គ្រួសារមួយដែលមានកូនស្រី២នាក់ត្រូវបានឈ្មួញលក់ក្រោមរូបភាពរៀបការទៅប្រទេសចិនស្នើសុំឱ្យអាជ្ញាធរកម្ពុជាអន្តរាគមន៍ទៅកាន់អាជ្ញាធរប្រទេសចិនដើម្បីឱ្យកូនស្រីខ្លួនបានវិលត្រឡប់មកកម្ពុជាវិញ ដោយពួកគេអះអាងថាកូនស្រីទាំងពីរនាក់នោះត្រូវបានអាជ្ញាធរចិនឃុំខ្លួនប្រហែល៥ខែហើយ។
លោក ភារុន មានមុខរបរជាអ្នកបើកឡាន បានប្រាប់អ្នកសារព័ត៌មានខេមបូចា ថា កូនស្រីរបស់លោកចំនួន២នាក់ ឈ្មោះ នីតា (ឈ្មោះអ្នកសារព័ត៌មានដាក់ឱ្យ) អាយុ១៨ និងឈ្មោះ តាណា (ឈ្មោះអ្នកសារព័ត៌មានដាក់ឱ្យ) អាយុ១៩ ត្រូវបានអាជ្ញាធរចិនឃុំខ្លួន បន្ទាប់ពីពួកគេប្ដឹងអាជ្ញាធរចិនសុំត្រឡប់មកកម្ពុជាវិញ ដោយសាររស់នៅមិនចុះសម្រុងជាមួយប្ដី។ លោកបន្តថា កូនស្រីទាំង២នាក់បានប្ដឹងអាជ្ញាធរចិនតាំងពីដើមខែកកដ្កា ឆ្នាំ២០២២ ប៉ុន្តែមកដល់ឥឡូវនៅមិនទាន់ទទួលបានដំណឹងអ្វីឡើយ។
លោក ភារុន ប្រាប់ថា៖ «ចង់ស្នើឱ្យគាត់(សមត្ថកិច្ចកម្ពុជា)ជួយអន្តរាគមន៍ឱ្យឆាប់បាន គ្នាបានមកមាតុភូមិវិញ។ កូនគេគ្រប់គ្នាជាប់[ឃុំឃាំង]តែ២ទៅ៣ខែអីអស់ ខ្លះតែ១ខែ កូនខ្ញុំ៤ខែជិត៥ខែហើយ។ វាមានឧក្រិដ្ឋជនបែបណាឬមួយក៏យ៉ាងម៉េច ជាប់ស្អីបានឃុំខ្លួនយូរម៉្លេះ?»។
លោក ភារុន បញ្ជាក់ថា៖ «មុនប្ដឹងប៉ូលិសគាត់តេទាក់ទងយើងដល់ជាប់ឃុំឃាំងប៉ូលិសដកទូរសព្ទ [ឥ]ឡូវទាក់ទងកូនលែងបាន»។
ឪពុករូបនេះ បានលើកឡើងពីកត្តាមួយចំនួនដែលកូនស្រីទាំងពីរនាក់របស់គាត់សម្រេចចាកចោលប្ដីជនជាតិចិន។
លោក ភារុន ឱ្យដឹងថា៖ «(ប្ដី)អត់ឱ្យលុយតលិខិតឆ្លងដែនមកលេងម៉ែឪ។ យើង(កូន)អត់បានធ្វើការងារអី វាឱ្យយើងនៅតែផ្ទះ[ដើរបានជិតៗផ្ទះ]។…មីបង(កូនស្រីបង) ប្ដីអត់វាយទេ។ មីទី២(កូនស្រីប្អូន)វាលេងទូរសព្ទច្រើនប្ដីវាប្រចណ្ឌ វាឈ្លោះគ្នាវាយគ្នាខ្លះទៅ មិនធំដុំអីទេ គ្រាន់ទះមួយកំផ្លៀងយប់ឡើងលួងប្រពន្ធវាវិញហើយ»។
លោក ភារុន បន្តទៀតថា កូនស្រីទាំងពីរបានទៅប្រទេសចិនដើម្បីរៀបការប្ដីជាជនជាតិចិនកាលពីឆ្នាំ២០១៨និង២០១៩។ ដោយកូនស្រីប្អូនបានរៀបការមុនជាង៥ខែ។ លោក ភារុន បន្តថា កូនស្រីទាំងពីរនាក់នេះបាន ស្ម័គ្រចិត្តរៀបការទៅប្រទេសចិន ដោយមើលឃើញជីវភាពគ្រួសារខ្សត់និងមានជំពាក់បំណុល។ កូនស្រីលោកបានស្គាល់មិត្តភក្តិម្នាក់កាលទៅធ្វើការនៅភ្នំពេញ រួចបានណែនាំអំពីការរៀបការទៅប្រទេសចិននេះ។
ឪពុករូបនេះលើកឡើងទៀតថា កូនស្រីទាំងពីរនាក់នោះ ប្អូនរៀនត្រឹមថ្នាក់ទី៨ និងបងរៀនត្រឹមថ្នាក់ទី៩។ ពួកគេជាកូនច្បងនិងបន្ទាប់ក្នុងចំណោមបងប្អូនស្រីចំនួន៥នាក់ ដោយ៣នាក់ទៀតនៅតូចៗ។
លោក ភារុន និយាយថា៖ «កូនវាថាប៉ាបើប៉ាជំពាក់[លុយ]គេច្រើនចឹង ខ្ញុំសូមទៅចិនហើយ បានលុយឱ្យប៉ាយកមកសងគេខ្លះ»។… កាលទៅជីវភាពយើងធ្លាក់ដុនដាបខ្លាំងទៅៗជំពាក់គេ រកណាក៏អត់បានទាល់ហ្មង ចឹងក៏សម្រេចចិត្តឱ្យកូនទៅ។…មេខ្យល់ថាកូនក្រមុំទៅណុង(ចិន)បានប្ដីគេទម្លាក់លុយឱ្យខាងខ្មែរ។ មីប្អូនបាន៣ពាន់ដុល្លារ ក្រោយ(កូនស្រីបង)បានជិត៤ពាន់[ដុល្លារ] ដោះបំណុលបាន»។
ប្រពន្ធលោក ភារុន អ្នកស្រី ម៉ាឡៃ ដែលជាម្ដាយរបស់ស្រ្តីខ្មែរទាំងពីរនាក់នេះ បានប្រាប់ថា កូនស្រីរបស់អ្នកស្រីទាំងពីរនាក់ស្ថិតក្នុងការឃុំឃាំងនៅតំបន់ ហ៊ូណាន ក្នុងខេត្តជាំងស៊ី។
ដោយឡែកកាលពីថ្ងៃទី១២ ខែសីហា ឆ្នាំ២០២២ មន្រ្តីអង្គការអាដហុក បាននាំអ្នកស្រីដាក់ពាក្យបណ្ដឹងតាមស្ថាប័នរដ្ឋនានានៅឯរាជធានីភ្នំពេញ។
អ្នកស្រី ម៉ាឡៃ លើកឡើងថា មន្រ្តីសមាគមអាដហុកធ្លាប់ប្រាប់ថា កុងស៊ុលកម្ពុជាប្រចាំប្រទេសចិនផ្ដល់ដំណឹងថា សមត្ថកិច្ចចិននឹងបញ្ជូនកូនស្រីទាំងពីរនាក់នេះត្រលប់មកកម្ពុជាវិញនៅខែកញ្ញា ឆ្នាំ២០២២ ប៉ុន្តែមកទល់បច្ចុប្បន្ននេះពុំមានដំណឹងឡើយ។
ម្ដាយរូបនេះ បន្តថា កូនស្រីប្អូនដែលរៀបការប្ដីចិនឈ្លោះគ្នាជាមួយប្ដីនាងជាញឹកញយ រួចក៏រត់ទៅរស់នៅជាមួយកូនស្រីបង មុនពេលពួកគេប្ដឹងសមត្ថកិច្ចចិន។
អ្នកស្រី ម៉ាឡៃ បន្ថែមថា៖ «មីប្អូនគ្រាន់ឧស្សាហ៍ឈ្លោះគ្នាវានៅក្មេង ដល់មីបងវានាំមកនៅជាមួយដើមហេតុ [ចង់ត្រលប់មកវិញ] ដល់មីប្អូនអត់មានគោលដៅ មីបងក៏សម្រេចចិត្តមកទាំងអស់គ្នា»។…ឈ្លោះគ្នាច្រើនក៏សម្រេចចិត្តនៅជាមួយបង(ស្រី) ហើយរកស៊ីអីអត់កើតទេ ហើយនៅស្រុកគេឈឺអីពិបាកយើង[កូនស្រីប្អូន]នៅម្នាក់ឯងចឹង។ យើង(កូនស្រីប្អូន)នៅមួយបងបានត្រឹមស៊ីអី[អាហារបីពេល] អត់មានលទ្ធភាពទិញអីស៊ី»។
មន្រ្តីមូលដ្ឋានអះអាងថា ប្រជាពលរដ្ឋរស់នៅក្នុងតំបន់ពួកគេគ្រប់គ្រងពុំមានគ្រួសារមួយណា ឱ្យកូនស្រីរៀបការប្ដីជនជាតិចិននិងរស់នៅប្រទេសចិនឡើយ។
លោកស្រី គង់ លឹមហូ អភិបាលស្រុកឆ្លូង ថ្លែងថា៖ «[នៅស្រុកឆ្លូង]ខ្ញុំដូចអត់មានផង។ រឿងគេទៅលួចលាក់ខ្ញុំម៉េចបានដឹង?។ តែស្របច្បាប់ការរៀបអាពាហ៍ពិពាហ៍ខ្មែរបរទេសធ្លាប់មានកន្លងមក ខ្ញុំអត់ចាំទេ(ទៅប្រទេសណា)ព្រោះអីវាយូរឆ្នាំដែរហើយ»។
លោក សេង គឹមចាំង មេឃុំឆ្លូង នៅស្រុកឆ្លូង មានប្រសាសន៍ថា៖ «រៀបការយកប្ដីចិន ដូចជាអត់មានផង បើមានទាល់តែគេធ្វើលិខិតបែបបទមក តែវាអត់មាន។…ខុសច្បាប់អត់មានទេ បើមានចុះហាមឃាត់ភ្លាមហើយ ជនបរទេសមិនឱ្យរៀបការខុសច្បាប់បានទេ។ លួចលាក់ម៉េចបាន អត់មានទេ»។
លោកស្រី ណៃ ធីតា ប្រធានមន្ទីរព័ត៌មានខេត្តក្រចេះ ថ្លែងប្រាប់អ្នកសារព័ត៌មានខេមបូចា បន្ទាប់ពីសួរអាជ្ញាធរពាក់ព័ន្ធរួច ថា៖ «អត់មានទេ។ គាត់(ប៉ូលិស)ថាអត់មានទេ ករណី២០២២នេះអត់មានទេ ២០២១អត់មានទេ។ អត់មានកូនស្រីការទៅប្រទេសចិនទេ មានតែស្ម័គ្រចិត្តទៅរៀបការប្ដីចិន គេស្ម័គ្រចិត្តខ្លួនគេ តែមួយករណីហ្នឹង ខ្ញុំអត់ច្បាស់ទេ គ្រាន់ថាមាន តែមិនច្បាស់ឆ្នាំ។ អត់មានឮ(ប្ដីចិនធ្វើបាបមកវិញ)ទេ»។
មន្រ្តីសង្គមស៊ីវិលនិងមន្រ្តីរដ្ឋាភិបាល លើកឡើងថា ពួកគេបានធ្វើការទាក់ទងទៅកាន់ស្ថានទូតកម្ពុជាប្រចាំប្រទេសចិន ឱ្យជួយអន្តរាគមន៍ស្រ្តីខែ្មរទាំងពីរនាក់នេះឱ្យបានវិលត្រឡប់មកកម្ពុជាវិញ ប៉ុន្តែកិច្ចការនេះត្រូវបានរាំងស្ទះ ដោយសារតំបន់ពួកគេរស់នៅកំពុងផ្ទុះជំងឺកូវីដ-១៩។
អ្នកស្រី ម៉ៅ ម៉ាប់ ប្រធានផ្នែកសិទ្ធិស្រ្តីនិងកុមារនៃសមាគមអាដហុក មានប្រសាសន៍ថា នៅដើមខែកកដ្កា ឆ្នាំ២០២២ ស្រ្តីជនជាតិខ្មែរទាំងពីរនាក់នោះ បានប្ដឹងមកសមាគមអាដហុក តាមរយៈវីឆាត(we chat) ឱ្យជួយបានវិលត្រលប់មកកម្ពុជាវិញ។ ដោយជនរងគ្រោះថា ពុំអាចស៊ូទ្រាំរស់នៅជាមួយប្ដីជនជាតិចិនបន្តទៀតបាន។
អ្នកស្រី ម៉ាប់ ថ្លែងថា៖ «ជនរងគ្រោះទាំងពីរនាក់បងប្អូន បានសុំពឹងឱ្យ អាដហុក ជួយគាត់មកជួបជុំគ្រួសារវិញទាំងពីរនាក់ ដោយគាត់ប្រាប់ថា មិនអាចទ្រំាការធ្វើបាបហិង្សាផ្លូវចិត្ត និងផ្លូវភេទពីប្តីចិនបានទេ»។
អ្នកស្រី ម៉ាប់ អះអាងថា សមាគមអាហុកបានធ្វើការជាមួយកុងស៊ុលកម្ពុជាក្បែរតំបន់ពួកគេរស់នៅជាប់ជាប្រចាំ។
អ្នកស្រី ម៉ាប់ បន្ថែមថា៖ «បញ្ហានៅត្រង់ថាដោយសារតែតំបន់គាត់កំពុងស្នាក់នៅរាល់ថ្ងៃហ្នឹង គឺវាផ្ទុះកូវីដខ្លាំង គឺអត់អាចឱ្យធ្វើដំណើរទៅណាផ្ដេសផ្ដាស់អីបានទេ។ ខាងទូតគេក៏ស្នើដែរថាបើសិននៅកន្លែងណាសុំឱ្យគាត់ស្នាក់នៅកន្លែងនោះបណ្ដោះអាសន្នសិនទៅ ដើម្បីទី១សុវត្ថិភាពកូវីដផង បើគាត់ផ្លាស់ប្ដូរវាពិបាកក្នុងការអន្តរាគមន៍គាត់បន្តទៀតដែរចឹង»។
លោក ជុំ សន្ទរី អ្នកនាំពាក្យក្រសួងការបរទេសកម្ពុជា មានប្រសាសន៍ថា ក្រសួងការបរទេសនិងស្ថានទូតកម្ពុជាប្រចាំប្រទេសចិនកំពុងដោះស្រាយករណីនេះជាមួយសម្ថកិច្ចចិនដើម្បីសម្របសម្រួលឱ្យស្រ្តីខ្មែរទាំងពីរនាក់នេះវិលត្រលប់មកកម្ពុជាវិញ ដោយរងចាំការបញ្ចប់នីតិវិធីផ្ទៃក្នុងប្រទេសចិនជាមុនសិន។
លោក សន្ទរី មានប្រសាសន៍ថា៖ «ក្រសួងការបរទស និងស្ថានទូតយើងនៅប៉េកាំងបាន និងកំពុងធ្វើការងារនេះជាមួយអាជ្ញាធរមានសមត្ថកិច្ចរបស់ចិន រៀបចំបែបបទសម្រាប់ការធ្វើមាតុភូមិនិវត្តន៍មកកម្ពុជា»។
លោកស្រី ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ថ្លែងថា លោកស្រីពុំទាន់ទទួលបានព័ត៌មានទាក់ទងស្រ្តីខ្មែរពីរនាក់នេះជាប់ឃុំខ្លួននៅប្រទេសចិននៅឡើយទេ។
លោកស្រី ប៊ុនអេង អះអាងថា ស្រ្តីជនជាតិណាដែលរៀបការប្ដីជនជាតិចិនរួចរត់ចោលប្ដី គឺត្រូវបានចាត់ទុកថាខុសច្បាប់ក្នុងប្រទេសចិន។ដូច្នេះទើបអ្នកស្រីត្រូវការព័ត៌មានលម្អិតជុំវិញករណីនេះ ដើម្បីជជែកជាមួយសមត្ថកិច្ចចិន។
លោកស្រី ប៊ុនអេង ថ្លែងថា៖ «ពេលខ្លះយើងពិបាកទៅដល់ស្រុកគេ គេអនុវត្តច្បាប់ស្រុកគេ ចឹងយើងទាល់ដឹងរឿងច្បាស់សិនថារឿងហ្នឹងវារឿងអ្វី។ ហើយទាំងពីរនាក់ហ្នឹងគេចាប់ឬមួយត្រូវបានគេយកទៅតើក្នុងន័យគេសង្រ្គោះឬក្នុងន័យគេទុកស៊ើបអង្កេតមានរឿងអីចឹង ទាល់តែដឹងសាច់រឿងហ្នឹងឱ្យច្បាស់សិន»។
លោកស្រី ប៊ុនអេង បន្ថែមថា៖ «យើងអាចទាក់ទងទៅស្ថានទូតខ្មែរនៅប្រទេសចិនដើម្បីឱ្យគាត់ពន្យល់ បើសិនជាមានរឿងនេះកើតឡើងនៅប្រទេសចិនស្ថានទូតត្រូវដឹង»។
សារព័ត៌មានខេមបូចា ពុំទាន់ទទួលបានការឆ្លើយតបពីឯកអគ្គរាជទូតកម្ពុជាប្រចាំប្រទេសចិន និងកុងស៊ុលកម្ពុជាប្រចាំប្រទេសចិន តាមរយៈសារអេឡិចត្រនិច(Gmail)បានទេ ។
យោងតាមរបាយការណ៍ដែលខេមបូចាទទួលបានពីមន្រ្តីសមាគមអាដហុក ឱ្យដឹងថា ក្នុងឆ្នាំ២០២១ ការជួញដូរផ្លូវភេទទៅកាន់ប្រទេសចិនមានចំនួន ៥២ករណី ក្នុងនោះខេត្តក្រចេះមានចំនួន៥ករណី។ ចំណែកក្នុងឆ្នាំ២០២២ គិតត្រឹមខែតុលា ឆ្នាំ២០២២នេះ មានចំនួន៣៩ករណី ក្នុងនោះខេត្តក្រចេះមានចំនួន៨ករណី។
ដោយឡែក ៨ករណីកើតឡើងក្នុងខេត្តក្រចេះនេះ ក្នុងនោះមាន៤ករណីដែលអាដហុកបានជួយមកជួបជុំគ្រួសារ នៅសល់៤កណីទៀតដែលមិនទាន់បានមកវិញ ដោយសារស្រ្តីរងគ្រោះនៅឆ្ងាយបណ្ដាលឱ្យពិបាកក្នុងការទាក់ទងជាមួយកុងស៊ុលខ្មែរនៅចិន។ យ៉ាងណាមន្រ្តីអាដហុកថា នៅតែបន្តការតាមដានជួយពួកគេឱ្យបានមកជួបជុំគ្រួសារវិញ៕