ប្រជាពលរដ្ឋជាង១០០គ្រួសារក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ បាននាំគ្នាទៅតវ៉ាដល់ទ្វារទឹកអាងត្រពាំងថ្មស្នើសុំឱ្យអាជ្ញាធរអន្តរាគមន៍ដល់មន្ទីរធនធានទឹកជាថ្មីដើម្បីបើកទ្វារទឹក ស្រោចស្រពដីស្រែពួកគាត់ជាង ២ ០០០ហិកតាដែលកំពុងត្រូវការទឹក នៅថ្ងៃទី១២ ខែមិថុនា ឆ្នាំ២០២៤។
លោក ណក់ ង៉ិ ជាពលរដ្ឋម្នាក់រស់នៅភូមិប៉ោយចារបានឱ្យដឹងថាពួកគាត់នាំគ្នាតវ៉ាឱ្យអាជ្ញាធរបើកទ្វារទឹកឱ្យបានធំដើម្បីស្រោចស្រពស្រូវពួកគាត់ដែលខ្លះស្រពោនស្វិតនិងខ្លះងាប់ទៅហើយដោយសាររាំងស្ងួតអូសបន្លាយ។ លោកបន្តថា ប្រជាពលរដ្ឋបានស្នើសុំឱ្យអាជ្ញាធរភូមិឃុំពីរបីដងហើយដើម្បីអន្តរាគមន៍ដល់មន្ទីរធនធានទឹក បើកទ្វារទឹកឱ្យប្រជាពលរដ្ឋស្រោច ស្រពស្រូវ ប៉ុន្តែគេបង្ហើបទ្វារទឹកតែមួយតឹកប៉ុណ្ណោះ មិនអាចស្រោចស្រពស្រូវ ពួកគាត់ខ្ទង់ពាន់ហិចតាដែលកំពុងត្រូវការទឹកបន្ទាន់បាននោះទេ។
លោក ណក់ ង៉ិ បញ្ជាក់ថា៖ «ស្រូវត្រូវការដាក់ទឹកដាក់ជី ស្រូវស្វិតអស់ហើយ គេដោះស្រាយបើកទ្វារមួយតឹកដែរ តែវាមិនបានហូរដល់ស្រែទេ បួនប្រាំថ្ងៃហូរបានកៀនៗបួនដប់ហិកតា ទឹកមានគេមិនបើកឱ្យ គេថាចាំខេត្តមកបានគេបើកឱ្យ ចាំបួនដប់ថ្ងៃហើយអត់ឃើញបើក»។
លោកបន្តថា គាត់បានដាំដុះស្រូវប្រភេទ៥១និង៥៤ កន្លះខែហើយ ដែលស្រែគាត់មានចម្ងាយពីទ្វារអាងប្រហែល៣គីឡូ។ លោកបន្តថា ខែនេះជាខែដែលពលរដ្ឋនៅតំបន់នេះធ្វើស្រែរៀងរាល់ឆ្នាំហើយ អាជ្ញាធរតែងតែបើកទ្វារទឹកឱ្យ ប៉ុន្តែឆ្នាំនេះទឹកក្នុងអាងមានមិនឃើញអាជ្ញាធរ បើកឱ្យនោះទេ។
ពលរដ្ឋម្នាក់ទៀតលោក លន់ សេងហៀង អាយុ៣៤ឆ្នាំ ដែលដាំដុះស្រូវ៣ហិកតាជិតម្ភៃថ្ងៃហើយ បាននិយាយថាស្រូវអាយុត្រឹមតែ១២ថ្ងៃវាត្រូវការទឹកដើម្បីស្រោចស្រពនិងដាក់ជី តែពេលនេះវាហួសពេលហើយ ស្រូវខ្លះស្រពោន ស្រូវខ្លះងាប់ក៏មាន។
លោកបន្តថាប្រជាពលរដ្ឋបានស្នើសុំអាជ្ញាធរជាង១០ថ្ងៃហើយមិនឃើញបើកទ្វារទឹកឱ្យ ទើប សម្រេចនាំគ្នាឡើងទៅតវ៉ាសុំឱ្យអាជ្ញាធរពន្លឿនការបើកទឹកដើម្បីសង្គ្រោះស្រូវពួកគាត់ បើមិនដោះស្រាយទេពួកគាត់នឹងបន្តឡើងទៅលើទៀត។
លោក លន់ សេងហៀង បន្ថែមថា៖ ខ្ញុំសំណូមពរឱ្យអាជ្ញាធរជួយបើកទឹកឱ្យបានគ្រប់គ្រាន់ដើម្បីស្រោចស្រពស្រែ ប្រជាពលរដ្ឋយើងសង្ឃឹមតែស្រែហ្នឹងហើយជាទីពឹង បើអត់ស្រែស្រូវទៅ ឱ្យគ្នារស់ នៅធ្វើម៉េចទៅ! ទ្វារទឹកមានបួនប្រាំ សំណូមពរឱ្យបើកតែទ្វារទឹកពីរទេសុំបើកឱ្យធំ»។
លោក អឿ សុទិន អនុភូមិប៉ោយចារ បាននិយាយថាស្រូវពង្រោះប្រជាពលរដ្ឋក្នុង ភូមិប៉ោយចារប្រមាណ ជិត៤០០ហិកតាដែលត្រូវការទឹកបន្ទាន់ដើម្បីស្រោចស្រព។ លោកបន្តថា ក្រោយពីប្រជាពលរដ្ឋស្នើសុំកន្លងមក ខាងធនធានទឹកគេបើកទ្វារទឹកឱ្យ១តឹកដែរ ប៉ុន្តែវាមិនអាចស្រោចស្រពទាន់នោះទេ ដែលខុសពីឆ្នាំ មុនគេបើកទ្វារទឹកឱ្យធំ បញ្ហានេះហើយទើបពលរដ្ឋនាំគ្នាឡើងមកតវ៉ា។
លោក ឃុត ឃួន មេឃុំប៉ោយចារ បានលើកឡើងថា ស្រូវប្រជាពលរដ្ឋក្នុងឃុំប៉ោយចារដែលដាំដុះខ្វះខាតទឹកប្រមាណ ២ ០០០ហិកតា ខ្លះបានដាំកន្លះខែហើយខ្លះយូរជាងនេះ។ លោកបន្តថា ពីដំបូងដៃមានភ្លៀងធ្លាក់ ប្រជាពលរដ្ឋបានចុះព្រោះស្រូវ បន្ទាប់មកភ្លៀងលែងធ្លាក់ធ្វើឱ្យស្រូវពង្រោះពួកគាត់ស្វិតត្រូវការទឹកដើម្បីស្រោចស្រព។
លោកឱ្យដឹងទៀតថា ស្រូវដែលត្រូវការសង្គ្រោះនោះ គឺមាន៥ឃុំក្នុងស្រុកភ្នំស្រុក និងស្រុកព្រះនេត្រព្រះ សរុបខ្ទង់មួយម៉ឺនហិកតាឯណោះ ប៉ុន្តែជំហានដំបូង គឺបើកទ្វារទឹកដើម្បីស្រោចស្រពស្រូវឃុំប៉ោយចារមុនសិនព្រោះឃុំនេះនៅមុខគេ។
លោកមេឃុំបន្ថែមថា៖ «សហគមន៍ឃុំ និងស្រុកបានធ្វើពាក្យស្នើសុំទៅមន្ទីរធនធានទឹកដើម្បីសុំបើកទ្វារទឹកអាងនៅថ្ងៃទី០៤ខែមិថុនា ដោយកំណត់បើកថ្ងៃទី០៦ខែមិថុនា ប៉ុន្តែខាងមន្ទីរធនធានទឹកថារង់ចាំឆ្លងអភិបាលខេត្តសិន»។
លោកមេឃុំបានបន្ថែមថា ក្រោយមានការឡើងតវ៉ារបស់ប្រជាពលរដ្ឋ មានអភិបាលរងខេត្តតំណាងឱ្យ អភិបាលខេត្ត និងមន្ទីរធនធានទឹកបានចុះមកសម្រេចបើកទ្វារទឹកឱ្យប្រជាពលរដ្ឋតាមសំណូមពរចំនួនពីរទ្វារទឹក ដោយទ្វារទី១បើករាងធំដោយស្រោចស្រពស្រូវជាង ១ ៥០០ហិកតា និងទ្វារទីពីរបីបួនរយហិកតាទៀត។
លោក យឹម ប៊ុនរ៉ុង ប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានលើកឡើងផ្ទុយពីអាជ្ញាធរមូលដ្ឋានថា ប្រជាពលពលរដ្ឋឡើងមកនេះ គឺមិនមែនមកតវ៉ានោះទេ គឺពួកគាត់ឡើងមកសាទរដែលអាជ្ញាធរបានបើកទ្វារទឹកស្រោចស្រពស្រូវពួកគាត់ប៉ុណ្ណោះ។
លោក យឹម ប៊ុនរ៉ុង បានថ្លែងថា៖ «គាត់មកអបអរសាទេមិនមែនតវ៉ាទេ មកអបអរសាទរ យើងបើកទឹកហ្នឹងគាត់មកមើល ឥឡូវយើងបើកអស់ហើយអភិបាលរងខេត្តអភិបាលស្រុក អីមកទាំងអស់គ្នា មិនមែនបាតុកម្មអីទេ»។
ដូចគ្នាទៅនឹងការលើកឡើងរបស់ប្រធានមន្ទីរធនធានទឹកដែរ លោក ឃ្លោក នួយ អភិបាលរងខេត្តបន្ទាយមានជ័យ ដែលចុះមកដល់ទីតាំងប្រជាពលរដ្ឋប្រមូលផ្តុំខាងលើ មិនមែនការតវ៉ាទេដោយលោកថាការងារនេះលោកបានរៀបចំកម្មវិធីបើកទ្វារទឹកជាមួយសហគមន៍ប្រើប្រាស់ទឹក ហើយប្រជាពលរដ្ឋឡើងមកដើម្បីអបអរសាទរដែលអាជ្ញាធរបើកទ្វារទឹកឱ្យ។
លោកបន្តថា៖ «យើងមានគម្រោងបើកឱ្យនាព្រឹកនេះ ដល់ពេលគាត់ដឹងទៅ គាត់មកអបអរសាទរទេ មិនមែនតវ៉ាទេ យើងមានផែនការតាំងពីម្សិលមិញ»។
លោកអភិបាលរងខេត្តបានបន្តទៀតថា ដោយសារឃើញមានការខ្វះខាតទឹកទើបអាជ្ញាធរបើកទ្វារទឹកសន្សំសំចៃ ប៉ុន្តែក្រោយពីមើលឃើញថាប្រជាពលរដ្ឋត្រូវការទឹកចាំបាច់ ឥឡូវនេះលោកសម្រេចបើកទ្វារទឹកទៅតាមសំណូមពររបស់ប្រជាពលរដ្ឋអស់ហើយ។ លោកថាទ្វារទឹកផ្សេងៗបានគោកអស់ហើយនៅ សល់តែទ្វារទឹក២ប៉ុណ្ណោះដែលទ្វារទឹកទីមួយបើកកម្ពស់៦តឹក និងទ្វារទឹកមួយទៀតកម្ពស់៤តឹក។
លោកអភិបាលរងខេត្តបន្ថែមថា៖ «ទំហំទឹកក្នុងអាងតិច ត្រូវការសន្សំសំចៃ ហើយដីបង្កបង្កើនផលច្រើន នៅចំពោះមុខខ្វះខាតជាង ២ ០០០ហិកតា»។ លោកបន្ថែមថា៖ «បើសិនមេឃបន្តរាំងស្ងួតទៀតខ្វះខាតទឹកដោយសារទឹកក្នុងអាងស្រក វាអាចប៉ះពាល់ត្រីក្នុងអាងទៀត ទឹកក្នុងអាងតិចជាងឆ្នាំទៅមុន ហើយរាំងស្ងួតជាងឆ្នាំទៅមិញ បើបើកអស់មិនដឹងមានទឹកណាទៀត ខ្ញុំបារម្ភត្រង់ហ្នឹង»។
លោក ស៊ុំ ចន្ទគា មន្រ្តីសម្របសម្រួលសមាគមអាដហុក ប្រចាំខេត្តបន្ទាយមានជ័យ បានថ្លែងថា តាមលោក សាកសួរប្រជាពលរដ្ឋ ពួកគាត់និយាយថា មិនមែនមកអបអរសាទរអីទេ គឺគាត់មកស្នើសុំឱ្យអាជ្ញាធរឃុំ ប៉ោយចារ ជួយអន្តរាគមន៍ធ្វើម៉េចឱ្យបើកទឹកដើម្បីសង្គ្រោះស្រូវពួកគាត់ដែលកំពុងស្វិត វាជាបំណងរបស់ពួកគាត់ដែលឡើងមក។
មន្រ្តីសិទ្ធិមនុស្សរូបនេះបានស្នើឱ្យមន្រ្តីរដ្ឋដែលបម្រើរាស្រ្តគួរបង្កើតគណៈកម្មការច្បាស់លាស់មួយដើម្បីពិនិត្យលើប្រជាពលរដ្ឋនៅតំបន់នោះថាតើពួកគាត់កំពុងជួបផលលំបាកអីខ្លះ ព្រោះជារឿយៗប្រជាពលរដ្ឋដាំដុះស្រូវនៅខាងក្រោមអាងត្រពាំងថ្មនេះតែងតែមានបញ្ហាកើតឡើងខែធ្វើស្រែពេលខ្លះអស់ទឹក គាត់ធ្វើការតវ៉ាទៅគេបើកទឹកឱ្យទៅ ពេលខ្លះទឹកជំនន់ប្រជាពលរដ្ឋតវ៉ាដែរព្រោះបើកទឹកលិចស្រូវពួកគាត់។
លោក ចន្ទគា បន្ថែមថា៖ «ចឹងបង្កើតគណៈកម្មការពិនិត្យមើលផលប៉ះពាល់លើប្រជាពលរដ្ឋទាក់ទងការធ្វើស្រែអីហ្នឹង យើងយកចិត្តទុកដាក់ពួកគាត់អត់ជួបហានិភ័យទេ ពួកគាត់អត់បាច់មកតវ៉ាទេ បើលិចទឹកអីយើងពិគ្រោះយោបល់ ដើម្បីបិទទ្វារទឹក រឺយ៉ាងម៉េចកុំឱ្យលិចស្រូវពលរដ្ឋកន្លែងហ្នឹង បើស្រូវស្វិតយើងបើកទ្វារទឹកយ៉ាងម៉េចសង្គ្រោះដល់ពួកគាត់ដែរ»។
លោកបន្ថែមថា៖ «បើយើងទាល់តែពលរដ្ឋស្រែក ពលរដ្ឋតវ៉ា ទើបជួយសង្រ្គោះពួកគាត់ អាហ្នឹងវាជាការខ្វះចន្លោះមួយហើយសម្រាប់មន្រ្តីក្នុងតួនាទីរបស់រដ្ឋគឺមានការខ្វះចន្លោះ»៕
