អាជីវកម្មលក់ផលិតផលថែរក្សានិងកែសម្ផស្សតាមប្រពន្ធ័អ៊ីនធឺណិតនៅកម្ពុជាមានការរីកចម្រើនគួរឱ្យកត់សម្គាល់ក្នុងប៉ុន្មានឆ្នាំចុងក្រោយនេះ ដោយសារកត្តាមួយចំនួនដូចជាការកើនប្រជាប្រិយភាពនៃការទិញទំនិញតាមប្រពន្ធ័អ៊ីនធឺណិត និងការទិញផលិតផលថែរក្សាសម្ផស្សរបស់កូរ៉េ។
ការលក់ផលិតផលទាំងនេះតាមអ៊ីនធឺណិតបានកើនឡើងជិតបួនដងនៅចន្លោះឆ្នាំ ២០១៥ និង២០២២ ដោយមានការព្យាករណ៍ថានឹងលក់បាន១៥០ពាន់លានដុល្លារនៅឆ្នាំ២០២៧ នេះបើយោងតាមរបាយការណ៍របស់ McKinsey ។
ទីផ្សារនេះរួមបញ្ចូលទាំងគ្រឿងសំអាង និងផលិតផលថែរក្សាស្បែក ទឹកអប់ ក៏ដូចជាឧបករណ៍ថែរក្សា និងកែសម្រស់ ដូចជាអេប៉ុង ឬជក់ជាដើម។ អ្នកលក់ផលិតផលថែរក្សាសម្ផស្សទាំងនេះ ដែលភាគច្រើនជាស្ត្រី អាចមានសមត្ថភាពលក់ជូនអតិថិជន នូវផលិតផលថែរក្សានិងកែសម្ផស្សដែលមានជម្រើសដ៏ច្រើន និងក្នុងតម្លៃសមរម្យ បន្ថែមជាមួយនឹងភាពងាយស្រួលនៃការដឹកជញ្ជូនដល់ផ្ទះផងដែរ។
នៅក្នុងអាជីវកម្មលក់ផលិតផលថែរក្សានិងកែសម្ផស្សតាមប្រពន្ធ័អ៊ីនធឺណិតនៅកម្ពុជានេះដែរ អាជីវករទាំងអស់នោះ តែងតែបានធ្លាក់ខ្លួនទៅជាអ្នកបញ្ជ្រាប និងអ្នកអនុវត្តស្តង់ដារសម្រស់ដែលមិនមានផាសុខភាព។
ក្តីស្រមៃផ្ទាល់ខ្លួនក្នុងការប្រឡូកចូលក្នុងទីផ្សារនេះ គួបផ្សំនឹងសម្ពាធសង្គមក្នុងការធ្វើខ្លួនទៅតាមស្តង់ដារសម្រស់ដែលមិនមានផាសុខភាពទាំងនោះ បានពង្រាងជម្រើសរបស់អាជីវករលក់ផលិតផលថែរក្សា និងកែសម្ផស្សតាមប្រពន្ធ័អ៊ីនធឺណិតឲ្យបន្តអនុវត្តស្តង់ដារសម្រស់ទាំងនោះទៀត។ តួនាទីទាំងពីរនេះមិនត្រឹមតែជះឥទ្ធិពលលើការយល់ឃើញលើស្តង់ដារសម្រស់ និងជំនឿទុកចិត្តលើខ្លួនឯងរបស់អតិថិជនរបស់អាជីវករទាំងនោះប៉ុណ្ណោះទេ ប៉ុន្តែថែមទាំងអាចប៉ះពាល់ដល់សុខុមាលភាពរបស់ខ្លួនឯងផងដែរ។
ផលប៉ះពាល់លើអ្នកទិញទំនិញតាមប្រពន្ធ័អ៊ីនធឺណិត
មនុស្សស្រីត្រូវបានគេប្រាប់ថា ស្តង់ដារសម្រស់ណាដែលល្អសម្រាប់ខ្លួន ដែលវិវឌ្ឍន៍ទៅតាមពេលវេលា និងខុសគ្នាទៅតាមវប្បធម៌ តាំងពីវ័យក្មេង ដោយកំណត់ការយល់ឃើញរបស់ពួកគេអំពីអត្ថន័យនៃការទាក់ទាញខាងរាងកាយ។ ស្តង់ដារសម្រស់ទាំងនេះដើរតួក្នុងការដាក់សម្ពាធខ្លាំងលើមនុស្សស្រីឲ្យតុបតែងខ្លួនទៅតាមស្តង់ដារសម្រស់ទាំងនោះ។
សម្រាប់ប្រទេសកម្ពុជាវិញ ស្តង់ដារសម្រស់រួមបញ្ជូលលក្ខណៈសម្បត្តិដូចជា ស្បែកសទន់ រាងកាយស្លីម ដើមទ្រូងពេញ ច្រមុះស្រួច ទម្រង់មុខរាងពងក្រពើ ឬរាងអក្សរ V ត្របកភ្នែកពីរជាន់ ធ្មេញស និងសក់វែង រលោង ត្រង់។ ជារឿយៗ អាជីវកម្មថែរក្សា និងកែសម្ផស្សតាមប្រព័ន្ធអ៊ីនធឺណិតនៅកម្ពុជា ដែលដំណើរការដោយអ្នកលក់ជាស្ត្រីទាំងនេះ បានឆ្លុះបញ្ចាំងពីស្តង់ដារសម្រស់ទាំងនេះ។
ឧទាហរណ៍ អ្នកលក់ផលិតផលធ្វើឱ្យស្បែកស ជាញឹកញាប់ផ្សព្វផ្សាយអំពីអត្ថប្រយោជន៍នៃផលិតផលរបស់ពួកគេ ដូចជាការធ្វើឱ្យស្បែកភ្លឺថ្លា មានសំណើម ទន់ និងភ្លឺរលោង ខណៈពេលដែលធានានូវសុវត្ថិភាពខ្ពស់បំផុត ឬលទ្ធផលឆាប់រហ័ស និងមានរូបមន្តពិតប្រាកដមកពីប្រទេសកូរ៉េ ឬ ជប៉ុន។ បន្ថែមពីនោះទៀត ពួកគេក៏ធ្វើការបង្ហាញជាក់ស្តែងនៃការផ្លាស់ប្តូរពីស្បែកខ្មៅទៅស ឬរាងកាយស្លីមបន្ទាប់ពីបានប្រើប្រាស់ផលិតផលទាំងនោះ។
ទីផ្សារពិភពលោករបស់ផលិតផលធ្វើឱ្យស្បែកសនៅឆ្នាំ២០២០ មានតម្លៃប្រមាណ៨ពាន់លានដុល្លារ ដោយទីផ្សារអាស៊ីប៉ាស៊ីហ្វិករកមានតម្លៃពាក់កណ្តាលនៃប្រាក់ចំណូលពីផលិតផលធ្វើឱ្យស្បែកសក្នុងឆ្នាំ២០១៨។ ប្រជាជនកម្ពុជាមួយចំនួនធំ ដែលភាគច្រើនជាមនុស្សស្រីបានជ្រើសរើសផលិតផលធ្វើឱ្យស្បែកស ដើម្បីបំពេញតាមស្តង់ដារសម្រស់នៅកម្ពុជា ព្រោះថាស្បែកស ត្រូវបានផ្តល់សិទ្ធិ និងឋានៈសង្គមជាច្រើនដូចជា អំណាច ទ្រព្យសម្បត្តិ និងកេរ្តិ៍ឈ្មោះល្អ។
ក្នុងបទសម្ភាសន៍ជាមួយ VOA ប៊ុន សុខដានី អាយុ២៧ឆ្នាំ រស់នៅទីក្រុងភ្នំពេញ បានសម្តែងការមិនសប្បាយចិត្តចំពោះស្បែកខ្មៅរបស់ខ្លួនថា៖ «ពីមុនស្បែកខ្ញុំមិនស្អាតទេ ដូច្នេះខ្ញុំមិនសប្បាយចិត្តនឹងវាទេ»។ ការមិនពេញចិត្តនេះកើតចេញពីការយល់ឃើញដែលថា បុគ្គលដែលមានស្បែកខ្មៅ គឺជាអ្នកធ្វើការនៅក្រោមពន្លឺថ្ងៃ ដូចជាការធ្វើកសិកម្ម ឬការងារដែលសង្គមមិនសូវឲ្យតម្លៃ។ «ពាក្យខ្មែរថា ស្រែ ឬកូនអ្នកស្រែ គឺជាពាក្យជេរប្រមាថមួយ ដែលត្រូវបានគេផ្សាភ្ជាប់ទៅនឹងភាពក្រីក្រ ស្បែកខ្មៅ និងការធ្វើការនៅខាងក្រៅក្រោមពន្លឺថ្ងៃ»។
ដូច្នេះ តាមរយៈការលក់ និងផ្សព្វផ្សាយផលិតផលសម្រស់ទាំងនេះតាមប្រព័ន្ធអ៊ីនធឺណិត ដែលស្របទៅតាម ស្តង់ដារសម្រស់ទាំងនោះ អាជីវករលក់ផលិតផលថែរក្សា និងកែសម្ផស្សតាមប្រព័ន្ធអ៊ីនធឺណិតបាន កំពុងបន្តរក្សាស្តង់ដារសម្រស់ និងវណ្ណៈនិយមរបស់សង្គមដែលវាបានជះឥទ្ធិពលមិនល្អដល់ស្ត្រីដែលប្រាថ្នាចង់បានសម្រស់ដូចគ្នានេះដែរ។
ការលក់ស្តង់ដារសម្រស់ដែលមិនអាចសម្រេចបាន
នៅពេលដែលសហគ្រិនទាំងនេះ បន្តរក្សាស្តង់ដារសម្រស់ តាមរយៈការលក់ និងផ្សព្វផ្សាយផលិតផលសម្រស់ទាំងនេះតាមប្រព័ន្ធអ៊ីនធឺណិត ពួកគេផ្ទាល់ក៏បាន ស្រូបយកស្តង់ដារសម្រស់ទាំងនេះមកអនុវត្តលើខ្លួនឯងផងដែរ។
អាជីវករលក់ផលិតផលថែរក្សា និងកែសម្ផស្សតាមប្រព័ន្ធអ៊ីនធឺណិតត្រូវបានជះឥទ្ធិពលដោយពីសម្ពាធសង្គម និងការបង្ហាញពីប្រព័ន្ធផ្សព្វផ្សាយសង្គម ដែលសង្កត់ធ្ងន់លើនិយមន័យតូចចង្អៀតនៃស្តង់ដារសម្រស់។ ឥទ្ធិពលនេះត្រូវបានឆ្លុះបញ្ចាំងតាមរយៈផលិតផលថែរក្សាសម្រស់ដែលអាជីវករបានជ្រើសរើសមកដាក់លក់ ដែលរួមបញ្ចូល ចាប់ពីផលិតផលធ្វើឱ្យស្បែកស ដល់ថ្នាក់ផឹកថ្នាំសម្រាប់សម្រកទម្ងន់ ដែលស្របតាមស្តង់ដារសម្រស់ ដែលកំពុងពេញនិយមនៅលើប្រព័ន្ធផ្សព្វផ្សាយសង្គម ហើយពួកគេនៅតែរក្សាស្តង់ដារសម្រស់ ដែលវាបានជះឥទ្ធិពលមិនល្អដល់មនុស្សស្រីដូចគ្នា។
កញ្ញា អ៊ី រីយ៉ា មកពីខេត្តកំពង់ស្ពឺ ដែលបើកអាជីវកម្មលក់ក្រែមច្រើនពណ៌ សេរ៉ូម ចាក់ និងថ្នាំសម្រករាងតាមហ្វេសប៊ុក បានប្រាប់ VOD ថា ខ្លួនគាត់ផ្ទាល់បានប្រើក្រែមខាត់ស្បែកអស់រយៈពេល៣ខែ ហើយបានឃើញសក្តានុពលអាជីវកម្មលក់គ្រឿងសម្អាងនេះ។ ជាលទ្ធផល កញ្ញាបានបើកអាជីវកម្មតាមប្រព័ន្ធអ៊ីនធឺណិត ដោយលក់ផលិតផលថែរក្សាសម្រស់ជាច្រើនមុខ ដែលមានប្រភពពីអ្នកលក់ម្នាក់ទៀត។
កញ្ញាបានប្រាប់VODនៅឆ្នាំ2022ថា៖«ខ្ញុំពន្យល់អតិថិជនពីរបៀបប្រើប្រាស់ផលិតផល ថាបន្ទាប់ពីពួកគេងូតទឹក ពួកគេគួរតែប្រើឡេនេះ។ វានឹងជួយជម្រុះកោសិកាចាស់ចេញសម្រាប់ឲ្យសម្រាប់កោសិកាថ្មីដុះ។ បន្ទាប់មកស្បែកនឹងប្រែមកសវិញ»។
ករណី រីយ៉ា ជាឧទាហរណ៍មួយដែលបង្ហាញថា អាជីវករលក់ផលិតផលថែរក្សា និងកែសម្ផស្សបានដើរតួរជាអ្នកប្រើប្រាស់ និងអ្នកបញ្ជ្រាបស្តង់ដារសម្រស់ដែលមិនមានផាសុខភាពមួយចំនួន ដូចជាការធ្វើឱ្យស្បែកស។ បន្ថែមពីនេះទៀត ក្នុងនាមជាអ្នកបញ្ចៀប និងអ្នកអនុវត្ត អាជីវករទាំងនេះក៏ទទួលរងនូវផលប៉ះពាល់នៃស្តង់ដារសម្រស់ដែលពួកគេកំពុងបន្តបញ្ជ្រាបផងដែរ។
សម្ពាធក្នុងការ អនុវត្តតាមស្តង់ដារទាំងនេះអាចប៉ះពាល់ដល់សុខុមាលភាពផ្លូវចិត្ត និងផ្លូវកាយរបស់អ្នកលក់ខ្លួនឯងផ្ទាល់ ដោយសារពួកគេខិតខំថែរក្សាសម្រស់របស់ពួកគេទៅតាមការរំពឹងទុកដែលដាក់មកលើពួកគេ ទាំងអតិថិជនរបស់ពួកគេ និងវិស័យឧស្សាហកម្មថែរក្សាសម្រស់ទាំងមូល។
យោងតាមរបាយការណ៍របស់សភាចក្រភពអង់គ្លេសស្តីពីផលប៉ះពាល់នៃស្តង់ដារសម្រស់លើសុខភាពផ្លូវចិត្ត និងរាងកាយ គេសង្កេតឃើញថា ច្រើនប្រហែល៨០% នៃអ្នកចូលរួមក្នុងការសិក្សានោះ បានសម្តែងការយល់ព្រម ទាក់ទងនឹងផលប៉ះពាល់ជាអវិជ្ជមាននៃស្តង់ដារសម្រស់ទៅលើសុខភាពផ្លូវចិត្តរបស់ពួកគេ។ លើសពីនេះទៀត ប្រហែល៦១%បានទទួលស្គាល់ផលប៉ះពាល់អវិជ្ជមាននៃស្តង់ដារសម្រស់ទៅលើសុខភាពរាងកាយរបស់ពួកគេ។
វាក៏ស្រដៀងគ្នាដែរក្នុងចំណោមស្ត្រីខ្មែរ។ រស់ សុជាតា បុគ្គលិកហាងសម្លៀកបំពាក់នារីមួយរូប បានរៀបរាប់ពីអារម្មណ៍អវិជ្ជមានចំពោះខ្លួនថា៖ «ពេលខ្លះខ្ញុំអាណិតខ្លួនឯងព្រោះខ្ញុំមិនបានកើតមកមានច្រមុះស្រួច ឬស្បែកស។ មិត្តភ័ក្តិរបស់ខ្ញុំតែងតែលេងសើច និងចំអកឱ្យខ្ញុំអំពីច្រមុះធំរបស់ខ្ញុំ ធ្វើឱ្យខ្ញុំមានអារម្មណ៍ខ្មាស់អៀន និងគិតចង់ធ្វើការវះកាត់កែសម្ផស្ស»។
ដូច្នេះ សម្ពាធដើម្បីអនុវត្តទៅតាមស្តង់ដារសម្រស់ទាំងនេះអាចបណ្តាលឱ្យមានភាពតានតឹង ការថប់អារម្មណ៍ និងការមិនពេញចិត្តចំពោះរូបរាងរបស់ពួកគេ។ អ្នកលក់ផលិតផលថែរក្សាសម្រស់តាមប្រព័ន្ធអ៊ីនធឺណិត បានក្លាយជាអ្នកចូលរួមដោយមិនដឹងខ្លួននៅក្នុងការដែលមិនត្រឹមតែប៉ះពាល់ដល់អតិថិជនរបស់ពួកគេប៉ុណ្ណោះទេ ប៉ុន្តែថែមទាំងធ្វើឱ្យប៉ះពាល់ដល់សុខភាពផ្លូវចិត្ត និងផ្លូវកាយរបស់ខ្លួនឯងទៀតផង។
សេចក្តីសន្និដ្ឋាន
ការដើរតួជាអ្នកបញ្ជ្រាប និងអ្នកអនុវត្តស្តង់ដារសម្រស់ បានជំរុញស្រ្តីជាអ្នកលក់ផលិតផលថែរក្សាសម្រស់ទៅក្នុងស្ថានភាពស្មុគស្មាញមួយ ដែលពួកគេបានរួមចំណែកដោយអចេតនាក្នុងការបន្តរក្សានិងអនុវត្តស្តង់ដារសម្រស់ ដែលអាចប៉ះពាល់យ៉ាងធ្ងន់ធ្ងរដល់សុខុមាលភាពរបស់ពួកគេ និងអតិថិជនរបស់ពួកគេ។
ដើម្បីដោះស្រាយបញ្ហាទាំងនេះ វាមានសារៈសំខាន់ណាស់សម្រាប់សង្គមកម្ពុជាក្នុងការទទួលយក និងអបអរសាទរ ស្តង់ដារសម្រស់ដែលមានភាពចម្រុះ ប្រឆាំងនឹងស្តង់ដារសម្រស់ដែលមិនមានផាសុខភាព និងបង្កើនការយល់ដឹង និងការគាំទ្រផ្នែកសុខភាពផ្លូវចិត្ត ដើម្បីលើកកម្ពស់បរិយាកាសដែលមានផាសុខភាពល្អ និងមានភាពចម្រុះនៅក្នុងប្រទេសកម្ពុជា។
អ្នកមានឥទ្ធិពលលើប្រព័ន្ធផ្សព្វផ្សាយសង្គមកម្ពុជាគួរតែចូលរួមក្នុងការផ្សព្វផ្សាយ និងលើកទឹកចិត្តឱ្យមានការសន្ទនាដោយបើកចំហអំពីការស្រលាញ់ខ្លួនឯង ភាពវិជ្ជមានរបស់រាងកាយ និងសុខភាពផ្លូវចិត្ត។ ពួកគេគួរតែចូលរួមក្នុងការជួយអភិវឌ្ឍបណ្តាញដែលអាចបម្រើជាកន្លែងសុវត្ថិភាពសម្រាប់បុគ្គលម្នាក់ៗក្នុងការចែករំលែកបទពិសោធន៍ និងបញ្ហាប្រឈមរបស់បុគ្គលម្នាក់ៗ។
ប្រជាជនកម្ពុជាគួរតែគិតឱ្យបានហ្មត់ចត់ និងច្បាស់លាស់អំពីអ្វីដែលយើងរំពឹងពីឧស្សាហកម្មថែរក្សា និងកែសម្ផស្សតាមប្រព័ន្ធអ៊ីនធឺណិតនៅកម្ពុជា ទាំងសុវត្ថិភាព និងការផ្ញើសារ។ ជំហានដ៏សំខាន់មួយគឺដើម្បីលើកទឹកចិត្តដល់ការអភិវឌ្ឍន៍ និងការអនុវត្តគោលការណ៍ណែនាំស្តីពីទំនួលខុសត្រូវសង្គមរបស់សាជីវកម្ម (CSR) សម្រាប់អាជីវកម្មអ៊ីនធឺណែត ជាពិសេសនៅក្នុងឧស្សាហកម្មសម្រស់ និងសំលៀកបំពាក់។
សហគ្រិននៅក្នុងវិស័យនេះ គួរតែត្រូវបានលើកទឹកចិត្តឱ្យដើរតួនាទីយ៉ាងសកម្មក្នុងការលើកកម្ពស់ភាពចម្រុះនៃរូបរាងនិងសម្រស់ ផ្សេងៗតាមរយៈការផ្សាយពាណិជ្ជកម្ម ប្រកបដោយការទទួលខុសត្រូវ។
ជាងនេះទៅទៀត រដ្ឋាភិបាលកម្ពុជាគួរគាំទ្រគំនិតផ្តួចផ្តើមដែលលើកកម្ពស់ភាពចម្រុះប្រឆាំងនឹងស្តង់ដារសម្រស់ដែលអាចបង្កគ្រោះថ្នាក់ និងផ្តល់អាទិភាពដល់សុខភាពផ្លូវចិត្ត។ រដ្ឋាភិបាលគួរធ្វើការលើកទឹកចិត្តសម្រាប់អាជីវកម្មដែលរួមចំណែកយ៉ាងសកម្មក្នុងការបង្កើតបរិយាកាសដែលមានចម្រុះ និងមានផាសុខភាពផ្លូវចិត្តល្អ តាមរយៈការលើកលែងពន្ធ ឬភាពជាដៃគូជាមួយភ្នាក់ងាររដ្ឋាភិបាល។
អ្នកប្រើប្រាស់កម្ពុជាក៏មានតួនាទីផងដែរ។ ទោះជាយ៉ាងណាក៏ដោយ អ្នកលក់នឹងត្រូវឆ្លើយតបទៅនឹងទីផ្សាររបស់អ្នកទិញ ហើយយើងជាអ្នកប្រើប្រាស់និងជាវ មានសិទ្ធិក្នុងការគាំទ្រសាជីវកម្មទាំងអស់នោះ។ យើងជាអ្នកប្រើប្រាស់គួរតែគាំទ្រអាជីវកម្មលក់ផលលិតផលថែរក្សាសម្រស់តាមប្រព័ន្ធអ៊ីនធឺណិត ដែលសារទាំងនោះមានភាពវិជ្ជមាន និងប្រឆាំងនឹងការប្រើប្រាស់សារដែលបង្កគ្រោះថ្នាក់ដល់អ្នកប្រើប្រាស់។
នៅពេលដែល ឧស្សាហកម្មថែរក្សានិងកែសម្ផស្សតាមប្រពន្ធ័អ៊ីនធឺណិតនៅកម្ពុជាមានការរីកចម្រើន ប្រទេសកម្ពុជាគួរតែបោះជំហានយ៉ាងសំខាន់ឆ្ពោះទៅរកការជំរុញឲ្យមានបរិយាកាសតាមប្រពន្ធ័អនឡាញដែលមានផាសុខភាពល្អ និងមានភាពចម្រុះ និងផ្តល់អាទិភាពដល់ការយល់ដឹង និងការគាំទ្រផ្នែកសុខភាពផ្លូវចិត្ត៕
