កាលពីថ្ងៃពុធ រដ្ឋសភាបានបោះឆ្នោតផ្តល់សេចក្តីទុកចិត្តសមាសភាព សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) អាណត្តិថ្មីចំនួន៩រូប ខណៈមានការរិះគន់ពីអ្នកសង្កេតការណ៍នយោបាយថា គណៈកម្មាធិការជាតិរៀបចំការបោះឆ្នោតនេះ មិនអព្យាក្រិត្យ ឬគួរឱ្យជឿទុកចិត្តឡើយ។
លោក ប្រាជ្ញ ចន្ទ បន្តរក្សាតំណែងជាប្រធាន គ.ជ.ប ហើយលោកគឺជាបេក្ខភាពមកពីគណបក្សកាន់អំណាច ខណៈលោក ជឺ ចំណាន ជាអនុប្រធានមកពីគណបក្សហ៊្វុនស៊ិនប៉ិច ត្រូវបានសមាជិកសភាចំនួន១០១រូប បោះឆ្នោតគាំទ្រនៅក្នុងសម័យប្រជុំពេញអង្គកាលពីថ្ងៃពុធ។ រដ្ឋសភាមានសមាជិកសរុប ១២៥ រូប។
ក្នុងចំណោមសមាជិកដែលត្រូវបានតែងតាំងនោះ មានបួនរូបមកពីគណបក្សប្រជាជនកម្ពុជា បួនរូបមកពីគណបក្សហ៊្វុនស៊ិនប៉ិច ខណៈសមាជិកម្នាក់ទៀតគឺជាតំណាងមកពីអង្គការក្រៅរដ្ឋាភិបាល នេះបើតាមលោក ឡេង ប៉េងឡុង អ្នកនាំពាក្យរដ្ឋសភា។
សមាជិកទាំងបួនរូបមកពីគណបក្សប្រជាជនកម្ពុជាមានលោក ប្រាជ្ញា ចន្ទ លោក មាន សទិ លោក ឌឹម សុវណ្ណារុំ និងលោក សោម សូរីដា ចំណែកសមាជិកបួនរូបមកពីគណបក្សហ៊្វុនស៊ិនប៉ិចមានលោក ជឺ ចំណាន លោក ហេង ស៊ីឡេង លោក យិច សមិទ្ធិ និងលោក ហ៊ែល សារ៉ាត់ ខណៈលោក ហង្ស ពុទ្ធា គឺជាតំណាងមកពីអង្គការក្រៅរដ្ឋាភិបាលដែលត្រូវបានឯកភាពដោយគណបក្សទាំំងពីរ។
លោក ពុទ្ធា ដែលជាអ្នកនាំពាក្យ គ.ជ.ប ផងដែរបានច្រានចោលការរិះគន់ដែលថា គ.ជ.ប មិនឯករាជ្យ ដោយបញ្ជាក់ថា ការតែងតាំង និងការបោះឆ្នោតជ្រើសរើសសមាជិកថ្មី ធ្វើឡើងស្របតាមច្បាប់បោះឆ្នោត។
លោកមានប្រសាសន៍ថា៖ «ប្រសិនបើគណបក្សភ្លើងទៀនគ្មានអាសនៈនៅរដ្ឋសភា នោះមិនអាចក្លាយជាសមាជិកគណៈកម្មាធិការជាតិរៀបចំការបោះឆ្នោតបានទេ»។
លោកបន្ថែមថា៖ «ទាក់ទងនឹងសាធារណជន ពួកគាត់តែងតែលើកឡើងបែបនេះ [ គ.ជ.ប មិនអព្យាក្រិត្យ]។ វាមិនមែនជាលើកទីមួយទេ។ តាមពិតទៅ ការបោះឆ្នោតនៅកម្ពុជាបានប្រព្រឹត្តទៅដោយរលូន ហើយភាគីពាក់ព័ន្ធទទួលយក [លទ្ធផល] រួមទាំងសហគមន៍អន្តរជាតិផងដែរ»។
លោកមានប្រសាសន៍ថា យ៉ាងយូរប្រាំមួយខែក្រោយការបង្កើតរដ្ឋសភា គ.ជ.ប ត្រូវរៀបចំគណៈកម្មាធិការថ្មីមួយ និងស្វែងរកការយល់ព្រមពីរដ្ឋសភា។ យោងតាមមាត្រា៦ នៃច្បាប់ស្តីពីការរៀបចំ និងការប្រព្រឹត្តនៃគណៈកម្មាធិការជាតិរៀបចំការបោះឆ្នោត សមាជិកទាំង៩រូប រួមទាំងប្រធាន និងអនុប្រធាន ត្រូវតែមានសមាសភាពដែលត្រូវបានតែងតាំង និងជ្រើសរើសដោយគណបក្សនយោបាយដែលមានអាសនៈក្នុងរដ្ឋសភា។ សូមរំលឹកថា គណបក្សភ្លើងទៀនជាគណបក្សប្រឆាំងត្រូវបានដកសិទ្ធិមិនឲ្យចូលរួមប្រកួតក្នុងការបោះឆ្នោតជាតិឆ្នាំ២០២៣នេះទេ។
លោក អ៊ូ ច័ន្ទរ័ត្ន អនុប្រធានគណបក្សកំណែទម្រង់កម្ពុជា ជាសមាជិកសម្ព័ន្ធភាពឆ្ពោះទៅអនាគត មានប្រសាសន៍ថា សមាជិក គ.ជ.ប មិនឯករាជ្យទេ ដូច្នេះពួកគេបរាជ័យក្នុងការទទួលបានសេចក្តីទុកចិត្តពីសាធារណជន ដោយសារគណៈកម្មាធិការនេះ មានសមាជិកមកពីគណបក្សដដែល។
លោកមានប្រសាសន៍ថា៖ «ខ្ញុំនៅតែមើលឃើញថា គ.ជ.ប មានបញ្ហាដោយសារការជ្រើសរើសចេញពីគណបក្សនយោបាយ។ តិចឬច្រើន មានទំនោរទៅរកភាពលម្អៀងខាងនយោបាយ»។
លោក ច័ន្ទរ័ត្ន មានប្រសាសន៍ថា៖ «ខ្ញុំគិតថា អ្នកបោះឆ្នោតនឹងមិនទុកចិត្តសមាជិកមកពីគណបក្សហ៊្វុនស៊ិនប៉ិច ដោយសារពួកគេធ្លាប់ជាដៃគូជាមួយគណបក្សកាន់អំណាច ដូច្នេះពួកគេមកពីក្រុមតែមួយ»។
ដូច្នេះ លោកយល់ថា គ.ជ.ប មិនគួរជ្រើសរើសសមាជិកពីគណបក្សនយោបាយទេ ដោយបានបន្ថែមថា ពួកគេត្រូវកំណត់អាណត្តិរបស់ខ្លួន។
លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច បានបញ្ជាក់ថា សមាជិករបស់គណបក្សលោកត្រូវបានបោះឆ្នោតជ្រើសរើសចូលទៅក្នុង គ.ជ.ប ។
លោកបានមានប្រសាសន៍ថា៖ «យើងសង្ឃឹមថា អាណត្តិថ្មីដែលមានសមាជិកចម្រុះមកពីគណបក្សនយោបាយ និងមកពីអង្គការសង្គមស៊ីវិលនឹងបម្រើផលប្រយោជន៍របស់ស្ថាប័ននេះទាក់ទងនឹងដំណើរការបោះឆ្នោតប្រកបដោយសេរី និងយុត្តិធម៌»។
ស្របពេលជាមួយគ្នានេះដែរ លោក កន សាវាង្ស អ្នកសម្របសម្រួលកម្មវិធីឃ្លាំមើលការបោះឆ្នោត និងតស៊ូមតិនៃអង្គការខុមហ្វ្រែល មានប្រសាសន៍ថា អង្គការរបស់លោកនឹងតាមដានថា តើ គ.ជ.ប បំពេញតួនាទីរបស់ខ្លួនដោយអព្យាក្រឹត្យក្នុងការបម្រើប្រជាពលរដ្ឋ និងប្រទេសជាតិដែរឬទេ។
លោកបានមានប្រសាសន៍ថា៖ «ការជឿទុកចិត្តមិនអាស្រ័យលើសមាសភាពនៃគណៈកម្មាធិការនោះទេ ប៉ុន្តែផ្អែកលើការអនុវត្តជាក់ស្តែងថា តើសមាជិកថ្មីហ៊ានប្រឈមមុខ និងពិនិត្យមើលនីតិវិធី [មិនប្រក្រតី] ពីមុនទេ» ដោយលោកលើកឡើងពីទម្រង់ ១១០២ ដែលសរុបដំណើរការរាប់សន្លឹកឆ្នោត រួមទាំងសន្លឹកឆ្នោតដែលមិនបានការផងដែរ។
មុនការបោះឆ្នោតឆ្នាំ២០១៨ គ.ជ.ប បានអនុញ្ញាតឱ្យចែកទម្រង់ ១១០២ ដល់ភ្នាក់ងារគណបក្សនយោបាយ បន្ទាប់ពីបញ្ចប់ការរាប់សន្លឹកឆ្នោតនៅតាមការិយាល័យបោះឆ្នោត ប៉ុន្តែទម្រង់ទាំងនេះមិនត្រូវបានចែកចាយដោយផ្ទាល់ទៀតទេ។
លោក សាវាង្ស មានប្រសាសន៍បន្ថែមថា៖ «យើងមិនអាចធ្វើការសន្និដ្ឋានបានទេ ឥឡូវនេះ ប៉ុន្តែយើងនឹងតាមដានការអនុវត្ត»៕
ប្រែសម្រួលពីអត្ថបទភាសាអង់គ្លេស៖ National Assembly Votes In Four Funcinpec Members To Form NEC Committee
