សមាគមសម្ព័ន្ធអ្នកសារព័ត៌មានកម្ពុជា

មនុស្សជាង៥០០០នាក់ពាក់ព័ន្ធការទន្ទ្រានដីព្រៃលិចទឹកនៅខេត្តកំពង់ឆ្នាំង ខណៈ ACU សម្រេចឃាត់ខ្លួននគរបាលខេត្តពីរនាក់

បុរសម្នាក់ បើកម៉ូតូដឹកស្ត្រីម្នាក់កាត់អង្គភាពប្រឆាំងអំពើពុករលួយ ក្នុងក្រុងភ្នំពេញ ថ្ងៃទី១៧ ខែធ្នូ ឆ្នាំ២០២១។ ខេមបូចា/ ព្រីង សំរាំង
បុរសម្នាក់ បើកម៉ូតូដឹកស្ត្រីម្នាក់កាត់អង្គភាពប្រឆាំងអំពើពុករលួយ ក្នុងក្រុងភ្នំពេញ ថ្ងៃទី១៧ ខែធ្នូ ឆ្នាំ២០២១។ ខេមបូចា/ ព្រីង សំរាំង

អង្គភាព​ប្រឆាំង​អំពើពុក​រលួយ​បាន​សម្រេច​ឃាត់​ខ្លួន​មន្ត្រី​នគបាលជាន់ខ្ពស់ពីររូបនៃស្នងការដ្ឋាននគរបាល​ខេត្ត​កំពង់ឆ្នាំងក្រោយ​រកឃើញ​ថា​ ពួកគេ​បាន​ជាប់​​ពាក់​ព័ន្ធនឹងការ​កាប់ទន្ទា្រន​កាន់កាប់​​ដីព្រៃលិចទឹករាប់ពាន់ហិកតា​នៅបឹងទន្លេសាបដោយ​ខុសច្បាប់​​ ខណៈមន្ត្រីសង្គមស៊ីវិល​ជំរុញ​ឲ្យមានការ​ស៊ើបអង្កេតដោយ​តម្លាភាព​ និង​គ្មានការ​រើសអើង។

​យោងតាមសេចក្តីប្រកាស​ព័ត៌មាន​របស់អង្គភាព​ប្រឆាំង​អំពើពុក​រលួយ​​ កាលពីយប់ថ្ងៃទី​១៦ ខែធ្នូ ​បាន​ឲ្យ​ដឹងថា លោក ស៊ុំ សុជាតិ ស្នងការរងនគរបាលខេត្តកំពង់​ឆ្នាំ​ និង លោក កែវ ណារុន ប្រធាន​ការិយាល័យអន្តរាគមន៍ និង​តម្រួតបញ្ជានៃស្នងការរដ្ឋាននគរបាលខេត្ត​កំពង់​ឆ្នាំ​ ត្រូវ​បាន​អង្គភាព​ប្រឆាំង​អំពើពុក​រលួយសម្រេចឃាត់ខ្លួន​នៅថ្ងៃទី១៦ ខែធ្នូ។ ការឃាត់ខ្លួននេះ បន្ទាប់ពីបាន​សាកសួរ និងបាន​រកឃើញថា ​មន្ត្រីទាំងពីរនាក់​បាន​ជាប់​ពាក់ព័ន្ធនឹង​ការកាន់កាប់​ និងលក់​ដី​ព្រៃលិចទឹក​ក្នុងតំបន់​បី ក្នុងស្រុក​កំពង់លែង ខេត្ត​កំពង់ឆ្នាំ។

សេចក្តីប្រកាសព័ត៌មានដដែលបានឲ្យដឹងថា ACU នឹងបន្តនីតិវិធីផ្លូវច្បាប់ចំពោះមន្ត្រីនគរបាលទាំងពីររូបនេះ ប៉ុន្តែគិតត្រឹមព្រឹកថ្ងៃសុក្រនេះ ពួកគេនៅមិនទាន់បញ្ជូនទៅតុលាការនៅឡើយនោះទេ។

លោក ឱម យិនទៀង ប្រធានអង្គភាពប្រឆាំងអំពើពុករលួយបានប្រាប់ខេមបូចា ថា ករណីនគរបាលទាំងពីររូបនេះនៅមិនទាន់បញ្ចប់នីតិវិធីនៅឡើយនោះទេ។

 លោកថ្លែងថា៖ «យើងមានពេល២៤ម៉ោងដើម្បីកសាងសំណុំរឿង ទើបយើងអាចសន្និដ្ឋានថានឹងត្រូវចោទពីបទល្មើសអ្វីខ្លះ»។

លោក យិនទៀង បានបដិសេធការធ្វើអត្ថាធិប្បាយលើការស៊ើបអង្កេតអ្នកជាប់ពាក់ព័ន្ធផ្សេងទៀត រួមទាំងករណីអតីតអភិបាលខេត្តកំពង់ឆ្នាំង លោក ឈូ ចាន់ឌឿន។

 លោក បានបន្ថែមថា៖ «ករណីផ្សេងពីនេះ យើងគ្មានអ្វីអត្ថាធិប្បាយទេ»។

លោក​នាយករដ្ឋមន្ត្រី ហ៊ុន សែន កាលពីថ្ងៃទី ២៨ វិច្ឆិកា បាន​បញ្ជាឲ្យ​បង្ក្រាប​លើការ​ទន្ទ្រានកាន់កាប់ដីព្រៃលិចទឹក​នៅ​ជុំវិញ​បឹងទន្លេសាប​ បន្ទាប់ពី​ទទួល​បាន​របាយការណ៍ពី លោក សុខ ទូច ប្រធាន​រាជ្យបណ្ឌិត​សភាកម្ពុជា ពីការ​រំលោភកាន់កាប់ដីព្រៃលិចទឹក​រាប់ពាន់​ហិកតា​ដោយ​ខុសច្បាប់។ លោក​ ហ៊ុន សែន​បាន​បញ្ជា​ឲ្យ​មន្ត្រីដែលពាក់ព័ន្ធនឹងការ​ទន្ទ្រានដីព្រៃលិចទឹក​ចូល​មក​សារភាព និង​ត្រូវ​ប្រគល់​ដី​មក​ឲ្យ​រដ្ឋ​វិញ​ដើម្បី​គេចផុតពីការ​ចាប់ខ្លួន។

លោក ឈូ ចាន់ឌឿន អតីតអភិបាលខេត្ត​កំពង់ឆ្នាំង​ ដែល​បច្ចុប្បន្ន​ជា​អនុរដ្ឋលេខាធិការ​ក្រសួង​មហាផ្ទៃ ត្រូវ​បាន​គេ​រាយការណ៍​ថា​ បានទន្ទ្រានកាន់កាប់​ដីព្រៃលិចទឹក​ទំហំ ២០០០ហិកតា ខណៈលោក ស៊ុំ សុជាតិ ត្រូវបាន​រកឃើញថា​បាន​កាន់កាប់​ដីព្រៃលិចទឹក​ជាង​៦០០ហិកតា​។ ប៉ុន្តែមក​ដល់​ពេលនេះ​ មាន​តែមន្ត្រី​នគរបាល​ខេត្ត​កំពង់​ឆ្នាំ​ពីររូបប៉ុណ្ណោះត្រូវបាន​នាំខ្លួនមកសាកសួរ និងឃាត់ខ្លួន​ពាក់ព័ន្ធ​នឹង​ការរំលោភដីព្រៃលិចទឹក​រាប់​ពាន់​ហិកតានេះ។

រូបភាពបង្ហាញពីការកាប់ទន្រ្ទានដីព្រៃលិចទឹកធ្វើជាកម្មសិទ្ធិនៅបឹងទន្លេសាប។ រូបភាពបានបង្ហោះនៅលើហ្វេសប៊ុករបស់ក្រសួងដែនដី នៅដើមខែធ្នូ ឆ្នាំ២០២១។

ស៊ុន សុវណ្ណារិទ្ធ អភិបាលខេត្ត​កំពង់ឆ្នាំ​បាន​ឲ្យដឹងថា គិតត្រឹម​ថ្ងៃទី​១៥ ធ្នូ មាន​អ្នក​​ពាក់ព័ន្ធ​​ជាង ៥ ០០០នាក់​នៅក្នុងស្រុក​បី រួមមានស្រុក​កំពង់លែង បរិបូរណ៍ និងស្រុក​ជល់គិរី បានស្ម័គ្រចិត្ត​ប្រគល់ដីព្រៃលិចទឹក​មក​ឲ្យ​អាជ្ញាធរដែលមាន​ទំហំ​សរុប ២៤ ០០០ហិកតា។

យោង​តាម​លោក លី​ សំរិទ្ធ អភិបាលរងខេត្ត​សៀមរាប បាន​ឲ្យដឹង​ថា​គិត​ត្រឹម​ថ្ងៃទី ១៦ ធ្នូ អាជ្ញាធរខេត្ត​បាន​រឹបអូស​ដីព្រៃលិចទឹក​បាន​ចំនួន​ ២ ៤០០ហិកតា ដែលភាគច្រើន​កាន់កាប់ដោយ​ប្រជាពលរដ្ឋ។ 

លោកបន្តថា៖‌ «នៅខេត្ត​សៀមរាប មិនទាន់រកឃើញ​ថាមាន​មន្ត្រីពាក់ព័ន្ធនៅឡើយទេ ហើយភាគច្រើន​ដីទាំងនោះត្រូវបានកាន់កាប់​ដោយ​ប្រជាពលរដ្ឋ​»។

លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា​ បាន​ស្វាគមន៍​ចំពោះ​វិធានការ​របស់​អង្គភាព​ប្រឆាំងអំពើ​ពុក​រលួយ ប៉ុន្តែ​បាន​ជំរុញ​ឲ្យ​អាជ្ញាធរ​ធ្វើការ​ស៊ើបអង្កេត​ឲ្យ​ហ្មត់ចត់​ដើម្បី​ស្វែងរក​អ្នក​ពាក់ព័ន្ធ​ផ្សេងទៀតមក​ទទួល​ខុសត្រូវ​ចំពោះ​មុខច្បាប់​ស្មើៗគ្នា។

​លោកថ្លែងថា៖ «អ្វី​ដែល​មហាជនចង់ដឹង គឺការ​ស៊ើបអង្កេតករណីនេះជាប្រព័ន្ធ​ ហើយ​ជន​សង្ស័យដែលពាក់ព័ន្ធ​​ត្រូវតែធ្វើការ​ស៊ើបអង្កេត»។

លោកបន្តថា កន្លងមក​​មានករណីអាជ្ញាធរអនុវត្តតែទៅលើ​មន្ត្រីតូចតាច ដោយ​​មិនហ៊ាន​ធ្វើការ​ស៊ើបអង្កេតលើ​មន្ត្រី​ដែលមាន​អំណាច ឬអ្នក​ដែលមាន​ខ្នងបង្អែកនោះទេ ដែលនាំឲ្យមានការ​រិះគន់​ពីមហាជន​។

លោក​ថ្លែងថា៖ «កន្លងមក​យើងមានករណីបែបហ្នឹង គឺការអនុវត្តច្បាប់​មានលក្ខណៈរើសអើងចំពោះអ្នក​ដែលត្រូវ​គេស៊ើបអង្កេត និង​អ្នក​ដែលគេមិនហ៊ាន អញ្ចឹងគឺនៅមាន​បញ្ហាហ្នឹង»។ ដោយបន្ថែមថា៖​ «​បើ​ផ្អែកលើ​បទពិសោធន៍ចាស់ៗកន្លងមក ហើយ​សាធារណៈជន​ក៏មានការ​ព្រួយបារម្ភបញ្ហាហ្នឹង​ដែរ។ អញ្ចឹងខ្ញុំគិតថា​ ដើម្បីជំរុញឲ្យ​ករណីហ្នឹង​ទៅមុខបាន​ដោយ​ប្រសិទ្ធភាពទាល់តែយើង​ធ្វើការអនុវត្តច្បាប់​ដោយ​ស្មើភាពគ្នា និងមិនរើសអើង ទោះ​បី​​​ជាអ្នក​ធំ អ្នក​តូច ឬជាប់ខ្សែស្រឡាយខាងណាក៏ដោយ»។

យោង​តាម​អង្គការសម្ព័ន្ធភាព​ដើម្បី​អភិរក្ស​ធនធាន​ជលផល ការទន្ទ្រានកាន់កាប់​ដៃព្រៃលិចទឹក​នៅ​ជុំវិញ​បឹងទន្លេសាប​បាន​កើតឡើង​តាំងពី១០ឆ្នាំ​មក​ម្ល៉េះ។ នៅឆ្នាំ ​២០១០ រដ្ឋាភិបាល​បាន​ចេញ​ប្រកាស​ស្តីពីការ​គ្រប់គ្រង​ដីព្រៃលិចទឹកនៅ​ជុំវិញ​បឹងទន្លេសាប​ ដោយ​បាន​កំណត់​ដីព្រៃលិចទឹក​ជាង ​៦៩០ ០០០ហិចតា ជាតំបន់​អភិរក្ស៕

448 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម