សមាគមសម្ព័ន្ធអ្នកសារព័ត៌មានកម្ពុជា

រដ្ឋសភានឹងអនុម័តលើសេចក្ដីព្រាងវិសោធនកម្មរដ្ឋធម្មនុញ្ញដ៏ចម្រូងចម្រាសនៅសប្តាហ៍នេះ

បុរសម្នាក់ជិះម៉ូតូកាត់មុខរដ្ឋសភាជាតិកាលពីថ្ងៃទី២១ ខែកក្កដា ឆ្នាំ២០២២។ ខេមបូចា/ ព្រីង សំរាំង
បុរសម្នាក់ជិះម៉ូតូកាត់មុខរដ្ឋសភាជាតិកាលពីថ្ងៃទី២១ ខែកក្កដា ឆ្នាំ២០២២។ ខេមបូចា/ ព្រីង សំរាំង

រដ្ឋសភាជាតិ​រំពឹង​ថា​នឹង​ត្រូវ​អនុម័ត​លើ​សេចក្ដី​ព្រាង​វិសោធនកម្មរដ្ឋធម្មនុញ្ញ​ទាក់​ទង​នឹង​ការ​ផ្លាស់ប្តូរ​​ថ្នាក់​ដឹកនាំ​ជាតិ ដែល​ការ​ណ៍​នេះ​មាន​ការ​ជំទាស់​ជា​ខ្លាំង​ពី​ក្រុម​គណបក្ស​ប្រឆាំង ដោយ​ចាត់ទុក​ថា​នេះជា​ការ​បង្កើនអំណាច​ដោយ​គណបក្ស​ប្រជា​ជន​​កម្ពុជា​។​

វិសោធនកម្ម​រដ្ឋធម្មនុញ្ញ​កំពុង​មាន​ការ​ជំទាស់​​នេះ ត្រូវ​បាន​ប្រកាស​ឲ្យ​ដឹង​ថា​នឹង​ត្រូវ​ដាក់​បញ្ចូល​ក្នុង​របៀប​វារៈ​នៃ​កិច្ច​ប្រជុំ​សភា​នៅ​ថ្ងៃ​ព្រហស្បតិ៍ ដោយ​មានការ​កែ​ប្រែ​លើ​​របៀប​ដែល​រដ្ឋសភា​ជ្រើសរើស​នាយក​រដ្ឋមន្ត្រី​ថ្មី និង​រំលាយ​រដ្ឋាភិបាល និង​មន្ត្រី​របស់​រដ្ឋាភិបាល​។​

ក្រុម​អ្នក​ប្រឆាំង​​លើក​ឡើង​ថា​ ការ​ធ្វើ​វិសោធនកម្មនេះគឺ​ធ្វើ​ឡើង​ដើម្បី​ពង្រឹង​អំណាច​របស់​គណបក្ស​ប្រ​ជា​ជន​កម្ពុជា និង​ជួយ​បង្កើត​ក្របខណ្ឌ​ច្បាប់​សម្រាប់​លោក​នាយក​រដ្ឋ​មន្ត្រី​ហ៊ុន សែន ក្នុង​ការ​តែង​តាំង​កូនប្រុស​ច្បង​របស់​លោក​ គឺលោក ហ៊ុន ម៉ាណែត ជា​នាយក​រដ្ឋមន្ត្រី​បន្ទាប់។ យ៉ាងណា គណបក្ស​ប្រជា​ជន​កម្ពុជា​បដិសេធ​លើ​ការ​លើក​ឡើង​នេះ​។​

មាត្រា​ ១៩៩ នៃ​រដ្ឋធម្មនុញ្ញា​ចែង​ថា​ប្រធាន​រដ្ឋសភា និង​អនុប្រធានពីរ​រូប​អាច​បង្កើត​រដ្ឋាភិបាល​ថ្មី​។ ក្នុង​សេចក្ដីព្រាង​មាត្រា ១១៩​ ថ្មី នឹង​អនុញ្ញាត​ឲ្យ​គណបក្ស​នយោបាយ​ដែល​មាន​កៅ​អី​ច្រើន​បំផុត​នៅ​ក្នុង​រដ្ឋសភា​បង្កើត​រដ្ឋាភិបាល និង​តែង​តាំង​នាយក​រដ្ឋមន្ត្រី​ថ្មី​។​

ដោយ​ឡែក​មានត្រា​ ៩៨ នៃ រដ្ឋធម្មនុញ្ញ​ផ្ដល់​អំណាច​ឲ្យ​សភាស្នើ​​​​រំលាយ​រដ្ឋាភិបាល ឬ​ដក​មន្ត្រី​រដ្ឋាភិបាល​ដោយត្រូវ​ការ​សំឡេង​​៣០​ ​ក្នុង​ចំណោម​តំណាងរាស្រ្ត​១២៥​រូប។ មាត្រា​ ៩៨​ថ្មី ដែល​ត្រូវ​បាន​ស្នើ​ឡើង គឺ​បង្កើន​ចំនួន​នេះ​ពី​៣០​រូប ទៅ១ភាគ៣ ឬ​៤១​រូប​ដើម្បី​ស្នើ​រំលាយ​រដ្ឋាភិបាល ឬ​ដក​មន្ត្រី​រដ្ឋាភិបាល​។​ គណបក្ស​ប្រជា​ជន​កម្ពុជា​បច្ចុប្បន្ន​កាន់​កាប់​អាសនៈ​ទាំង​១២៥​នៅ​រដ្ឋសភា​។​

កង្វល់​របស់​បក្ស​ប្រឆាំង​

បណ្ដា​ក្រុម​គណបក្ស​ក្រៅ​រដ្ឋាភិបាលកាល​ពី​សប្ដាហ៍​មុន​បាន​ស្នើ​ទៅ​កាន់​រដ្ឋសភា​ឲ្យ​ច្រាន​ចោល​សំណើ​កែ​ប្រែ​រដ្ឋធម្មនុញ្ញ​ដែល​ស្នើ​ឡើង​ដោយ​គណបក្ស​កាន់​អំណាច​នេះ​។ ក្រុម​គណបក្ស​ទាំងនេះ​អះអាង​ថា​វិសោធនកម្ម​នឹង​ធ្វើ​ឲ្យ​អំណាច​សភាចុះ​ខ្សោយ ហើយ​រំលោភបំពាន​លើ​គោលការ​ប្រជាធិបតេយ្យ​ពហុបក្ស​។​

លោក ថាច់ សេដ្ឋា អនុ​ប្រធាន​គណបក្ស​ភ្លើង​ទៀន មាន​ប្រ​សាសន៍​ថា វាមិន​មែន​ជា​ពេល​សមរម្យ​សម្រាប់​ស្នើ ឬ​អនុម័ត​លើ​សំណើ​វិសោធនកម្ម​សំខាន់​មួយ​នេះ​ទេ​។​

លោក​បន្ត​ថា៖ «វិសោធនកម្មនេះ​មិន​បម្រើ​ដល់​ប្រយោជន៍​ប្រ​ជា​ពល​រដ្ឋ និងប្រទេស​ជាតិ​ទាំង​មូល​ទេ វាគ្រាន់​តែ​បម្រើ​អ្នក​មាន​អំណាច[គណបក្ស​ប្រជា​ជន​កម្ពុជា]»។ លោក​ប​ន្ថែម​ថា៖ «រដ្ឋាភបាល​គួរ​តែ​ពិចារណា​ស្ដារ​ឡើង​វិញ​នូ​វលទ្ធិ​ប្រជា​ធិបតេយ្យ ដែល​នេះជា​អ្វី​ដែល​ប្រជា​ពល​រដ្ឋ​ត្រូវ​ការ និង​ជា​កង្វល់​របស់​សហគមន៍អន្តរជាតិ»។​

លោក អ៊ូ ច័ន្ទរ័ត្ន អនុប្រធាន​គណបក្ស​កំណែទម្រង់​កម្ពុជា មាន​ប្រសាសន៍​ថា បើ​ទោះ​បី​ជា​សំណើវិសោធនកម្មនេះ​ត្រូវ​បាន​អនុម័ត​ដោយ​សភា​ដឹក​នាំ​ដោយ​គណបក្ស​ប្រជា​ជន​កម្ពុជា​ក៏​ដោយ ក៏​គណបក្ស​ប្រឆាំង​នៅ​តែ​បន្ត​តស៊ូ​ឲ្យ​មាន​ការ​ផ្លាស់​ប្តូរ និង​បន្ត​ធ្វើ​ជា​តំណាង​ឲ្យ​សំឡេង​ប្រ​ជា​ពល​រដ្ឋ​កម្ពុជា​។​

លោក​បន្ថែម​ថា៖ «ទោះបី​ជា​យើង​មាន​សង្ឃឹម​តិចតួច យើង​ត្រូវ​តែ​ក្រោកឈរ​ជំទាស់​ទៅ​នឹង​វិសោធនកម្មនេះ ពីព្រោះ​ថា​បើ​យើង​មិន​ធ្វើ​អ្វី​សោះ ពួកគេ​នឹង​គិត​ថា​យើង​យល់​ព្រម​តាមគេ»។ លោក​បន្តថា៖ «ការ​ធ្វើ​វិសោធនកម្មនេះ​ផ្ដល់​ផល​ប្រយោជន៍​ដល់​បក្ស​ប្រ​ជា​ជន​កម្ពុជាជាង​ប្រយោជន៍​ជាតិ»

ក្រ​សួង​យុត្តិ​ធម៌​បាន​ច្រាន​ចោល​កា​ចោទ​ប្រកាន់​នេះ និង​ថា​សំណើធ្វើ​វិសោធនកម្មនេះ​មិន​មាន​ន័យ​ថា​គណបក្ស​ប្រជា​ជន​កម្ពុជា​នឹង​ដឹក​​នាំ​រដ្ឋាភិបាល​កម្ពុជា​ជាអចិន្ត្រៃយ៍​នោះទេ​។ លោក ឡេង ប៉េងឡុង អ្នកនាំពាក្យ​រដ្ឋសភា មានប្រសាសន៍​ថា សេចក្ដី​សម្រេច​​នឹង​ធ្វើ​ឡើង​នៅ​ក្នុង​កិច្ច​ប្រជុំ​សភា​នៅ​ក្នុង​សប្ដាហ៍​នេះ ៕

ប្រែសម្រួលពីអត្ថបទភាសាអង់គ្លេស៖ Opposition Outrage as CPP’s Constitution Changes Move Ahead

260 views

ព័ត៌មានថ្មីៗ

អត្ថបទពេញនិយម