សមាគមសម្ព័ន្ធអ្នកសារព័ត៌មានកម្ពុជា

ចាប់ខ្លួនជនជាតិថៃបួននាក់នៅកម្ពុជាពាក់ព័ន្ធនឹងអំពើឆបោកតាមអនឡាញ និងឃាតកម្មលើមនុស្សបីនាក់

សមត្ថកិច្ចកម្ពុជាចាប់ខ្លួនជនជាតិថៃបួនរូបនៅក្រុងប៉ោយប៉ែតរងការចោទប្រកាន់ថាជាប់ពាក់ព័ន្ធនឹងអំពើឆបោកតាមអនឡាញ និងឃាតកម្មលើមនុស្សបីនាក់។ រូបភាពផ្សាយលើគេហទំព័រអគ្គស្នងការដ្ឋាននរគបាលជាតិ ថ្ងៃទី១១ ខែកញ្ញា ឆ្នាំ២០២៣។
សមត្ថកិច្ចកម្ពុជាចាប់ខ្លួនជនជាតិថៃបួនរូបនៅក្រុងប៉ោយប៉ែតរងការចោទប្រកាន់ថាជាប់ពាក់ព័ន្ធនឹងអំពើឆបោកតាមអនឡាញ និងឃាតកម្មលើមនុស្សបីនាក់។ រូបភាពផ្សាយលើគេហទំព័រអគ្គស្នងការដ្ឋាននរគបាលជាតិ ថ្ងៃទី១១ ខែកញ្ញា ឆ្នាំ២០២៣។

ជនជាតិ​ថៃ​បួន​រូប​ដែល​រង​ការ​ចោទ​ប្រកាន់​ថា​បាន​ជាប់​ពាក់ព័ន្ធ​នឹង​ប្រតិបត្តិការ​ឆបោក​តាម​អនឡាញ និង​ឃាត​កម្ម​លើ​មនុស្ស​បី​នាក់ ត្រូវ​បាន​ចាប់​ខ្លួន​នៅ​ក្រុង​ប៉ោយប៉ែត​កាល​ពីចុង​សប្ដាហ៍​នេះ​។​

បើ​តាម​កាសែត​បាងកកប៉ុស្ដិ៍ ជនសង្ស័យ​មាន​ឈ្មោះ​ Supol Wongwian, Nisarat Sukasem, Kanokporn Kraisuk និង​ Kornkanok Singthit ប្រឈម​មុខ​នឹង​ការ​ចោទ​ប្រកាន់​ពីបទ​សមគំនិត​ក្នុង​អំពើ​ឆបោក ឧក្រិដ្ឋកម្ម​អនឡាញ និង​បាន​ចូល​រួម​ជាមួយ​ក្រុម​ឧក្រិដ្ឋកម្ម​ឆ្លង​ដែន។​

​លោក កែវ វណ្ណថន អ្នកនាំពាក្យ​នៃ​អគ្គនាយកដ្ឋានអន្តោប្រវេសន៍ បញ្ជាក់​ថា​ជនសង្ស័យ​ទាំង​បួន​រូប​កំពុង​ឃុំ​ខ្លួន​នៅ​អគ្គស្នងការ​ដ្ឋាននគរបាល​ជាតិ​។ លោកថា នាយក​ដ្ឋាន​របស់​លោក​កំពុង​រង់ចាំ​ការ​សម្រេច​របស់​ក្រ​សួង​មហាផ្ទៃ​លើ​សំណើ​បញ្ជូន​អ្នក​ទាំង​នោះទៅ​ប្រទេស​ថៃ​វិញ ហើយ​ថា​លោក​មិន​អាច​បញ្ជាក់​កាល​បរិច្ឆេទ​នៃការ​បញ្ជូន​អ្នក​ទាំង​នោះ​បានទេ​។​

អគ្គស្នងការ​នរគបាលជាតិ​កម្ពុជា​បាន​ធ្វើ​ការ​រួម​គ្នា​ជាមួយ​នគរបាល​ភូមិន្ទថៃ​លើ​ការស៊ើប​អង្កេត និង​ឈាន​ទៅ​ដល់​ការ​កំណត់​អត្តសញ្ញាណ និង​ចាប់​ខ្លួន​ជន​សង្ស័យ​។​

បើ​តាម​អគ្គស្នងការ​នរគបាល​ជាតិ ជនសង្ស័យ​ដែល​បាន​ចាប់​ខ្លួន​នេះ​មាន​ជាប់​ពាក់​ព័ន្ធ​នឹង​ប្រតិបត្តិការ​ឆបោក​តាម​អនឡាញ ដែល​អំពើ​នេះ​បាន​ជំរុញ​ឲ្យ​បុរស​ជនជាតិ​ថៃ​ម្នាក់​ប្រព្រឹត្ត​អំពើ​ឃាតកម្ម​លើ​សមាជិក​គ្រួសារ​របស់​ខ្លួន​។ លោក Sanit Dokmai វ័យ​៤១​ឆ្នាំ​ ជាប់​ចោទ​ពី​បទ​ឃាតកម្ម​លើ​ប្រពន្ធ និង​កូន​ពី​រ​នាក់​របស់​ខ្លួន មុន​ពេល​លោក​ព្យាយាម​ធ្វើ​អត្តឃាត​តាម​ក្រោយ បន្ទាប់​ពី​លោក​ចាញ់បោក​គេអស់​ប្រាក់​ ៤៧ ០០០​ដុល្លារ និង​ធ្វើ​ឲ្យ​គ្រួសារ​ជាប់​បំណុល​។​

បើ​តាម​ការ​ផ្សាយ​របស់​សារព័ត៌មាន​​ Thai PBS World កាល​ពី​សប្ដាហ៍​មុន​អគ្គស្នង​ការ​នរគបាលជាតិ​កម្ពុជា លោក ស ថេត និង​អគ្គស្នងការ​រង​នរគរបាលភូមិន្ទថៃលោក Surachate Hakparn  បាន​ពិភាក្សា​គ្នា​លើ​ការ​ពង្រឹង​កិច្ច​សហប្រតិបត្តិការផ្នែក​នរគបាល​រវាង​ប្រទេស​ទាំង​ពីរ។ លោក Hakparn ក៏​បាន​ស្វែង​រក​កិច្ចសហការ​ចាប់​ខ្លួន​ជនសង្ស័យ​ជនជាតិ​ថៃ និង​ចិន ដែល​ជាប់​ពាក់​ព័ន្ធ​នឹង​ប្រតិបត្តិការ​ឆបោក​តាម​អនឡាញ ដែល​ជាប់ពាក់​ព័ន្ធ​នឹង​ឃាតកម្ម​លើ​មនុស្ស​បី​នាក់​ផង​ដែរ​។​ 

អ្នក​នាំពាក្យក្រ​សួង​មហារផ្ទៃ​ លោក ខៀវ សុភ័គ មាន​ប្រសាសន៍​ថា ​ការ​ចាប់​ខ្លួន​នេះជា​លទ្ធ​ផល​នៃ​ការ​ចូល​រួម​សហការ​គ្នាជា​មួយ​នរគ​បាល​ថៃ ហើយ​លោក​បាន​បន្ថែម​ថា​រដ្ឋាភិបាល​កម្ពុជា​ «​បានធ្វើ​ការ​ជាច្រើ​ន» ​ក្នុង​ការបង្ក្រាប​អំពើ​ឆបោក​ទាំង​នេះ។​

លោក​បន្ត​ថា៖ «​ពួកគេ [ប្រព័ន្ធ​ផ្សព្វផ្សាយ]ថា​យើង​មាន​មនុស្ស ​២ ០០០​នាក់ ឥឡូវពួកគេថា​យើង​មាន​មនុស្ស ១០០ ០០០​នាក់ ស្រេច​តែពួកគេ​ថា យើង​បាន​បន្ត [បង្ក្រាប​] សម្រាប់​ប្រទេស​ជាតិ​យើង»។ ការ​លើក​ឡើង​របស់​លោក ខៀវ សុភ័គ ទំនង​សំដៅ​ដល់​របាយការណ៍​របស់​អង្គការសហប្រជាជាតិ​ចេញ​ផ្សាយ​ថ្មីៗ​នេះថា​មានជនរងគ្រោះ​ពី​អំពើ​ឆបោក​នៅ​កម្ពុជា​ ១០០ ០០០​នាក់​។​

ថ្វី​បើ​មាន​សេចក្ដី​រាយការណ៍​ជាច្រើន​លើក​ថា​ប្រតិបត្តិការអំពើ​ឆបោក​ក្នុង​ប្រទេស​កម្ពុជា​មាន​ជាប់​ពាក់ព័ន្ធ​នឹង​អ្នក​ជំនួយ និង​អ្នក​នយោបាយ​មាន​ឥទ្ធិពល​នៅ​កម្ពុជា លោក​ សុភ័គ អះអាង​ថា​ប្រជា​ជន​កម្ពុជា​មិន​ប្រព្រឹត្ត​ឧក្រិដ្ឋកម្ម​បែបនេះទេ​។​

លោក ខៀវ សុភ័គ បន្ថែម​ថា៖ «​ប្រជាពល​រដ្ឋ​កម្ពុជា​មិន​ប្រព្រឹត្តឧក្រិដ្ឋកម្ម​បែបនេះទេ​ពីព្រោះថា​ប្រជា​ពល​រដ្ឋ​ខ្មែរ​មិន​មាន​ចំណេះដឹង​ក្នុង​ការ​ប្រើ​ប្រាស់​កុំព្យូទ័រ​សម្រាប់​អំពើ​ឆបោក​តាម​អនឡាញ​​ទេ​។ មាន​ជនបរទេស​ដែល​ប្រើ​[កម្ពុជា] ជា​ទីតាង​ប្រព្រឹត្តបទល្មើស»។​

ក្នុង​របាយការណ៍​របស់​ខ្លួន​ចេ​ញ​ផ្សាយ​កាលពីខែ​សីហា អង្គការ​សហប្រជាជាតិ​បាន​បង្ហាញ​ថា​កម្ពុជា​បាន​ប្រែ​ពី​ប្រទេស​ដែល​មាន​ជន​រងគ្រោះ​នៃអំពើជួញដូរ មក​ជា​ប្រទេស​គោលដៅ​ដែល​ជន​រងគ្រោះ​បរទេស​ត្រូវ​គេជួយ​ដូរ​ចូល​មក​វិញ និង​បាន​បង្ហាញ​ទៀត​ថា​ទី​តាំង​ជា​ច្រើន​នៅ​ក្នុង​តំបន់​អាស៊ីអាគ្នេយ៍ដែល​មាន​ការ​បង្ខំ​មនុស្ស​ឲ្យ​ប្រព្រឹត្ត​អំពើ​ឆបោក​តាម​អនឡាញ គឺ​ជា​តំបន់​ដែល​មានការគ្រប់​គ្រង​ខ្សោយ និង​នីតិរដ្ឋខ្សោយ​។​

មន្ត្រី​កម្ពុជា​ម្ដង​ហើយ​ម្ដង​ទៀត​បាន​ច្រាន​ចោល​ថា​បុគ្គលិក​ទាំង​នោះជា​ជន​រងគ្រោះ​នៃការ​ធ្វើ​ការដោយបង្ខំ បន្ទាប់​ពី​អ្នក​ទាំង​នោះ​ត្រូវ​បាន​សមត្ថកិច្ចជួយ​ឲ្យ​បាន​រួច​ខ្លួន​ពី​កន្លែង​ធ្វើ​ការទាំង​នោះ​​។​​

លោកស្រី ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធ​ប្រឆាំងអំពើជួញដូរ​មនុស្ស​នៃក្រ​សួង​មហាផ្ទៃ និង​លោក ឆាយ គឹមខឿន អ្នកនាំពាក្យ​អគ្គស្នងការ​ដ្ឋាន​នរគបាលជាតិ​​បដិសេធ​អត្ថាធិប្បាយ​លើ​រឿង​នេះ។​ 

ស្នងការនរគបាលខេត្ត​បន្ទាយ​មានជ័យ​លោក សិទ្ធិ ឡោះ មិន​អាច​ទាក់ទង​សុំ​ការអត្ថាធិប្បាយ​បានទេ។ ចំណែក​ស្ថានទូតថៃ​ប្រចាំ​ទីក្រុង​ភ្នំពេញ​ក៏​មិន​បាន​ឆ្លើយ​តប​នឹង​សំណើសុំ​អត្ថាធិប្បាយ​​នេះដែរ។​

លោក ស៊ុំ ចាន់គា មន្ត្រីសម្របសម្រួលសមាគមការពារសិទ្ធិមនុស្ស​អាដហុកប្រចាំខេត្ត​បន្ទាយមានជ័យ​​មាន​ប្រសាសន៍ថា ប្រទេស​កំពុង​អភិវឌ្ឍន៍​ដូច​កម្ពុជា​បាន​ក្លាយ​ជា​កន្លែង​លាក់​ខ្លួន​របស់​ពួក​ឆបោក​មក​ពី​ប្រទេស​ផ្សេងៗ​។​

លោក ចាន់គា បន្ត​ថា រដ្ឋាភិបាល​គួរតែ​ប្រើលទ្ធភាព​របស់​ខ្លួន​ក្នុង​ការ​បិទ​ខ្ទប់​វិបសាយ​ទាំង​នោះ​ដើម្បី​ការពារ​អំពើ​ឆបោក​តាម​អនឡាញ ហើយថា​ការ​មាន​ករណី​បែបនេះ​ញឹក​ញាប់​អាច​នាំ​ឲ្យ​ចំនួន​ភ្ញៀវទេសចរ​ពី​ប្រទេស​ជិត​ខាង​ធ្លាក់​ចុះ និង​អាច​ប៉ះពាល់​ដល់​សេដ្ឋកិច្ច​កម្ពុជា​។​

លោក​បន្ថែម​ថា៖ «​វា​ជា​ការសំខាន់​ណាស់​ដែល​រដ្ឋាភិបាល​ថ្មី​ត្រូវ​យក​ចិត្ត​ទុក​ដាក់​លើ​បញ្ហា​ទាំង​នេះ ពីព្រោះបើ​សិន​ជា​នៅ​ពន្យារ​ពេល វា​នឹង​បន្ត​កើត​មាន​ឡើង ហើយ​ធ្វើ​ឲ្យ​កម្ពុជា​ក្លាយ​ជា​កន្លែង​សម្រាប់​ឧស្សាហកម្ម​ជួញ​ដូរ​មនុស្ស និង​ឆបោក​តាម​អនឡាញ»៕​

រាយការណ៍​បន្ថែម​ដោយ ឃួន ណារីម​

ប្រែសម្រួលពីអត្ថបទភាសាអង់គ្លេស៖ Four Thai Citizens Arrested in Cambodia Over Links to Online Scam and Triple Murder

262 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម