សាលាដំបូងរាជធានីភ្នំពេញ នៅថ្ងៃទី១៦ ខែកក្កដា បានសម្រេចផ្តន្ទាទោសប្រជាសហគមន៍សំរោងត្បូងចំនួនប្រាំបួននាក់នៅតំបន់បឹងតាមោកឱ្យជាប់ពន្ធនាគារចំនួនមួយខែ ពាក់ព័ន្ធនឹងបទប្រឆាំងនឹងមន្ត្រីរាជការសាធារណៈ ដោយសារការតវ៉ារឿងជីកប្រឡាយកាលពីខែកុម្ភៈឆ្នាំមុន។
ប្រជាសហគមន៍សំរោងត្បូងដែលបានទៅចូលរួមស្តាប់សាលក្រមនៅរសៀលថ្ងៃទី១៦ ខែកក្កដានេះ បានលើកឡើងបន្ទាប់ពីចៅក្រមប្រកាសសាលក្រមថា តុលាការសម្រេចផ្តន្ទាទោសពួកគាត់រយៈពេលមួយខែ ប៉ុន្តែចៅក្រមមិនបញ្ជាក់ថា តើទោសមួយខែនេះព្យួរ ឬក៏អត់ទេ? ដូច្នេះពួកគាត់មិនច្បាស់លាស់ជាមួយនឹងសាលក្រមនេះទេ។ ពួកគាត់បានបន្តថា ពួកគាត់សោកស្តាយដែលតុលាការបានសម្រេចឱ្យពួកគាត់មានទោស ហើយពួកគាត់បន្ថែមថា វាអយុត្តិធម៌ណាស់សម្រាប់ពួកគាត់។
នៅថ្ងៃទី២៦ ខែមិថុនា ប្រជាសហគមន៍សំរោងត្បូងចំនួនប្រាំបួននាក់នៅតំបន់បឹងតាមោកបានចូលខ្លួនទៅតុលាការ ដើម្បីចូលរួមសវនាការលើកទី៧ របស់ពួកគេដើម្បីទប់ទល់នឹងការចោទប្រកាន់ពីបទព្រហ្មទណ្ឌ បន្ទាប់ពីការតវ៉ារឿងជីកប្រឡាយកាលពីខែកុម្ភៈឆ្នាំមុន។ ពួកគេបានបដិសេធចំពោះការប្រើអំពើហិង្សា។
អ្នកភូមិចំនួន៨នាក់ដែលចូលរួមក្នុងសវនាការកន្លងមក រួមមាន អ្នកស្រី ទឹម អ៊ុក និងប្តីរបស់គាត់ឈ្មោះ ស៊ា សម្បត្តិ, អ្នកស្រី ស៊ា ដាវី, អ្នកស្រី គង់ តឿ, អ្នកស្រី អំ ភឿន, អ្នកស្រី អំ យ៉ុក និងអ្នកស្រី យ៉ុង ស្រីណុច ត្រូវបានចោទប្រកាន់ពីបទ«ប្រឆាំងនឹងមន្ត្រីរាជការសាធារណៈ» ដោយមាន យន សំបូរ ជាសាក្សី។
កាលពីខែកុម្ភៈ ឆ្នាំ២០២៥ អ្នកភូមិត្រូវបានផាកពិន័យចំនួនប្រាំលានរៀល ដែលពួកគេបានបង់ ហើយត្រូវបានកាត់ទោសឱ្យជាប់ពន្ធនាគាររយៈពេលប្រាំបីខែ (ប៉ុន្តែទោសត្រូវបានព្យួរ) ពីបទប្រើប្រាស់អំពើហិង្សាលើមន្ត្រីសាធារណៈ។
គួរបញ្ជាក់ថា ប្រជាសហគមន៍សំរោងត្បូងប្រាំបួននាក់នៅតំបន់បឹងតាមោកដែលមានពាក់ព័ន្ធនឹងវិវាទដីធ្លី បានទទួលយកសំណងដើម្បីផ្លាស់ទីពីដីរបស់ពួកគេរួចហើយ៕
