តាមរយៈទំព័រហ្វេសប៊ុករបស់ក្រសួងរ៉ែ និងថាមពល បានឱ្យដឹងថា ក្រសួងបានផ្ដល់អាជ្ញាបណ្ណអាជីវកម្មបូមខ្សាច់ថ្មីមួយដល់សហគ្រាស សំរិទ្ធ ប៊ុនធឿន សម្រាប់ការបូមខ្សាច់ក្នុងទន្លេសេកុង ក្នុងខេត្តស្ទឹងត្រែង។
ក្រុមហ៊ុនបូមខ្សាច់ខាងលើបានចុះបញ្ជីកាលពីខែតុលា ឆ្នាំមុន និងមានលោក សំរិទ្ធ ប៊ុនធឿន ជាម្ចាស់កម្មសិទ្ធិ និងមានទីតាំងនៅក្នុងភូមិស្រែពោធិ សង្កាត់ស្រះឫស្សី។
លោក ប៊ុនធឿន ថ្លែងថា៖ «ការបូមខ្សាច់ធ្វើឡើងគ្រាន់តែសម្រាប់ផ្គត់ផ្គង់ដល់ក្រុមហ៊ុនស៊ីម៉ងត៍លាយស្រេចវឌ្ឍនៈ»។ លោកបន្តថា៖ «ការបូមរបស់យើងមានចម្ងាយ២០០ម៉ែត្រពីច្រាំងទន្លេ ដើម្បីឱ្យប្រាកដថាមានសុវត្ថិភាព កាត់បន្ថយផលប៉ះពាល់បរិស្ថាន និងអនុវត្តទៅតាមពេលវេលា និងគោលនយោបាយរបស់ក្រសួងរ៉ែ និងថាមពល»។
ពលរដ្ឋវ័យកណ្ដាលម្នាក់រស់នៅក្នុងភូមិស្រែពោធិ ជិតកន្លែងបានអាជ្ញាបណ្ណបូមខ្សាច់ថ្មីបានឱ្យដឹងថា លោកបានឃើញការបូមខ្សាច់ចំនួនបីកន្លែង និងបាម្ភពីផលប៉ះពាល់របស់សកម្មភាពបូមខ្សាច់នេះ។
លោកបន្ថែមថា៖ «សព្វថ្ងៃនៅតាមបណ្ដោយដងទន្លេក្នុងសហគមន៍របស់ខ្ញុំ វាមានការរំខានដល់ប្រជាពលរដ្ឋ និងសំឡេងចេញពីការបូមខ្សាច់»។ បុរសម្នាក់នោះបន្តថា៖ «ម្ដងម្កាលពេលគេជួសជុលសាឡង់ យើងឃើញមានលេចប្រេងចូលទៅក្នុងទន្លេ ដែលវាអាចប៉ះពាល់ដល់បរិស្ថាន និងរំខានដល់អ្នកទេសចរក្នុងតំបន់នេះ»។
ប្រជាពលរដ្ឋបានអះអាងថាការបូមខ្សាច់តាមបណ្ដោយដងទន្លេមានជាយូរឆ្នាំមកហើយ និងថាមានច្រាំងទន្លេជាច្រើនកន្លែងបានបាក់ក្នុងឆ្នាំកន្លងមកផងដែរ»។
លោកបន្តថា៖ «រាល់ឆ្នាំមានដីបាក់នៅកន្លែងមួយចំនួនជុំវិញតំបន់នេះ ហើយអំឡុងខែប្រាំង ខ្ញុំឃើញទន្លេជ្រៅទៅៗ»។ លោកបន្ថែមថា៖ «ខ្ញុំជំរុញឱ្យអាជ្ញាធរ និងក្រសួងពាក់ព័ន្ធជួយតាមដាន និងណែនាំអ្នករកស៊ីទាំងនោះឱ្យគោរពច្បាប់ និងកាត់បន្ថយការរំខានដល់ប្រជាពលរដ្ឋក្នុងតំបន់នេះ»។
មេឃុំស្រះឫស្សី លោក ដែន ភារម្យ បដិសេធថាមិនមានផលប៉ះពាល់អវិជ្ជមាននៅកន្លែងបូមខ្សាច់នោះ ឬជុំវិញសហគមន៍។
លោកមានប្រសាសន៍ថា៖ «ពួកគេបូមផ្អែកតាមការវាយតម្លៃត្រឹមត្រូវ គេបូមនៅឆ្ងាយពីច្រាំងទន្លេ និងអនុវត្តតាមគោលការណ៍ក្រសួងរ៉ែ ហើយខ្ញុំមិនគិតថា មានសំឡេងរំខានអ្នកភូមិ ហើយក៏គ្មានការបាក់ដីដូចការលើកឡើងដែរ»។
លោក ប៊ុនធឿន បានឱ្យដឹងដែរថា ប្រហែលជាមានក្រុមហ៊ុនប្រតិបត្តិការបូមខ្សាច់ដោយខុសច្បាប់ផ្សេងទៀតនៅទីនោះដែរ។
លោកបន្ថែមថា៖ «ខ្ញុំសង្ឈឹមថាក្រសួងនឹងពិនិត្យលើអាជីវកម្មដែលកំពុងដំណើរការដោយមិនបានចុះបញ្ជីនៅក្រសួង ដែលកំពុងកើតមាន និងមិនបានអនុវត្តតាមច្បាប់កំណត់របស់ក្រសួង»។
បើតាមលោក គង់ ស៊ីថា អគ្គនាយករង នៃអគ្គនាយកដ្ឋានធនធានរ៉ែ នៅខេត្តស្ទឹងត្រែងក៏មានក្រុមហ៊ុនបូមខ្សាច់មានអាជ្ញាបណ្ណមួយផ្សេងទៀតផងដែរ។
ស្ថាប័នធ្វើការលើបរិស្ថាន Mongabay បានរាយការណ៍ថា មានក្រុមហ៊ុនបូមខ្សាច់ស្របច្បាប់ និងចុះបញ្ជីត្រឹមត្រូវចំនួន៤៩ គិតក្នុងខែសីហា ឆ្នាំ២០២២។ លោក អ៊ឹង ឌីប៉ូឡា អគ្គនាយក នៃអគ្គនាយកដ្ឋានធនធានរ៉ែ មិនអាចទាក់ទងសុំអត្ថាធិប្បាយបានទេ។
សារព័ត៌មានក្នុងស្រុកមួយកាលពីខែតុលា បានរាយការណ៍ថា កម្ពុជាបានបើកឱ្យមានការនាំខ្សាច់ទៅបរទេសវិញ ដែលការនាំចេញនេះគឺធ្វើឡើងតាមច្រកព្រំដែនវៀតណាម។ ការនាំខ្សាច់ចេញនេះត្រូវបានហាមឃាត់កាលពីឆ្នាំ២០១៧។
សកម្មជនបរិស្ថាន លោក លី ចាន់ដារ៉ាវុធ បានឱ្យដឹងថា ការបូមខ្សាច់បានបន្តកើនឡើងជាខ្លាំងក្នុងប្រទេសកម្ពុជា ដែលនាំឱ្យមានកង្វល់ទាក់ទងនឹងផលប៉ះពាល់ដល់បរិស្ថាន និងសង្គម ឈានទៅដល់សហគមន៍ និងទន្លេនានា។
លោកសង្ឃឹមថា ក្រសួងពាក់ព័ន្ធនឹងធ្វើការសិក្សាស៊ីជម្រៅមួយពីផលប៉ះពាល់របស់អាជីវកម្មនេះ។
លោកលើកឡើងថា៖ «[ការបូមខ្សាច់]ធ្វើឱ្យទន្លេកាន់តែជ្រៅ បង្កើនហានិភ័យទឹកជំនន់»។ លោកបន្ថែមថា៖ «ខ្ញុំគិតថាគួរតែមានការយកចិត្តទុកដាក់ឱ្យបានខ្ពស់ ព្រោះប្រព័ន្ធអេកូឡូស៊ី មិនងាយនឹងជួសជុលបានឡើងវិញទេ»៕
ប្រែសម្រួលពីអត្ថបទភាសាអង់គ្លេស៖ New Sand Mining License Issued in Stung Treng