ក្រុមគ្រូបង្រៀន និងសិស្សនៅវិទ្យាល័យ ជាស៊ីមឈូកវ៉ា បានតវ៉ាជាថ្មីម្តងទៀត ដោយមានលើកជាបដាផង អំពាវនាវឲ្យក្រសួងអប់រំ និងអាជ្ញាធរពាក់ព័ន្ធដកតំណែងនាយក និងនាយករងចេញពីសាលាមួយនេះ។ នាយក និងនាយករង បានរងការចោទប្រកាន់ថាបានប្រើប្រាស់ថវិកាសាលា និងថវិកាពីប្រភពផ្សេងទៀតសម្រាប់ប្រយោជន៍ផ្ទាល់ខ្លួន។
កាលពីថ្ងៃអង្គារ ម៉ោង១២ថ្ងៃត្រង់ ក្រុមគ្រូបង្រៀន និងសិស្សនៅវិទ្យាល័យជាស៊ីមឈូកវា ដែលមានទីតាំងស្ថិតនៅក្នុងសង្កាត់គោករកា ខណ្ឌព្រែកព្នៅ ក្នុងរាជធានីភ្នំពេញ បានតវ៉ាជាថ្មី បន្ទាប់ពីការតវ៉ាលើកទីមួយធ្វើឡើងកាលពីខែមីនា មិនទទួលបានលទ្ធផលតាមការស្នើសុំ។ ក្រុមគ្រូបង្រៀនបានស្នើដល់រាជរដ្ឋាភិបាលដកនាយកសាលាឈ្មោះ ប៊ុន មុនី និងនាយករងឈ្មោះ យ៉ើ លាង ព្រោះថា «សកម្មភាព និងការដឹកនាំ» របស់អ្នកទាំងពីរបានធ្វើឲ្យប៉ះពាល់ដល់ការអភិវឌ្ឍសាលារៀន។
បើតាមលិខិតរបស់ក្រុមគ្រូបង្រៀនដាក់ទៅក្រសួងអប់រំ បានលើកឡើងថាគ្រូៗស្នើឲ្យដកនាយក និងនាយករងចេញពីតំណែង ដោយចោទថាគ្មានតម្លាភាពក្នុងការចាយវាយថវិកាដែលប្រមូលបានពីប្រភពផ្សេង និងមិនមានការដាក់ដេញថ្លៃចំពោះចំណតយានជំនិះជាដើម។ បន្ថែមពីនេះថវិកាប្រចាំឆ្នាំ៤៥លានរៀល ដែលបានអនុម័តក្នុងសម័យកូវីដ-១៩ សម្រាប់រយៈពេលបីឆ្នាំក៏ «បាត់» ផងដែរ។
ទាំងនាយក និងនាយករង ក៏រងការចោទដែរថាបានប្រើពាក្យសម្ដីប្រមាថ ដែលមិនត្រឹមត្រូវតាមក្រមសីលធម៌ វិជ្ជាជីវៈបុគ្គលិក។
ក្នុងលិខិតរបស់គ្រូបង្រៀនបានសរសេរចោទប្រកាន់ទៀតថានាយកសាលាបាន «ដាក់សម្ពាធលើគ្រូៗឲ្យបង់ប្រាក់៦ម៉ឺនរៀលសម្រាប់ប្រយោជន៍ផ្ទាល់ខ្លួន»ក្នុងពេលមានការប្រឡងថ្នាក់បឋម ថ្នាក់អនុវិទ្យាល័យ និងវិទ្យាល័យ។ ក្រៅពីនេះក៏បានធ្វើយុទ្ធនាការឲ្យអាណាព្យាបាលសិស្សបង់ថ្លៃទឹក ភ្លើងមួយខែ២ ០០០រៀលផងដែរ។
លោកស្រី ចាន់ ហួត ជាគ្រូបង្រៀននៅទីនោះមានប្រសាសន៍ថា គ្រូៗមាន៦៧នាក់ មានការមិនពេញចិត្តចំពោះ «ការប្រព្រឹត្តខុស និងការដឹកនាំ» របស់នាយកសាលា ដែលលោកស្រីថាទង្វើទាំងនេះបានប៉ះពាល់ជាខ្លាំងដល់គុណភាពអប់រំ។
លោកស្រីប្រាប់ខេមបូចាថា៖ «យើងមិនស្បាយចិត្តនឹងសម្មភាពរបស់ពួកគាត់ទេ ពីព្រោះថាអ្នកទាំងពីរតែងគិតថាអ្វីដែលខ្លួនធ្វើ គឺត្រឹមត្រូវ។ ដូចនេះ អ្វីដែលយើងកំពុងធ្វើនៅពេលនេះ គឺដកអ្នកទាំងពីរនោះចេញ»។
អ្នកគ្រូដដែលបន្តថា នាយក និងនាយករង រងការចោទ «បានប្រើប្រាស់ថវិកាសាលាយ៉ាងច្រើនដោយមិនមានចែករំលែកព័ត៌មានដល់បុគ្គលិកផ្សេងទៀតឲ្យដឹង»។
លោកស្រីបន្តថា៖ «ពួកគេបានលាក់លុយពីសប្បុរសជន។ យើងមិនដឹងថាវាទៅណាទេ ហើយលុយរដ្ឋឲ្យមកសាលាក៏មិនដឹងដែរ។ ពេលយើងសួរ គាត់ដូរប្រធានបទ និងបាននិយាយយ៉ាងឈ្លើយ ដែលមិនអាចទទួលយកបានទេ»។
លោកស្រីឲ្យដឹងថាបញ្ហាបានកើតមានឡើងជាច្រើនឆ្នាំមកហើយ ខណៈដែលការង់ចាំវិធានការច្បាប់ គ្រូៗបានពហិការមិនចូលបង្រៀន និងប្រជុំ។
កាលពីការតវ៉ាលើកទីមួយ មន្ទីរអប់រំបានចុះមកស៊ើបអង្កេត និងបានរកឃើញថាបណ្ដឹងរបស់លោកគ្រូ អ្នកគ្រូ គឺត្រឹមត្រូវ ប៉ុន្តែមន្ទីរបានស្នើឲ្យគ្រូៗរង់ចាំដល់ខែឧសភា ដោយថាបញ្ហាបានទៅដល់រដ្ឋមន្ត្រីហើយ។
លោកស្រីចាន់ ហួត រំពឹងថាអាជ្ញាធរពាក់ព័ន្ធនឹងពន្លឿនការស៊ើបអង្កេតលើបណ្ដឹងរបស់គ្រូៗ។
ជាមួយគ្នានេះដែរ ឪពុករបស់សិស្សរៀនថ្នាក់ទី៧ ម្នាក់ ដែលសុំមិនបញ្ចេញឈ្មោះ បានលើកឡើងថាគាត់បារម្ភអំពីការសិក្សារបស់កូន ដោយសារតែឃើញមានការតវ៉ាបែបនេះ និងសង្ឃឹមថាក្រសួងនឹងអាចដោះស្រាយបញ្ហានេះឲ្យបានឆាប់។
អាណាព្យាបាលរូបនេះបាននិយាយថា លោកក៏ធ្លាប់បង់ប្រាក់៣០ ០០០រៀលក្នុងមួយឆ្នាំសម្រាប់ថ្លៃទឹក និងភ្លើង និង២០ដុល្លារផ្សេងទៀតសម្រាប់កម្មវិធីសិក្សារាល់ពេលដែលសាលាស្នើ។ ប៉ុន្តែលោកថាទឹកស្អាតប្រើប្រាស់មានកម្រិត និងកង្ហារក៏ប្រើមិនសូវកើត ដែលវាប៉ះពាល់ខ្លាំងដល់ការសិក្សារបស់កូនលោក។
អាណាព្យាបាលរូបនោះបញ្ជាក់ថា៖ «ខ្ញុំសង្ឃឹមថានឹងមានការស៊ើបអង្កេតលើរឿងនេះបានឆាប់។ បើសិនជាវានៅតែបន្ត ជនរងគ្រោះគឺជាកូនសិស្ស»។
នាយកសាលាលោក ប៊ុន មុនី មិនទទួលទូរសព្ទរបស់ខេមបូចាទេ ថ្វីបើបានហៅចូលច្រើនដង។
ចំណែកនាយករង លោក យ៉ើ លាង បាននិយាយថាករណីរបស់ពួកលោក «គឺកំពុងដោះស្រាយតាមនីតិវិធី»។ លោកបានបដិសេធឆ្លើយសំណួរផ្សេងទៀតដោយនិយាយថាលោក «កំពុងជាប់ប្រជុំ»។
អ្នកស្រី ឃួន វិច្ឆិកា អ្នកនាំពាក្យក្រសួងអប់រំ ប្រាប់ខេមបូចាថា មន្ទីរអប់រំរាជធានីបានរៀបចំក្រុមអធិការកិច្ច និងបានដោះស្រាយបញ្ហា និងថាគ្រូៗបានយល់ព្រមចូលធ្វើការវិញធម្មតា។
អ្នកស្រីអះអាងថាគ្រូៗប្រហែល៩០ភាគរយបានចូលបង្រៀនវិញ «ដូចធម្មតា» លើកលែងតែគ្រូៗ «មួយចំនួននៅចូលរួមបន្តការតវ៉ា»។
អ្នកស្រីឲ្យដឹងដែរថាដូចជាថ្ងៃនេះ កិច្ចប្រជុំ និងសកម្មភាពក្រុមការងារបច្ចេកទេស គឺដំណើរការជាធម្មតា មិនប៉ះពាល់ការរៀនសូត្ររបស់សិស្សនោះទេ។
អ្នកស្រីបន្ថែមថា៖ «បញ្ហានឹងត្រូវដោះស្រាយដោយមន្ទីរអប់រំ។ ខ្ញុំសូមបញ្ជាក់ថាគ្រូៗជាង៩០ភាគរយបានធ្វើការធម្មតា»។
កាលពីឆ្នាំមុន អង្គការឃ្លាំមើលអំពើពុករលួយឈ្មោះថាអង្គការតម្លាភាពអន្តរជាតិកម្ពុជា បានចេញរាយការណ៍ថាតម្លាភាពលើដំណើរការថវិកាជាតិរបស់កម្ពុជាចន្លោះឆ្នាំ២០១៨ ដល់២០២៣ មានកម្រិតទាប និងខ្វះបទបញ្ញត្តិច្បាស់លាស់។ អង្ការអន្តរជាតិនេះបានដាក់ចំណាត់ថ្នាក់ឲ្យកម្ពុជា១៥០ លើ១៨០ ក្នុងសន្ទស្សន៍នៃការយល់ឃើញពីអំពើពុករលួយសម្រាប់ឆ្នាំ២០២២។
អ្នកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ ប្រាប់ខេមបូចាថា ក្រសួងអប់រំ និងអាជ្ញាធរពាក់ព័ន្ធគួរតែចាត់វិធានការភ្លាមៗ ពីព្រោះថាវានឹងប៉ះពាល់ប្រព័ន្ធអប់រំ និងកូនសិស្ស។
អ្នកស្រីលើកឡើងថានីតិវិធីទាំងអស់អាចនឹងរកឃើញនៅពេលស៊ើបអង្កេត ហើយបើរកឃើញកំហុស គួរតែមានការដាក់ទណ្ឌកម្មតាមច្បាប់។
អ្នកស្រីបន្តថា៖ «ជាធម្មតាគ្រូៗមិនតវ៉ាទេ ដរាបណាមិនប្រឈមការលំបាកខ្លាំង។ បើសិនជាក្រសួងមិនអាចដោះស្រាយបញ្ហានេះ វាដូចជាសារាចរណ៍មុនៗរបស់ក្រសួងអត់ន័យ។ ដើម្បីបង្ហាញពីយុត្តិធម៌ ក្រសួងគួរតែស៊ើបអង្កេត បញ្ឈប់អំពើពុករលួយក្នុងប្រព័ន្ធអប់រំ»៕
ប្រែសម្រួលពីអត្ថបទភាសាអង់គ្លេស៖ Teachers Protest Again To Remove Principal and Deputy Over Alleged Funds Misuse
