សមាគមសម្ព័ន្ធអ្នកសារព័ត៌មានកម្ពុជា

ប៉ូលិសកម្ពុជាថ្លែងផ្ទុយពីមន្ត្រីឥណ្ឌូនេស៊ី និងអះអាងថាពលរដ្ឋដែលបញ្ជូនត្រឡប់ទៅវិញមិនមែនជាជនរងគ្រោះទេ

ពលរដ្ឋឥណ្ឌូនេស៊ី៤១នាក់ ត្រូវបានបញ្ជូនចេញពីកម្ពុជាត្រឡប់ទៅប្រទេសឥណ្ឌូនេស៊ីវិញកាលពីខែមុន នៅក្នុងរូបភាពដែលថតនៅការិយាល័យនគរបាលអន្តោប្រវេសន៍កម្ពុជា ។ (ក្រសួងការបរទេសនៃសាធារណរដ្ឋឥណ្ឌូនេស៊ី)
ពលរដ្ឋឥណ្ឌូនេស៊ី៤១នាក់ ត្រូវបានបញ្ជូនចេញពីកម្ពុជាត្រឡប់ទៅប្រទេសឥណ្ឌូនេស៊ីវិញកាលពីខែមុន នៅក្នុងរូបភាពដែលថតនៅការិយាល័យនគរបាលអន្តោប្រវេសន៍កម្ពុជា ។ (ក្រសួងការបរទេសនៃសាធារណរដ្ឋឥណ្ឌូនេស៊ី)

ស្ថានទូត​ឥណ្ឌូនេស៊ី​ប្រចាំរាជធានីភ្នំពេញ បានប្រកាស​កាលពីថ្ងៃចន្ទ​សប្ដាហ៍នេះថា នៅក្នុង​ខែមុន ស្ថានទូត​​បានបញ្ជូន​ពលរដ្ឋឥណ្ឌូនេស៊ី ៤១នាក់ ត្រឡប់ទៅប្រទេស​កំណើតវិញ ទាក់ទិនទៅនឹង​ប្រតិបត្តិការ​ឆបោក​តាមអនឡាញ ប៉ុន្តែមន្ត្រីនគរបាល​កម្ពុជា​និយាយថា មនុស្សទាំងនេះ​មិនមែនជាជនរងគ្រោះនោះទេ ។​

សេចក្ដីប្រកាស​របស់​ស្ថានទូត​ឥណ្ឌូនេស៊ី ថ្លែងថា កម្លាំងនគរបាលជាតិ​កម្ពុជា​បានរំដោះ​ជនរងគ្រោះ​ពី​ខេត្ត​បន្ទាយមានជ័យ ស្វាយរៀង និងរាជធានីភ្នំពេញ ចន្លោះពីថ្ងៃទី៥ ដល់ថ្ងៃទី១៤ ខែមិថុនា ។ ជនរងគ្រោះ​រួមមាន​កម្មករ​ឥណ្ឌូនេស៊ីមួយក្រុម​ដែល​មានទីតាំង​ស្ថិតនៅក្នុងក្រុង​បាវិត ដែល​បាន​ថតវីដេអូ​អំពាវនាវសុំ​ការជួយ​ពី​ប្រធានាធិបតី​ Joko Widodo ដែល​បាន​ចុះផ្សាយ​ដោយ​សារព័ត៌មាន​ឥណ្ឌូនេស៊ី ឈ្មោះ Detik News ។ បុរសដែល​និយាយ​នៅក្នុងវីដេអូនោះ បាននិយាយថា ក្រុមខ្លួន​មានអារម្មណ៍គិត​ថា​ត្រូវបានគេ​បោកប្រាស់។ ពួកគេត្រូវបានគេបំភ័ន្ត​ឱ្យជឿថាពួកគេនឹងធ្វើការនៅក្នុងការិយាល័យ​បម្រើសេវាអតិថិជន​តាមទូរសព្ទ (call center) ប៉ុន្តែ នៅពេលដែលពួកគេបានមកដល់​ប្រទេសកម្ពុជា ពួកគេ​ត្រូវបាន​បង្ខំ​ឱ្យធ្វើការជាអ្នក​ឆបោក​ទៅវិញ ។ 

ខេមបូចា បានសម្ភាស​ជាមួយ​មន្ត្រី​នគរបាល​ដែលពាក់ព័ន្ធនៅក្នុង​សំណុំរឿងនេះ ដែលបាននិយាយថា នេះ​មិនមែន​ជា​ប្រតិបត្តិការជួយសង្គ្រោះរបស់នគរបាលទេ ហើយ​អ្នកទាំងនេះ​​ក៏មិនមែនជា​ជនរងគ្រោះ​​នៃអំពើជួញដូរមនុស្ស ឬ​ការឆបោកតាម​អនឡាញ នោះដែរ ដោយ​លើកហេតុផល​បញ្ជាក់ថា ពលរដ្ឋ​ឥណ្ឌូនេស៊ី​មិនត្រូវបានឃុំ​ខ្លួន​ ឬវាយដំ​អ្វីនោះឡើយ ។

យោងតាម​អង្គការសហប្រជាជាតិ ការប្រើកម្លាំង​គឺគ្រាន់តែជា​មធ្យោបាយ​មួយ​ប៉ុណ្ណោះ​នៃ​អំពើ​ជួញដូរ​មនុស្ស ហើយ​ជនល្មើស​ក៏អាច​ប្រើប្រាស់​ការឆបោក ការបង្ខិតបង្ខំ ការរំលោភបំពាន​អំណាច ឬ​ការគំរាម​ប្រើប្រាស់​អំពើហិង្សា ដើម្បី​ធ្វើអាជីវកម្ម​លើ​មនុស្ស​សម្រាប់​ផលចំណេញ ។ ជាមួយគ្នានេះដែរ ជារឿយៗ ជនល្មើសជួញដូរមនុស្ស​តែងតែ​ប្រើប្រាស់«ការសន្យាខ្យល់​អំពី​ឱកាស​អប់រំ​និង​ឱកាស​ការងារ ដើម្បី​បោកបញ្ឆោត​និងបង្ខំ​ជនរងគ្រោះរបស់ខ្លួន» ។

មន្ត្រីនគរបាល​ខេត្តស្វាយរៀង​មួយរូប​ដែល​សុំ​មិន​បញ្ចេញឈ្មោះ​ដល់​ ខេមបូចា បាន​បញ្ជាក់ថា នគរបាល​ពិតជាបាន​នាំពលរដ្ឋ​ឥណ្ឌូនេស៊ី​ចាកចេញពី​កាស៊ីណូ Moc Bai ដែលស្ថិតក្នុងក្រុងបាវិត កាលពីខែមិថុនា តាមការស្នើសុំរបស់ស្ថានទូត​ឥណ្ឌេនេស៊ី ។ ប៉ុន្តែ លោកជំទាស់​នឹងការពណ៌នា​ស្ថានការណ៍​នេះ​ថា​ជា​ការរំដោះ ។ មន្ត្រីនគរបាលដដែល និយាយដូច្នេះថា៖ «ការនិយាយពាក្យថា«សង្គ្រោះ» គឺមិនត្រូវទេ ពីព្រោះ​ឯកអគ្គរដ្ឋទូត​របស់​ពួកគេ​ស្នើឱ្យ​យើង​ទៅ ដូច្នេះ​យើង​ក៏​បានទៅយកពួកគេ​ត្រឡប់មកវិញ ។ ពួកគេមិនត្រូវបានឃុំឃាំង ឬ​វាយដំ​អ្វីទេ ហើយ​ពួកគេ​បាននិយាយថា ពួកគេ​គ្រាន់តែចង់​ត្រឡប់ទៅផ្ទះវិញប៉ុណ្ណោះ» ។

មន្ត្រីនគរបាលខេត្តស្វាយរៀងដដែល បាននិយាយថា នៅពេលដែល​កម្លាំងនគរបាល​បានទៅដល់
​ទីតាំងកាស៊ីណូ​ ពួកគេបានឃើញ​ជនបរទេស​ផ្សេងទៀត​កំពុងដើរ​តាមផ្លូវ ហើយ​ពលរដ្ឋ​ឥណ្ឌូនេស៊ី​ខ្លះ​ដែលបាន​ស្នើសុំ​ជំនួយពីស្ថានទូតក៏កំពុងដើរ​នៅខាងក្រៅអគារ ផងដែរ ។ លោកនិយាយថា ដោយសារតែពួកគេ​មិនត្រូវបានក្រុមហ៊ុន​ឃុំ​ឃាំងនៅក្នុងអគារ ដូច្នេះ មិនគួរ​ហៅពួកគេថាជា«ជនរងគ្រោះ​»ឡើយ ។

លោកក៏បាន​អះអាងផងដែរថា ពុំមាន​ករណី​ជួញដូរមនុស្ស ការឆបោកតាមអនឡាញ ឬ​ការឃុំឃាំងមនុស្ស​នៅកាស៊ីណូ​ Moc Bai នេះ​ទេ ។

លោកនិយាយថា៖ «សារព័ត៌មានតែងតែផ្សាយអ្វីដែលពួកគេចង់ផ្សាយ ។ យើងមិនអាចបញ្ឈប់ពួកគេបានទេ» ។

យោងតាម​ VOD កាលពីខែកញ្ញា ឆ្នាំ២០២២ ពលរដ្ឋវៀតណាមជាង ៦០នាក់ បានរត់គេចចេញពី​កាស៊ីណូ​ Moc Bai ប៉ុន្តែ មន្ត្រី​បានបដិសេធថា ពួកគេទាំងនោះមិនត្រូវបាន​បង្ខំ​ឱ្យធ្វើការ ឬ​ឃុំឃាំងខ្លួន​នោះ​ទេ ។

សារព័ត៌មាន​ក្នុងស្រុក​និង​អន្តរជាតិ​បាន​រាយការណ៍​ពី​ករណីផ្សេងៗទៀត ដែលពាក់ព័ន្ធ​នឹង​កម្មករនិយោជិតជាជនបរទេស​នៅឯកាស៊ីណូ Moc Bai នេះ យ៉ាងហោច ចាប់តាំងពីឆ្នាំ២០១៧មកម្ល៉េះ ។

ខេមបូចា បានផ្សាយព័ត៌មានកាលពីខែកក្កដា ដោយផ្អែកលើ​របាយការណ៍​មួយ​របស់​នគរបាលជាតិ ដែល​ចេញផ្សាយជាសាធារណៈអំពី​កម្លាំងនគរបាល​បានយកបុគ្គលិកជនជាតិវៀតណាម ៣៥នាក់ ចេញពី​កាស៊ីណូ Oriental Paris Casino ដែលជាកាស៊ីណូ​ផ្សេងមួយទៀត​ ស្ថិតនៅក្នុងក្រុងបាវិត ។ នៅខែមេសា ខេមបូចា បានរាយការណ៍ថា នគរបាល​បាននិងកំពុងស៊ើបអង្កេត​ករណីឃាតកម្ម​លើ​ស្ត្រី​មួយរូប​ដែល​ធ្វើ​ការនៅឯ Dynasty Entertainment ជាកាស៊ីណូ​ដែល​នៅទល់មុខគ្នានឹង​កាស៊ីណូ Moc Bai ដែលបាន​ផ្សាយ​ប្រកាស​ជ្រើសរើស​តំណែង​សម្រាប់«call center» ។ ស្ត្រីរូបនេះ​ត្រូវបាន​រកឃើញ​ត្រូវគេសម្លាប់ដោយ​កាត់​ក្បាលនៅក្នុងបន្ទប់​ជួល​របស់​គាត់ ។

អធិការ​នគរបាល​ក្រុងបាវិត លោក ឯម សុវណ្ណារិទ្ធ បានអះអាងកាលពីថ្ងៃពុធ ថា កន្លងមក ពុំធ្លាប់​មាន​ករណីនៃការបង្ខាំងមនុស្ស​ដោយ​ខុសច្បាប់​ណាមួយ នៅ​ក្នុង​កាស៊ីណូ Moc Bai នេះទេ ។ កាលពីពេល​កន្លងមក លោក សុវណ្ណារិទ្ធ និងអាជ្ញាធរ​កម្ពុជា​ផ្សេងទៀត បាន​បដិសេធថាពុំមានករណី​ពលកម្មដោយ​បង្ខិតបង្ខំ និងករណីឃុំ​ឃាំងមនុស្ស​ខុសច្បាប់នោះទេ នៅក្រោយនាំកម្មករនិយោជិតបរទេស​ចេញ​ពីសណ្ឋាគារ​នោះ​ម្ដងៗ ។

លោក សុវណ្ណារិទ្ធ បាននិយាយថា កម្លាំងនគរបាល​បាន​ល្បាតតំបន់នេះ ហើយ​«ប្រជាជន​ដើរលេង​ពេញទូទាំងក្រុងបាវិត ហើយ​ជនជាតិឥណ្ឌូនេស៊ី​ខ្លះ​ចេញមកខាងក្រៅ រីឯខ្លះទៀត​ជិះម៉ូតូ ដោយកត់សម្គាល់ថា ម៉ូតូរបស់ពួកគេ​លាន់សំឡេងឮខ្លាំង ។ លោកថា៖ «គ្មានអ្នកណាម្នាក់ត្រូវបាន[ថៅកែ]ឃុំឃាំងទេ» ។

ស្នងការនគរបាលខេត្តបន្ទាយមានជ័យ លោក សិទ្ធ ឡោះ បានអះអាងថា ពុំដែល​មាន​ករណី​ឆបោក​ ឬ​ជួញដូរមនុស្ស​ឡើយ នៅក្នុងខេត្តរបស់​លោក ។

លោកបាននិយាយយ៉ាងដូច្នេះថា៖ «កន្លងមក ពុំដែលមានរឿងបែបនេះ​ទេ [ការជួញដូរមនុស្ស​នៅ​ក្នុង​ខេត្ត] ។ ព័ត៌មានដែល​គេ​និយាយថាមានអំពើជួញដូរមនុស្ស​នៅខេត្តបន្ទាយមានជ័យ គឺ​ពុំមាន​រឿងនេះ​កើតឡើងនៅឡើយទេ» ។

លោកនិយាយថា នៅពេល​កម្មករ​និយាយថា ពួកគេត្រូវបាន​ថៅកែ​ឃុំឃាំងខ្លួន ដែលលោក​ស្នងការ​អះអាងថាពុំដែលមានករណីបែបនេះ​កើតឡើងនៅក្នុងខេត្តនេះទេ គឺដោយសារតែ​ថៅកែ​ដកហូត​យក​លិខិត​ឆ្លងដែនរបស់ពួកគេទុក បន្ទាប់ពីពួកគេអត់សង​បំណុល ។ លោកបានបន្ថែមថា កម្មករនៅក្នុង​​ស្ថានការណ៍នេះ​បានអះអាងដោយ​មិនពិត​ថា ពួកគេ​ត្រូវបាន​គេឃុំឃាំង ដើម្បី​ឱ្យ​នគរបាល​ជួយ ។

លោកស្នងការបាននិយាយថា៖ «ករណីជាច្រើនដែលបានកើតឡើងនៅខេត្តបន្ទាយមានជ័យ គឺករណី​ដែល​អ្នកធ្វើការហើយជំពាក់លុយគេ ឬពាក់ព័ន្ធនៅក្នុងការខ្ចីលុយ ត្រូវបានថៅកែ​ដកហូត​យក​លិខិត​ឆ្លងដែនជាថ្នូរនឹង​ការខ្ចីលុយ ។ នៅពេលដែលអត់មានលុយសងគេ វាក្លាយទៅជាករណី​បង្ខាំងមនុស្ស »។

ការបញ្ចាំខ្លួនដោះបំណុល ដែល​មនុស្សត្រូវបានគេបង្ខំឱ្យ​ធ្វើការឱ្យគេដើម្បី​សងបំណុល អាចជា​ធាតុ​ផ្សំ​មួយ​នៃ​ករណីជួញដូរមនុស្ស ឬករណីពលកម្ម​ដោយ​បង្ខិតបង្ខំ ។ នេះ​បើ​យោងតាម​អង្គការ ពលកម្មអន្តរជាតិ (ILO) និង UN ។ ការដកហូត​ឯកសារ​គឺជា​សូចនាករ​មួយ​នៃ​ការជួញដូរមនុស្ស​ផងដែរ ។

យោងតាម​ Detik News, អង្គភាពសារព័ត៌មាននេះ​បានទទួល​ព័ត៌មាន​អំពីជនរងគ្រោះ​នៅក្នុងវីដេអូ នៅថ្ងៃទី២៩ ខែឧសភា ហើយបន្ទាប់មក ក៏បានទាក់ទងទៅ​អាជ្ញាធរ​ឥណ្ឌូនេស៊ី ។ Detik News បានបញ្ចេញ​អត្តសញ្ញាណ​របស់បុរស​ដែល​និយាយ​នៅក្នុង​វីដេអូដែលថតនៅថ្ងៃទី៦ ខែមិថុនា ថាមានឈ្មោះ Herri អាយុ ៣៨ឆ្នាំ មកពី Medan ប្រទេសឥណ្ឌូនេស៊ី ។ បុរសនេះ​និយាយថា គាត់​និង​ពលរដ្ឋ​ឥណ្ឌូនេស៊ីមួយក្រុម​ទៀត​ស្ថិតនៅក្នុង«Moc Bai បាវិត» ប៉ុន្តែ វីដេអូនេះ គេមិនប្រាកដ​ច្បាស់ទេថាតើ​បុរស​រូបនេះនិយាយសំដៅតំបន់ទូទៅ​ដែលនៅក្បែរច្រក​ព្រំដែន​ Moc Bai-បាវិត ដែល​ជាច្រក​ឆ្លងទៅ​កាន់​ប្រទេសវៀតណាម ឬ​សំដៅ​កាស៊ីណូ Moc Bai ជាក់លាក់ ឬយ៉ាងណា ។

សមាជិកមួយរូប​នៃក្រុមនេះ ដែលមានឈ្មោះថា Steven បានប្រាប់ Detik News ថា លោក​​ត្រូវបានជ្រើសរើស​ឱ្យធ្វើការតាមរយៈតេឡេក្រាម ហើយ​ក្រុមលោក​​បាន​ជិះយន្តហោះទៅកាន់វៀតណាម រួចហើយ​ទើប​បន្តដំណើរចូលមក​ប្រទេស​កម្ពុជា ។ លោកបាននិយាយថា ពួកគេបាន​មកដល់​តំបន់​«Moc Bai» នៅថ្ងៃទី២៨ ខែមីនា និង​បានចូលក្នុងអគារដែលនៅជិតកាស៊ីណូមួយ ។

ប៉ុន្តែ នៅពេល​ចូលដល់​កន្លែងធ្វើការ ពួកគេត្រូវបានណែនាំឱ្យ​ធ្វើការជាមួយកុំព្យូទ័រ និង​អនុវត្ត​ការឆបោក​តាមរយៈ​ទំនាក់ទំនង​ស្នេហា (romance scams) ។ ពួកគេត្រូវបាន​ណែនាំឱ្យ​ឆបោក​ជនជាតិ​ឥណ្ឌូនេស៊ីដទៃទៀត តាមរយៈ​កម្មវិធីណាត់ជួបគ្នាបែបស្នេហា (dating app) ឈ្មោះ TanTan ហើយ​បន្ទាប់មក ឱ្យពួកគេដាក់បញ្ចូល​លុយ​ទៅក្នុង​កម្មវិធី​ជម្រើស​គូ ដែលមានឈ្មោះថា Mekri ។ លោក Steven បាននិយាយថា ជនជាតិឥណ្ឌា​និង​វៀតណាម​ក៏កំពុងធ្វើការនៅក្នុងបន្ទប់​ផ្សេងទៀត​នៅក្នុង​អគារនោះ​ដែរ ។

មន្ត្រីឥណ្ឌូនេស៊ី​បានរាយការណ៍ថា រដ្ឋាភិបាល​កម្ពុជា​បានសន្និដ្ឋានថា ពលរដ្ឋ​ឥណ្ឌូនេស៊ីទាំងនេះ​មិនមែន​ជា​ជនរងគ្រោះ​នៃការជួញដូរមនុស្ស​ទេ ហើយ​ពួកគេ​ត្រូវបាន​ឃុំ​ឃាំង​នៅ​មណ្ឌល​​អន្តោប្រវេសន៍​ដោយសារតែការស្នាក់នៅ​ផុតកំណត់​រយៈពេលអនុញ្ញាត ។ ក្រុមនេះ​ត្រូវបាន​ឃុំ​ឃាំង​អស់​រយៈពេល​ជាង ១ខែកន្លះ នៅមុនពេលវិលត្រឡប់ទៅកាន់ប្រទេស​ឥណ្ឌូនេស៊ីវិញ ។ ​

លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានប្រាប់ ខេមបូចា ឱ្យ​ផ្ញើ​សំណួរទៅកាន់អគ្គស្នងការនគរបាលជាតិ ។ លោក ឆាយ គឹមឃឿន អ្នកនាំពាក្យអគ្គស្នងការ​ដ្ឋាន​នគរបាលជាតិ មិនបានឆ្លើយតបនឹងសំណើសុំ​អត្ថាធិប្បាយ​តាម​តេឡេក្រាមឡើយ ។ ​

លោក កែវ វណ្ណថន អ្នកនាំពាក្យអគ្គ​នាយកដ្ឋានអន្តោប្រវេសន៍​នៃក្រសួងមហាផ្ទៃ បានប្រាប់​ ខេមបូចា ថា ពលរដ្ឋ​ឥណ្ឌូនេស៊ីទាំង ៤១នាក់ ជាប់ពាក់ព័ន្ធនឹងករណីស្នាក់នៅលើស​រយៈពេលកំណត់​នៅកម្ពុជា ។ ពួកគេត្រូវបានបញ្ជូនត្រឡប់ទៅវិញ ហើយបានធ្វើដំណើរតាមជើងយន្តហោះទៅកាន់​ឥណ្ឌូនេស៊ី​វិញ តាមព្រលានយន្តហោះអន្តរជាតិភ្នំពេញ​ចន្លោះពី​ថ្ងៃទី១៤ ខែកក្កដា ដល់ថ្ងៃទី៥ ខែសីហា បន្ទាប់ពីទទួលបាន​បញ្ជា​ឱ្យ​ចាកចេញពី​ប្រទេសកម្ពុជា​ពីក្រសួងមហាផ្ទៃ ។ ពលរដ្ឋឥណ្ឌូនេស៊ី ៥រូប គឺជា​ស្ត្រី ។

អនុប្រធានគណៈកម្មាធិការជាតិ​ប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង បាន​និយាយថា លោកស្រីមិនទាន់ទទួលបានព័ត៌មានណាមួយ​ជុំវិញ​ករណីដែលពាក់ព័ន្ធនឹង​ពលរដ្ឋ​ឥណ្ឌូនេស៊ីនេះ នៅឡើយទេ ។ លោកស្រី​ធ្លាប់បានទទួលរបាយការណ៍​ពី​អាជ្ញាធរអំពីកាស៊ីណូ Moc Bai កាលពីពេល​កន្លងមក ប៉ុន្តែ លោកស្រីមិនច្បាស់ទេថា​តើ​បទល្មើស​អ្វី​ដែល​បាន​ប្រព្រឹត្តនៅ​លើ​ទីតាំងនេះ ៕

ប្រែសម្រួលពីអត្ថបទភាសាអង់គ្លេស៖ Cambodian Police Contradict Indonesian Officials, Claim Repatriated Indonesians Are Not Victims

209 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម