សមាគមសម្ព័ន្ធអ្នកសារព័ត៌មានកម្ពុជា

ស្នងការនគរបាលរាជធានីភ្នំពេញអះអាងថា ករណីបែកធ្លាយពាក្យបណ្ដឹងពាក់ព័ន្ធនឹងភាពមិនប្រក្រតីរបស់អធិការខណ្ឌកំបូលគឺជារឿងប៉ែងជើងគ្នា

អធិការដ្ឋាននគរបាលខណ្ឌកំបូល រាជធានីភ្នំពេញ។ រូបថតថ្ងៃទី៧ ខែធ្នូ ឆ្នាំ២០២៣។ (រូបថតផ្ដល់ឱ្យ)
អធិការដ្ឋាននគរបាលខណ្ឌកំបូល រាជធានីភ្នំពេញ។ រូបថតថ្ងៃទី៧ ខែធ្នូ ឆ្នាំ២០២៣។ (រូបថតផ្ដល់ឱ្យ)

ស្នងការនគរបាលរាជធានីភ្នំពេញថា ករណីបែកធ្លាយលិខិតប្ដឹងអធិការខណ្ឌកំបូល ​គឺជា​រឿង​បុគ្គល និងកំពុងចុះស៊ើបអង្កេតដើម្បីចាត់វិធានការ ខណៈសង្គមស៊ីវិលចាត់ទុកថា វាជារឿង​មិនប្រក្រតី និងជាអំពើពុករលួយ និងស្នើឱ្យអង្គភាពប្រឆាំងអំពើ​ពុករលួយបន្ថែមការ​ស៊ើប​អង្កេត​​ដើម្បីពង្រឹងប្រព័ន្ធច្បាប់មានចែងជាធរមាន។

បើតាមសម្ដីរបស់ លោក ជួន ណារិន្ទ អគ្គស្នងការរង​ និងជាស្នងការនគរបាលរាជធានីភ្នំពេញ បានថ្លែងថា ការបែកធ្លាយលិខិតប្ដឹងផ្ដល់គ្នារបស់សមត្ថកិច្ចខណ្ឌកំបូលមកកាន់លោកនេះថា ជា​រឿង​បុគ្គល​ និងបុគ្គល ដោយសារការមិនពេញចិត្ដគ្នា និងចង់ប៉ែងជើងគ្នាប៉ុណ្ណោះ។

លោកបានបន្តថា លោកបានទទួលលិខិតតាំងពីមួយខែមុនមកម្ល៉េះ ហើយលោកបានចុះទៅ​ត្រួត​ពិនិត្យ​នឹងណែនាំរួចមកហើយ អំឡុងពេលលោកឡើងដឹកនាំ។​ តែយ៉ាងណាលោកថា លោក​សុំមិនបញ្ចេញឈ្មោះបុគ្គលទេ ដើម្បីឱ្យលោកមានចំណាត់ការសិន និងបន្ដវិធានការ​ឱ្យ​ច្បាស់​លាស់សិន។

លោក ជួន ណារិន្ទ មានប្រសាសន៍ថា៖ «ខ្ញុំបានចុះស៊ើប និងសម្របសម្រួលរួច​មកហើយ។ រឿងនេះវាមិនដូចការចុះផ្សាយទេ។ ខ្ញុំនឹងចុះដោះស្រាយរឿងហ្នឹងដើម្បីដឹងថា​អ្នកណាខុស​អ្នកណាត្រូវ ព្រោះខ្ញុំធ្វើការក្នុងនាមជាមេគេ។ ខ្ញុំសុំរក្សាផ្ទៃក្នុងសិន។ រឿងបុគ្គល និងបុគ្គលទេ ប៉ែងជើងគ្នា ខ្ញុំសុំមិនបញ្ចេញឈ្មោះទេ ទុកពេលឱ្យខ្ញុំធ្វើការសិន»

