ចាងហ្វាងសារព័ត៌មានអនឡាញម្នាក់ និងបុរសពីរនាក់ផ្សេងទៀតត្រូវបានរងការចោទប្រកាន់ពីបទព្រហ្មទណ្ឌចំនួនបី ជុំវិញការធ្វើឱ្យខូចទឹកចិត្តកងទ័ព រួមទាំងការបញ្ចេញមតិបង្ហាញការរើសអើងលើកងកម្លាំង។ អ្នកទាំងបីត្រូវបានឃុំខ្លួនបណ្តោះអាសន្ននៅពន្ធនាគារព្រៃស។
ព្រះរាជអាជ្ញារងអមសាលាដំបូងរាជធានីភ្នំពេញ លោក ឆាយ ហុង បានបញ្ជាក់នៅថ្ងៃចន្ទនេះថា ចាងហ្វាងសារព័ត៌មានលោក ហង្ស សំណាង ក៏ដូចជាលោក កុញ វាសនា និងលោក រស់ អែវ ត្រូវបានចោទប្រកាន់ពីបទបំបាក់ទឹកចិត្តកងកម្លាំងប្រដាប់អាវុធ ញុះញង់ឱ្យមានការរើសអើង និងប្រើប្រាស់ឯកសណ្ឋានដែលស្រដៀងនឹងសម្លៀកបំពាក់របស់នគរបាល ឬយោធាដោយគ្មានការអនុញ្ញាត។
ចាងហ្វាងរូបនេះបានបង្ហោះវីដេអូមួយនៅលើបណ្ដាញសង្គមរបស់គាត់ដែលមានឈ្មោះ ហង្ស សំណាង ប៉ុស្តិ៍ ជាកន្លែងដែលគាត់បានសុំទោសដល់ថ្នាក់ដឹកនាំចំពោះ «ការប្រព្រឹត្តគ្មានវិជ្ជាជីវៈក្នុងវិស័យសារព័ត៌មាន»។
អ្នកទាំងបីត្រូវបានចាប់ខ្លួននៅខេត្តស្វាយរៀង កាលពីថ្ងៃទី៣០ ខែឧសភា ហើយបញ្ជូនទៅតុលាការ។ ការចោទប្រកាន់លើពួកគេគឺទាក់ទងនឹងវីដេអូដែលគេបង្ហោះ។ នៅក្នុងវីដេអូ លោក ហង្ស សំណាង បានសម្តែងធ្វើជាសម្ភាសបុរសពីរនាក់ស្លៀកពាក់ឯកសណ្ឋានទាហាន និងពិភាក្សាអំពីវិសមភាពដែលគេយល់ឃើញរវាងទាហានជួរមុខ ដែលការពារអធិបតេយ្យភាពទឹកដី«នៅតែមានឋានៈទាប» ខណៈទាហានដែលឈរជើងក្នុងរាជធានី«កាន់ឋានៈខ្ពស់ជាង»។
វីដេអូឃ្លីបនេះ ត្រូវបានចេញផ្សាយ ចំពេលមានការប៉ះទង្គិចគ្នានៅតាមព្រំដែនកម្ពុជា-ថៃ កាលពីសប្តាហ៍មុន ដែលបណ្តាលឱ្យពលទាហានខ្មែរម្នាក់ស្លាប់ ដោយភាគីទាំងពីរបានស្តីបន្ទោសគ្នាទៅវិញទៅមកចំពោះការបាញ់ប្រហារ។
អ្នកនាំពាក្យក្រសួងព័ត៌មាន លោក ទេព អស្នារិទ្ធ មានប្រសាសន៍ថា អ្នកសារព័ត៌មានមិនត្រូវធ្វើអ្វីមួយឲ្យហួសព្រំដែននៃច្បាប់ និងសិទ្ធិរបស់កម្ពុជា។
លោក អស្នារិទ្ធ បានមានប្រសាសន៍ថា៖ «ការអនុវត្តភារកិច្ច អ្នកសារព័ត៌មានមិនត្រូវដើរហួសដែនកំណត់នៃច្បាប់ និង សិទ្ធិនិងករណីយកិច្ចដែលខ្លួនមានក្នុងនាមជាអ្នកសារព័ត៌មានឡើយ ព្រោះការអនុវត្តជ្រុល ឬទង្វើហួសដែនកំណត់នៃច្បាប់ ជាពិសេសទង្វើក្រៅដែននៃច្បាប់ស្តីពីរបបសារព័ត៌មាន នឹងនាំមកនូវផលវិបាកដល់អ្នកសារព័ត៌មានខ្លួនឯង និងអាចនាំឱ្យប្រឈមនឹងការទទួលខុសត្រូវផ្នែករដ្ឋប្បវេណី ឬផ្នែកព្រហ្មទណ្ឌជាដើម»។
នាយកប្រតិបត្តិនៃសមាគមសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី បានអំពាវនាវឱ្យអ្នកសារព័ត៌មានប្រកាន់ខ្ជាប់នូវក្រមសីលធម៌ និងអនុវត្តការងាររបស់ខ្លួនឱ្យបានត្រឹមត្រូវ ព្រោះវាជាខែលការពារពួកគេ។
លោកបានមានប្រសាសន៍ថា៖ «អ្នកសារព័ត៌មានមិនមានបុព្វសិទ្ធិអ្វីពិសេសជាងពលរដ្ឋធម្មតាដែលយើងអាចទៅបង្កើត ឬទៅធ្វើរឿងអ្វីមួយដែលប្រាសចាកពីក្រមសីលធម៌របស់យើងបានទេ»។
លោក វី ថ្លែងថា៖ «បើកាលណាយើងធ្វើកិច្ចការងារប្រាសចាក ដែលមិនសមស្របនឹងវិជ្ជាជីវៈ វានាំឱ្យមានបញ្ហាដូចជាអាចធ្វើឱ្យប៉ះពាល់ទៅដល់គុណតម្លៃរបស់យើងជាអ្នកសារព័ត៌មាន ឫក៏អ្នកសារព័ត៌មានផ្សេងៗទៀត»។ ក្នុងនោះដែរ លោក ជំរុញឱ្យតុលាការពិចារណាលើការប្រើប្រាស់ច្បាប់ស្ដីពីរបបសារព័ត៌មាន និងគោរពគោលការណ៍សេរីភាពនៃការបញ្ចេញមតិជាមូលដ្ឋាន ៕
ប្រែសម្រួលពីអត្ថបទភាសាអង់គ្លេស៖ Online Publisher, Two Others Charged for “Mocking” the Army Amid Cambodia-Thai Border Dispute
