សមាគមសម្ព័ន្ធអ្នកសារព័ត៌មានកម្ពុជា

អង្គការក្រៅរដ្ឋាភិបាល និងក្រុមគាំពារសិទ្ធិមនុស្សជំរុញឲ្យរដ្ឋាភិបាលកែប្រែអនុក្រឹត្យស្តីពីច្រកទ្វារអ៊ីនធឺណិតជាតិ

កម្មកររៀបចំខ្សែកាបអ៊ីធឺណិតនៅរាជធានីភ្នំពេញ កាលពីថ្ងៃទី១៥ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង
កម្មកររៀបចំខ្សែកាបអ៊ីធឺណិតនៅរាជធានីភ្នំពេញ កាលពីថ្ងៃទី១៥ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង

​នៅ​ក្នុង​រយៈពេល​ជិត​មួយ​ខែ​ចាប់តាំង​ពី​ក្រសួងប្រៃសណីយ៍​និង​ទូរគមនាគមន៍​ពន្យារ​​ការ​អនុវត្ត​អនុក្រឹត្យ​ស្តី​ពី​ច្រកទ្វារ​អ៊ីនធឺណិត​ជាតិ​(NIG) ក្រុម​សង្គមស៊ីវិល​បន្ត​ជំរុញ​ឲ្យ​រដ្ឋាភិបាល​ពិចារណា​ផែនការ​របស់​ខ្លួន​ក្នុងការលុបបំបាត់ទាំងស្រុង។

​ខណៈពេលដែលការ​អនុវត្ត​អនុក្រឹត្យ​ស្តីពី​ច្រកទ្វារ​អ៊ីនធឺណិត​ជាតិ​ត្រូវ​បាន​ពន្យារ​ជា​បណ្តោះអាសន្ន អង្គការ​ក្រៅ​រដ្ឋាភិបាល​និង​ក្រុម​គាំពារ​សិទ្ធិ​មនុស្ស​និយាយ​ថា គោលបំណង​របស់​រដ្ឋាភិបាល​នៅ​ក្នុង​ការ​​ដាក់​បញ្ចូល​ចរាចរណ៍​ទិន្នន័យ​អ៊ីនធឺណិត​ក្នុង​ស្រុក​តាម​ច្រក​ទ្វារ​តែ​មួយ ហើយគ្រប់គ្រង​ដោយ​រដ្ឋ នឹង​រឹតត្បិត​សេរីភាព​នៃ​ការ​បញ្ចេញ​មតិ និង​ផ្តល់​លទ្ធភាព​ដល់​ការ​បៀតបៀន​ពី​រដ្ឋាភិបាល​តាម​ប្រព័ន្ធ​អនឡាញ។

កាល​ពី​ថ្ងៃ​ទី១០ ខែ​មីនា ការិយាល័យ​មជ្ឈមណ្ឌល​សិក្សា​គោលនយោបាយ​អាល្លឺម៉ង់​ Konrad Adenauer Stiftung (KAS) បាន​រៀបចំ​វេទិកា​មួយ​ ដើម្បី​ពិភាក្សា​ពី​ឥទ្ធិពល​វិជ្ជមាន​និង​អវិជ្ជមាន​ ដែល​អាច​កើត​មាន​ឡើង​ នៅ​ពេល​ច្រកទ្វារ​អ៊ីនធឺណិត​ជាតិ​ត្រូវ​បាន​អនុវត្ត។

ប្រធាន​មជ្ឈមណ្ឌល KAS លោក Daniel Schmücking បាន​និយាយ​ថា ការ​វាយប្រហារ​តាម​ប្រព័ន្ធ​អ៊ីនធឺណិត​គឺ​ជា ការ​គំរាមកំហែង​ពិតប្រាកដ​មួយ​នៅ​ក្នុង​សង្គម​ឌីជីថល ប៉ុន្តែ​រដ្ឋាភិបាល​ត្រូវ​ផ្តល់​សន្តិសុខ​ដល់​ពលរដ្ឋ​ ដោយ​មិន​រឹតត្បិត​សេរីភាព​របស់​ពួកគេ។ លោក​បាន​បន្ថែម​ថា ច្បាប់​គួរ​តែ​មាន​ការ​ថ្លឹងថ្លែង​រវាង​កត្តា​ទាំងពីរ​នេះ ដើម្បី​ឲ្យ​លំនាំ​នៃ​ការ​ធ្វើ​សេចក្តីព្រាង​ច្បាប់​មាន​ប្រកប​ដោយ​តម្លាភាព​និង​​ការ​រួម​បញ្ចូល។ ​

លោក​បាន​ថ្លែង​ថា៖ «មាន​តម្រូវការ​ឲ្យ​គ្រប់ភាគី​ពាក់ព័ន្ធ​បង្ហាញ​ការ​ព្រួយបារម្ភ​របស់​ពួកគេ​នៅ​ក្នុង​វេទិកា​សាធារណៈ។ មាន​កង្វះ​ការ​យល់ដឹង​ និង​ចំណេះដឹង​ពី​អ្វី​ទៅ​ជា​ច្រកទ្វារ​អ៊ីនធឺណិត​ជាតិ​សម្រាប់​ពលរដ្ឋ ក្រុមហ៊ុន​ផ្តល់​សេវាកម្ម​អ៊ីនធឺណិត និង​វិស័យ​ធុរកិច្ច»

នាយិកា​មជ្ឈមណ្ឌល​សិទ្ធិ​មនុស្ស​កម្ពុជា​ អ្នកស្រី​ ចក់ សុភាព និយាយ​ថា អនុក្រឹត្យ​ស្តី​ពី​ការ​បង្កើត​ច្រកទ្វារ​អ៊ីនធឺណិត​ជាតិ​បាន​បង្ក​ជា​ការ​ព្រួយបារម្ភ​យ៉ាង​ខ្លាំង​មួយ​សម្រាប់​អនាគត​មូលដ្ឋាន​សិទ្ធិ​មនុស្ស​នៅ​ក្នុង​ប្រទេស។ អ្នកស្រី​បាន​បន្ត​ថា ការ​អនុវត្ត​ច្រកទ្វារ​អ៊ីនធឺណិត​ជាតិ​នឹង​អាច​ឲ្យ​អាជ្ញាធរ​ពាក់ព័ន្ធ​បង្អាក់ ឬ​ផ្តាច់​ការ​តភ្ជាប់​បណ្តាញ​អ៊ីនធឺណិត​ជាក់លាក់​ណា​មួយ។​

​​អ្នកស្រី​បាន​ថ្លែង​ថា៖ ​«នេះ​ទំនង​នឹង​ជួយ​សម្រួល​ដល់​ការ​ឃ្លាំមើល​ទ្រង់ទ្រាយ​ធំ ការ​បង្អាក់​ និង​ការ​រឹតត្បិត​លើ​ទំនាក់ទំនង​តាម​ប្រព័ន្ធ​ឌីជីថល និង​ការ​ប្រមូល​ទិន្នន័យ​បុគ្គល។ ដូច្នេះ​ នេះ​គឺ​ គំរាមកំហែង​ដល់​ការ​អនុវត្ត​បុគ្គល​ចំពោះ​សិទ្ធិ​ឯកជនភាព និង​សិទ្ធិ​សេរីភាព​មូលដ្ឋាន​ដទៃ​ទៀត»។ ​

​​​បន្ទាប់​ពី​មាន​ការ​បន្ត​បង្រ្កាប​លើ​ការ​រិះគន់ និង​ការ​ប្រឆាំង​ពី​សំណាក់​រដ្ឋាភិបាល អ្នកស្រី​ ចក់ សុភាព បាន​បន្ថែម​ថា មាន​ហេតុផល​ផ្សេងៗ​ក្នុង​ការ​ជឿ​ថា សំឡេង​រិះគន់​ ដូចជា​ អ្នកសារព័ត៌មាន អ្នក​ការពារ​សិទ្ធិ​មនុស្ស សកម្មជន និង​សមាជិក​គណបក្ស​ប្រឆាំង​ នឹង​រង​ការ​ប៉ះពាល់​យ៉ាង​ខ្លាំង​ពី​ច្រកទ្វារ​អ៊ីនធឺណិត​ជាតិ។

របាយការណ៍​មួយ​លើ​ការ​បៀតបៀន​តាម​ប្រព័ន្ធ​អនឡាញ​កាល​ពី​ឆ្នាំ​មុន​ដោយ​អង្គការ​លីកាដូ ពណ៌នា​រដ្ឋាភិបាល​កម្ពុជា​ថា បាន​ធ្វើ​ការ​ដាក់​ពន្ធនាគារ​ ចាប់​ខ្លួន និង​បៀតបៀន​អ្នក​ប្រើប្រាស់​បណ្តាញ​សង្គម និង​សកម្មជន​ជា​ប្រចាំ​ ចំពោះ​ការ​បញ្ចេញ​មតិ​របស់​ពួកគេ​តាម​ប្រព័ន្ធ​អនឡាញ។

របាយការណ៍​បាន​លើកឡើង​ថា៖ «ច្បាប់​ដែល​ទើប​នឹង​ត្រូវ​បាន​អនុវត្ត​កាល​ពី​ពេល​ថ្មីៗ​នេះ​ទំនង​នឹង​ជំរុញ​ការ​ឃ្លាំ​មើល​ពី​សំណាក់​រដ្ឋាភិបាល​ និង​រឹតត្បិត​ការ​បញ្ចេញ​មតិ​ដោយ​សេរី​តាម​ប្រព័ន្ធ​អនឡាញ​កាន់​តែ​ខ្លាំង​ថែម​ទៀត»

អ្នកស្រី​ចក់​ សុភាព​បាន​និយាយ​ថា ច្រកទ្វារ​អ៊ីនធឺណិត​ជាតិ​នឹង​បង្ក​ឲ្យ​មាន​បរិយាកាស​ភ័យខ្លាច ការ​ជំរុញ​ឲ្យ​មាន​ការ​រឹតត្បិត​ដោយ​ខ្លួន​ឯង និង​ប៉ះពាល់​ដោយ​ផ្ទាល់​មក​លើ​ការ​បំពេញ​ការងារ​របស់​អ្នកសារព័ត៌មាន និង​ក្រុម​គាំពារ​សិទ្ធិមនុស្ស។

អ្នកស្រី​បាន​បន្ត​ថា៖ «ពេលវេលា​នៃ​ការ​បង្កើត​ច្រកទ្វារ​​អ៊ីនធឺណិត​ជាតិ​គឺ​ ពិតជា​​គួរ​ឲ្យ​ព្រួយបារម្ភ ស្រប​ពេល​ដែល​ការ​បោះឆ្នោត​ឃុំ​សង្កាត់​ឆ្នាំ ២០២២ ខិត​ចូល​មក​ដល់ និង​ឆ្ពោះ​ទៅ​ការ​បោះឆ្នោត​ជាតិ​នា​ឆ្នាំ​ក្រោយ»។ ដោយបន្ថែមថា៖ «នេះ​ជា​ការ​គំរាមកំហែង​ពិតប្រាកដ​ដែល​ថា នៅ​មុន និង​អំឡុងពេល​ការ​បោះឆ្នោត ច្រកទ្វារ​អ៊ីនធឺណិត​ជាតិ​នឹង​ត្រូវ​បាន​ប្រើប្រាស់​ដើម្បី​បង្អាក់ និង​រឹតត្បិត​លើ​មតិ​ប្រឆាំង​តាម​ប្រព័ន្ធ​អនឡាញ បើទោះ​ការ​ធ្វើ​ដូច​នេះ​មិន​ត្រូវ​បាន​អនុញ្ញាត​នៅ​ក្រោម​ច្បាប់​សិទ្ធិ​មនុស្ស​អន្តរជាតិ​ក៏ដោយ»

អ្នកស្រី​បាន​បន្ថែម​ថា អនុក្រឹត្យ​ស្តី​ពី​ច្រកទ្វារ​អ៊ីនធឺណិត​ជាតិ​ចូលរួម​ជាមួយ​ច្បាប់​ស្តី​ពី​ទូរគមនាគមន៍ និង​ប្រកាស​អន្តរក្រសួង​ឆ្នាំ​ ២០១៨ ស្តី​ពី​ការ​គ្រប់គ្រង​លើ​ការ​ផ្សព្វផ្សាយ​តាម​វេបសាយ និងបណ្តាញ​សង្គម​លើ​ប្រព័ន្ធ​អ៊ីនធឺណិត។ ច្បាប់​ទាំង​នេះ​ផ្តល់​អំណាច​ដល់​រដ្ឋាភិបាល​ក្នុង​ការ​ប្រើប្រាស់​អ៊ីនធឺណិត​ជា​ឧបករណ៍​បំបិទ​និង​បង្អាក់​លទ្ធភាព​ប្រព័ន្ធ​អ៊ីនធឺណិត​​ដែល​ជា​កន្លែង​មួយ​នៅ​ក្នុង​ការ​ប្រើប្រាស់​សិទ្ធិ​សេរីភាព​មូលដ្ឋាន។ ​

​​​អ្នកស្រី​បាន​ថ្លែង​ថា៖ «ខណៈ​ការ​ពន្យារ​ការ​អនុវត្ត​ច្រកទ្វារ​អ៊ីនធឺណិត​ជាតិ​ផ្តល់​ការ​ធូរ​ស្បើយ​បន្តិចបន្តួច​ដល់​ពលរដ្ឋ​កម្ពុជា ជា​អកុសល​នេះ​គ្រាន់​តែ​បណ្តោះអាសន្ន​តែ​ប៉ុណ្ណោះ។ ការ​គំរាមកំហែង​ដែល​ច្រកទ្វារ​អ៊ីនធឺណិត​ជាតិ​មាន​ នឹង​អាច​ត្រូវ​បំបាត់​បាន​ ទាល់តែ​មាន​ការ​ដក​ចេញ​ដោយ​ឥតលក្ខខណ្ឌ​នូវ​​អនុក្រឹត្យ​ស្តី​ពី​ច្រកទ្វារ​អ៊ីនធឺណិត​ជាតិ»

​​​លោក​ ណុប វី នាយកប្រតិបត្តិ​សមាគម​សម្ព័ន្ធ​អ្នកសារព័ត៌មាន​កម្ពុជា (ខេមបូចា) បង្ហាញ​គំនិត​ស្រដៀង​គ្នា​នេះ​ដែរ ដោយ​លោក​ជឿ​ថា ការ​អនុវត្ត​ច្រកទ្វារ​អ៊ីនធឺណិត​ជាតិ​នឹង​បង្កើន​ការ​​គំរាមកំហែង​មក​លើ​អ្នកប្រើប្រាស់​បណ្តាញ​សង្គម។

​​​​លោក​បាន​ថ្លែង​ថា៖ «អនុក្រឹត្យ​នេះ​គួរ​តែ​ត្រូវ​ផ្អាក រហូត​ដល់​ពេល​មាន​ការ​ពិគ្រោះ​យោបល់​ និង​ធ្វើ​វិសោធនកម្ម​ផ្អែក​តាម​ការ​លើកឡើង​របស់​អង្គការ​ក្រៅ​រដ្ឋាភិបាល​នានា»

​​​​លោក​ សូ វិសុទ្ធី រដ្ឋលេខាធិការ​ក្រសួង​ទូរគមនាគមន៍ ក៏ដូចជា មន្រ្តី​ក្រសួង​ដទៃ​ទៀត មិន​អាច​ទាក់ទង​សុំ​យោបល់​បាន​នោះ​ទេ។ ប៉ុន្តែ​​យោង​តាម​សេចក្តីថ្លែងការណ៍​មួយ​ចេញ​ផ្សាយ​កាល​ពី​ខែ​មុន​ដោយ​ក្រសួង​ការបរទេស ច្រក​ទ្វារ​អ៊ីនធឺណិត​ជាតិ​គឺ ​មាន​គោលដៅ​សម្រួល​និង​គ្រប់គ្រង​ការ​តំណ​ភ្ជាប់​អ៊ីនធឺណិត និង​ពង្រឹង​សន្តិសុខ និង​ការ​ប្រមូល​ថវិកា​ជាតិ។

​​​​សេចក្តីថ្លែងការណ៍​បាន​រៀបរាប់​ថា៖ «ការ​ចោទប្រកាន់​ថា ការ​បង្កើត​ច្រក​ទ្វារ​អ៊ីនធឺណិត​អនុញ្ញាត​ឲ្យ​អាជ្ញាធរ​គ្រប់គ្រង​រាល់​សកម្មភាព​អនឡាញ​ទាំងអស់ ការ​ចាប់យក និង​រឹតត្បិត​ទំនាក់ទំនង​តាម​ប្រព័ន្ធ​ឌីជីថល ក៏ដូចជា ការ​រក្សាទុក និង​ចែករំលែក​ទិន្នន័យ​អ្នកប្រើប្រាស់ និង​រឹតត្បិត​សេរីភាព​នៃ​ការ​បញ្ចេញ​មតិ គឺ​ជា ការ​ចោទប្រកាន់​គ្មាន​ភស្តុតាង»

ប្រែសម្រួលពីអត្ថបទភាសាអង់គ្លេស៖ NGOs and human rights advocates urge government to revise NIG sub-decree

660 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម