អាជីវករផ្សារអូឬស្សីរាប់រយនាក់ប្រមូលផ្តុំតវ៉ាបន្ទាប់ពីគណៈកម្មការផ្សារប្រកាសដំឡើងប្រាក់បង់ថ្លៃតូប និងផ្សព្វផ្សាយពីឯកសារសម្រាប់ដាក់ពាក្យបង់ថ្លៃតូបនៅព្រឹកថ្ងៃទី២០ ខែកក្កដា ឆ្នាំ២០២២។
ក្រុមអាជីវករស្នើឱ្យអាជ្ញាធរបញ្ចុះតម្លៃបង់ប្រាក់ថ្លៃតូប និងលុបពាក្យ «ជួល» ចេញពីឯកសារសម្រាប់ដាក់ពាក្យបង់ថ្លៃតូប ខណៈដែលអ្នកគ្រប់គ្រងផ្សារព្យាយាមសម្របសម្រួលផ្អាកការតវ៉ាសិន។
អាជីករវ័យ៧២ឆ្នាំ អ្នកស្រី គឹម ឈួន ជាចាស់ទុំម្នាក់ដែលរកស៊ីក្នុងផ្សារអូរឫស្សីតាំងពីឆ្នាំ១៩៨២។ អ្នកស្រីលក់អង្ករនិងគ្រឿងទេសមួយចំនួន ក្នុងតូបមួយដែលមានទំហំជិត២ម៉ែត្របួនជ្រុង។ អ្នកស្រីប្រាប់ថាគាត់មិនសុខចិត្តចំពោះចំណាត់ការរបស់អាជ្ញាធរឡើយ។
អ្នកស្រី គឹម ឈួន រៀបរាប់ថា៖ «កាលឆ្នាំ២០០០អ៊ំបង់ថ្លៃតូបហ្នឹងអស់ជាង២ពាន់ដុល្លារ ព្រោះគេសង់អគារថ្មី ពេលផ្សារហ្នឹងធ្វើថ្មី ចុះពេលនេះ? យើងមិនទាន់ឃើញធ្វើទេ។ អ៊ំនិងអាជីវករគ្រប់គ្នាហ្នឹងឆ្ងល់ថាតើហេតុអ្វីបានជាដំឡើងថ្លៃតូប?»។ អ្នកស្រីបន្តថា៖ «អ្នកផ្សារងើបពីកូវីដទើបតែបានប៉ុន្មានខែ មកដល់ពេលបង់តូបទៀត។ ថ្ងៃនេះអង្គុយមួយព្រឹកទើបលក់បាន២ម៉ឺនរៀលទេ ដូច្នេះសូមអាជ្ញាធរយោគយល់ផង។ ពួកយើងស្នើឱ្យទម្លាក់ថ្លៃតូបនេះពាក់កណ្ដាលមិនមែនឡើងថ្លៃអ៊ីចឹងទេ»។
អាជីវករម្នាក់ទៀតវ័យជាង៤០ឆ្នាំ លោក សាង សុផា លក់ដូរនៅក្នុងផ្សារអូរឫស្សីរយៈពេលជាង១០ឆ្នាំមកហើយ។ លោកថា តូបនេះជាកេរ្តិ៍របស់ម្ដាយក្មេក ដែលចែកឱ្យប្ដីប្រពន្ធលោករកស៊ីចិញ្ចឹមជីវិត។ លោកថា អាជីវករទាំងអស់មិនមែនមិនចង់បង់ប្រាក់ថ្លៃតូបទេ គ្រាន់តែចង់ឱ្យអាជ្ញាធរយោគយល់និងធ្វើការប្រកបដោយតម្លាភាព។
លោក សុផា ប្រាប់ថា៖ «យើងសុំបីចំណុច ទី១ សុំពន្យាបង់ប្រាក់ពីខែកញ្ញា ទៅដល់ចុងឆ្នាំ។ ទី២ សុំបញ្ចុះតម្លៃតូប មកនៅត្រឹម៥០%នៃតម្លៃបង់កាលពីឆ្នាំមុន។ទី៣ សុំដកពាក្យ«ជួល»ចេញពីលិខិតស្នើសុំបង់ប្រាក់ថ្លៃតូប»។
លោក សុផា បន្ថែមថា៖ «តូបទាំងអស់នេះ គឺជាកម្មសិទ្ធិរបស់អាជីវករ កាន់កាប់អាស្រ័យផលពីដីផ្សាររបស់រដ្ឋ។ យើងបង់ប្រាក់ឱ្យ គឺបង់ថ្លៃសង់អគារសង់តូបសង់ផ្សារ បើសិនប្រើពាក្យថា យើងជួលនោះពួកយើងភ័យថាថ្ងៃណាមួយគេយកផ្សារទៅលក់បាត់ ដេញយើងចេញយើងគិតម៉េចវិញ? អ៊ីចឹងយើងសុំឱ្យគណៈកម្មការផ្សារដកពាក្យ«ជួល»នេះចេញ»។
ក្រុមអាជីវករផ្អាកការតវ៉ានៅវេលាម៉ោងជិត១១ព្រឹក តាមការស្នើសុំពីគណៈកម្មការផ្សារ។ភាគីទាំងពីរបានបើកកិច្ចប្រជុំពិភាក្សាគ្នាវិញម្ដងនៅពេលរសៀល ប៉ុន្តែមិនទាន់អាចត្រូវរ៉ូវគ្នានោះទេ។
ប្រធានគណៈកម្មការផ្សារអូរឫស្សី លោក ហ៊ត វណ្ណធី មានប្រសាសន៍ថា លោកបានជួបប្រជុំជាមួយអាជីវករអស់ពេញមួយថ្ងៃទៅហើយ ប៉ុន្តែមិនទាន់រកចំណុចត្រូវគ្នាឃើញទេ។ លោកបន្តថា បើសិនជាមិនទាន់មានការព្រមព្រៀងគ្នាលោកនឹងបញ្ជូនសំណើររបស់អាជីវករទៅកាន់សាលារាជធានីដើម្បីស្វែងរកដំណោះស្រាយ។
លោក វណ្ណធី ថ្លែងថា៖ «អាជីវករគាត់ទារចុះថ្លៃរហូតដល់ពាក់កណ្ដាលនៃតម្លៃចាស់ ដូចជាមិនអាចទៅរួចទេ បើចុះថ្លៃតារាងថ្មីមកត្រឹមតម្លៃចាស់យើងនឹងរៀបសំណើរហ្នឹងជូនទៅសាលារាជធានីសម្រេចពីព្រោះតម្លៃថ្មីនេះលើសតម្លៃចាស់ត្រឹម១០%ទេ»។
លោក ហ៊ត វណ្ណធីបញ្ជាក់ទៀតថា៖ «អាជីវករថា ពួកយើងមិនសង់អីផងយកលុយច្រើនធ្វើអី? ខ្ញុំសួរវិញថាបើប្រមូលលុយមិនបានតើយើងទៅសង់អីកើត? អ៊ីចឹងត្រូវតែប្រមូលប្រាក់ថ្លៃជួលនេះយកទៅប្រើប្រាស់ជួសជុលកែលម្អ សល់ប៉ុន្មានយើងប្រគល់ជូនរដ្ឋចាត់ចែងប្រើប្រាស់ទៅ»។
ចំពោះក្ដីបារម្ភពីពាក្យ«ជួល»នៅក្នុងឯកសារសម្រាប់ដាក់ពាក្យបង់ថ្លៃតូបវិញ លោក ហ៊ត វណ្ណធី ចាត់ទុកថា ជាការភ័យព្រួយហួសហេតុ។
លោក ហ៊ត វណ្ណធី បន្ថែមថា៖ «គ្មាននរណាទៅយកផ្សារហ្នឹងលក់កើតទេព្រោះផ្សារជារបស់រដ្ឋ ពួកអាជីវករចេះតែដេកយល់សប្ដិខ្លួនគាត់ ពាក្យជួលនេះគឺសរសេរដើម្បីបញ្ជាក់ថាពួកគាត់ជួលពីរដ្ឋប៉ុណ្ណោះ»។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី មានប្រសាសន៍ថា សាលារាជធានីភ្នំពេញទុកពេលឱ្យគណៈកម្មការផ្សារដោះស្រាយជាមួយអាជីវករសិន។
លោក ម៉េត មាសភក្ដី៖«យើងមិនទាន់លូកដៃទេ ខាងយើងប្រមូលព័ត៌មាននិងតាមដានពីហេតុការណ៍ទាំងនេះដោយយកចិត្តទុកដាក់។បើខាងផ្សារដោះមិនបានបញ្ជូនសំណើមកសាលារាជធានីនោះយើងនឹងបើកកិច្ចពិភាក្សាដោះស្រាយបញ្ហានេះដោយការទទួលខុសត្រូវខ្ពស់»។
សេចក្ដីជូនដំណឹងរបស់គណៈកម្មការផ្សារអូរឫស្សី បង្ហាញថា តូបប្រភេទក ១តូបត្រូវបង់ប្រាក់ ៣ ៦៣០ដុល្លារ ។ តូបប្រភេទខ ត្រូវបង់ប្រាក់៣ ១៤៦ដុល្លារ។ តូបប្រភេទគ ត្រូវបង់ប្រាក់មួយតូប២ ៦៦២ដុល្លារ។ តូបប្រភេទ ឃ ១តូបត្រូវបង់ ២ ១៧៨ដុល្លារ។ តូបប្រភេទច ១តូបត្រូវបង់២ ១៧៨ដុល្លារ ។
ផ្សារអូរឫស្សីស្ថិតនៅខណ្ឌ៧មករា រាជធានីភ្នំពេញ។ ផ្សារនេះត្រូវបានសាងសង់កែលម្អថ្មីរួចរាល់កាលពីខែសីហា ឆ្នាំ២០០០។ ផ្សារអូរឫស្សី មានតូបសរុបចំនួនជាង៥ពាន់តូប។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ មានប្រសាស៍ថា អាជ្ញាធរមិនគួរណាដំឡើងថ្លៃតូបឬបង្កើតកិច្ចសន្យាថ្មីណាមួយដែលបង្ខំឱ្យអាជីវករបង់ប្រាក់បន្ថែមនោះទេ ក្នុងស្ថានភាពសេដ្ឋកិច្ចកំពុងងើបឡើងពីវិបត្តិជំងឺកូវីដ១៩នេះ។
លោក វន់ ពៅ បានលើកឡើងថា៖ «ការចរចាត្រូវតែឈ្នះៗទាំងសងខាង គឺគិតពីផលលំបាកអាជីវករ។ បើឡើងថ្លៃតូបនាំឱ្យអាជីវករមិនមានលទ្ធភាពបង់ ធ្លាក់ចូលបំណុលវណ្ឌក លែងមកលក់នៅផ្សារនេះ តើផ្សារឬរដ្ឋមានចំណូលឬអត់? អាហ្នឹងត្រូវគិត កុំឱ្យគ្នាកំពុងយ៉ាប់ហើយជាន់កថែមនោះ មិនកើតទេ»៕