នៅថ្ងៃទី៧ខែធ្នូ ឆ្នាំ២០២៣នេះ មានលិខិតមួយបានបែកធ្លាយពាក់ព័ន្ធនឹងករណីប្ដឹងលោក ហុង ពិសិដ្ឋ អធិការ នៃអធិការដ្ឋាននគរបាលខណ្ឌកំបូលទៅកាន់​ស្នងការដ្ឋាននគរបាល​រាជធានីភ្នំពេញ​​ដោយបានបោះត្រាចូលថ្ងៃទី១០ ខែតុលា ឆ្នាំ២០២៣ ដោយស្នើឱ្យ​ស្នងការ​ដ្ឋាន​​នគរបាល​ស៊ើបអង្កេតលើករណីដឹកនាំមិនប្រក្រតី ក្រោយពីលោក ហុង ពិសិដ្ឋ ចូល​កាន់​តំណែងដោយបញ្ជាក់ថា៖ «ចាប់តាំងពីលោក ហុង ពិសិដ្ឋ លោកវរសេនីយ៍ឯក  អធិការ​នៃ​អធិការដ្ឋាននគរបាលខណ្ឌកំបូល ប្រកាសចូលមកកាន់តំណែងជាអធិការ កាលពី​ថ្ងៃ១៨ ខែសីហា ឆ្នាំ២០២៣មក បានបង្កើតនូវបាតុភាពមិនប្រក្រតី​ប៉ះពាល់សតិអារម្មណ៍​កងកម្លាំង និងប្រជាពលរដ្ឋនៅក្នុងមូលដ្ឋានយ៉ាង​ខ្លាំង»

ក្នុងលិខិតដដែលក៏បានលើកឡើងថា ការតែងតាំងតួនាទី ឋានន្ដរសក្ដិមន្ដ្រីនគរបាល នៃ​អធិការដ្ឋាននគរបាលខណ្ឌកំបូល ដោយគ្មានការប្រជុំវាយតម្លៃត្រឹមត្រូវ ដោយថ្នូរ​ជាប្រាក់​៨០០​ដុល្លារ​ទៅ១០០០ដុល្លារ(តួនាទីនាយករងប៉ុស្ដ៍ និងនាយករងផ្នែក) ដោយគ្រាន់​តែ​ហៅ លោក­ លោកស្រីអធិការរងមកចុះហត្ថលេខាជាការស្រេច។ ក្នុងលិខិតដដែលនេះ​ក៏បាន​បញ្ជាក់​ពីករណីមិនប្រក្រតីជាច្រើន និងស្នាមមេដៃអ្នកគាំទ្រ៤៣នាក់ទៀតផងដែរ។

ជុំវិញរឿងនេះដែរ លោក វុទ្ធ ប៊ុនថន មេប៉ុស្ដ៍ឪឡោក ខណ្ឌកំបូលដែលមានស្នាមមេដៃក្នុង​ពាក្យបណ្ដឹង បានថ្លែងបញ្ជាក់ថា លោកសុំមិនអត្ថាធិប្បាយលើករណីខាងលើបន្ថែមនោះទេ ដោយលោកថា សុំរក្សាភាពស្ងៀមស្ងាត់សិន។

លោកបញ្ជាក់យ៉ាងខ្លីថា៖ «ខ្ញុំមិននិយាយអ្វីទេ សុំទោសផងណា»

អ្នកសារព័ត៌មានខេមបូចា មិនអាចសុំការអត្ថាធិប្បាយបន្ថែមពី លោក ខឹម ស៊ុនសូដា អភិបាល​ខណ្ឌ​កំបូលបានទេ។

ចំណែកសាមីខ្លួន លោក ហុង ពិសិដ្ឋ អធិការនៃអធិការដ្ឋាននគរបាលខណ្ឌកំបូល​ដែលត្រូវ​បាន​ថ្នាក់រងពាក្យបណ្តឹងនោះ ខេមបូចាក៏មិនអាចសុំការបំភ្លឺបានដែរជុំវិញរឿងនេះ។

យ៉ាងណាមិញករណីនេះលោក ជួន ណារិន្ទ បានបញ្ជាក់បន្ថែមថា លោកនឹងព្យាយាម​ដោះ​ស្រាយ​​ករណីឱ្យបានឆាប់តាមដែលអាចធ្វើទៅបាន ប៉ុន្ដែលោកថា លោកមិនហ៊ានកំណត់​ពេលវេលា​ជាក់លាក់ណានោះទេ ដោយលោកសុំរក្សាការសម្ងាត់។

លោក សយ ច័ន្ទវិចិត្ដ អ្នកនាំពាក្យអង្គភាពប្រឆាំងអំពើពុករលួយ បានថ្លែងថា ខាង​អង្គភាព​ក៏​បាន​លិខិតបែកធ្លាយជំហរដែរ ប៉ុន្ដែលោក​ថា ការដាក់ពាក្យបណ្ដឹងនេះគឺទៅស្នងការ​រាជធានីភ្នំពេញ ដូច្នេះហើយខាងអង្គភាពប្រឆាំងអំពើពុករលួយ និងចូលរួមតាម​ដានបន្ដ។

លោកលើកឡើងថា៖ «ក្រុមការងារក៏បានប្រមូលព័ត៌មានទាក់ទងនឹង​លិខិតហ្នឹង។ លិខិត​ហ្នឹង​ជាពាក្យបណ្ដឹងដាក់ទៅកាន់ស្នងការរាជធានីភ្នំពេញ ចឹងយើងនឹងប្រមូលព័ត៌មានបន្ថែម​ទៀត​។ យើងនឹងពិនិត្យមើលទៅលើចំណាត់ផ្សេងៗខាងស្នងការលោកនឹងមានចំណាត់ការ»

តាមច្បាប់ក្រមព្រហ្មទណ្ឌ មាត្រា៣៨ ចែងថា​ អំពើពុករលួយគឺជាបទល្មើសដែលដាក់​ទោស​ទណ្ឌ​ទៅលើអំពើពុករលួយ ឬប៉ុនប៉ងពុករលួយ ប្រព្រឹត្ដដោយមន្ដ្រីនយោបាយ អ្នករាជការ យោធា ឬភ្នាក់ងាររបស់គណបក្សនយោបាយ។ អំពើពុករលួយទោះធ្វើឡើងក្រោម​ទម្រង់​សកម្ម ឬអកម្ម ដូចជាការសូកប៉ាន់ ការរំលោភមុខងារ ដើម្បីប្រយោជន៍ផ្ទាល់ខ្លួន និងការជំរិត​ទារប្រាក់ ត្រូវបានកំណត់ថាជាបទល្មើសនៅក្រោមបទបញ្ញតិ្ដរបស់ក្រមព្រហ្មទណ្ឌ។

បើតាម លោក ប៉ិច ពិសី នាយកប្រតិបត្ដិនៃអង្គការតម្លាភាពកម្ពុជា បានលើកឡើងថា វាជា​អំពើ​ពុករលួយ ព្រោះក្នុងពាក្យបណ្ដឹងបាននិយាយពីការសូកប៉ាន់ ដើម្បីក្លាយជាអធិការ។ លោកបន្ដថា មានពាក្យបណ្ដឹងពីថ្នាក់ក្រោម ជាការចាំបាច់ណាស់សាមីស្ថាប័ន ឬសាមីក្រសួង​ត្រូវមានចំណាត់ការ ស្រាវជ្រាវបន្ថែម និងដោះស្រាយ ជាពិសេសស្វែងរកការពិតពាក់ព័ន្ធ​នឹង​ការចោទប្រកាន់។ លោកបានផ្ដល់ជាយោបល់ថា ថ្នាក់លើគួរមានក្រុមតូចមួយ​ដើម្បីធ្វើការ​លើ​រឿងទាំងអស់ និងអាចដោះស្រាយដោយតម្លាភាព និងយុត្ដិធម៌សម្រាប់​ភាគីទាំងសង​ខាង។

លោកបន្ថែមថា៖ «ករណីមានតម្រុយ ឬក៏មានការចោទប្រកាន់ថាការឡើង​ជាស្នងការបាន​ប្រើ​ប្រាស់​​​មធ្យោបាយពុករលួយ សូកប៉ាន់ដើម្បី​​បានតំណែង។ ករណីនេះអង្គភាពប្រឆាំង​អំពើ​ពុក​រលួយអាចមើលបន្ថែមបានថាតើពិតជាមានករណីចឹងកើតឡើងទេ ហើយស៊ើបអង្កេត​»

