សមាគមសម្ព័ន្ធអ្នកសារព័ត៌មានកម្ពុជា

NGO ស្នើឲ្យឪពុកម្ដាយជំរុញឲ្យកូនៗហ៊ាននិយាយពីការរំលោភបំពាន និងកេងប្រវ័ញ្ចផ្លូវភេទតាមអនឡាញ

អ្នកចូលរួមកម្មវិធីកំពុងទស្សនាការសម្ដែងរបស់ក្មេងស្រីៗដើម្បីស្វែងរកការគាំទ្រពេលប្រឈមមុខនឹងការកេងប្រវ័ញ្ចផ្លូវភេទកុមារលើអនឡាញ។ (រូបភាព៖ ផ្ដល់ឲ្យ)
អ្នកចូលរួមកម្មវិធីកំពុងទស្សនាការសម្ដែងរបស់ក្មេងស្រីៗដើម្បីស្វែងរកការគាំទ្រពេលប្រឈមមុខនឹងការកេងប្រវ័ញ្ចផ្លូវភេទកុមារលើអនឡាញ។ (រូបភាព៖ ផ្ដល់ឲ្យ)

អង្គការដែនដីមនុស្ស- ហូឡង់ប្រចាំកម្ពុជា (TdH NL) បាន​ឲ្យ​ដឹង​ថា​ឪពុក​ម្ដាយ​ដើរតួយ៉ាង​សំខាន់​ក្នុង​ការ​ការពារ​កូនៗ​ពី​ការ​រំលោភបំពាន​តាម​ប្រព័ន្ធ​អនឡាញ​។ អង្គការ​ក៏​បាន​ធ្វើ​យុទ្ធនាការ​មួយ​ដែរ​កាល​ពី​ឆ្នាំ​មុន​ដើម្បី​ពង្រឹង​ការ​យល់​​ដឹង​អំពី​សុវត្ថិភាព​លើ​ប្រព័ន្ធ​អនឡាញ​។ អង្គការ​ក្រៅ​រដ្ឋាភិបាល​មួយ​នេះ​ក៏បាន​ជំរុញ​ឲ្យ​ឪពុក​ម្ដាយ​យក​ចិត្ត​ទុក​ដាក់​លើ​កូនៗ​ឲ្យ​បាន​ច្រើន​ចំពោះ​សកម្មភាព​លើ​អនឡាញ​របស់​ពួកគេ ព្រម​ទាំង​ជជែក​អំពី​បញ្ហា​សុវត្ថិភាព និង​ជំរុញ​កូនៗ​ឲ្យ​ស្វែង​រក​ជំនួយ​បើ​បានជួប​ការ​បំពាន​តាម​អនឡាញ​ណា​មួយ​។​

លោកស្រីZoe De Melo ប្រធានគម្រោងការពារកុមារពីការរំលោភបំពានតាមប្រព័ន្ធអនឡាញ នៃអង្គការ ដែនដីមនុស្ស- ហូឡង់ (Terre des Hommes Netherlands) ប្រចាំកម្ពុជាមានប្រសាសន៍ថា​យុទ្ធនាការ​មាន​គោល​បំណង​​លើក​កម្ពស់​ការ​យល់​ដឹង​ទាក់​ទង​នឹង​ហានិភ័យ​លើ​កុមារ ឥរិយាបថ​ប្រកប​ដោយ​សុវត្ថិភាព​លើ​ប្រព័ន្ធ​អនឡាញ  ខណៈ​ដែល​មាន​ការ​ជំរុញ​ឲ្យ​មាន​ការ​ជជែក​ពី​សុវត្ថិ​ភាព​លើ​អនឡាញ​។​

យុទ្ធនាការនេះ​ក៏​មាន​គោល​បំណង​កសាង​ទំនាក់​ទំនង​ជា​វិជ្ជមាន​រវាង​ឪពុក​ម្ដាយ និង​កូនៗ ដែល​អាច​អនុញ្ញាត​ឲ្យ​មាន​ការ​ជជែក​ដោយ​ចំហ​អំពី​ការរំលោភបំពានតាមប្រព័ន្ធអនឡាញលើ​កុមារ។​

យុទ្ធនាការ​របស់​អង្គការ ដែនដីមនុស្ស- ហូឡង់ប្រចាំកម្ពុជា បាន​ចាប់​ដៃគូ​ជាមួយ​​អង្គការសេរីភាពកម្ពុជា- អូស្រ្តាលី (AusCam Freedom Project) ដែល​ជា​អង្គការ​ធ្វើ​ការ​លើ​សិទ្ធិ​ស្រ្តី និង​​ការ​ប្រឆាំង​ការជួញ​ដូរ​មនុស្ស ដែល​ផ្ដោត​លើ​ក្រុម​គោល​ដៅ​ជា​អនីតិជន​មាន​អាយុ​១២​ទៅ​១៧​ឆ្នាំ និង​ឪពុក​ម្ដាយ ឬ​អាណាព្យាបាល​។​

ឆ្លើយ​សំណួរ​ខេមបូចា​តាម​រយៈ​អ៊ីម៉ែល លោកស្រី Zoe De Melo បាន​ផ្ដល់​ជា​អនុសាសន៍​ដល់​ឪពុក​ម្ដាយ​ដែល​មាន​ចំណេះដឹង​ខាង​បច្ចេក​វិទ្យាថ្មីៗ ជជែក​ដោយ​ចំហ​ជាមួយ​កូនៗ​ពី​ផល​វិជ្ជមាន និង​អវិជ្ជមាន​របស់​ប្រព័ន្ធ​អនឡាញ​។​ បើ​សិន​ជា​​មាន​ការគាំទ្រពីឪពុក​ម្ដាយ កូនៗ​នឹង​ហ៊ាន​និយាយ​មុន​ពេល​មាន​ការ​រំលោភ​បំពាន​ណា​មួយ​កើត​ឡើង​ ហើយ​ក៏​អាច​នឹង​រាយការណ៍​ទៅ​ភាគី​ពាក់ព័ន្ធ​​ពី​រឿង​នេះ​បាន​ទៀត​ផង​។​

ជា​ធម្ម​តា ក្មេង​ស្រី​មួយ​ចំនួន​អាច​មាន​អារម្មណ៍​កណ្ដោចកណ្ដែង និង​តប់​ប្រមល់ ហើយ​ក៏​ចាប់​ផ្ដើមស្វែង​រក​មិត្ត​តាម​ប្រព័ន្ធ​អនឡាញ ឬ​រក​មិត្ត​ប្រុស ប៉ុន្តែ​ការ​ទទួល​យក​មិត្ត​តាម​ប្រព័ន្ធ​អនឡាញ​ដោយ​ចៃ​ដន្យ​បែបនេះ​អាច​នាំ​ឲ្យ​មាន​ការ​រំលោភបំពាន​ណា​មួយ​កើត​ឡើង ដែ​ល​នេះ​ជា​ករណី​ទូទៅ​ដែល​លោក​ស្រី​បាន​ជួប​ប្រទះ​ពេល​បំពេញ​ការងារ​​។​

លោក​ស្រី​សរសេរ​បន្ថែម​ថា៖ «​បច្ចុប្បន្ន​ ទោះបី​ជា​រូបភាព​ធម្មតា ក៏​ត្រូវ​ជន​ខិល​ខូច​អាច​យក​ទៅ​បង្កើត​ជា​រូបភាព​មិន​សមរម្យបាន​ដែរ ដោយ​ប្រើ​បច្ចេក​វិទ្យា​បញ្ញា​សិប្បនិម្មិត ឬ​​AI»។​

កម្មវិធី​រាំជាក្រុម ឬ​ Flash mob ត្រូវ​បាន​រៀប​ចំឡើង​នៅ​ចុង​បញ្ចប់​នៃយុទ្ធនាការ​ ថ្ងៃទី១១ ខែតុលា ឆ្នាំ២០២៣ ក្នុង​​ឱកាសទិវាកុមារីអន្តរជាតិ និង​បាន​ផ្សាយ​លើ​ទំព័រ​ហ្វេ​សប៊ុក​របស់​អង្គការសេរីភាពកម្ពុជា- អូស្រ្តាលី កាលពី​ពីរ​បី​ខែមុន។ កម្មវិធី​ Flash mob គឺ​ជាគំ​និត​ច្នៃ​ប្រឌិត​មួយ​របស់​​ក្រុម​ការងារ​ដើម្បី​បង្ហាញ​ពី​ការតាំងចិត្ត និង​ការ​ខិត​ខំ​ផ្សព្វ​ផ្សាយ​សារ​តាម​ប្រព័ន្ធ​អនឡាញ​អំពី​សុវត្ថិ​ភាព​លើ​ប្រព័ន្ធ​អនឡាញ​។​

លោក​ស្រី De Melo សរសេរទៀត​ថា៖ «​​នៅ​មាន​យុទ្ធ​ការ​​ជា​ច្រើន​ទៀត​ដែល​នឹង​ត្រូវ​រៀប​ចំ​នៅ​ក្នុង​ឆ្នាំ​២០២៤ ជាក់​ស្ដែង​យើង​នឹង​រៀប​ចំ​​​យុទ្ធនាការ​ក្នុង​ទិវា​សុវត្ថិភាព​អនឡាញ​នៅ​ក្នុង​ខែ​កុម្ភៈ នេះ»។​

​ការ​កេង​ប្រវ័ញ្ច​តាម​ប្រព័ន្ធ​អនឡាញ ជា​ទម្រង់​មួយ​នៃ​​អំពើ​ហិង្សា​ផ្លូវភេទ​ដែល​ជាប់​ពាក់​ព័ន្ធ​នឹង​ប្រព័ន្ធ​អនឡាញ​ ហើយ​ក្មេង​ស្រី​ជា​ជន​រង​គ្រោះ​ចម្បង​គេ​ក្នុង​ទម្រង់​នៃ​អំពើ​ហិង្សា​មួយ​នេះ​។ អង្គការ ដែនដីមនុស្ស- ហូឡង់ប្រចាំកម្ពុជា បាន​ចាប់​ផ្ដើម​ធ្វើ​ការ​លើ​បញ្ហា​នេះ​តាំង​ពី​ឆ្នាំ​២០១៧ ដោយ​ផ្ដោត​សំខាន់​​លើ​ទម្លាប់​ដែល​ក្មេង​ស្រី​មិន​សូវ​មាន​សិទ្ធិ​និយាយ​ស្ដី​ ​ហើយ​ជា​លទ្ធផល​​​ធ្វើ​ឲ្យ​ក្មេង​ស្រី​ក្លាយ​ជា​ជន​រងគ្រោះ​ និង​រង​ការ​ស្ដីបន្ទោស​​។​

ក្មេង​ស្រី​ក្លាយ​ជា​ជន​​រងគ្រោះ​​បន្ទាប់​ពី​ត្រូវ​គេ​បោក​បញ្ឆោត បង្ខិត​បង្ខំ ឬ​​​គំរាម​ឲ្យ​ចែក​រំលែក​រូប​ភាព​​អាក្រាត​កាយ ឬ​​ក៏​មាន​ការ​រៀប​ចំ​ឲ្យ​ជួប​មនុស្ស​ប្លែក​មុខ​នៅ​កន្លែង​ណា​មួយ ហើយ​​ក្មេង​ស្រី​ក៏​ត្រូវ​គេ​បំពាន​ផ្លួវ​ភេទ ឬ​ត្រូវ​រំលោភ​សេពសន្ថវៈ ជា​ដើម​។​

​លោក​ស្រី De Melo សរសេរ​បន្ថែម​ទៀត​ថា៖ «ទោះ​បី​ជា​មានការ​ពិបាក​ក្នុង​ការ​ផ្ដល់​តួលេខ​​ជាក់​លាក់​សម្រាប់​កម្ពុជា យើង​ក៏​អាច​ដឹង​បាន​ថា​៩៦​ភាគរយ​នៃ​​ការ​សំលោភ​បំពាន​លើ​កុមារ​​តាម   ​រយៈ​ មធ្យោបាយ​ផ្សេងៗ​ដូច​ជា​តាម​រូបភាព ឬ វីដេអូ គឺ​កើត​លើ​ក្មេង​ស្រី​ភាគ​ច្រើន ហើយ​ការ​រំលោភ​បំពាន​តាម​រូបភាព​បែបនេះ​កើន​ឡើង​ជា​រៀង​រាល់​ឆ្នាំ»។​​

បើ​តាម​ការ​សិក្សា​រួម​គ្នាមួយ​ដែល​មាន​ចំណង​ជើង​ថា «ការបញ្ឈប់គ្រោះថ្នាក់នៅក្នុងប្រទេសកម្ពុជា» ធ្វើ​ឡើង​ដោយ​អង្គការ​យូនីសេហ្វ និង​អង្គការ​អន្តរជាតិពីរ​ផ្សេង​ទៀត បាន​រក​ឃើញ​ថា ​កុមារ​ដែល​រង​ការ​រំលោភ​បំពាន​ និង​ការកេង​ប្រវ័ញ្ចតាម​អន​ឡាញ​​នៅ​មាន​​មួយ​ចំនួន​មិន​ទាន់​បង្ហាញ​មុខ​។​

ក្មេង​ស្រី​ម្នាក់​កំពុង​មើល​ទូសព្ទ​របស់​ខ្លួន​នៅ​តាម​ដង​ផ្លូវ​ក្នុង​ទីក្រុង​ភ្នំពេញ​កាលពី​ថ្ងៃទី​១ ខែកុម្ភៈ ឆ្នាំ​២០២៤។ (ខេមបូចា/ ព្រីង សំរាំង)

កុមារ​​ច្រើន​មាន​ភាព​ស្ទាក់​ស្ទើរ​ក្នុង​ការ​ទម្លាយ​ពី​បញ្ហា​ដែល​បានជួប​ប្រទះ ដោយ​ពួកគេ​មាន​អារម្មណ៍​ភ័យ​ខ្លាច ខ្មាសអៀន និង​មិន​ស្រួល​ចិត្ត​ពេល​និយាយ​ដោយ​ចំហ​អំពី​រឿង​រួម​ភេទ និង​សុខភាព​ផ្លូវ​ភេទ​ ពិសេស​ពេល​រង​ការ​បៀតបៀន​ពីសមាជិក​គ្រួសារ​ណា​មួយ​។ ក្នុង​ករណី​នេះ មាន​កុមារ​រហូត​ដល់​២៣​ភាគ​រយ​ដែលជ្រើស​រើស​មិន​ជូន​ដំណឹង​ទៅ​អ្នក​ដទៃពី​​អ្វី​ដែល​បាន​កើត​ឡើង​ទាក់​ទង​នឹង​រឿង​ផ្លូវ​ភេទ​។​

កញ្ញា ផល ឧស្សាហ៍ វ័យ​២៥​ឆ្នាំ ជា​អ្នករស់នៅក្រុង​ភ្នំពេញ បាន​ប្រាប់​ខេមបូចា​ថាឪពុក​ម្ដាយ​របស់​កញ្ញា មិន​សូវ​មាន​ចំណេះ​ដឹង​អំពី​ការ​ប្រើ​ប្រាស់​បណ្ដាញ​សង្គម​នោះទេ។ ដូច​នេះ កញ្ញា ជា​អ្នក​តាម​ដាន​សកម្មភាព​លើ​អនឡាញ​របស់​ប្អូន​ស្រី ដែល​បច្ចុប្បន្ន​មាន​វ័យ​២០​ឆ្នាំ។​

កញ្ញា ឧស្សាហ៍ បន្ថែម​ថា កញ្ញា​តែង​តែ​តាម​ដាន​ផ្លូវ​ចិត្ត​ប្អូន​ស្រី និង​ផ្ដល់​ជា​ដំបូន្មាន​ដល់​ប្អូន​ស្រី​ឲ្យ​មាន​ការ​ប្រុង​ប្រយ័ត្ន​ចំពោះ​ការ​ប្រើ​ប្រាស់​បណ្ដាញ​សង្គម​ដូ​ចជា​ហ្វេសប៊ុក Instagram និង​Tik Tok ​ជា​ដើម​។​

​កញ្ញា​ឲ្យ​ដឹង​ថា៖ «​ឪពុក​ម្ដាយ​ខ្ញុំ​មាន​វ័យ​ចំណាស់​ហើយ។ ពួក​គាត់​រវល់តែ​រក​ស៊ី​។ ប៉ុន្តែ​ខ្ញុំ​ជា​កូន​ស្រី​ច្បង ដូច​នេះ ខ្ញុំ​ត្រូវ​តែ​​មើល​ថែ​ប្អូន​ស្រី និង​ឲ្យ​ដំបូន្មានដល់​នាង​ពី​របៀប​ដែល​គួរ​ប្រើ​បណ្ដាញ​សង្គម​»។

​កញ្ញា​បន្ត​ថា៖ «​ខ្ញុំ​បារម្ភ​អំពី​សុវត្ថិភាព​របស់​នាង ពីព្រោះ​នាង​នៅ​ក្មេង ហើយ​នាង​ក៏​កំពុង​ប្រើ​បណ្ដាញ​សង្គម​ច្រើន​ប្រភេទ​ផង។ ដូច​នេះ​ខ្ញុំ​បារម្ភ​ថា​វាអាច​មាន​ការ​បំពាន​ផ្លូវ​ភេទ​»។​

ជាសិស្ស​វ័យ​១៨​ឆ្នាំ និង​ជា​អ្នក​ភ្នំពេញ​ផង ហេង សុគន្ធា ឲ្យ​ដឹង​ដែរថា​ឪពុក​ម្ដាយ​របស់​ខ្លួន​​​ជា​បុគ្គល​សំខាន់​ក្នុង​ការ​ផ្ដល់​ប្រឹក្សា​ និង​ជួយ​​ដោះស្រាយ​បញ្ហា​ផ្សេងៗ​។​

យុវសិស្ស​រូបនេះ​បន្ត​ថា៖ «​ប៉ា​ម៉ាក់​ពិត​ជា​សំខាន់​ណាស់ ពីព្រោះ​ពួកគាត់​មើល​ថែ​ពួក​យើង ដូច​នេះ​ខ្ញុំ​គិត​ថា​ពេល​យើងជួប​បញ្ហា​ទាំង​នោះ ប៉ាម៉ាក់​របស់​យើង​ជា​អ្នក​ជួយ»។

សុគន្ធា ឲ្យ​ដឹង​ទៀត​ថា​ម្នាក់ៗ​ប្រើ​ប្រាស់​អ៊ីនធឺណិត​ក្នុង​គោល​បំណង​ផ្សេងៗ​គ្នា ដែល​មាន​ទាំង​គុណ​ប្រយោជន៍ និង​គុណវិបត្តិ អាស្រ័យ​លើ​ការ​ប្រើ​ប្រាស់​របស់​មនុស្ស​ម្នាក់ៗ។ សម្រាប់​អ្នក​ដែល​មិន​បាន​ដឹង​ពី​សុវត្ថិភាព​អនឡាញ ពួកគេ​អាច​នឹង​ធ្លាក់​ក្នុង​ការ​គេង​ប្រវ័ញ្ច​តាម​អនឡាញ ជា​ពិសេស​គឺ​ក្មេង​ស្រី​។​

សុគន្ធា បន្ថែម​ថា៖ «ខ្ញុំ​គិត​ថា​ជន​រង​គ្រោះ​អាច​ជា​ក្មេង​ស្រី ឬក្មេង​ប្រុស បើ​ទោះ​បីជា​ក្មេង​ស្រី​ងាយ​រង​គ្រោះ​ជាង​ក្មេង​ប្រុស​ក្ដី។ ខ្ញុំ​មិនដឹង​​ពី​វិធី​ការពារ​ខ្លួន​ពី​ការ​រំលោភបំពាន​តាម​អនឡាញ​ទេ​កាល​ពី​មុន​មក​ ហើយ​វា​ពិត​ជា​គួរ​ឲ្យ​បារម្ភក្នុង​ការ​ប្រើ​ប្រាស់​អ៊ីនធឺណិត ប៉ុន្តែ​ពេល​នេះ​ខ្ញុំ​បាន​ដឹង​ពី​វិធី​ការពារ​ខ្លួន​ហើយ»។​

ពេល​បាន​ដឹង​ពី​របៀប​ការពារ​ខ្លួនពី​ការ​រំលោភបំពាន​តាម​អនឡាញ​ហើយ យុវសិស្ស​រូប​នេះ​ក៏​ចង់​ឃើញ​​​យុវវ័យ​ផ្សេង​ទៀត​រៀន​សូត្រ​ពីរឿង​នេះ​ឲ្យ​បាន​ច្រើន ដើម្បី​ការពារ​ខ្លួន​ពី​គ្រប់​ទម្រង់​នៃ​ការ​កេង​ប្រវ័ញ្ច​។ យុវត្តី​​រូបនេះ ក៏ជំរុញ​ឲ្យ​អ្នក​ដែ​ល​កំពុង​ប្រឈម​បញ្ហា​បែបនេះ ចែក​រំលែក​បញ្ហា​របស់​ខ្លួន​ទៅ​កាន់​ឪពុក​ម្ដាយ និង​ស្វែង​រក​ជំនួយ​ពី​ស្ថាប័ន​ពាក់​ព័ន្ធ​។​

យុវតី សុគន្ធា បន្ត​ថា៖ «​ខ្ញុំ​គិត​ថា​យើង​គួរ​ប្រាប់​បញ្ហា​របស់​យើង​ទៅ​ឪពុក​ម្ដាយ ពីព្រោះ​ពួក​គាត់​ជា​មនុស្ស​មាន​ហេតុ​ផល និង​ចេះ​ដឹង​ច្រើន»។​

​ក្រៅពី​នេះ យុវតី​រូប​នេះ​ក៏​សង្ឃឹម​ថា​អង្គការ​មិន​មែន​រដ្ឋាភិបាល និង​រដ្ឋាភិបាល​បន្ត​បង្កើន​ការ​យល់​ដឹង​អំពី​បញ្ហា​នេះ​ឲ្យ​កាន់តែ​ទូលំទូលាយ។ សុគន្ធា ថា៖ «ខ្ញុំ​ចង់​ឲ្យ​ពួកគាត់​បន្ត​កិច្ច​ខិត​ខំ​បន្ថែមទៀត ដើម្បី​លើក​កម្ពស់​ការ​យល់​ដឹង​​លើហានិភ័យ​ការ​រំលោភបំពាន​ផ្លូវ​ភេទ​លើ​កុមារ​តាម​អនឡាញ​»​។

​បច្ចុប្បន្ន​នេះ រដ្ឋាភិបាល​កំពុង​រៀបចំ​ធ្វើ​សេចក្ដីព្រាង​ច្បាប់​ស្ដី​ពី​ការ​គាំពារ​កុមារ ដោយ​ក្នុង​នោះ​មាន​មាត្រា​ជាច្រើន​សង្កត់​ធ្ងន់​លើ​ការ​រំលោភ​បំពាន​កុមារ​តាម​ប្រព័ន្ធអនឡាញ។ លោកស្រី De Melo សង្ឃឹម​ថា​ច្បាប់​នេះ​នឹង​អាច​ដាក់​ចេញ​ឲ្យ​អនុវត្ត​បាន​ឆាប់​ដើម្បី​ការពារ​កុមារ​កម្ពុជា​។​

ក្នុង​ឆ្នាំ​២០២១ រដ្ឋាភិបាល​បាន​បញ្ជាក់​ជា​ថ្មី​ពី​​ការ​ប្ដេជ្ញាចិត្ត​របស់​ខ្លួន​ក្នុង​ការ​ឈាន​ទៅ​បញ្ចប់​អំពើ​ហិង្សា​លើ​កុមារ​នៅ​ឆ្នាំ​២០៣០​។​

លោក តូច ចាន់​នី អ្នក​នាំពាក្យ​ក្រសួងសង្គមកិច្ច អតីត​យុទ្ធជន និងយុវនីតិសម្បទា បាន​ប្រាប់​ខេមបូចា​ថា ក្រៅពី​ការ​ធ្វើ​សេចក្ដី​ព្រាង​ច្បាប់​ស្ដី​ពី​ការ​គាំពារ​កុមារ ក្រ​សួង​ក៏​បាន​សហការ​ជាមួយ​ក្រសួង​កិច្ច​ការនារី និង​អង្គការ​សង្គម​ស៊ីវិល​ផ្សេង​ទៀត​ធ្វើ​ការ​លើ​ការ​រំលោភបំពាន​ផ្លូវ​ភេទ​កុមារ​លើ​អនឡាញ​ផង​ដែរ។​

​លោក​ថា​ឪពុក​ម្ដាយ ក៏​ដូច​ជា​សហគមន៍ គឺ​​ត្រូវ​បាន​លើក​ទឹក​ចិត្ត​ឲ្យ​ចំណាយ​ពេល​ស្វែង​យល់​ពី​បញ្ហា​នេះ ដោយថា​វា​មិន​មែន​ជា​ការ​ទទួល​ខុស​ត្រូវ​របស់​រដ្ឋាភិបាល​តែ​ឯង​នោះ​ទេ​។​

​យ៉ាងណា លោក ចាន់នី នៅ​មិន​ទាន់​ច្បាស់​ទេ​ថា​សេចក្ដីព្រាង​ច្បាប់​នេះ​អាច​នឹង​បញ្ចប់​នៅ​ពេល​ណា​នោះ ហើយ​លោក​ថា​សង្គម​ទាំង​មូល​ដើរតួ​យ៉ាង​សំខាន់​ក្នុង​ការ​ការពារ​ការ​កេង​ប្រវ័ញ្ច​ផ្លូវ​ភេទកុមារ​តាម​អនឡាញ​។​

ដូច​គ្នា​ដែរ កាល​ពី​ឆ្នាំ​២០២២ កា​រសិក្សា​របស់​អង្គការ​យូនីសេហ្វ ដែល​បាន​ត្រួតពិនិត្យ​ដោយ​ក្រុម​ប្រឹក្សា​ជាតិ​កម្ពុជាដើម្បី​​កុមារ​របស់​ក្រ​សួង​សង្គម​កិច្ច ក៏​បាន​រក​ឃើញ​ពី​បញ្ហា​ប្រឈម​របស់​កុមារ​ដែល​មិន​ដឹង​ថា​ត្រូវ​ទៅណា ឬ​រក​អ្នក​ណា​ជួយ​ពេល​ពួក​គេ​ជួប​បញ្ហា​កេង​ប្រវ័ញ្ច ឬ​បៀត​បៀន​តាម​អន​ឡាញ​។​

បន្ថែម​ពី​នេះ ការ​សិក្សា​បញ្ជាក់​ថា​កុមារ​ម្នាក់​ក្នុង​ចំណោម​១០​នាក់​បាន​រងគ្រោះ​ពី​ការ​កេង​ប្រវ័ញ្ច​នេះ ក្នុងនោះក្មេង​ស្រី​រង​គ្រោះ​ច្រើន​ជាង​ក្មេង​ប្រុស​។​

ការ​សិក្សា​ក៏​បង្ហាញ​ដែរថា​១១​ភាគរយ​នៃ​អនីតិជន ដែល​បាន​ប្រើ​ប្រាស់​អ៊ីនធឺណិត បាន​រាយ​ការណ៍​ថា​ធ្លាប់​ជួប​មាតិ​កា​មិនសមរម្យ​នៅ​លើ​អនឡាញ​ពាក់​ព័ន្ធ​នឹង​ការ​បៀត​បៀន និង​កេង​ប្រវ័ញ្ច​ផ្លូវ​ភេទ​​ក្នុង​ឆ្នាំ​២០១៩​។​

​ពេល​គណនា​តួលេខផ្អែក​លើ​​ក្រុម​អាយុ​​ទៅ​នឹង​ចំនួន​ប្រជា​ជន​សរុប​របស់​កម្ពុជា បាន​បង្ហាញ​ថា​ក្មេងៗ​ប្រហែល​១៦០ ០០០​នាក់​បាន​រង​នូវ​អំពើ​បៀត​បៀន និង​កេង​ប្រវ័ញ្ច​ផ្លូវ​ភេទ​តាម​អនឡាញ​។​

លោកស្រី ប៊ូ សោភណ្ឌ អគ្គលេខា​នៃ​ក្រុមប្រឹក្សាជាតិកម្ពុជាដើម្បីកុមារ មិន​អាច​ទាក់​ទង​សុំ​ការ​អត្ថាធិប្បាយ​បានទេ​៕

ប្រែសម្រួលពីអត្ថបទភាសាអង់គ្លេស៖​ NGO Asks Parents To Encourage Children To Talk About Online Sexual Abuse, Exploitation

202 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម