរយកលុយពីកាស៊ីណូប៉ុណ្ណោះ។ លោកនិយាយថា៖ «យើង(លោក ផែង វណ្ណៈ)មិនដឹងថាកាសែតមួយណាទេ តែយើងចាត់ទុកថាអ្នកដែលប្រើកាតកាសែត ស្ពាយកាតកាសែតដើរសុំលុយគេវាខុសច្បាប់»។
លោក ផែង វណ្ណៈ បានបន្ថែមទៀតថា ការប្រើពាក្យអាក្រក់ គឺសម្រាប់តែអ្នកកាសែតមិនត្រឹមត្រូវទេ ប៉ុន្តែបើសម្រាប់អ្នកកាសែតដែលត្រឹមត្រូវគឺលោកមិនប្រើពាក្យអាក្រក់ជាមួយឡើយ។ ចំពោះការប្តឹង គឺសម្រេចលើក្រសួង ហើយលោកមិនតតាំងជាមួយអ្នកកាសែតទាំងនោះឡើយ។
ចំណែកឯលោក សូ សំបូរ ជាចាងហ្វាងសារព័ត៌មាន ASB TV News ដែលបានចូលរួមក្នុងការថ្កោលទោសលោក ផែង វណ្ណៈ បានផ្តល់បទសម្ភាសន៍ក្រោយអង្គប្រជុំបិទបញ្ចប់ថា លោកមានសង្ឃឹមថាក្រសួងនឹងដកអាជ្ញាបណ្ណលោក ផែង វណ្ណៈ ព្រោះមានអ្នកសារព័ត៌មានជាច្រើនដែលមកពីស្ថាប័នផ្សេងៗទូទាំងប្រទេសបានចូលរួមធ្វើការថ្កោលទោស។ លោកបន្តថា ក្រសួងគួរតែដកស្ថាប័នរបស់លោក ផែង វណ្ណៈ ព្រោះបើក្រសួងមិនដកគឺនឹងធ្វើឱ្យប៉ះពាល់ដល់បរិយាកាសសារព័ត៌មានដែលមានវិជ្ជាជីវៈ ព្រោះលោក ផែង វណ្ណៈ បានប្រើពាក្យមើលងាយ និងប្រមាថដល់អ្នកសារព័ត៌មានក្នុងប្រទេស។
លោកបន្ថែមថា៖ «ក្រសួងព័ត៌មានមិនដឹងជាទុកសាច់ស្អុយនេះធ្វើអ្វីទៀតទេ សាច់ស្អុយគួរតែ[..]ចោល បុគ្គលដែលបំពុលបរិយាកាសផ្នែកវិស័យសារព័ត៌មានក៏គួរតែដកចេញទៅ»។
លោក ខៀវ កូឡា ជាអ្នកនាំពាក្យក្លឹបអ្នកកាសែតកម្ពុជា យល់ឃើញថា អ្នកសារព័ត៌មានពួកគេមានសិទ្ធិប្រតិកម្មទៅលើការនិយាយរបស់លោក ផែង វណ្ណៈ ព្រោះជាសិទ្ធិរបស់ពួកគេដែលរស់នៅក្នុងសង្គមហើយវាក៏ជាច្បាប់ស្តីពីសារព័ត៌មាន។ លោកបន្ថែមថា ការនិយាយរបស់លោក ផែង វណ្ណៈ គឺជ្រុលហួសដោយការនិយាយមិនបានរៀបពាក្យឱ្យបានសមរម្យដែលធ្វើឱ្យប៉ះទង្គិចដល់អ្នកសារព័ត៌មានដែលមានប្រាក់ចំណូលទាប។
លោកថ្លែងថា៖ «ខ្ញុំគិតថាលោក ផែង វណ្ណៈ គាត់ទៅជ្រុលពេក ការបញ្ចេញយោបល់គាត់អត់ចេះរៀបពាក្យចឹងទៅវាប៉ះទង្គិចជាមួយអ្នកសារព័ត៌មានមួយចំនួន»។
ទោះយ៉ាងលោក កូឡា ចង់ឃើញរដ្ឋមន្រ្តីក្រសួងព័ត៌មានបង្ហាញពីសមត្ថភាពក្នុងការដោះស្រាយទៅលើបញ្ហានេះ និងឱ្យភាគីទាំងសងខាងពួកគេអាចទទួលយកបានបន្ទាប់ពីការដោះស្រាយហើយ។
លោកបន្ថែមថា៖ «ខ្ញុំជឿថាឯកឧត្តមរដ្ឋមន្រ្តីលោកប្រាកដជាបង្ហាញទេពកោសល្យរបស់គាត់ ក្នុងការដោះស្រាយវិបត្តិ ដែលជះឥទ្ធិពលមិនល្អដល់សាមគ្គីភាព ក្នុងចំណោមសហគមន៍សារព័ត៌មានកម្ពុជា»។
គួរឱ្យដឹងថា កាលពីថ្ងៃទី១៩ ខែមិថុនា ឆ្នាំ២០២៣ លោក ផែង វណ្ណៈក៏ធ្លាប់បានផ្ញើសារគំរាមកំហែងដល់អាយុជីវិត ជាសំឡេងទៅហ្វេកប៊ុករបស់អ្នកសារព័ត៌មាន The Cambodia Daily លោក តាំង សារ៉ាដា ថា៖ «កុំចូលទឹកដីខ្មែរ បើហ៊ានចូលទឹកដីខ្មែរ អញនឹងកាប់ក្បាលនឹង ពូថៅ»។ ដោយឡែក លោក វណ្ណៈ ក៏ធ្លាប់បានបង្ហោះសារបៀតបៀនទៅលើស្រ្តីអ្នកយកព័ត៌មានVOD ម្នាក់នៅលើបណ្ដាញសង្គម ក្រោយស្ថាប័នមួយនេះត្រូវបានបិទ៕
