រដ្ឋសភាបានប្រកាសសុពលភាពតំណាងរាស្ត្រថ្មីចំនួន១២៥រូប បន្ទាប់ពីព្រះមហាក្សត្រ ព្រះបាទ នរោត្តម សីហមុនី នៅថ្ងៃចន្ទនេះ បានយាងបើកសម័យប្រជុំដំបូងនៃសភា នីតិកាលទី៧។
ប្រធានរដ្ឋសភាចាំផ្ទះ លោក ហេង សំរិន បានដឹកនាំសម័យប្រជុំ ដើម្បីប្រកាសសុពលភាពដល់តំណាងរាស្រ្ត១២០រូបមកពីគណបក្សកាន់អំណាច និងតំណាងរាស្រ្ត៥រូប មកពីគណបក្សរាជានិយមហ៊្វុនស៊ិនប៉ិច និងបានអនុម័តបទបញ្ជាផ្ទៃក្នុងរដ្ឋសភា។
តំណាងរាស្រ្តទាំង១២៥រូប ត្រូវបានបោះឆ្នោតជ្រើសរើស ហើយនឹងធ្វើសច្ចាប្រណិធាននៅព្រះបរមរាជវាំងនៅពេលរសៀលនេះ បើតាមអ្នកនាំពាក្យ លោក ឡេង ប៉េងឡុង បានអានរបៀបវារៈ។
លោក ប៉េងឡុង បានបន្ថែមថា រដ្ឋសភានឹងត្រូវបោះឆ្នោតនៅថ្ងៃអង្គារ ទី២២ ដើម្បីជ្រើសរើសថ្នាក់ដឹកនាំរបស់រដ្ឋសភា និងបោះឆ្នោតគាំទ្រលោកនាយករដ្ឋមន្ត្រី ហ៊ុន ម៉ាណែត សម្រាប់រដ្ឋាភិបាលអាណត្តិទី៧នេះ ដែលអាចនឹងអនុម័តគណៈរដ្ឋមន្ត្រីថ្មីរបស់គាត់ ដែលភាគច្រើននៃការគ្រប់គ្រងរបស់គាត់គឺជាថ្នាក់ដឹកនាំថ្មីដើម្បីកាន់តំណែងរដ្ឋមន្ត្រី។
លោក ហេង សំរិន បានប្រកាសថា រដ្ឋសភានឹងជ្រើសរើសប្រធានសភាថ្មី និងអនុប្រធានរដ្ឋសភាចំនួនពីររូប ហើយប្រកាសជ្រើសរើសគណៈកម្មការថ្មីចំនួន១០នៃរដ្ឋសភា ហើយបោះឆ្នោតគាំទ្ររដ្ឋាភិបាលថ្មីនៅថ្ងៃអង្គារ ទី២២ ខែសីហា ឆ្នាំ២០២៣។
លទ្ធផលបោះឆ្នោតជាតិថ្មីៗនេះ គណបក្សប្រជាជនកម្ពុជាដណ្តើមបានអាសនៈរដ្ឋសភាចំនួន ១២០អាសនៈ ខណៈ៥អាសនៈទៀតបានទៅគណបក្សរាជានិយមហ៊្វុនស៊ិនប៉ិច។
ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រឹកថ្ងៃទី២១ ខែសីហា ឆ្នាំ២០២៣ ព្រះអង្គបានសព្វព្រះរាជហឫទ័យ យាងជាព្រះរាជាធិបតីភាពដ៏ខ្ពង់ខ្ពស់បំផុតក្នុងពិធីបើកសម័យប្រជុំដំបូងរដ្ឋសភានីតិកាលទី៧ ដោយមានវត្តមានរបស់ឥស្សរជនជាថ្នាក់ដឹនាំស្ថាប័នជាតិសំខាន់ៗ អង្គទូតនានាប្រចាំព្រះរាជាណាចក្រកម្ពុជា និងវត្តមានបេក្ខជនជាប់ឆ្នោតជាតំណាងរាស្ត្រក្នុងនីតិកាលទី៧ នៃរដ្ឋសភាទាំង១២៥រូប។
នៅក្នុងឱកាសដ៏មហានក្ខតឫក្សថ្លៃថ្លានេះ ព្រះករុណាព្រះបាទ នរោត្តម សីហមុនី បានមានព្រះរាជបន្ទូលថា ថ្ងៃនេះជាឱកាសដ៏មហាវិសេសវិសាល ដែលរដ្ឋសភា នីតិកាលទី៧ ប្រារព្ធបើកសម័យប្រជុំដំបូងរបស់ខ្លួន ស្របទៅតាមកាលកំណត់របស់រដ្ឋធម្មនុញ្ញ បន្ទាប់ពីតំណាងរាស្ត្រទាំងអស់ត្រូវបានជ្រើសតាំងដោយការបោះឆ្នោត កាលពីថ្ងៃទី២៣ ខែកក្កដា ឆ្នាំ២០២៣កន្លងទៅនេះ ។
ព្រះករុណា បានមានព្រះរាជបន្ទូលបន្តថា រដ្ឋសភាដែលជាអង្គការមានអំណាចនីតិប្បញ្ញត្តិ នឹងបន្តបំពេញភារកិច្ចរបស់ខ្លួនដូចមាន កំណត់ក្នុងរដ្ឋធម្មនុញ្ញ និងច្បាប់ជាធរមាន ដើម្បីបន្តនិរន្តរភាពនយោបាយ សេដ្ឋកិច្ចសង្គម វប្បធម៌ កសាងព្រះរាជាណាចក្រកម្ពុជា ជារដ្ឋដ៏រឹងមាំ និងជឿនលឿន ដោយផ្អែកលើច្បាប់ ធានាការអនុវត្តច្បាប់ដោយស្មើភាពសម្រាប់ប្រជាពលរដ្ឋគ្រប់រូប និងធានាការពារលើកស្ទួយ សិទ្ធិសេរីភាពគ្រប់បែបយ៉ាងរបស់ប្រជាពលរដ្ឋ។
ព្រះបាទ នរោត្តម សីហមុនី ទ្រង់មានព្រះបន្ទួលនៅក្នុងព្រះរាជលិខិតថា៖ «តំណាងរាស្ត្រក្នុងរដ្ឋសភា ជាតំណាងប្រជាជាតិខ្មែរទាំងមូល ធ្វើយ៉ាងណាខិតខំប្រឹងប្រែងបន្ថែមទៀត ជួយប្រជាពលរដ្ឋឲ្យរស់នៅបានស្មើភាពគ្នាក្នុងជំនឿសាសនា ការសិក្សារៀនសូត្រ ការមានការងារធ្វើសមរម្យទៅតាមកម្លាំងសមត្ថភាព និងកម្រិតវិជ្ជារបស់ខ្លួន»។
ព្រះករុណា បានបង្ហាញនូវជំនឿយ៉ាងមុតមាំថា៖ «រាជរដ្ឋាភិបាលកម្ពុជាអាណត្តិថ្មី ដែលនឹងទទួលការទុកចិត្តពីរដ្ឋសភា នឹងបំពេញភារកិច្ចតាមគោលនយោបាយ បន្តជំរុញកំណើនសេដ្ឋកិច្ច លើកកម្ពស់កម្រិតជីវភាពប្រជាពលរដ្ឋ បន្តអភិវឌ្ឍ និងពង្រឹងប្រព័ន្ធការពារសង្គម ដែលមានវិសាលភាពគ្របដណ្តប់ ប្រជាពលរដ្ឋគ្រប់រូប ទាំងការអភិរក្ស និងអភិវឌ្ឍវប្បធម៌ដោយចីរភាព ដើម្បីធានាអត្ថិភាពដ៏រឹងមាំនៃអត្តសញ្ញាណជាតិ ជំរុញការអភិវឌ្ឍសេដ្ឋកិច្ចសង្គម ស្របគ្នានឹងការលើកកម្ពស់សីលធម៌ សម្រាប់ភាពសុខដុមនៃសង្គមជាតិ»៕
