Updated: ក្រុមហ៊ុន Sokha Hotels និង Resorts, និង Sokimex Group របស់លោកឧកញ៉ា សុខ គង់ បានបដិសេធថា ក្រុមហ៊ុនពុំបានដឹង និងពុំដែលឮទាល់តែសោះថាមានការជួញដូរមនុស្សនៅលើភ្នំបូកគោដូចការចុះផ្សាយរបស់ខេមបូចា ដែលមានចំណងជើងថា «អំពើឆបោក ការជួញដូរមនុស្សកើតមាននៅភ្នំបូកគោក្រោយសណ្ឋាគារប្រណិតរបស់ឧកញ៉ាម្នាក់»។ ក្រុមហ៊ុនបានបន្ថែមថា៖ «ដោយឡែក អ្នកដែលជួលទីតាំងនោះទៀតសោត ក៏បានឈប់ជួលតាំងពីមុនពាក់កណ្តាលឆ្នាំ២០២៣ មកម្លេះ»។
ក្រុមហ៊ុនបានផ្ញើលិខិតមកខេមបូចា កាលពីថ្ងៃទី១៩ ខែមិថុនា ឆ្នាំ២០២៤ គឺជាងមួយឆ្នាំក្រោយពីការចុះផ្សាយអត្ថបទ គឺនៅថ្ងៃទី៩ ខែកុម្ភៈ ឆ្នាំ២០២៣។ មុនការផ្សាយ ខេមបូចាបានព្យាយាមទាក់ទងទៅក្រុមហ៊ុនជាច្រើដងតាមទូរសព្ទ និងដាក់លិខិតនៅក្រុមហ៊ុន ប៉ុន្តែពុំមានការឆ្លើយតបនៅពេលនោះ។
ជារៀងរាល់ថ្ងៃក្រុមទេសចរទៅលេងកន្លែងកម្សាន្តដ៏ពេញនិយមមួយក្បែរសណ្ឋាគារឋានសួគ៌សុខា ដែលជាសណ្ឋាគារលំដាប់ផ្កាយប្រាំ ក៏ដូចជាកាស៊ីណូនៅលើភ្នំបូកគោ ដើម្បីថតរូបប្រាសាទ សំណង់អគារសល់ពីសម័យអាណានិគម និងឆ្នេរសមុទ្រខេត្តកំពត។
ប៉ុន្តែយោងតាមសមត្ថកិច្ចតៃវ៉ាន់ ភស្តុតាងពីជនរងគ្រោះដែលត្រូវបានឃុំខ្លួន និងក្រុមតស៊ូមតិដែលពាក់ព័ន្ធនឹងការជួយសង្រ្គោះជនរងគ្រោះ អគារដែលមានទីតាំងនៅខាងក្រោយអគារដ៏ធំនៃសណ្ឋាគារដែលគ្រប់គ្រងដោយក្រុមហ៊ុនសូគីម៉ិច Investment Group របស់ឧកញ៉ា សុខ គង់ ត្រូវបានបណ្តាញក្រុមហ៊ុនឆបោកយាមកាមយ៉ាងតឹងរ៉ឹងហើយប្រើប្រាស់ពាក់ព័ន្ធនឹងការជួញដូរមនុស្ស។
មន្ត្រីម្នាក់នៃការិយាល័យស៊ើបអង្កេតឧក្រិដ្ឋកម្មរបស់ទីភ្នាក់ងារប៉ូលិសជាតិតៃវ៉ាន់ (CIB) បាននិយាយថា បរិវេណភ្នំបូកគោគឺជា «ទីតាំងដ៏រឹងមាំ» សម្រាប់ក្រុមហ៊ុនឆបោកតាមអ៊ីនធឺណិត និងជួញដូរមនុស្ស។ មន្ត្រីដែលទទួលបន្ទុកជួយសង្គ្រោះជនជាតិតៃវ៉ាន់ដែលជាប់នៅក្នុងប្រទេសកម្ពុជារូបនោះបានសុំមិនបញ្ចេញឈ្មោះដើម្បីការពារសុវត្ថិភាពរបស់គាត់។
នៅចន្លោះខែសីហា ដល់ខែធ្នូ ឆ្នាំ ២០២២ សមត្ថកិច្ចអនុវត្តច្បាប់របស់តៃវ៉ាន់បានចាប់ខ្លួនមនុស្សចំនួន ១២ នាក់នៅតៃវ៉ាន់ ដែលជាប់ពាក់ព័ន្ធនឹងក្រុម «បងធំម៉ាប់» ដែលត្រូវចោទប្រកាន់ថាបានជួញដូរជនជាតិតៃវ៉ាន់ ៣១ នាក់ ។ មន្ត្រី CIB បាននិយាយថា មនុស្សទាំង៣១នាក់ស្ថិតក្នុងចំណោមជនជាតិតៃវ៉ាន់ជាង ៤៣០ នាក់ដែលត្រូវបានជួយសង្គ្រោះពីទូទាំងប្រទេសកម្ពុជាក្នុងឆ្នាំ ២០២២ ។
មន្ត្រី CIB ពីររូបបញ្ជាក់ប្រាប់ ខេមបូចា ថាក្រុមបងធំម៉ាប់ បានជួញដូរជនរងគ្រោះដល់បរិវេណឧទ្យានជាតិព្រះមុនីវង្សបូកគោ។
ខណៈដែលព័ត៌មានពីក្រុមជួញដូរមនុស្សនៅក្នុងក្រុងព្រះសីហនុដែលនៅជិតនោះត្រូវបានផ្សព្វផ្សាយយ៉ាងច្រើនក៏ដោយ ប៉ុន្តែព័ត៌មាននៃការឆបោកនៅស្ថិតក្នុងបរិវេណអគារនៅភ្នំបូកគោបានមិនសូវមានការចាប់អារម្មណ៍ពីមហាជនឡើយ លើកលែងតែក្នុងក្នុងប្រព័ន្ធផ្សព្វផ្សាយជាភាសាចិន ជាពិសេសនៅតៃវ៉ាន់ និងសេចក្តីរាយការណ៍ជាភាសាខ្មែរខែធ្នូនៅក្នុងវិទ្យុអាស៊ីសេរី។ ទោះជាយ៉ាងណាក៏ដោយទីតាំងអគារដែលនៅភ្នំបូកគោក៏ស្ថិតក្នុងចំណោមទីតាំងក្នុងប្រទេសកម្ពុជាដែលមានមនុស្សប្រមាណ១០០ ០០០ ត្រូវបានជួញដូរតាមរយៈ ហើយត្រូវបានគេដឹងថាជាកន្លែងដែលក្រុមឆបោកប្រើប្រាស់តាំងពីនៅដើមឆ្នាំ២០១៨ នៅពេលដែលប៉ូលិសចិនបានចាប់ខ្លួនជនជាតិចិនចំនួន៩១នាក់ដែលពាក់ព័ន្ធនឹងការឆបោកតាមអ៊ីនធឺណិត។
មន្ត្រី CIB ពីររូបបានប្រាប់ ខេមបូចា ថា បន្ទាប់ពីមានការបង្រ្កាបនៅខេត្តព្រះសីហនុកាលពីឆ្នាំមុន សកម្មភាពជួញដូរ និងឆបោកមួយចំនួនហាក់ដូចជាបានបង្វែរទៅភ្នំបូកគោក្នុងខេត្តកំពត ហើយបានដំណើរការនៅក្នុងប្រទេសកម្ពុជាតាំងពីពេលនោះមក។
ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធរិទ្ធ បានទទួលស្គាល់ថា បានទទួលពាក្យបណ្តឹងមួយចំនួនកាលពីឆ្នាំមុន ពីជនបរទេស រួមទាំងជនជាតិតៃវ៉ាន់ ដោយនិយាយថា ពួកគេកំពុងត្រូវបានឃុំខ្លួន និងធ្វើទារុណកម្មនៅបូកគោ។ លោកបានអះអាងថា ប៉ូលិសបានទៅមើលបរិវេណនេះ រាល់ពេលដែលពួកគេបានទទួលពាក្យបណ្តឹង ប៉ុន្តែមិនដែលបានរកឃើញករណីនៃការបង្ខាំងដោយបង្ខំ ការរំលោភបំពាន ឬការបោកប្រាស់តាមអ៊ីនធឺណិតទេ។ លោកថាបណ្តឹងនេះគ្រាន់តែជាលេសរបស់កម្មករដែលមិនពេញចិត្តនឹងប្រាក់ខែរបស់ខ្លួនប៉ុណ្ណោះ។
ជនរងគ្រោះជនជាតិតៃវ៉ាន់រាប់សិបនាក់ដែលត្រូវបានឃុំខ្លួននៅបរិវេណអគារនៅភ្នំបូកគោ ត្រូវបានជួញដូរនៅទីនោះដោយពួកគេមិនបានដឹងមុននោះទេ ហើយពួកគេក៏ត្រូវបានឃុំឃាំង វាយដំយ៉ាងឃោរឃៅ ហើយក្នុងករណីខ្លះជនរងគ្រោះដែលត្រូវបានជួយសង្គ្រោះមួយចំនួន ត្រូវបានគេគំរាមកំហែងថានឹងស្លាប់ ប្រសិនបើពួកគេនិយាយទៅកាន់ប្រព័ន្ធផ្សព្វផ្សាយ។ នេះបើតាមអ្នកតស៊ូមតិដែលរស់រានមានជីវិតពីការជួញដូរជនជាតិតៃវ៉ាន់ លោក Yu Tang និងនាយកក្រុមប្រឹក្សាធនធានមនុស្សធម៌(HRC) Mina Chiang ប្រាប់ខេមបូចា។ ពួកគេនិយាយថាពួកគេបានជួយក្នុងប្រតិបត្តិការជួយសង្គ្រោះមនុស្សប្រាំនាក់ពីបរិវេណនោះកាលពីឆ្នាំមុន។
Chiang បានលើកឡើងថាក្នុងអគារនៅបរិវេណកំពូលភ្នំដែលហ៊ុំព័ទ្ធដោយព្រៃឈើចំនួន១៤០០០០ហិកតានោះ៖ «ជាកន្លែងដ៏ល្អឥតខ្ចោះសម្រាប់អ្នកជួញដូរលាក់ជនរងគ្រោះ»។ «ដោយសារធម្មជាតិរារាំងពួកគេមិនឲ្យចេញឆ្ងាយ»។
ទីតាំងឆបោកដ៏មាំក្នុងបរិវេណកម្មសិទ្ធិក្រុមហ៊ុនសូគីម៉ិច
សន្តិសុខឋានសួគ៌សុខា យាមច្រកចូលផ្លូវតែមួយ ឡើងភ្នំបូកគោ ជាកន្លែងដែលពួកឥស្សរជននៅសម័យអាណានិគមបារាំងធ្លាប់ទៅកម្សាន្ត ដើម្បីគេចពីកំដៅនៅទីក្រុង។
លោក សុខ គង់ ប្រធានក្រុមហ៊ុនសូគីម៉ិច ដែលបានបង្កើតទ្រព្យសម្បត្តិរបស់គាត់ក្នុងវិស័យប្រេងឥន្ធនៈ និងបានសាងសង់អាណាចក្រប្រព័ន្ធផ្សព្វផ្សាយ សេវាកម្សាន្ត និងសណ្ឋាគារ បានទទួលសម្បទានរយៈពេល៩៩ឆ្នាំ ដើម្បីអភិវឌ្ឍឧទ្យានជាតិព្រះមុនីវង្សបូកគោក្នុងឆ្នាំ២០០៧។
បិទបាំងដោយទិដ្ឋភាពនៃសណ្ឋាគារសុខាដែលមានបន្ទប់ចំនួន៥៦៤ របស់លោក សុខ គង់ អគារចំនួនប្រាំបួនជាកន្លែងសម្រាប់ស្នាក់នៅដែលភាគច្រើនជាជនជាតិចិន ប៉ុន្តែក៏មានជនជាតិវៀតណាម ថៃ អារ៉ាប៊ីសាអូឌីត ម៉ាឡេស៊ី និងឥណ្ឌូណេស៊ី ពួកគេទាំងអស់ត្រូវបានបង្ខាំងនៅខាងក្នុងបរិវេណដើម្បីធ្វើ ការងារ «អនឡាញ»។ នេះបើយោងតាមបុគ្គលិកសណ្ឋាគារ និងអ្នកលក់នៅក្នុងតំបន់នោះ។
បុគ្គលិកសណ្ឋាគារម្នាក់បានប្រាប់ខេមបូចា ថា៖«កម្មករនៅទីនោះមិនអាចចាកចេញបានទេ។ ខ្ញុំពិតជាមិនដឹងថាហេតុអ្វីឡើយ»។
របងលួសបន្លាព័ទ្ធជុំវិញបរិវេណនិងឆ្កែមួយយាមទ្វារព្រុសយ៉ាងខ្លាំងនៅពេលចូលទៅជិតចូលអ្នកទស្សនា។ សន្តិសុខឈរមើលនៅគ្រប់ច្រកចេញដោយស្លៀកឯកសណ្ឋានមានរូបផ្កាឈូកក្រហមរបស់សណ្ឋាគារឋានសួគ៌សុខាដាក់លើអ្នករាំអប្សរាពណ៌ស។
ទាក់ទងតាមទូរសព្ទ លោក សារិន សៅ ប្រធានគ្រប់គ្រងទូទៅសណ្ឋាគារបានថ្លែងថា លោកមិនបានដឹងអំពីសកម្មភាពនៅក្នុងបរិវេណអគារដែលមានចម្ងាយ ១០០ ម៉ែត្រពីសណ្ឋាគារ សុខា ទេ។
លោក សៅបាននិយាយថា៖ «ខ្ញុំគ្រាន់តែជាអ្នកទទួលខុសត្រូវលើសណ្ឋាគារប៉ុណ្ណោះ។ អគារមួយនេះ គ្រប់គ្រងដោយក្រុមហ៊ុនសូគីម៉ិច ក្រោមក្រុមហ៊ុនវិនិយោគសូគីម៉ិច»។
លោក សៅ បន្តថា ប្រធានសន្តិសុខសូគីម៉ិច ទទួលបន្ទុកគ្រប់គ្រងសន្តិសុខយាមបរិវេណនោះ។ យោងតាមការបង្ហោះលើបណ្តាញទំនាក់ទំនងLinkedIn លោក វណ្ណ ចន្ថា ជាប្រធានសន្តិសុខនៅសណ្ឋាគារ សុខា រីសត និងសូគីម៉ិចគ្រុប ប៉ុន្តែមិនអាចទាក់ទងសុំការអត្ថាធិប្បាយបានទេ។ លោក សៅ បដិសេធមិនផ្តល់ព័ត៌មានបន្ថែមទេ។
សណ្ឋាគារ ឋានសួគ៌ សុខា គឺជាផ្នែកមួយនៃក្រុមហ៊ុន សុខា អូតែល ដែលជាក្រុមហ៊ុនបុត្រសម្ព័ន្ធរបស់សូគីម៉ិច។ ក្រសួងពាណិជ្ជកម្មចុះបញ្ជីកូនស្រីរបស់លោក សុខ គង់ ឈ្មោះ សុខ ចន្ថា ជានាយិកាជាមួយឪពុក។ អ្នកស្រីក៏ជានាយកក្រុមហ៊ុនសូគីម៉ិចផងដែរ។
ខេមបូចា បានព្យាយាមទាក់ទងលោក សុខ គង់ និង អ្នកស្រី សុខ ចន្ថា ម្តងហើយម្តងទៀតដើម្បីសុំការអត្ថាធិប្បាយតាមរយៈទូរសព្ទ និងអ៊ីមែល។ នៅពេលហៅចូលទៅកាន់លេខទូរសព្ទរបស់លោក សុខ គង់ និង សុខ ចន្ថា ជំនួយការរបស់ពួកគេបដិសេធមិនបង្ហាញអត្តសញ្ញាណ ឬអះអាងថាមិនពាក់ព័ន្ធនឹងលោក សុខ គង់ ឬសណ្ឋាគារ សុខា ទេ។
លោក ស្វាយ វុទ្ធី ប្រធានផ្នែកច្បាប់ និងកិច្ចការសាជីវកម្មនៅសូគីម៉ិច បានបដិសេធនិយាយជាមួយខេមបូចា នៅពេលទាក់ទងតាមទូរសព្ទ ហើយមិនអើពើនឹងសារ Telegram ជាបន្តបន្ទាប់។ លិខិតសំណួរលម្អិតដែលផ្ញើទៅទីស្នាក់ការកណ្តាលសូគីម៉ិចក្នុងរាជធានីភ្នំពេញក៏មិនមានការឆ្លើយតបដែរ។
ឧត្តមសេនីយ៍ទោ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ខេមបូចាថា មិនមានករណីនរណាម្នាក់ត្រូវបានឃុំខ្លួន ឬធ្វើទារុណកម្មនៅលើភ្នំបូកគោទេ ប៉ុន្តែលោកបានទទួលស្គាល់ថា លោកបានជួយជនជាតិតៃវ៉ាន់ចេញពីទីតាំងនោះមែនកាលពីឆ្នាំមុន។ លោកថាប៉ូលិសទទួលពាក្យបណ្ដឹងពាក់ព័ន្ធភ្នំបូកគោ ពួកគេតែងតែទាក់ទងម្ចាស់អគារមុនពេលចុះទៅពិនិត្យ។
លោកបានមានប្រសាសន៍ថា៖ «ពួកគេ [មនុស្សនៅក្នុងបរិវេណ] បានដាក់ពាក្យបណ្តឹងដោយសារតែពួកគេគ្រាន់តែចង់ផ្លាស់ប្តូរការងារទៅកន្លែងផ្សេងទេ ហើយមិនមានការឃុំឃាំង ឬធ្វើទារុណកម្មអីទេ ហើយនៅឆ្នាំ ២០២២ យើងក៏បានទៅពិនិត្យអគារទាំង ៩ នោះ ដែលជាកម្មសិទ្ធិរបស់ក្រុមហ៊ុនសូគីម៉ិចហ្នឹងដែរ»។
លោកបន្តថា៖ «នៅទីនោះពួកគេជាជនជាតិថៃ និងជនជាតិបង់ក្លាដែស។ ពួកគេទាំងអស់ហ្នឹងបានដាក់ពាក្យបណ្ដឹងថា ពួកគេត្រូវបានគេឃុំខ្លួន និងធ្វើទារុណកម្ម។ ហើយពេលយើងទៅពិនិត្យនៅទីនោះ យើងរកមិនឃើញអ្វីទេ គ្រាន់តែពួកគេចង់ប្ដូរការងារដើម្បីបានប្រាក់ខែខ្ពស់»។
ច្រកចូលដែលមានការយាមកាមតឹងតែងមិនបានធ្វើឱ្យលោកច័ន្ទមធុរិទ្ធ ព្រួយបារម្ភនោះឡើយ ដោយលោកថា«ជារឿងធម្មតា»ប៉ុណ្ណោះសម្រាប់កន្លែងការងារ ហើយលោកបានបន្ថែមថាក្រុមហ៊ុនក្នុងបរិវេណអគារនោះជាក្រុមហ៊ុនល្បែងស្របច្បាប់។
លោកបានបន្ថែមថា៖ «ប្រសិនបើកន្លែងនោះមានការឃុំឃាំង ឬធ្វើទារុណកម្ម ហេតុអ្វីបានជា [ជនរងគ្រោះ] អាចទូរសព្ទមកខ្ញុំបាន? ពួកគេ[ក្រុមហ៊ុន]នឹងមិនអនុញ្ញាតឱ្យពួកគេប្រើទូរសព្ទទេ ប្រសិនបើវាជាករណីនៃការឃុំឃាំង គ្មាននរណាម្នាក់អាចប្រើទូរសព្ទ និងទូរសព្ទមកប៉ូលិសបានទេ»។
ជនរងគ្រោះម្នាក់ដែលត្រូវបានជួញដូរនៅភ្នំបូកគោបានប្រាប់ខេមបូចាថា ខណៈពេលដែលគាត់ត្រូវបានប្រគល់ទូរសព្ទរបស់គាត់មកវិញ គាត់ឃើញថាអ្នកផ្សេងទៀតដែលទាក់ទងប៉ូលសត្រូវបានពិន័យដោយឆក់ខ្សែភ្លើង ឬលក់ទៅកន្លែងផ្សេង។ លោកបានអះអាងថា ប៉ូលិសមូលដ្ឋានបានធ្វើការជាមួយនឹងថៅកែឆបោក ដែលការអះអាងរបស់លោកត្រូវបានគាំទ្រដោយសេចក្តីថ្លែងការណ៍មួយដែលចេញដោយមន្ត្រី CIB និងអ្នកតស៊ូមតិដែលធ្វើការនៅកម្ពុជា។
មន្ត្រី CIB តៃវ៉ាន់បាននិយាយថា ប៉ូលិសកម្ពុជា និងមន្ត្រីមូលដ្ឋានត្រូវបានគេដឹងថាមិនអើពើ ឬច្រានចោលករណីជួញដូរមនុស្សពាក់ព័ន្ធនឹងការឆបោក ហើយថែមទាំងបានឃុបឃិតជាមួយសមាសធាតុឆបោក ដើម្បីជួយក្រុមឧក្រិដ្ឋជនឱ្យគេចពីការរកឃើញ។ កាលពីឆ្នាំមុន នៅក្នុងរបាយការណ៍ស្តីពីការជួញដូរមនុស្សឆ្នាំ២០២២របស់ខ្លួន ក្រសួងការបរទេសសហរដ្ឋអាមេរិកបានទម្លាក់ចំណាត់ថ្នាក់ប្រទេសកម្ពុជាទៅកម្រិតទាបបំផុត ដោយកត់សម្គាល់ថា«អាជ្ញាធរមិនបានស៊ើបអង្កេត ឬទទួលខុសត្រូវព្រហ្មទណ្ឌចំពោះមន្ត្រីណាដែលពាក់ព័ន្ធនឹងរបាយការណ៍ដែលគួរឱ្យទុកចិត្តភាគច្រើននោះទេ» ។
មន្ត្រី CIB បានរំឮកថា ការប្រជុំសម្ងាត់ជាមួយក្រុមថៅកែឆបោកនៅក្រុងព្រះសីហនុ ហើយសាក្សីថាពួកគេបានទទួលទូរសព្ទពីប៉ូលិសជូនដំណឹងដល់ពួកគេនៅថ្ងៃបន្ទាប់ថានឹងមានការបង្ក្រាបនៅក្នុងបរិវេណរបស់ពួកគេ។
លោក Chiang នៃក្រុមសង្គ្រោះ HRC បាននិយាយថា ប៉ូលិសមានភាពស៊ាំនឹងការជួយសង្គ្រោះជនរងគ្រោះនៅបូកគោ។
លោក Chiang បាននិយាយថា៖ «ទោះបីជាយើងដឹងថាមានជនរងគ្រោះច្រើននៅទីនោះក៏ដោយ វាពិតជាលំបាកណាស់ក្នុងការជួយសង្គ្រោះពួកគេនៅទីនោះដោយគ្មានព័ត៌មានលម្អិត ទាំងឈ្មោះ លេខអត្តសញ្ញាណ ព្រោះវាតែងតែត្រូវឆ្លងកាត់ការទំនាក់ទំនងខ្លះជាមួយភាគីកម្ពុជា។ ហើយវាមិនអាចកៀរគរប៉ូលិសកម្ពុជាដើម្បីបង្ក្រាបអគារទាំងមូលបាននោះទេ វាអាស្រ័យលើព័ត៌មានបុគ្គលច្រើន»។
ប្រាក់លោះត្រូវបានទាមទារជាញឹកញាប់សម្រាប់ការដោះលែងជនរងគ្រោះ។ បើមិនដូច្នេះទេ ពួកគេអាចនឹងត្រូវលក់ទៅឱ្យក្រុមហ៊ុនផ្សេង។ សូម្បីតែបន្ទាប់ពីការជួយសង្គ្រោះក៏ដោយ ផលប៉ះពាល់ និងការគំរាមកំហែងនៃអំពើហិង្សាអាចលងបន្លាចជនរងគ្រោះជានិច្ច។
Tang បាននិយាយថា ស្ត្រីវ័យក្មេងតៃវ៉ាន់ម្នាក់ក្នុងចំណោមស្ត្រីតៃវ៉ាន់ពីរនាក់ដែល HRC ជួយសង្គ្រោះពីបូកគោត្រូវបានវាយដំយ៉ាងធ្ងន់ធ្ងរដែលធ្វើឱ្យនាងស្ទើរតែពិការភ្នែក។
Tang បាននិយាយថា៖ «មុនពេលដែលក្មេងស្រីទាំងពីរនាក់នោះចាកចេញ ក្រុមហ៊ុនឆបោកនៅភ្នំបូកគោបានប្រាប់ពួកគេយ៉ាងច្បាស់ថា ពួកគេមិនអាចនិយាយអ្វីបាននៅពេលដែលពួកគេត្រឡប់ទៅតៃវ៉ាន់វិញ បើមិនដូច្នេះទេ ពួកគេ [ក្រុមឆបោក]នឹងស្វែងរកនរណាម្នាក់សម្លាប់ពួកគេនៅតៃវ៉ាន់»។
មន្រ្តី CIB បានបង្ហាញរូបថតពីអេក្រង់ទូរសព្ទដល់ខេមបូចាពាក់ព័ន្ធសារជាមួយជនរងគ្រោះជាច្រើននាក់ផ្សេងទៀត និងក្រុមគ្រួសាររបស់ពួកគេ ដែលបានផ្ញើវីដេអូ រូបថត និងទីតាំងដែលបង្ហាញថាពួកគេត្រូវបានគេឃុំខ្លួននៅបរិវេណភ្នំបូកគោ។
លោកបានបន្ថែមថាដើម្បីជួយសង្គ្រោះជនរងគ្រោះទាំងនេះលោកត្រូវផ្ញើសារតាមហ្វេសប៊ុកផ្ទាល់ទៅកាន់លោក ស ខេង រដ្ឋមន្ត្រីក្រសួងមហាផ្ទៃ ដែលមានក្រុមការងារខិតខំប្រឹងប្រែងជួយសង្គ្រោះជនរងគ្រោះដោយសារអំពើឆបោក។
រូបថតលើអេក្រង់ទូរសព្ទបង្ហាញសារពីជនរងគ្រោះនៅបូកគោដែលត្រូវបានផ្ញើដោយមន្ត្រី CIB ក្នុងខែវិច្ឆិកា ឆ្នាំ២០២២ទៅកាន់ក្រុមងារងាររបស់លោក ស ខេង ដែលក្នុងរយៈពេលមួយម៉ោងបានឆ្លើយតបថា «យល់ព្រម» ជាភាសាចិន។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា លោកមិនមាន«យោបល់» ជុំវិញទីតាំងឆបោកនៅភ្នំបូកគោទេ ហើយអះអាងថាគ្មានពលរដ្ឋតៃវ៉ាន់ណាបានស្នើសុំជំនួយនៅទីនោះទេ។ នៅពេលនិយាយពីការចុះឆែកឆេររបស់ប៉ូលិសជាបន្តបន្ទាប់លើបរិវេណឆបោកក្នុងខែតុលា រដ្ឋមន្ត្រីក្រសួងមហាផ្ទៃ លោក ស ខេង មិនបានលើកឡើងពីខេត្តកំពតទេ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន មិនបានឆ្លើយតបនឹងសំណើសុំអត្ថាធិប្បាយម្តងហើយម្តងទៀតទេ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្ស មានប្រសាសន៍ថា លោកស្រីមិនដឹងអំពីករណីនៅភ្នំបូកគោនោះទេ។ ជាជាងឆ្លើយសំណួរអ្នកសារព័ត៌មាន អ្នកស្រីបាននិយាយថាមានពលរដ្ឋតៃវ៉ាន់ក្នុងចំនួនតិចតួចប៉ុណ្ណោះដែលត្រូវបានជួញដូរមកកម្ពុជា ដោយថាមិនដល់៥០០០នាក់ទៀតដូចការផ្សព្វផ្សាយរបស់បណ្តាញសារព័ត៌មានតៃវ៉ាន់នោះឡើយ។
រត់ចេញពីភ្នំបូកគោ
បន្ទាប់ពីទទួលរងការផាកពិន័យចំនួន៦០០០ដុល្លាដោយសារការបើកបរក្នុងស្ថានភាពស្រវឹង និងគ្មានការងារធ្វើ លោក Jiahao ក្នុងវ័យជាង៣០ឆ្នាំ ត្រូវការប្រាក់យ៉ាងច្រើន។ នៅខែមីនា ឆ្នាំ២០២២ ពលរដ្ឋតៃវ៉ាន់រូបនេះបានឃើញការបង្ហោះហ្វេសប៊ុកផ្សាយពាណិជ្ជកម្មការងារដែលមិនច្បាស់លាស់ទាក់ទងនឹងកុំព្យូទ័រ ហើយប្រាក់ខែ៣០០០ដុល្លារក្នុងមួយខែ ដែលការងារនេះបានទទួលការចាប់អារម្មណ៍ពីលោក។
ដូចអ្នកផ្សេងទៀតជាច្រើនដែលត្រូវបានបោកបញ្ឆោត និងជួញដូរឱ្យមកកម្ពុជាដែរ លោក Jiahao បានមកដល់បរិវេណអគារក្រុងព្រះសីហនុក្នុងខែមេសា ដែលអគារនោះមើលទៅមិនដូចរូបថតដែលអ្នកជ្រើសរើសបុគ្គលិកបានផ្ញើតាមអ៊ីនធឺណិតទេ ហើយពេលនោះលោកក៏បានដឹងខ្លូនថាលោកចូលរួមបម្រើការងារក្នុងក្រុមហ៊ុនបោកប្រាស់។ លោកលើកឡើងបនុ្តថាលោកត្រូវបានគេប្រាប់ថាមធ្យោបាយតែមួយគត់ដើម្បីចាកចេញពីទីនោះគឺត្រូវបង់លុយលោះខ្លួន។
លោកបានមានប្រសាសន៍បន្ថែមថា៖ «ប្រសិនបើអ្នកមិនធ្វើការនោះទេ អ្នកនឹងត្រូវបានគេឃុំឃាំងក្នុងបន្ទប់ងងឹតដ៏តូចមួយ ហើយត្រូវបានគេវាយដំ។ ដូច្នេះខ្ញុំអាចត្រឹមតែធ្វើអ៊ីចឹង [មនុស្សឆបោក] នៅពេលនោះ»។
ទោះបីជា Jiahao នៅតែមានទូរសព្ទរបស់លោកជាប់ខ្លួនក៏ដោយ ក៏លោកមិនហ៊ាទាក់ទងទៅប៉ូលិស ឬអ្នកផ្សេងទៀតឱ្យជួយដែរ បន្ទាប់ពីឃើញអ្នកដទៃត្រូវបានគេវាយនឹងដំបងឆក់ ឬលក់នៅកន្លែងផ្សេង។
នៅពាក់កណ្តាលឆ្នាំ២០២២ នៅពេលដែលប្រព័ន្ធផ្សព្វផ្សាយតៃវ៉ាន់បានចាប់ផ្តើមផ្សព្វផ្សាយពីករណីឆបោកនៅប្រទេសកម្ពុជា ហើយក្រុងព្រះសីហនុទទួលបានការចាប់អារម្មណ៍ពីប្រព័ន្ធផ្សព្វផ្សាយអន្តរជាតិ ការជួយសង្គ្រោះជនជាតិតៃវ៉ាន់កាន់តែងាយស្រួលជាងមុន។ នេះបើតាមការលើកឡើងរបស់ Yu Tang ជនជាតិតៃវ៉ាន់ដែលជាអតីតជនរងគ្រោះនៃការជួញដូរ។ ស្រ្តីជាជនរងគ្រោះរូបនេះបដិសេធមិនបញ្ចេញឈ្មោះពេញដើម្បីសុវត្ថិភាពរបស់ខ្លួន។
កាលពីចុងខែកញ្ញា លោក Jiahao និងមនុស្ស ៣០នាក់ផ្សេងទៀតពីបរិវេណអគាររបស់លោកត្រូវបានបញ្ជូនតាមរថយន្តក្រុងទៅបរិវេណខាងក្រោយសណ្ឋាគារឋានសួគ៌សុខាលើភ្នំបូកគោ។ លោកបានបន្តថាក្រុមបោកប្រាស់តាមអ៊ីនធឺណិតជាច្រើនទៀតដែលគ្រប់គ្រងដោយថៅកែមកពីខេត្តស៊ីឈួនរបស់ប្រទេសចិនក៏បានចូលរួមភ្លាមៗដែរ។
Jiahao បានធ្វើការក្នុងសកម្មភាពឆបោកមួយដែលស្គាល់ថាផែនការចិញ្ចឹមជ្រូកឱ្យធាត់ទើបកាប់សាច់ ដែលករណីនេះអ្នកឆបោកត្រូវកសាងទំនាក់ទំនងមនោសញ្ចេតនាជាមួយជនរងគ្រោះតាមរយៈការជជែកតាមTelegram មុនពេលបញ្ចុះបញ្ចូលឱ្យគេវិនិយោគលើទ្រព្យសម្បត្តិរូបិយប័ណ្ណគ្រីបតូ ដោយសន្ទនាជាមួយអ្នកដែលអាចជាជនរងគ្រោះចាប់ពីម៉ោង១០យប់ដល់ថ្ងៃត្រង់នៅថ្ងៃបន្ទាប់។
ទាំងនៅក្រុងព្រះសីហនុនិងភ្នំបូកគោ លោកJiahaoនិងកម្មករផ្សេងទៀតទទួលបានថ្ងៃឈប់សម្រាកតែមួយថ្ងៃប៉ុណ្ណោះក្នុងមួយខែ ដែលពួកគេត្រូវបានគេនាំទៅភោជនីយដ្ឋានក្នុងបរិវេណនោះ ហើយអ្នកគ្រប់គ្រងជាន់ខ្ពស់បានចេញលុយឱ្យពួកគេផឹកស៊ី។
លោក Jiahao បានរំលឹកថា គ្មាននរណាម្នាក់ត្រូវបានអនុញ្ញាតឱ្យចេញពីបរិវេណភ្នំបូកគោនោះទេ។
Jiahao បាននិយាយថាដោយដាក់ការងឿងឆ្ងល់ថាសណ្ឋាគារត្រូវបានភ្ជាប់ទៅនឹងប្រតិបត្តិការរបស់ក្រុមហ៊ុនបោកប្រាស់។
លោកបាននិយាយថា៖ «ពួកគេ [ក្រុមបោកប្រាស់] ហាក់ដូចជាមានទ្រព្យសម្បត្តិនៅក្នុងសណ្ឋាគារនៅពេលពួកគេផ្លាស់ទៅទីនោះជាលើកដំបូង។ ប្រសិនបើពួកគេត្រូវការលុយនៅបរិវេណអគារហ្នឹង ពួកគេគ្រាន់តែទូរស័ព្ទទៅសណ្ឋាគារ ហើយបន្ទាប់មកគេនិយាយថាគេទៅយកលុយ»។
កាលពីខែសីហា Jiahao មានភាពក្លាហានបានទូរសព្ទទៅម្តាយរបស់លោកនៅតៃវ៉ាន់ដោយអង្វរឱ្យម្តាយទូរសព្ទទៅប៉ូលិស។ បន្ទាប់ពីលោក Jiahao ត្រូវបានផ្ទេរទៅបូកគោ លោកអាចទាក់ទងមន្ត្រី CIB ក្នុងខែកញ្ញា ដែលបន្ទាប់មកពួកគេបានទាក់ទងទៅរដ្ឋមន្ត្រីក្រសួងមហាផ្ទៃ លោក ស ខេង។
Jiahao បានចែករំលែកទីតាំងរបស់លោកនៅភ្នំបូកគោជាមួយមន្រ្តី CIB នៅក្នុងសារដែលខេមបូចាបានអាន។ បីថ្ងៃបន្ទាប់ពីលោក ស ខេង ត្រូវបានទាក់ទង លោក Jiahao និងកម្មករតៃវ៉ាន់ម្នាក់ទៀតត្រូវបានយកចេញពីបរិវេណនោះ។
មុនពេលឱ្យJiahaoចាកចេញ ថៅកែឆបោកនៅភ្នំបូកគោនោះបានបង្ហាញសារជជែកដែលលោកបានធ្វើជាមួយសមត្ថកិច្ចតៃវ៉ាន់។
ត្រឡប់មកតៃវ៉ាន់វិញ Jiahao រកបានការងារជាអ្នកបើកឡានដឹកទំនិញ។ លោកបាននិយាយថាលោកសប្បាយចិត្តណាស់ដែលបានត្រឡប់មកជាមួយម្តាយដោយសារលោកជាកូនតែម្នាក់។ ទោះបីជាមានការប្រថុយប្រថានក្នុងការចែករំលែករឿងរ៉ាវរបស់ខ្លួនក៏ដោយ ក៏លោក Jiahao ជឿជាក់អ្នកផ្សេងច្រើនទៀតត្រូវដឹងឱ្យច្រើនទៀតពីភ្នំបូកគោ និងប្រតិបត្តិការរបស់ក្រុមហ៊ុនបោកប្រាស់នៅទីនោះ។
លោកបានមានប្រសាសន៍ថា៖ «ខ្ញុំគិតថារឿងបែបនេះគួរតែត្រូវបានគេដឹងជាសាធារណៈ។ បើមិនដូច្នេះទេ មនុស្សជាច្រើនទៀតនឹងនៅតែត្រូវបានបោកប្រាស់នាពេលអនាគត»។
ការដួលរលំនៃក្រុមបងធំម៉ាប់ (Big Fatty Gang)
មន្ត្រី CIB ទីពីរដែលសុំមិនបញ្ចេញឈ្មោះបាននិយាយថា នៅរដូវស្លឹកឈើជ្រុះឆ្នាំមុន តម្លៃសម្រាប់អ្នកបោកប្រាស់ដែលនិយាយភាសាចិនបានកើនឡើងពី១០០០០ដុល្លារទៅ២០០០០ដុល្លារ ខណៈដែលការផ្គត់ផ្គង់បានធ្លាក់ចុះ។ លោកបានប៉ាន់ប្រមាណថា ជនរងគ្រោះភាគច្រើនជាជនជាតិតៃវ៉ាន់ត្រូវបានបោកបញ្ឆោតចូលមកប្រទេសកម្ពុជា ខណៈដែលចំនួនតិចតួចបានទទួលយកការងារនៅក្នុងប្រតិបត្តិការបោកប្រាស់ទាំងនោះ។
បុរសម្នាក់ដែលមានរហស្សនាមថាបងធំម៉ាប់ បានមកដល់ភ្នំបូកគោក្នុងខែកុម្ភៈឆ្នាំ២០២២ ហើយបានជ្រើសរើសថៅកែជនជាតិតៃវ៉ាន់ម្នាក់ទៀតដែលគេស្គាល់ថាជា«បងអាន» មកកាន់ប្រទេសកម្ពុជា និងជួយដឹកនាំក្រុមជួញដូរមនុស្ស។ មន្ត្រី CIB បាននិយាយថា ប្រព័ន្ធផ្សព្វផ្សាយតៃវ៉ាន់ CTWANT បានរាយការណ៍ពីឈ្មោះពិតរបស់បងអានថា Liu Zheyi ហើយបុរសនោះនៅតែមានវត្តមាននៅក្នុងប្រទេសកម្ពុជា។ ថ្នាក់ដឹកនាំជាន់ខ្ពស់ដែលមកពីចិនដីគោកមិនត្រូវបានប៉ូលិសតៃវ៉ាន់ស្គាល់នោះឡើយ។
ប៉ូលិសតៃវ៉ាន់បាននិយាយថាការកំណត់ថាតើជនបរទេសជាជនរងគ្រោះឬអ្នកចូលរួមដោយស្ម័គ្រចិត្តអាចជាការលំបាក។
បងធំម៉ាប់ដែលអត្តសញ្ញាណមិនត្រូវបានបង្ហាញឱ្យឃើញពេញលេញនោះ បានបោកបញ្ឆោតមនុស្សឱ្យធ្វើដំណើរមកប្រទេសកម្ពុជាដោយប្រើការផ្សាយពាណិជ្ជកម្មតាម Facebook និងលួងលោមជនរងគ្រោះតាមរយៈអ្នកសម្របសម្រួលនៅលើដីនៅតៃវ៉ាន់។ ពួកគេបានរៀបចំលិខិតឆ្លងដែន និងនាំជនរងគ្រោះទៅកាន់អាកាសយានដ្ឋាន ដែលមន្ត្រីបានពិពណ៌នាថាជា«ក្រុមជួញដូរមនុស្សដែលមានការរៀបចំយ៉ាងល្អ» ដែលក្នុងនោះមានមនុស្សចំនួន១២នាក់។ ក្រុមនេះក៏បានលេងរូបិយប័ណ្ណគ្រីបតូពីជនរងគ្រោះបោកប្រាស់តាមរយៈទីផ្សារងងឹតនៅតៃវ៉ាន់ផងដែរ។
មន្ត្រី CIB ទី២ បាននិយាយថាបងធំម៉ាប់ត្រូវបានចាប់ខ្លួននៅពេលត្រឡប់ទៅតៃវ៉ាន់វិញក្នុងខែកញ្ញា ទោះបីជាទូរសព្ទរបស់លោកបានលុបឯកសារអស់ហើយក្តី និងមានព័ត៌មានតិចតួចដើម្បីផ្តល់ឱ្យប៉ូលិសក៏ដោយ ។
មន្ត្រី CIB ទាំងពីរបាននិយាយថា ពួកគេមិនបានទទួលព័ត៌មានថ្មីអំពីជនរងគ្រោះជនជាតិតៃវ៉ាន់ ឬក្រុមឆបោកជនជាតិតៃវ៉ាន់ដែលប្រតិបត្តិការនៅក្នុងបរិវេណអគារនៅភ្នំបូកគោចាប់តាំងពីការចាប់ខ្លួនបងធំម៉ាប់និងក្រុមរបស់បុរសនោះ។
ប៉ុន្តែតាមរយៈព័ត៌មានពីបុគ្គលិកសណ្ឋាគារ និងការចូលទៅបរិវេណអគារនៅភ្នំបូកគោនាពេលថ្មីៗនេះបង្ហាញយ៉ាងច្បាស់ថា សកម្មភាពលួចលាក់ និងការបង្ខាំងជនបរទេសនៅតែបន្តដោយស្ងៀមស្ងាត់។
មន្ត្រី CIB ដំបូងបានប្រាប់ខេមបូចាថា៖ «ខ្ញុំមិនគិតថាប៉ូលិសកម្ពុជានឹងបង្ក្រាបនោះទេ។ ផ្ទុយទៅវិញ ពួកគេបានជូនដំណឹងយ៉ាងរហ័សដល់មនុស្សរបស់ក្រុមហ៊ុនបោកប្រាស់តាមអ៊ីនធឺណិតឱ្យចាកចេញឱ្យបានឆាប់តាមដែលអាចធ្វើទៅបាន ដោយបង្កើតការចាប់អារម្មណ៍ក្លែងក្លាយថាវាហាក់ដូចជាត្រូវបានដោះស្រាយអស់ហើយ។ បន្ទាប់មករង់ចាំរហូតដល់ពេលវេលាបានកន្លងផុតទៅ ដោយរង់ចាំដល់មន្តី្រជាន់ខ្ពស់បញ្ឈប់ការផ្តោតអារម្មណ៍លើបញ្ហានេះ។ ហើយបន្ទាប់មក មនុស្សទាំងនេះត្រឡប់មកវិញ»។
កណត់សម្គាល់៖ អត្ថបទនេះបានធ្វើបច្ចុប្បន្នភាពនៅថ្ងៃទី២១ ខែមិថុនា ឆ្នាំ២០២៤ វេលាម៉ោង៤ រសៀល ក្រោយពីបានទទួលលិខិតពីក្រុមហ៊ុន Sokha Hotels និង Resorts, និង Sokimex Group ។
ប្រែសម្រួលពីអត្ថបទភាសាអង់គ្លេស៖ Scams, Human Trafficking Thrived at Bokor Mountain Behind Tycoon’s Luxury Hotel
