សមាគមសម្ព័ន្ធអ្នកសារព័ត៌មានកម្ពុជា

រដ្ឋសភាអនុម័តវិសោធនកម្មច្បាប់បោះឆ្នោត

រដ្ឋសភាកំពុងប្រជុំនៅព្រឹកថ្ងៃទី២៣ ខែមិថុនា ដើម្បីពិភាក្សាលើវិសោធនកម្មច្បាប់បោះឆ្នោត ដែលតម្រូវឱ្យបេក្ខជនដែលឈរឈ្មោះឱ្យបោះឆ្នោត ត្រូវបោះឆ្នោតឱ្យបានពីរអាណត្តិជាប់គ្នា ដើម្បីមានលក្ខណៈសម្បត្តិគ្រប់គ្រាន់សម្រាប់តំណែង។ (CamboJA/ ព្រីង សំរាំង)
រដ្ឋសភាកំពុងប្រជុំនៅព្រឹកថ្ងៃទី២៣ ខែមិថុនា ដើម្បីពិភាក្សាលើវិសោធនកម្មច្បាប់បោះឆ្នោត ដែលតម្រូវឱ្យបេក្ខជនដែលឈរឈ្មោះឱ្យបោះឆ្នោត ត្រូវបោះឆ្នោតឱ្យបានពីរអាណត្តិជាប់គ្នា ដើម្បីមានលក្ខណៈសម្បត្តិគ្រប់គ្រាន់សម្រាប់តំណែង។ (CamboJA/ ព្រីង សំរាំង)

រដ្ឋសភាបានអនុម័តវិសោធនកម្មច្បាប់បោះឆ្នោត នៅព្រឹកថ្ងៃទី២៣ ខែមិថុនា ដែលច្បាប់នេះ​តម្រូវ​ឱ្យបុគ្គលម្នាក់មានកាតព្វកិច្ចបោះឆ្នោតពីរលើកជាប់គ្នា ដើម្បីមានសិទ្ធិឈរ​ជា​បេក្ខជន ដែលចំណាត់ការមួយនេះហាក់ដូចជាប្រតិកម្ម​ទៅនឹងការអំពាវនាវ​ឱ្យធ្វើពហិកា​ការ​បោះ​ឆ្នោត​ខែកក្កដា។

ក្នុង​សុន្ទរកថា​មួយ លោកនាយករដ្ឋមន្ត្រី ហ៊ុន សែន កាល​ពី​សប្តាហ៍​មុន​បាន​ស្នើ​ឱ្យ​រដ្ឋាភិបាល​របស់​លោក​ធ្វើ​វិសោធនកម្ម​ច្បាប់​បោះឆ្នោត ដើម្បី​ធ្វើ​ឱ្យ​មាន​ការ​ចាំបាច់​សម្រាប់​ប្រជាពលរដ្ឋ​ដែល​ចង់​ឈរ​ឈ្មោះ​ជា​សាធារណៈ​ ត្រូវ​បោះឆ្នោត​យ៉ាង​ហោច​ណាស់​ពីរ​អាណត្តិ​ជាប់​គ្នា។ លោកបាន​ពន្យល់​ថា ប្រសិនបើនរណាម្នាក់ចង់ឈរឈ្មោះជាបេក្ខជន​ក្នុងការបោះឆ្នោតជាតិ​ឆ្នាំ២០២៨ ពួកគេត្រូវតែបង្ហាញថា ពួកគេបានបោះឆ្នោតនៅ​ក្នុងការបោះឆ្នោតថ្នាក់ជាតិឆ្នាំ​២០២៣ និង២០២៧។

ការផ្លាស់ប្តូរនេះទំនងជាត្រូវបានជំរុញដោយអ្នកគាំទ្រគណបក្សប្រឆាំងដែលប្រកាសថាពួកគេនឹងមិនបោះឆ្នោតនៅក្នុងការបោះឆ្នោត​ខែកក្កដាបន្ទាប់ពីគណបក្សភ្លើងទៀន ត្រូវបានដកសិទ្ធិ​ដោយសារកង្វះឯកសារនៅក្នុងពាក្យសុំបេក្ខជនរបស់ពួកគេ។ ក្នុង​ឆ្នាំ​២០១៨ អ្នកគាំទ្រ​គណបក្ស​​សង្គ្រោះ​ជាតិ​ក៏​បាន​អំពាវនាវ​ឱ្យ​ធ្វើ​ពហិកា​ការ​បោះឆ្នោត​ដែល​ជា​ផ្នែក​នៃ​យុទ្ធនាការ «ម្រាមដៃស្អាត» របស់​ពួកគេ។

រដ្ឋសភា ទោះបី​មិន​ត្រូវ​សម័យ​ប្រជុំ​ក៏ដោយ ក៏​ត្រូវ​បាន​កោះប្រជុំ​ជាថ្មី​នៅ​ថ្ងៃ​នេះ ដើម្បី​បោះឆ្នោត​​លើ​សេចក្តីព្រាង​វិសោធនកម្ម​ច្បាប់​ចំនួន៤ផ្សេង​គ្នា​។ ច្បាប់​ទាំង​នោះ​គឺ​ជា​ច្បាប់​សម្រាប់​ការ​បោះឆ្នោត​ជ្រើស​តាំង​សមាជិក​រដ្ឋសភា សមាជិក​ព្រឹទ្ធសភា ក្រុមប្រឹក្សា​ឃុំ-សង្កាត់ និង​សមាជិក​ក្រុម​ប្រឹក្សា​ស្រុក-ខេត្ត។

សមាជិកសភា១១១រូបរបស់គណបក្សប្រជាជនកម្ពុជា បានបោះឆ្នោតអនុម័តលើវិសោធនកម្ម​ច្បាប់បោះឆ្នោត ដែលច្បាប់នេះនឹងត្រូវបញ្ជូនទៅព្រឹទ្ធសភាដើម្បីអនុម័តបន្ត។

លោក ស ខេង រដ្ឋមន្ត្រីក្រសួងមហាផ្ទៃ បានមានប្រសាសន៍កំឡុងពេលប្រជុំដើម្បីអនុម័ត​វិសោធនកម្ម​ច្បាប់បោះឆ្នោតនៅរដ្ឋសភាថា វិសោធនកម្មច្បាប់នៅពេលនេះ​គឺត្រូវបានធ្វើទ្បើង​ក្នុងគោលបំណងការពារដំណើរការនៃការបោះឆ្នោតពីផែនការ​ ឬឧបាកលនយោបាយនាៗ​ក្នុងការប៉ុនប៉ងបំផ្លាញការបោះឆ្នោត។ លោកបន្តថា ជារួមលោកសុំឯកភាពទាំងស្រុង​នូវ​ខ្លឹមសារ​ និងរបាយការណ៍​ដែលបានលើកទ្បើងរបស់គណកម្មការនីតិកម្ម និងយុត្តិធម៌។

លោក ស​ខេង បានថ្លែងថា៖ «ការធ្វើវិសោធនកម្មនេះក៏នឹងរួមចំណែកលើកស្ទួយគុណតម្លៃ​នៃលទ្ធិប្រជាធិបតេយ្យ សេរីពហុបក្ស​ដែលមានចារិកក្នុងរដ្ឋធម្មនុញ្ញដែលជាច្បាប់កំពូល​របស់​ជាតិ ដូចជា រួមចំណែក​លើកកម្ពស់ក្នុងការទទួលខុសត្រូវរបស់អ្នកដឹកនាំនយោបាយ​ដែល​មាន​បំណងឈរឈ្មោះឱ្យគេបោះឆ្នោតក្នុងការគោរពករណីយកិច្ចរបស់ខ្លួនជាពលរដ្ឋល្អក្នុង​សង្គម»

សេចក្តី​ព្រាង​ច្បាប់​ដែល​ដាក់​នៅ​ចំពោះ​មុខ​រដ្ឋសភា​រួម​មាន​ការ​ធ្វើ​វិសោធនកម្ម​មាត្រា​ចំនួន៨។ មាត្រា២៣ នៃច្បាប់ស្តីពីការបោះឆ្នោតជ្រើសតាំងតំណាងរាស្រ្ត និងមាត្រា១៣ នៃច្បាប់ស្តី​ពីការ​​បោះឆ្នោត​​ជ្រើសតាំងសមាជិកព្រឹទ្ធសភា នឹងត្រូវធ្វើវិសោធនកម្ម ដើម្បីតម្រូវឱ្យ​បុគ្គល​ម្នាក់​បានទៅបោះឆ្នោតចំនួនពីរលើក មុននឹងអាចដាក់សំណើ​ជាបេក្ខភាពឈរឈ្មោះឱ្យ​គេ​បោះ​ឆ្នោតឱ្យ។

ច្បាប់ដែលទាក់ទងនឹងព្រឹទ្ធសភាមានឃ្លា «ការផ្លាស់ប្តូរ» មួយសម្រាប់ការបោះឆ្នោត​ព្រឹទ្ធសភា​ឆ្នាំ 2024 ដែលបេក្ខជនត្រូវបង្ហាញថា ពួកគេបានបោះឆ្នោតនៅក្នុង «ការបោះឆ្នោតចុង​ក្រោយ» ដែលទំនងជាសំដៅដល់ការបោះឆ្នោតខែកក្កដាខាងមុខនេះ។

មាត្រា៣៥នៃច្បាប់បោះឆ្នោតឃុំសង្កាត់ និងមាត្រា១៥នៃច្បាប់បោះឆ្នោតជ្រើសរើស​ក្រុមប្រឹក្សា​ខេត្ត ក្រុង នាពេលនេះ នឹងតម្រូវឱ្យបេក្ខជនដែលបានបោះឆ្នោតនៅក្នុង «ការបោះឆ្នោតចុង​ក្រោយ» ដើម្បីមានសិទ្ធិឈរឈ្មោះជាបេក្ខជន។

វា​មិន​ច្បាស់​ថា ​ច្បាប់​នេះ​មាន​ន័យ​យ៉ាង​ណា​ចំពោះ​ការ​បោះឆ្នោត​លើក​មុន ដោយ​រដ្ឋលេខាធិការ​​ក្រសួង​មហាផ្ទៃ លោក ប៊ុន ហុន បាន​បង្វែរ​សំណួរ​ទៅ​ក្រសួង​យុត្តិធម៌ និង​លោក ជិន ម៉ាលីន អ្នក​នាំពាក្យ​ក្រសួង​យុត្តិធម៌ ដោយ​និយាយ​ថា លោក​នឹង​ពន្យល់​ពី​ការ​ធ្វើ​វិសោធនកម្ម​បន្ទាប់​ពី​បាន​អនុម័ត។

ប្រជាពលរដ្ឋ​កម្ពុជា​បោះឆ្នោត​តែ​ក្នុង​ការ​បោះឆ្នោត​ជាតិ និង​ឃុំ​សង្កាត់ ចំណែក​សមាជិក​ព្រឹទ្ធសភា និង​សមាជិក​ក្រុមប្រឹក្សា​ស្រុក និង​ខេត្ត​ត្រូវ​បាន​បោះឆ្នោត​ដោយ​ប្រយោល។

វិសោធនកម្មនេះក៏ណែនាំពាក្យ «ញុះញង់» ដែលជាការចោទប្រកាន់​ដោយ​រដ្ឋាភិបាល​ជាញឹកញាប់ ថាជាសកម្មភាពរារាំងការបោះឆ្នោត។ ពាក្យ​នេះ​ត្រូវ​បាន​បញ្ចូល​ទៅ​ក្នុង​មាត្រា​ក្នុង​ច្បាប់​បោះឆ្នោត​រដ្ឋសភា និង​ក្រុម​ប្រឹក្សា​ឃុំ​សង្កាត់។ ក្រៅ​ពី​ការ​ផាក​ពិន័យ​ដែល​មាន​ស្រាប់ មាត្រា​នេះ​អាច​ប្រើ​ដើម្បី​ហាម​មិន​ឱ្យ​មនុស្ស​បោះឆ្នោត​រយៈពេល​ប្រាំ​ឆ្នាំ។

267 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម