ម្ចាស់ដេប៉ូប្រេងឥន្ធនៈចំនួន ៤២ កន្លែងបានស្នើសុំឱ្យអង្គភាពប្រឆាំងអំពើពុករលួយនិងអភិបាលខេត្តកណ្ដាលឱ្យជួយពន្លឿនការស៊ើបអង្កេតលើមន្ត្រីជំនាញនៃក្រសួងពាណិជ្ជកម្មដែលប្រព្រឹត្តអំពើពុករលួយដោយគំរាមនិងគាបសង្កត់ពិន័យទារលុយខុសប្រក្រតីពីពួកគាត់ក្នុងពេលចុះត្រួតពិនិត្យដេប៉ូប្រេងឥន្ធនៈ។
លោក សេង សុខនា អាយុ៤២ឆ្នាំ ជាម្ចាស់ដេប៉ូប្រេងឥន្ធនៈមួយកន្លែងក្នុងឃុំព្រែកអំបិល ស្រុកស្អាង ខេត្តកណ្តាល បានប្រាប់ ខេមបូចា នៅថ្ងៃពុធថា បុគ្គលឈ្មោះ តូច ចៅកុយ ជាមន្ដ្រីនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប)នៃក្រសួងពាណិជ្ជកម្មតែងតែគំរាមកំហែងលោកថា កន្លែងលោកលក់មិនគ្រប់លីត្រ ម្ដងថាខ្វះអានេះ ម្ដងថាខ្វះអានោះ និងតែងតែទាមទារលុយគ្រប់ពេលដែលចុះទៅពិនិត្យ បើទោះជាលោកទាមទារឱ្យមានការបង្ហាញច្បាស់លាស់អំពីការកំណត់លីត្រនិងការពិន័យជាប្រាក់ដោយចេញវិក្កយបត្រក៏ដោយ ក៏បុគ្គលហ្នឹងមិនព្រមចេញឱ្យដែរ ព្រមទាំងគំរាមចាប់រូបលោកដាក់គុក។
លោក សុខនា ឱ្យដឹងថា៖ «ពេលដែលគាត់(តូច ចៅកុយ)ចុះមកសុទ្ធតែគំរាមម្ចាស់ការ៉ាស់សុទ្ធតែចាប់ដាក់គុក ដាក់ច្រវ៉ាក់ ហើយគាត់អត់មានថាឥឡូវពិន័យលើកទី១ មានលើកទី២ វាកំហុសឆ្គងពីនេះពីនោះពន្យល់ណែនាំដូចខាងមន្ដ្រីមាត្រាសាស្ដ្រគាត់ចុះមកវាស់ គាត់ធ្វើការល្អ ហើយដល់ពេលគាត់(តូច ចៅកុយ)ចុះមកដឹងតែសម្លុតគុកច្រវ៉ាក់»។
លោក នៅ ណូត អាយុ៣៦ឆ្នាំ ម្ចាស់ដេប៉ូប្រេងឥន្ធនៈសៀមរាបតេលា នៅឃុំអំពៅព្រៃ ស្រុកកណ្ដាលស្ទឹង ម្នាក់ទៀត បាននិយាយថា ការដាក់ពាក្យនេះលោកស្នើសុំថាឱ្យមានការបញ្ជាក់លីត្រឬក៏តម្លៃណាមួយជាសាធារណៈមក កុំឱ្យម្ចាស់ដេប៉ូនេះប៉ុណ្ណេះ ម្ចាស់ដេប៉ូនោះប៉ុណ្ណោះដោយមិនមានភាពច្បាស់លាស់ និយាយតាមតែមាត់គាត់ថា។
លោកបានប្រាប់ថា៖ «ខ្ញុំសួរទៅ តូច ចៅកុយ ហ្នឹងគាត់ថា បើចង់ដឹងអាហ្នឹងពិតប្រាកដ គាត់សរសេរឱ្យ ថារំហួតប៉ុណ្ណេះ រំហួតប៉ុណ្ណោះ។ ដល់ពេលសរសេរចឹងមានអ្វីជាក់លាក់ អឹចឹងស្នើសុំឱ្យមានការបង្ហាញជាក់លាក់»។