នៅថ្ងៃទី០៦ ខែធ្នូ ឆ្នាំ២០២៣នេះ លោក ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញ​សារ​លិខិតអបអរសាទរដល់ ទិវាជាតិ និងអន្តរជាតិប្រឆាំងអំពើពុករលួយ ៩ធ្នូ។ លោក​បាន​ណែនាំឱ្យបន្តពង្រឹង និងពង្រីកលើការងារអប់រំ បង្ការ និងទប់ស្កាត់ជាចម្បង ព្រមទាំងការ​ពង្រឹង ការអនុវត្តច្បាប់យ៉ាងម៉ឹងម៉ាត់ ដើម្បីបង្ក្រាបបទល្មើសអំពើពុករលួយ ។ ពង្រឹងកិច្ច​សហប្រតិបត្តិការ រវាងអង្គភាពប្រឆាំងអំពើ​ពុករលួយ និងស្ថាប័នសាធារណៈ ជាពិសេស​តាម​រយៈ​យន្តការជនបង្គោល ទាំងការងារអប់រំ និងការងារបង្ការទប់ស្កាត់ ដើម្បីរៀបចំដាក់​​​ឱ្យ​អនុវត្ត តាមដាន ត្រួតពិនិត្យ និងវាយតម្លៃ ការអនុវត្តផែនការយុទ្ធសាស្ត្រ និងលើកកម្ពស់ភាព​ស្អាតស្អំ នៅតាម​សា្ថប័ន​សាធារណៈ។

ចំណែកឯលោក អំ សំអាត នាយកចាត់ការទូទៅនៃអង្គការ លីកាដូ បានថ្លែងថា សម្រាប់​ករណី​បែកធ្លាយនេះ ​លោកមើលឃើញថា ជាភាពមិនប្រក្រតី និងជារឿងអសមត្ថភាព​របស់​អាជ្ញាធរខ្លួនឯង។ លោកបន្ដថា មានករណីជាច្រើន គឺមិនខុសគ្នានោះទេ ការប្រព្រឹត្ដជាច្រើន​នៅបន្ដបិទបាំងដែលពលរដ្ឋមិនបានដឹង។

លោកបន្តទៀតថា៖ «ខ្ញុំយល់ថានៅមានករណីបែបហ្នឹងច្រើនទៀត ប្រសិនបើច្បាប់មិនតឹងរឹង ព្រោះអ្នកណាមានលុយគឺអាចទិញតំណែងបាន។ ស្ថាប័នពាក់ព័ន្ធគួរពិនិត្យឡើងវិញ ដើម្បី​ឱ្យការឡើងកាន់តំណែងអាចបម្រើផលប្រយោជ៍ប្រជាពលរដ្ឋបានដោយគ្មានការសូកប៉ាន់»។​

បើ​តាម​សន្ទស្សន៍​នៃ​ការ​យល់​ឃើញ​ពី​អំពើ​ពុក​រលួយ​ឆ្នាំ​២០២១​ ដែល​ទើប​ចេញ​ផ្សាយ​ដោយ​អង្គការ​តម្លាភាព​អន្តរជាតិ (Transparency International) នៅ​ថ្ងៃ​ទី​២៥ ខែ​មករា ឆ្នាំ​២០២២​ បាន​បង្ហាញ​ថា កម្ពុជា​ជាប់​ចំណាត់​ថ្នាក់​លេខ​១៥៧ក្នុង​ចំណោម​ប្រទេស​ចំនួន​១៨០ នៅ​លើ​ពិភព​លោក។ ចំណាត់​ថ្នាក់​នេះ​ថយជាង​ឆ្នាំ​មុន​បន្តិច ដែល​មាន​ចំណាត់​ថ្នាក់១៦០។ យ៉ាង​ណាក្តី ចំណាត់​ថ្នាក់​នេះ​បង្ហាញ​ថា កម្ពុជា​នៅ​តែ​ជាប្រទេស​ដែល​មន​កម្រិត​ពុក​រលួយ​អាក្រក់​​ក្នុងចំណោម​ប្រទេស​ទាំង​១០នៃ​សមាគម​ប្រជាជាតិ​អាស៊ីអាគ្នេយ៍ ហៅ​កាត់​ថា អាស៊ាន៕

414 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម