សមាគមសម្ព័ន្ធអ្នកសារព័ត៌មានកម្ពុជា

កូដករណាហ្គាវើលដ៍រង់ចាំដំណោះស្រាយពីនាយករដ្ឋមន្រ្តី និងរដ្ឋសភា បន្ទាប់ពីក្រសួងការងារមិនអាចដោះស្រាយវិវាទការងារនេះ

មន្រ្តីនៃខុទ្ទកាល័យនាយករដ្ឋមន្រ្តីពិនិត្យនិងទទួលញត្តិពីកូដករណាហ្គាវើលដ៍។ រូបថតនៅថ្ងៃ ទី២០ ខែមិថុនា ឆ្នាំ២០២២។ ខេមបូចា/ សុវណ្ណ ស្រីពេជ្រ
មន្រ្តីនៃខុទ្ទកាល័យនាយករដ្ឋមន្រ្តីពិនិត្យនិងទទួលញត្តិពីកូដករណាហ្គាវើលដ៍។ រូបថតនៅថ្ងៃ ទី២០ ខែមិថុនា ឆ្នាំ២០២២។ ខេមបូចា/ សុវណ្ណ ស្រីពេជ្រ

កូដករណាហ្គាវើលដ៍ប្រមាណជាង១០០នាក់នាព្រឹកថ្ងៃទី២០ ខែមិថុនានេះ បានយក​ញត្តិ​ទៅ​ដាក់នៅខុទ្ទកាល័យលោកនាយករដ្ឋមន្រ្តីហ៊ុន សែន និងរដ្ឋសភាជាតិ ដើម្បីស្នើសុំកិច្ច​អន្តរាគមន៍​ពីស្ថាប័នទាំងពីរ ដោយពួកគេអះអាងថាក្រសួងការងារហៅចរចា១១ដងមកហើយ តែមិនមានលទ្ធផលជាផ្លែផ្កា។

បើតាមថ្នាក់ដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា​ ឈឹម ស៊ីថរ ប្រាប់ឱ្យដឹងថាពួកគេពិតជាមានសេចក្ដីរំពឹងយ៉ាងមុតមាំថា វិវាទការងារ​ដ៏​រុំារ៉ៃរបស់ពូកគេនឹងរកបានដំណោះស្រាយ តាមរយៈញត្តិដែលពួកគេដាក់ទៅនាយករដ្ឋមន្រ្តី និងរដ្ឋសភា។

កញ្ញាអះអាងថា៖ «ប្រាកដជារំពឹងហើយ បើមិនរំពឹងយើងមិនមករកសម្ដេចទេ ព្រោះយើង​ឃើញថាមុនទៅដល់លោកយើងប្រើប្រាស់អស់និតិវិធី។ យើងឃើញមានស្ថាប័នផ្សេងៗ​ចូលរួមដែរ តែមិនទាន់មានដំណោះស្រាយ ចឹងវាដល់ពេលវេលាគួរសម ប្រហែលទាល់តែ​សម្ដេចបានដោះស្រាយបញ្ហានឹងបាន»។

កញ្ញាបញ្ជាក់ថា មូលហេតុនៃការដាក់ញត្តិទៅនាយករដ្ឋមន្រ្តី និងរដ្ឋសភា គឺមានគោលបំណង​ធំៗ​៣ គឺទីមួយ ស្នើឱ្យក្រុមហ៊ុនទទួលយកបុគ្គលិកឱ្យចូលធ្វើការវិញ ទីពីរ ទូទាត់ប្រាក់សំណង​ឱ្យបានត្រឹមត្រូវ និងទម្លាក់ចោលការចោទលើថ្នាក់ដឹកនាំសហជីព និងសកម្មជនសហជីព​ទាំង​១៥រូប។

មេដឹកនាំសហជីពថ្លែងថា៖ «យើងខ្ញុំស្នើសម្តេចមេត្តាជួយអន្តរាគមន៍ដោះស្រាយវិវាទការងារ នៅ​ក្រុមហ៊ុនណាហ្គាវើលដ៍ ដោយការទទួលយកបុគ្គលិកដែលនៅសេសសល់​ត្រឡប់ចូល​ធ្វើ​ការ និងទូទាត់សំណងឲ្យបានត្រឹមត្រូវតាមច្បាប់ស្តីពីការងារ និង ទម្លាក់ចោល ការចោទ​ប្រកាន់​លើថ្នាក់ដឹកនាំសហជីព និងសកម្មជនសហជីពទាំង ១៥រូប»។

កញ្ញា ស៊ីថរ បន្តថា មូលហេតុដែលពួកគេដាក់ញត្តិទៅស្ថាប័នខាងលើ ក៏ដោយសារតែ​ក្រសួងការងារមិនបានដោះស្រាយវិវាទការងារនេះ ដោយតម្លាភាព និងប្រសិទ្ធិភាពឡើយ ព្រោះតំណាងកម្មករ បានចូលរួមកិច្ចប្រជុំរៀបចំដោយក្រសួងការងារចំនួន ១១លើករួចមក ក៏ប៉ុន្តែមិនទទួលបានដំណោះស្រាយណាមួយអាចទទួលយកបានឡើយពីកិច្ចប្រជុំនេះទេ។

កញ្ញាថ្លែងថា៖ «ពួកខ្ញុំចូលរួមប្រជុំ១១ដងតាំងពីពួកខ្ញុំត្រូវបានដោះលែង គឺអត់បានដោះស្រាយ​អីក្រៅ​​ពីឱ្យកម្មករយកលុយទេ ហើយបញ្ហាដែលបង្ខំឱ្យកម្មករយកលុយដោយ​មិនគិតពី​សេរីភាព​សហជីពរបស់គាត់[កម្មករ] នឹងហើយបានកើតជារឿងដល់ថ្ងៃហ្នឹង»។

កញ្ញា ស៊ីថរ​ ប្រាប់ទៀតថា មូលហេតុដែលកម្មករមិនព្រមទទួលយកសំណង គឺដោយសារ​ទាក់ទង​នឹងសេរីភាពសហជីព គ្មានសហជីពនៅកន្លែងធ្វើការ ដូច្នេះការបញ្ឈប់ការ​ដឹកនាំ​សហជីព សកម្មជនសហជីពហើយក្រសួងការងារសម្របសម្រូលឱ្យកម្មករទទួលយក​សំណង មិនអាចជាដំណោះស្រាយទេ ព្រោះវាប៉ះពាល់ដល់សេរីភាពសហជីព​ និងសិទ្ធិការងារ។

ក្រុមកូដករណាហ្គាវើលដ៍ខ្លះអង្គុយ ខ្លះឈរ ខណៈ​ចរចា​ជាមួយអាជ្ញាធរក្រោមកំដៅថ្ងៃ មុនអាជ្ញាធរអនុញ្ញាតឱ្យដើរទៅដាក់ញត្តិនៅរដ្ឋសភា។ រូបថតនៅថ្ងៃទី២០ ខែមិថុនា ឆ្នាំ២០២២។ ខេមបូចា/ សុវណ្ណ ស្រីពេជ្រ

ខេមបូចា មិនទទួលបានការឆ្លើយតបពីអ្នកនាំពាក្យក្រសួងការងារលោក ហេង សួរ ឡើយ នៅថ្ងៃចន្ទនេះ។ តែលោកធ្លាប់មានប្រសាសន៍ថា ការរាំងស្ទះជុំវិញ​ការ​ដោះស្រាយវិវាទការងារ​នេះបណ្ដាលមកពីភាគីវិវាទមិនបានអនុវត្តតាមនីតិវិធីដោះស្រាយ​វិវាទ មិនមែនមកពីការ​អសមត្ថភាពរបស់ក្រសួងឡើយ។

នៅម៉ោងប្រមាណ៩ព្រឹក គេសង្កេតឃើញថា កូដករជាង១០០នាក់បានជួបជុំគ្នានៅលើ​សួនច្បារ​វត្តបុទុម ដើម្បីយកញត្តិទៅដាក់នៅខុទ្ទកាល័យនាយករដ្ឋមន្រ្តី។ បន្ទាប់ពីតំណាង​ខាង​ខុទ្ទកាល័យបានទទួលញត្តិហើយ ក្រុមកូដករបានបន្តដំណើរទៅដាក់ញត្តិនៅរដ្ឋសភា ប៉ុន្តែដើរបានបន្តិច ក្រុមអាជ្ញាធរ មានទាំងក្រុមរក្សាសណ្ដាប់ធ្នាប់ខណ្ឌ បានរារាំងមិនឱ្យពួកគេ​បន្តដំណើរ​ទៅរដ្ឋសភាឡើយ ដោយអាជ្ញាធរសំអាងថាខ្លាចប៉ះពាល់សណ្ដាប់ធ្នាប់សាធារណៈ ដោយអនុញ្ញាតឱ្យទៅតែ១០នាក់។

បើតាមមន្រ្តីរដ្ឋាភិបាលម្នាក់ស្លៀកពាក់ស៊ីវិលមិនបានប្រាប់ឈ្មោះ ចេញមកនិយាយ​ជាមួយ​ក្រុមកូដករថា៖ «តំណាងប្អូន១០នាក់ អាចទៅដាក់[ញត្តិ]ទៅ ឬឱ្យសមាជិកសភា​មកទទួល​ញត្តិនៅនេះក៏បានដែរ។ ទោះបីក្នុងការដើរហើរនេះគឺលើចញ្ចើមផ្លូវ ទ្រូងផ្លូវ ដែលធ្វើឱ្យយើង​មើលទៅមិនយល់យោគការរៀបចំ ពូក៏មិនចង់ប៉ះទង្គិច»។

តែយ៉ាងណាមិញ បន្ទាប់ពីក្រុមកម្មករបានចរចាជាមួយអាជ្ញាធរអស់រយៈពេល ៣០នាទីនៅ​កណ្ដាលថ្ងៃក្ដៅចែស លើសួនច្បារវត្តបុទុម អាជ្ញាធរក៏បានយល់ព្រមឱ្យ​ក្រុមកូដករដើរទៅដាក់​ញត្តិទៅរដ្ឋសភា។

លោក សរ ចំរ៉ុង  ប្រធានគណៈកម្មាការ សិទ្ធិមនុស្ស ទទួលពាក្យបណ្តឹង អង្កេត ទំនាក់ទំនង​រដ្ឋសភា ព្រឹទ្ធសភា នៃរដ្ឋសភា បានថ្លែងប្រាប់ខេមបូចា ថា លោកមិនមាន​សមត្ថភាព​ក្នុងការ​ដោះស្រាយវិវាទនេះទេ។

លោក ចំរ៉ុង បន្តថា មន្រ្តីរបស់លោកបានទទួលញត្តិរបស់កូដកររួចហើយ ដូច្នេះស្អែកនេះ​លោកនិងក្រុមការងារ នឹងពិនិត្យមើលខ្លឹមសារនៃញត្តិ ហើយចាត់ចែងទៅតាមនីតិវិធី។

លោកបន្តថា៖ «ខ្ញុំយល់ឃើញថាខ្ញុំក៏មិនមានសមត្ថភាពឯណាទៅដោះស្រាយដែរ អាហ្នឹងវាជា​សមត្ថកិច្ចរបស់ក្រសួងការងារទៅតាមច្បាប់ការងារណា៎។ ហើយបើថាមិនត្រូវគ្នា​មានតែប្ដឹង​តុលាការ មិនចឹង?»។

នៅពេលដែលអ្នកសារព័ត៌មានសួរថា វិវាទនេះអូសបន្លាយយូរមកហើយ តើក្រសួងការងារ និងអ្នកពាក់ព័ន្ធអាចបញ្ចប់បញ្ហានេះចប់ឆាប់ៗទេ?

លោកចំរ៉ុង មានប្រសាសន៍បន្ថែមថា៖ «វាមានអ្នកអុជពីក្រោយដោះម៉េចកើត។ វាមានអ្នក​ក្ដិចក្ដិត​ពីក្រោយ គេចិញ្ចឹមទំនាស់ឱ្យវារុំារ៉ៃ បើចឹងមិនងាយទេ»។

ដោយឡែក លោក នៅ រ៉ា មន្រ្តីនៃខុទ្ទកាល័យនាយករដ្ឋមន្រ្តី ថ្លែងយ៉ាងខ្លីថា ជុំវិញការដាក់​ញត្តិ​របស់ក្រុមកូដករ ខាងលោកបានទទួលហើយ ហើយមន្រ្តីជំនាញនឹងចាត់ចែង​ទៅ​តាម​ជំនាញ។

ក្រុមកូដករណាហ្គាវើលដ៍បន្តដំណើរទៅដាក់ញត្តិនៅរដ្ឋសភា បន្ទាប់ពីចរចាជាមួយ​អាជ្ញាធរអនុញ្ញាតរួច។ រូបថតនៅថ្ងៃទី២០ ខែមិថុនា ឆ្នាំ២០២២។ ខេមបូចា/ សុវណ្ណ ស្រីពេជ្រ

អ្នកស្រី អ៊ូ ទេពផល្លីន ប្រធានសហព័ន្ធសហជីពកម្មករចំណីអាហារ និងសេវាកម្មកម្សាន្ត​កម្ពុជា ដែលឃ្លាំមើលដំណើរការដាក់ញត្តិ បានលើកឡើងថា នៅពេលដែលពលរដ្ឋមិនអាច​ប្រើប្រាស់សិទ្ធិជាមូលដ្ឋានបាន អ្នកស្រីចាត់ទុកមិនមែនជាសន្តិភាពទេ ព្រោះពាក្យសន្តិភាព​មិនអាចស្ដែងចេញត្រឹមតែការអភិវឌ្ឍទេ សន្តិភាពគឺនៅពេលដែលពលរដ្ឋ ជាវណ្ណៈកម្មករ​ប្រើប្រាស់​សិទ្ធិជាមូលដ្ឋានជំរុញឱ្យនិយោជកគោរពសិទ្ធិកម្មក។

អ្នកស្រីថា៖«មានអំពើហិង្សាពីអាជ្ញាធរមកវិញ យើងឃើញថាទម្រង់ក្នុងស្ថានភាព​ស្រុកយើង​ក្នុងប្រទេសមួយដែលមានប្រជាធិបតេយ្យ​បិទមុខ ហើយសន្តិភាពក៏បិទមុខដែរនៅពេល​ដែល​វណ្ណៈកម្មករត្រូវបានគេរំលោភបំពានមួយតង់ហើយមួយតង់ទៀត»។

ចំណែកលោកឃុន ថារ៉ូ ប្រធានគ្រប់គ្រងកម្មវិធីនៃអង្គការសង់ត្រាល់ បានលើកឡើងថា កន្លង​មកខាងអង្គការសង្គមស៊ីវិលធ្លាប់បានយកញត្តិទៅដាក់នៅរដ្ឋសភាម្ដងហើយ ដើម្បីសុំការ​អន្តរាគមន៍ចំពោះវិវាទការងារនៅក្រុមហ៊ុនណាហ្គាវើលដ៍តែមិនទទួលបានលទ្ធផល។

លោករំពឹងថា បញ្ហារបស់កម្មករនឹងទៅដល់ដៃនាយករដ្ឋមន្រ្តី  ព្រោះអ្នកដែលមាន​ឥទ្ធិពល​ក្នុងការដោះស្រាយវិវាទនេះបាន គឺមានតែនាយករដ្ឋមន្រ្តីទេ ខណៈក្រសួងការងារ​គ្មាន​ឥទ្ធិពលក្នុងការបិទបញ្ចប់វិវាទការងារនេះ។

លោកថ្លែងថា៖ «បើសិនជានាយករដ្ឋមន្រ្តីមានគោលការណ៍ក្នុងការដោះស្រាយវិវាទនេះ គឺវិវាទនេះអាចបិទបញ្ចប់បា​ន ព្រោះកូនសោរអ្នកដែលមានឥទ្ធិពល មានអំណាច​ក្នុងការ​សម្រេច​ឱ្យភាគីទទួលយក ខ្ញុំគិតថាមានតែនាយករដ្ឋមន្រ្តីហ្នឹងហើយ ដោយសាររដ្ឋមន្រ្តី​ក្រសួងការងារមិនមានឥទ្ធិពល មិនមានអំណាចក្នុងការបិទបញ្ចប់វិវាទការងារនេះ»។

សូមជម្រាបជូនថា ក្រុមហ៊ុនណាហ្គាវើលដ៏បានបញ្ឈប់កម្មករនិយោជិត​រួមទាំងថ្នាក់ដឹកនាំ​សហជីព និងប្រតិភូបុគ្គលិកចំនួន១ ​៣២៩នាក់ កាលពីខែមេសា ឆ្នំា២០២១ ក្រោមហេតុផល​រងវិបត្តិកូវីដ១៩។​

ទន្ទឹមនឹងនេះ មេដឹកនាំសហជីព និងសកម្មជនចំនួន១៥នាក់ ត្រូវបានតុលាការចោទប្រកាន់​ពីបទញុះញង់បង្ករភាពវឹកវរក្នុងសង្គម ហើយរហូតមកដល់ពេលនេះ​ថ្វីបើពួកគេត្រូវបាន​តុលាការសម្រេចឱ្យនៅក្រៅឃុំក៏ពិតមែន តែតុលាការមិនទាន់ទំលាក់បទចោទប្រកាន់​មក​លើពួកគេនៅឡើយទេ៕

222 views

ព័ត៌មានទាក់ទង

ព័ត៌មានថ្មី

អត្ថបទពេញនិយម