អ្នកស្រី អូន ស៊ីនាថ អាយុ៣៧ឆ្នាំ ម្ចាស់ដេប៉ូប្រេងឥន្ធនៈនៅឃុំវិហារសួគ៌ ស្រុកខ្សាច់កណ្ដាល បានឱ្យដឹងថា ពេលដែលលោក តូច ចៅកុយ និងបក្សពួកចុះវាស់ប្រេងឥន្ធនៈកន្លែងអ្នកស្រី វាស់គ្រប់ហើយក៏ថាមិនគ្រប់លីត្រដែរ ពីព្រោះអ្នកស្រីក៏មិនបានដឹងពីបរិមាណហ្នឹងវាយ៉ាងម៉េច អ្នកស្រីថានិយាយរួមទៅគឺថាខ្វះរហូតហ្មង ប៉ុន្ដែអ្នកស្រីវាស់ខ្លួនឯងគ្រប់លីត្រទេ ហើយក៏មានការគំរាមកំហែងអ្នកស្រីផងដែរ។
អ្នកស្រីថ្លែងថា៖ «ចា៎បង បើគំរាមវិញលែងនិយាយហើយ គឺគាត់គំរាមហ្មង។ គំរាមថាបើយើងខ្វះចឹងទៅគឺត្រូវចាប់ដាក់គុកឬត្រូវបិទកន្លែងយើងមិនឱ្យលក់អីចឹងទៅ ហើយទៅដល់តុលាការទៅដល់អីចឹងទៅ»។ អ្នកស្រីបន្តថា៖ «បើមិនមានការឆ្លើយតបទេប្រហែលជាបន្ដទៅទៀត ចាំពួកខ្ញុំពិភាក្សាគ្នាសិនបង»។
កាលពីថ្ងៃទី២១ ខែកុម្ភៈ ឆ្នាំ២០២២ កន្លងទៅនេះ ម្ចាស់ដេប៉ូប្រេងឥន្ធនៈចំនួន ៤២ កន្លែងបានដាក់ពាក្យបណ្ដឹងទៅអង្គភាពប្រឆាំងអំពើពុករលួយដើម្បីឱ្យអង្គភាពមានចំណាត់ការចំពោះបុគ្គលឈ្មោះ តូច ចៅកុយ និងក្រុមគាត់ ដែលបានប្រព្រឹត្តអំពើពុករលួយពេលចុះអនុវត្តការងារ និងបានគាបសង្កត់ពិន័យអាជីវករម្ចាស់ដេប៉ូប្រេងឥន្ធនៈដោយគ្មានចេញវិក្កយបត្រ ហើយករណីខ្លះទៀតបានចេញវិក្កយបត្រដោយសរសេរទឹកប្រាក់តិចជាងទឹកប្រាក់ដែលពួកគាត់បានទារនិងមិនព្រមបង្ហាញពីច្បាប់ មាត្រា ប្រការ ដែលត្រូវពិន័យឱ្យបានជាក់លាក់នោះគឺគ្រប់តាមមាត់ទាំងអស់។
ក្នុងលិខិតនោះដដែលក៏បានបញ្ជាក់ថា ពេលក្រុមលោក តូច ចៅកុយ និងក្រុមគាត់ ចុះអនុវត្តការងារទាំងមិនដែលបានហៅម្ចាស់អាជីវករទៅពន្យល់ពីច្បាប់ឱ្យយល់ជាមុនឬក៏ជូនដំណឹងឱ្យអាជីវករដាក់ពាក្យស្នើសុំជាមុនសិនដូចខាងមន្ដ្រីមាត្រាសាស្រ្ដដែលមានជំនាញត្រួតពិនិត្យនិងមានឧបករណ៍ដែលមានលិខិតបញ្ជាក់អំពីភាពអនុលោមត្រឹមត្រូវពីស្ថាប័នជាតិធ្លាប់ធ្វើកន្លងមកនោះទេ។
ដោយឡែកនៅថ្ងៃទី២៥ ខែមេសា ឆ្នាំ២០២២ ម្ចាស់ដេប៉ូទាំង៤២កន្លែងក្នុងខេត្តកណ្ដាលក៏បានដាក់លិខិតទៅលោក គង់ សោភ័ណ្ឌ អភិបាលខេត្តកណ្ដាលដើម្បីស្នើសុំកិច្ចអន្ដរាគមន៍ពីលោកពាក់ព័ន្ធនឹងករណីតែមួយរបស់បុគ្គលឈ្មោះ តូច ចៅកុយ និងក្រុមគាត់ អំពីការប្រព្រឹត្តភាពមិនប្រក្រតីពេលចុះអនុវត្តការងារផងដែរ។
ខេមបូចា មិនអាចសុំការអត្ថាធិប្បាយពី លោក ឱម យិនទៀង ប្រធានអង្គភាពប្រឆាំងអំពើពុករលួយ បានទេ ដោយហៅទូរសព្ទចូលហើយ ប៉ុន្ដែលោកចុចបិទវិញ។
ប៉ុន្តែទោះជាយ៉ាងណា លោក ឃាង សេង អនុប្រធានអង្គភាពប្រឆាំងអំពើពុករលួយ បានមានប្រសាសន៍ថា លោកមិនបានដឹងរឿងនេះជាក់លាក់នោះទេ ដោយលោកឱ្យអ្នកសារព័ត៌មានទាក់ទងទៅអ្នកនាំពាក្យអង្គភាពវិញ។
លោកមានប្រសាសន៍យ៉ាងខ្លីថា៖ «ខ្ញុំអត់សូវដឹងរឿងហ្នឹងជាក់លាក់ទេ លោកអាចទាក់ទងទៅអ្នកនាំពាក្យទៅបានគេដឹងច្បាស់»។
លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាល បានប្រាប់ ខេមបូចា ថា លោកបានទទួលលិខិតសំណូមពររបស់ម្ចាស់ដេប៉ូប្រេងឥន្ធនៈហើយ។ លោកបន្តថា លោកបានចាត់ចែងឱ្យមន្ត្រីរដ្ឋបាលខេត្តត្រួតពិនិត្យលើបញ្ហានេះ ប៉ុន្តែលោកមិនទាន់ទទួលបានរបាយការណ៍ត្រឡប់មកវិញទេ។
លោកបានបញ្ជាក់ថា៖ «[ខ្ញុំ]ឱ្យរដ្ឋបាលពិនិត្យ។ ចាំមើលសិន ខ្ញុំអត់ទាន់បានរបាយការណ៍មកវិញ»។
បើតាមលោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានប្រាប់ ខេមបូចា ថា លោកមិនទាន់បានទទួលព័ត៌មានទាក់ទងនឹងបញ្ហានេះទេ។
លោកបានពន្យល់បន្តថា បាតុភាពនៃការលក់ប្រេងមិនគ្រប់លីត្រ លក់ប្រេងមិនគោរពតាមអនុលោមភាព កើតឡើងរឿយៗនៅក្នុងសង្គមរបស់យើង ហើយប្រជាពលរដ្ឋដែលជាអ្នកជាប្រើប្រាស់ក៏ជួបប្រទះនូវបញ្ហានេះជាច្រើនលើកច្រើនសារដែរ។
លោក សុវិជាតិ បន្ថែមថា មកដល់ឥឡូវនេះ បន្ទាប់ពីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ចុះអនុវត្តវិធានការខ្ជាប់ខ្ជួនមក ដោយបន្ថែមលើចំណាត់ការត្រួតពិនិត្យមាត្រាសាស្ត្រ និងស្ដង់ដា ដែលធ្វើដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ ក.ប.ប បានចុះធ្វើការជាប្រចាំមកឃើញថា ការលក់មិនគ្រប់លីត្រក្ដី ការអះអាងខុសពីកម្រិតគឺបានថយចុះ។
លោកបានមានប្រសាសន៍ថា៖ «ខ្ញុំជឿជាក់ថា អ្នកប្រើប្រាស់ទាំងមូល រួមទាំងអ្នកលក់ខ្លួនឯងផ្ទាល់ មកដល់បច្ចុប្បន្ននេះ បានសម្ដែងនូវការកោតសរសើរនូវចំណាត់ការរបស់ ក.ប.ប ដែលប្រឆាំងទៅនឹងអ្វីដែលជាការធ្វើពាណិជ្ជកម្មមិនសុចរិតនោះ ពីព្រោះការដែលអាជីករលក់មិនគ្រប់លីត្រក្ដី លក់បន្លំកម្រិតខុសពីកម្រិតដែលបានអះអាងក្ដី ជាអំពើមិនសុចរិតក្នុងអាជីវកម្ម»។
លោកបានពន្យល់បន្ថែមថា មិនមែន ១០០លីត្រ ត្រូវតែបូមចេញមកវិញបាន ១០០លីត្រទេ គឺយើងមានកម្រិតសម្រាប់ការបាត់បង់ហួតហើរ និងកម្រិតល្អៀងមួយចំនួនដែលអាស្រ័យដោយការបាត់បង់ដោយកត្តាផ្សេងៗ ដូចជាកត្តាស្ដុកទុក កត្តាអាកាសធាតុ ។ល។ ក៏ប៉ុន្តែអ្វីដែលម្ចាស់ស្ថានីយ៍មួយចំនួនបានប្រព្រឹតខុសនោះ គឺការលក់លីត្រហ្នឹង វាទាបជាងដែលវាបាត់បង់ហើយលើសពីអ្វីដែលបទដ្ឋានបច្ចេកទេស បានអនុញ្ញាតឱ្យគាត់ធ្វើ។
ទោះបីជាយ៉ាងណា លោកបន្តថា ប្រសិនបើមិនមានអំពើល្មើស ឬការប្រព្រឹត្តខុស ប្រហែលជាមិនមានការចុះទៅត្រួតពិនិត្យទេ។ ប្រសិនបើម្ចាស់ដេប៉ូប្រេងឥន្ធនៈទាំងនោះប្រព្រឹត្តតែអំពើសុចរិតក្នុងអាជីវកម្មប្រហែលជាពុំមានរឿងបែបនេះកើតឡើងទេ។
លោកមានប្រសាសន៍ថា៖ «ប្រសិនបើរឿងនេះបានកើតឡើងហើយ និងបានដាក់ជូនទៅអាជ្ញាធរខេត្ត ក្រសួងពាណិជ្ជកម្ម និងអាជ្ញាធរពាក់ព័ន្ធផ្សេងៗ ខ្ញុំជឿថា អាជ្ញាធរទាំងអស់នឹងមានវិធានការ មិននៅស្ងាត់ទេ»។
ផ្ទុយទៅវិញ លោកបន្តថា ប្រសិនបើដាក់ពាក្យបណ្ដឹង ឬធ្វើការស្នើសុំហើយ មិនមានការឆ្លើយតប លោកជឿថាប្រហែលជាបញ្ហានេះ មិនស្ថិតនៅក្នុងរង្វង់នៃប្រក្រតីភាព ប្រត្យក្សភាព ឬក៏តថភាព ដែលស្ដែងចេញពីការអនុវត្តកិច្ចការទូទៅទេ។
លោកមានប្រសាសន៍ថា ម្ចាស់ស្ថានីយ៍ទាំងអស់នោះ គួរពិនិត្យមើលសកម្មភាពរបស់ខ្លួនវិញ។ តើខ្លួនបានធ្វើអំពើមិនសុចរិតនៅក្នុងអាជីវកម្ម ឬក៏មិនបានប្រព្រឹត្តទេ? ហើយតើអ្វីដែលជាដើមចមពិតប្រាកដនៃការចុះទៅធ្វើអធិការកិច្ច ឬក៏ការត្រួតពិនិត្យដែលជាសកម្មភាពចុះជាប្រចាំរបស់អង្គភាព ក.ប.ប នេះ? លោកបញ្ជាក់ថា ក.ប.ប មានកាតព្វកិច្ចក្នុងការត្រួតពិនិត្យ និងការពារអ្នកប្រើប្រាស់៕
