អ្នកសារព័ត៌មានអនឡាញម្នាក់ ត្រូវបានតុលាការសម្រេចផ្តន្ទាទោសដាក់ពន្ធនាគាររយៈពេល ២ឆ្នាំ បន្ទាប់ពីផ្សព្វផ្សាយព័ត៌មានដែលអាជ្ញាធរចាត់ទុកថា ធ្វើប៉ះពាល់ដល់ទឹកចិត្តកងទ័ពកម្ពុជាក្នុងអំឡុងពេលមានជម្លោះព្រំដែនកម្ពុជា និងថៃ។ ក្រុមអង្គការការពារសេរីភាពសារព័ត៌មានបានលើកឡើងថា វាធ្វើឱ្យប៉ះពាល់ដល់សេរីភាពសារព័ត៌មាននៅកម្ពុជា។
នៅថ្ងៃអង្គារនេះ សាលាដំបូងខេត្តឧត្តរមានជ័យបានសម្រេចថា លោក លួត សុផល មានទោសពីបទ «ធ្វើឱ្យខូចទឹកចិត្តកងទ័ព» និង «ញុះញង់ឱ្យប្រព្រឹត្តបទឧក្រិដ្ឋជាអាទិ៍»។ នេះបើតាមការបញ្ជាក់ពីអ្នកនាំពាក្យសាលាដំបូងលោក ហ៊ែល ឆេងហុង។
លោក អែម ចន្ថា មេធាវីការពារក្តី លោក សុផល បានថ្លែងថា៖ «ខ្ញុំមិនអាចទទួលយកការសម្រេចនេះបានទេ ព្រោះអ្វីដែលគាត់បានធ្វើ មិនមែនជាចេតនាប្រព្រឹត្តបទល្មើសឡើយ។ គាត់គ្រាន់តែចង់ផ្តល់ព័ត៌មានដល់រដ្ឋាភិបាលប៉ុណ្ណោះ»។ លោកបន្ថែមថា លោកនឹងពិភាក្សាជាមួយកូនក្តីថា តើគួរប្តឹងឧទ្ធរណ៍ឬអត់។
លោក សុផល ត្រូវបានចាប់ខ្លួនក្នុងខែកុម្ភៈ ឆ្នាំ២០២៦ បន្ទាប់ពីលោកបានផ្សាយព័ត៌មានកាលពីថ្ងៃទី៧ ខែកុម្ភៈ អំពីកងទ័ពជួរមុខដែលប្រឈមនឹងការខ្វះទឹកប្រើប្រាស់។
ភរិយារបស់លោក លួត សុផល គឺអ្នកស្រី វឿន ឡាឡង់ បានសម្តែងការខកចិត្តចំពោះសាលក្រមដែលសម្រេចដាក់ពន្ធនាគារស្វាមីរបស់អ្នកស្រី។
អ្នកស្រីបាននិយាយថា៖ «វាមិនយុត្តិធម៌ទេ ព្រោះគាត់កំពុងផ្តល់ព័ត៌មានដែលមានប្រយោជន៍ដល់ប្រទេសជាតិ។ ផ្ទុយទៅវិញ គាត់ត្រូវបានចាប់ដាក់ពន្ធនាគារ។ គាត់គ្រាន់តែរាយការណ៍ការពិតប៉ុណ្ណោះ។ គាត់មិនបានញុះញង់នរណាទេ»។
អ្នកស្រីបានអំពាវនាវឱ្យតុលាការដោះលែងស្វាមីខ្លួនជាបន្ទាន់ ដោយលើកឡើងថា អ្នកស្រីនឹងត្រូវទទួលបន្ទុកផ្គត់ផ្គង់គ្រួសារតែម្នាក់ឯង ខណៈពួកគេមានកូនបីនាក់ដែលមានអាយុចន្លោះពី ៣ឆ្នាំ ដល់ ១៧ឆ្នាំ។
អ្នកស្រី ឡាឡង់ បានបន្តថា៖ «ចំណូលភាគច្រើនរបស់យើងបានមកពីគាត់។ ប៉ុន្តែពេលនេះ ខ្ញុំត្រូវសងបំណុលធនាគារជាង ៥០០ដុល្លារអាមេរិកក្នុងមួយខែ»។
សមាគម និងអង្គការសារព័ត៌មាននានាបានអំពាវនាវឱ្យរដ្ឋាភិបាលការពារអ្នកសារព័ត៌មានក្នុងអំឡុងពេលមានជម្លោះព្រំដែនកម្ពុជា និងថៃ ដោយលើកឡើងថា ការចោទប្រកាន់ដោយប្រើបទព្រហ្មទណ្ឌលើអ្នកសារព័ត៌មានបានប៉ះពាល់ដល់សេរីភាពសារព័ត៌មាន។
នាយិកាមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោកស្រី ឆន សុគន្ធា បានមានប្រសាសន៍ថា៖ «ការផ្តន្ទាទោសលោក សុផល ឱ្យជាប់ពន្ធនាគាររយៈពេល ២ឆ្នាំ បានប៉ះពាល់ដល់សេរីភាពនៃការបញ្ចេញមតិ ជាពិសេសអ្នកសារព័ត៌មានដែលហ៊ានរាយការណ៍ពីបញ្ហារសើប»។
លោកស្រីបានអំពាវនាវឱ្យអាជ្ញាធរពាក់ព័ន្ធ ជាពិសេសក្រសួងការពារជាតិ ធ្វើការស៊ើបអង្កេតជាមុនសិនថា តើព័ត៌មានដែលលោក សុផល រាយការណ៍អំពីការខ្វះទឹកប្រើប្រាស់របស់កងទ័ពជួរមុខ ថាជាការពិតឬយ៉ាងណា មុននឹងសម្រេចចោទប្រកាន់លោក។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា លោក ណុប វី ក៏បានបង្ហាញទស្សនៈស្រដៀងគ្នានេះដែរ ដោយលោកបានលើកឡើងថា វិធានការផ្លូវច្បាប់បែបនេះ «មានហានិភ័យជាង» ការរាយការណ៍អំពីជម្លោះព្រំដែនទៅទៀតសម្រាប់អ្នកសារព័ត៌មាន។
លោកបានថ្លែងថា៖ «នៅតែខ្វះភាពច្បាស់លាស់។ អាជ្ញាធរគួរបញ្ជាក់ឱ្យច្បាស់អំពីការអនុវត្តច្បាប់ពាក់ព័ន្ធនឹងជម្លោះព្រំដែន បទធ្វើឱ្យខូចទឹកចិត្តកងទ័ព និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍»។
លោកបានបន្តថា ប្រសិនបើស្ថានភាពបែបនេះនៅតែបន្ត ប្រព័ន្ធផ្សព្វផ្សាយនឹងពិបាកបំពេញតួនាទីក្នុងការផ្តល់ព័ត៌មានដល់សាធារណជនទាំងក្នុង និងក្រៅប្រទេស អំពីផលប៉ះពាល់នៃសង្រ្គាម។
លោកបានបន្ថែមថា៖ «ខ្ញុំសូមអំពាវនាវឱ្យមានការអនុវត្តស្តង់ដារច្បាប់អន្តរជាតិ និងគោរពសេរីភាពជាមូលដ្ឋានក្នុងការផ្សព្វផ្សាយព័ត៌មានដែលមានប្រយោជន៍សាធារណៈ ជាជាងការបកស្រាយច្បាប់យ៉ាងទូលំទូលាយ ដែលនាំឱ្យមានការរឹតត្បិតសេរីភាព»។
ចាប់តាំងពីការចាប់ផ្តើមកើតជម្លោះព្រំដែនកម្ពុជា និងថៃមក អ្នកសារព័ត៌មានចំនួនបីនាក់ និងអ្នកមានឥទ្ធិពលលើបណ្តាញសង្គមម្នាក់ គឺអ្នកស្រី ធី សុវណ្ណថា ត្រូវបានផ្តន្ទាទោសពីបទពាក់ព័ន្ធនឹងអំពើក្បត់ជាតិ និងបទធ្វើឱ្យខូចទឹកចិត្តកងទ័ព។
ចន្លោះពីខែកក្កដា ឆ្នាំ២០២៥ ដល់ខែកុម្ភៈ ឆ្នាំ២០២៦ មនុស្សជាង ៣០នាក់ រួមមានមន្ត្រីគណបក្សប្រឆាំង សកម្មជន និងអ្នកសារព័ត៌មាន ត្រូវបានចាប់ខ្លួន ដោយសារការបង្ហោះសារនៅលើបណ្តាញសង្គមពាក់ព័ន្ធនឹងការប៉ះទង្គិចតាមព្រំដែនរវាងកម្ពុជា និងថៃ។
កម្ពុជា ស្ថិតនៅចំណាត់ថ្នាក់លេខ ១៦១ ក្នុងចំណោម ១៨១ ប្រទេស នៅក្នុងសន្ទស្សន៍សេរីភាពសារព័ត៌មានពិភពលោកឆ្នាំ២០២៥ ហើយនៅតែជាប្រទេសមួយក្នុងចំណោមប្រទេសដែលមានការអនុវត្តនីតិរដ្ឋទាបជាងគេនៅលើពិភពលោក។ កន្លងមក រដ្ឋាភិបាលកម្ពុជាតែងតែច្រានចោលរបាយការណ៍រិះគន់របស់អង្គការសិទ្ធិមនុស្សអន្តរជាតិ ដោយអះអាងថា មានភាពលម្អៀង៕
ប្រែសម្រួលពីអត្ថបទភាសាអង់គ្លេស៖ Online Journalist Found Guilty of Publishing Story on Frontline Soldiers Facing Water Shortage
