សមាគមសម្ព័ន្ធអ្នកសារព័ត៌មានកម្ពុជា

លោក ហ៊ុន ម៉ាណែត នាយករដ្ឋមន្ត្រីថ្មី ប្តេជ្ញារក្សាសន្តិភាព ខណៈឪពុករបស់លោកចុះចេញពីតំណែង

លោក ហ៊ុន ម៉ាណែត នាយករដ្ឋមន្ត្រីថ្មី ថ្លែងនៅក្នុងរដ្ឋសភាជាតិក្នុងរាជធានីភ្នំពេញ ថ្ងៃទី២២ ខែសីហា ឆ្នាំ២០២៣។ (រូបភាព៖​ រដ្ឋសភា)
លោក ហ៊ុន ម៉ាណែត នាយករដ្ឋមន្ត្រីថ្មី ថ្លែងនៅក្នុងរដ្ឋសភាជាតិក្នុងរាជធានីភ្នំពេញ ថ្ងៃទី២២ ខែសីហា ឆ្នាំ២០២៣។ (រូបភាព៖ រដ្ឋសភា)

បន្ទាប់ពីកាន់អំណាចអស់រយៈ​ពេល​៣៨ឆ្នាំមក នៅ​ទីបំផុតលោក ហ៊ុន សែន បាន​ចុះចេញ​ពីតំណែងជានាយករដ្ឋមន្ត្រី ដោយផ្ទេរ​តំណែងកំពូលនេះ​ទៅឲ្យ​លោក ហ៊ុន ម៉ាណែត ​ជា​កូនប្រុសច្បងរបស់លោកនៅ​សប្តាហ៍នេះ ប៉ុន្តែលោក​នៅរក្សាអំណាចសំខាន់ដដែល។ 

លោក ហេង សំរិន ប្រធានរដ្ឋសភាដែល​ត្រូវ​ចាកចេញពីតំណែងបាន​ប្រកាស​ «ការបោះឆ្នោត​ជា​កញ្ចប់​» ​​កាល​ពី​ព្រឹក​ថ្ងៃអង្គារ ហើយ​រដ្ឋ​សភា​បាន​​អនុម័តគាំទ្រទាំង​ស្រុង​លើ​​លោក ហ៊ុន​ ម៉ាណែត និងសមាសភាព​គណៈរដ្ឋមន្ត្រីថ្មីរបស់លោក ដែល​ជា​ការ​ផ្លាស់​ប្តូរ​ក្បាល​ម៉ាស៊ីន​ដឹកនាំរបស់រដ្ឋាភិបាល។

ការបោះឆ្នោតអនុម័ត​គាំទ្រ​ដ៏ច្រើនសន្ធឹកសន្ធាប់នឹង​ធ្វើ​ឡើង​តែមួយដង​នេះ បានពង្រឹង​ការ​ស្នង​​តំណែង​របស់លោក ម៉ាណែត ដែលរង់ចាំជាយូរមកហើយ និងការផ្ទេរ​អំណាចដ៏​ទូលំ​ទូលាយ​​នៅ​ក្នុង​ចំណោម​តំណែង​រដ្ឋមន្ត្រីកំពូលពីមន្ត្រី​ចាស់ៗ​ទៅឲ្យ​ក្មេងជំនាន់ក្រោយ ដែល​ពួកគេ​ភាគច្រើនគឺ​ជា​សាច់ញាតិ​នឹង​គ្នា​។ 

ប៉ុន្តែ​លោក ហ៊ុន សែន មិនបាន​​បោះបង់​អំណាច​ទាំងស្រុង​នោះទេ។ លោក​ត្រូវបាន​តែងតាំង​ជា​ប្រធានក្រុម​ឧត្តមប្រឹក្សានៃព្រះមហាក្សត្រ ដោយរក្សាបាន «ឋានៈ​ស្មើ​​នាយករដ្ឋមន្ត្រី» ដដែល​ នេះ​បើយោងតាមព្រះរាជក្រឹត្យចេញ​ផ្សាយ​កាលពីថ្ងៃអង្គារ។ 

លោក ហេង សំរិន ត្រូវបានតែងតាំងជាប្រធានកិត្តិយសក្រុមឧត្តម​ប្រឹក្សាផ្ទាល់​​ព្រះមហាក្សត្រ​ដែលមានកម្រិតអំណាចដូចគ្នា ចំណែក​អតីតរដ្ឋមន្ត្រីកំពូលផ្សេងទៀត​មាន​លោក​ ស ខេង​ លោក​ ទៀ បាញ់ និង​លោកស្រី​​ ម៉ែន សំអន ត្រូវបានតែងតាំង​ដោយ​ព្រះរាជក្រឹត្យ​​ដាច់ដោយ​ឡែក ជាឧត្តម​ប្រឹក្សាផ្ទាល់​ព្រះមហាក្សត្រ​​ដែលមានសិទ្ធិអំណាច​ស្មើ​នឹងឧបនាយករដ្ឋមន្ត្រី។

លោក ហ៊ុន សែន បាន​មាន​ប្រសាសន៍​​ថា លោក​នឹង​បន្ត​ប្រឡូក​ក្នុង​នយោបាយ​ក្នុង​ឋានៈ​ជា​ប្រធាន​គណបក្ស​ប្រជា​ជន​កម្ពុជាដែល​កំពុង​កាន់​អំណាច ហើយ​គ្រោង​នឹង​ធ្វើ​ជា​ប្រធាន​ព្រឹទ្ធសភា ក្រោយ​ការ​បោះឆ្នោត​នៅ​ខែ​កុម្ភៈ។ 

លោក​បាន​មាន​ប្រសាសន៍​ថា៖ «ខ្ញុំ​ចាក​ចេញ​ពី​​តំណែងនៅក្នុង​អង្គនីតិ​ប្រតិបត្តិ ប៉ុន្តែ​ខ្ញុំ​មិន​ទាន់​បញ្ចប់​អាជីព​នយោបាយ​របស់​ខ្ញុំ​នៅ​ឡើយ​ទេ។ ខ្ញុំ​នៅ​តែ​មាន​សមត្ថភាព​​កសាង​ប្រទេស»

លោកនាយករដ្ឋមន្ត្រី ហ៊ុន សែន សម្រក់​ទឹកភ្នែក​ អំឡុង​ពេលធ្វើ​សន្និសីទ​កាសែតក្នុងរដ្ឋសភានៅពេលនិយាយអំពីលោក ហ៊ុន ម៉ាណែត កូនប្រុស​ច្បង​របស់លោក ​នៅថ្ងៃទី២២ ខែសីហា ឆ្នាំ២០២៣។ (ខេមបូចា/ ព្រីង សំរាំ​ង​​​)

លោកស្រក់ទឹកភ្នែក អំឡុង​ពេល​ធ្វើ​សន្និសីទសារព័ត៌មាន ដោយលោក​រំឭក​អំ​ពីការ​បែកគ្នា​ពីកូនប្រុស​របស់លោក​នៅ​ពេល​ដែល​កូន​ប្រុស​របស់​លោកជាទារក​​នៅ​ក្នុងផ្ទៃម្តាយនៅ​ឡើយ​ អំឡុងរបប ប៉ុល ពត មុនពេលលោក ហ៊ុន សែន ផ្តាច់​ខ្លួន​ចេញពីក្រុម​ខ្មែរក្រហម។ លោក​​បាន​ពណ៌នាពី​កូនប្រុស​របស់លោក​​ថា ជា​ក្មេង​ «​ដ៏កំសត់​​ជាងគេ​​» ក្នុងចំណោម​កូន​ទាំង​ប្រាំ​នាក់​របស់​លោក​ ប៉ុន្តែ​លោក​​ជឿថា កូន​ប្រុស​របស់​លោក​បាន​ជម្នះ​​លើ​ភាពលំបាកនេះ​​។

លោក ហ៊ុន សែន បញ្ជាក់​​ថា៖​ «គេ​​មិន​បាន​ធ្វើ​ឲ្យ​ខ្ញុំ​ខក​ចិត្ត​ទេ គេបាន​ប្រឹង​រៀន​​។ ​​ចំណេះវិជ្ជា​​របស់​គេ​​គ្រប់គ្រាន់ល្មម​​ ដើម្បី​នឹង​ដឹកនាំ​ប្រទេស​កម្ពុជា»

លោក ហ៊ុន​ ម៉ាណែត បានមានប្រសាសន៍ថា៖ «ខ្ញុំសូម​យកឱកាសដ៏កម្រនេះសម្តែងនូវ​ការ​អរគុណ និង​គោរព​ដឹងគុណដ៏ជ្រាលជ្រៅបំផុត​…ដែល​បាន​ផ្តល់​នូវ​ការ​ទុក​ចិត្តនិង​ភារកិច្ច​ដ៏​ឧត្តុងឧត្តម​ដល់​យើងខ្ញុំ​ទាំង​អស់​គ្នា​ ដើម្បី​បន្ត​វេននូវក្នុង​ការ​បំពេញ​បេសកកម្មជាតិ​ដ៏ថ្លៃថ្លា​នេះ»។ លោកបន្តថា៖ «ខ្ញុំ​សូម​សន្យា​និង​ធ្វើ​ការ​ប្ដេជ្ញា​ជា​​ឱឡារិក​ជូន​ជនរួមជាតិ​ទាំងប្រទេស​ថា ខ្ញុំ​​​នឹង​ប្តូរផ្តាច់​​ដឹកនាំ​ស្ថាប័ននីតិ​ប្រតិបត្តិ​របស់​ជាតិ​»

ក្នុងសុន្ទរកថាទៅកាន់អង្គសភា​ លោក ហ៊ុន ម៉ាណែត បានគូសបញ្ជាក់​នូវអ្វីដែលលោក​បាន​ហៅ​​ថា ជាគោលនយោបាយអាទិភាព រួមមានការពង្រីកសេវាថែទាំសុខភាព ដែលមាន​គោលដៅ​គ្របដណ្តប់ទូទៅ​ ការផ្តល់ការបណ្តុះបណ្តាលវិជ្ជាជីវៈ និងបច្ចេកទេសដល់​យុវជន​ក្រីក្រ បង្កើត​កម្មវិធីជំនួយសង្គមជាតិសម្រាប់គ្រួសារ​ក្រីក្រ និងការពង្រីកប្រព័ន្ធ​គាំពារសង្គម​ដល់កម្មករនិយោជិតនៅ​ក្នុងវិស័យសេដ្ឋកិច្ចក្រៅប្រព័ន្ធ។ 

លោក​ក៏​បាន​បញ្ជាក់​ដែរ​ថា លោក​នឹង​ខិតខំ​ពង្រឹង​លទ្ធភាព​ទទួល​បាន​​ទីផ្សារ និង​ស្ថិរភាព​តម្លៃ​សម្រាប់​កសិករ និង​ដាក់​ពង្រាយ​មន្ត្រី​បច្ចេកទេស​គ្រប់​ឃុំ ដើម្បី​ជំរុញ​​សកម្មភាព​កសិកម្ម និង​ជួយ​បង្កើត​សមាគម​អ្នក​ដាំដុះ​។

លោកបានសន្យាថា នឹងធានា «ការការពារឲ្យបាន​ដាច់ខាតនូវសន្តិភាព» និង «ការ​បន្ត​ផ្តល់​អាទិភាពខ្ពស់​លើការវិនិយោគលើមូលធនមនុស្ស» និង«ការគ្រប់​គ្រង​ធនធានធម្មជាតិ​ប្រកប​ដោយចីរភាព»

លោកស្រី ឃួន សុដារី ប្រធាន​រដ្ឋសភា​ថ្មី​បានមាន​ប្រសា​សន៍​​​ថា៖​ «យើង​នឹង​ខិតខំ​បំពេញ​បេសកកម្ម​ដ៏​ធំធេង​របស់​យើង​ក្នុង​នាម​ជា​តំណាង​ប្រជាពលរដ្ឋ ដោយ​​សហ​ការ​ជាមួយ​ស្ថាប័ន​ជាតិ ​ដើម្បី​លើក​កម្ពស់​លទ្ធិប្រជាធិបតេយ្យ និង​ពង្រឹង​នីតិរដ្ឋ»

គណបក្ស​ប្រជាជន​កម្ពុជា​ដែល​កំពុង​កាន់​អំណាច​ដណ្តើមបាន​​អាសនៈ​ចំនួន១២០ ក្នុង​ការ​បោះឆ្នោត ​ដែលក្នុងនោះ ​គណបក្ស​ប្រឆាំង​ឈាន​មុខ​គេ​ត្រូវ​បាន​រារាំង​មិន​ឱ្យ​ចូល​រួម​ប្រកួត​ប្រជែង​។ អាសនៈ​ចំនួន៥ ដែល​នៅ​សល់​បាន​ទៅ​គណបក្ស​​រាជានិយម​ហ៊្វុនស៊ិនប៉ិច។

លោក សុខ ឥសាន អ្នក​នាំ​ពាក្យ​គណបក្ស​ប្រជាជន​កម្ពុជាមិន​អាច​ទាក់​ទងសុំ​ការ​អត្ថាធិប្បាយ​​បាន​ទេ។

លោក ហ៊ុន ម៉ាណែត ត្រូវបានព្រះមហាក្សត្រចាត់តាំង​ជានាយករដ្ឋមន្ត្រីមុនពេល​រដ្ឋសភា​បោះឆ្នោតគាំទ្រ រួចហើយបាន​ស្បថចូលកាន់តំណែង បន្ទាប់ពីការ​ធ្វើវិសោធនកម្មថ្មីនៃ​រដ្ឋធម្មនុញ្ញ ដែលអនុញ្ញាតឱ្យគណបក្សដែលមានសំឡេងភាគច្រើនសម្រេចដោយផ្ទាល់​លើបេក្ខភាព​នាយករដ្ឋមន្ត្រី មុនពេលរដ្ឋាភិបាលថ្មីត្រូវបានបង្កើតឡើង។

លោក ឯម សុវណ្ណារ៉ា អ្នកវិភាគនយោបាយមានប្រសាសន៍ថា ​ បើ​មើល​ទៅលើ​​គោល​នយោបាយ​របស់លោក ម៉ាណែត ដែលបានស្នើឡើង លោកមិនជឿថា នឹង​​មានការផ្លាស់ប្តូរ​គួរ​ឲ្យ​កត់សម្គាល់ចំពោះ​ប្រជាជនកម្ពុជាទេ បើទោះបីជាមានការផ្លាស់ប្ដូរថ្នាក់​ដឹកនាំរបស់​រដ្ឋាភិបាលក៏ដោយ។ 

លោក សុវណ្ណារ៉ា បាន​មាន​ប្រសាសន៍​ថា៖ «ប្រជាពលរដ្ឋ​មិន​ជឿ​ទាំង​ស្រុង​ទៅ​លើ​មេ​ដឹកនាំ​វ័យ​ក្មេង​ទាំង​នេះ​ទេ ព្រោះ​យើង​មិន​ឃើញ​សមិទ្ធផល​ធំៗ​របស់គាត់ [​លោក ម៉ាណែត] ក្នុង​ការ​​អន្តរាគមន៍​ជួយ​​ដល់​ប្រជាពលរដ្ឋ​ដែល​រង​គ្រោះ​នោះ​ទេ។ ខ្ញុំ​មិន​មាន​សង្ឃឹម​ច្រើន​សម្រាប់​ [សេរីភាព​បញ្ចេញ​មតិ​] ព្រោះ​ប្រព័ន្ធ​ផ្សព្វ​ផ្សាយ​​ឯករាជ្យ​ដែលបាន​​​ផ្សាយ​ពី​បញ្ហា​អវិជ្ជមាន​របស់​រដ្ឋាភិបាល​ ហើយ​ហាក់​ដូច​ជា​បាត់​សំឡេង​ ហើយ​មិន​ត្រូវ​បាន​ស្ដារ​ឡើង​វិញទេ»

លោក នី សុខា ប្រធាន​អង្គការ​សិទ្ធិ​មនុស្ស​អាដហុក​បាន​មាន​ប្រសាសន៍​ថា រឿង​​សំខាន់គឺ​ថា ​តើ​គោលនយោបាយ​លើក​កម្ពស់​ជីវភាព​ប្រជាពលរដ្ឋនឹង​ត្រូវ​បាន​អនុវត្ត​ដោយ​ជោគជ័យ​ដែរ​ឬ​យ៉ាង​ណា។

លោក​បាន​ថ្លែង​ថា៖ «ចំណុច​នោះ​ គឺ​សំខាន់ មិនថា ​ការ​អនុវត្ត​នឹង​ឆ្លុះ​បញ្ចាំង​ពី​អ្វី​ដែល​បាន​​ចែង​ក្នុង​គោល​នយោបាយ​នោះ​ឬ​អត់​ទេ»។ ប៉ុន្តែលោកមិន​រំពឹងថា រដ្ឋាភិបាលថ្មីនឹងធ្វើ​ឲ្យ​សិទ្ធិមនុស្សប្រសើ​រឡើង​ ពង្រីកលទ្ធិ​ប្រជាធិបតេយ្យ ឬបង្ហាញ​ការអភិវឌ្ឍន៍ដ៏មានអត្ថន័យនៅក្នុងសេដ្ឋកិច្ច​នយោបាយ​របស់កម្ពុជា៖ «អំពើពុករលួយ និងបក្ខពួកនិយមនៅតែចាក់ស្រេះក្នុងសង្គមរបស់យើង»

ប្រែសម្រួលពីអត្ថបទភាសាអង់គ្លេស៖ New Prime Minister Hun Manet Vows to Keep Peace As His Father Steps Down

438 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម