សមាគមសម្ព័ន្ធអ្នកសារព័ត៌មានកម្ពុជា

លោក ហ៊ុន ម៉ាណែត លើកឡើងថា នឹងដំឡើងប្រាក់ឈ្នួលនៅឆ្នាំក្រោយសម្រាប់វិស័យឧស្សាហកម្មកាត់ដេរ វាយនភ័ណ្ឌ និងផលិតស្បែកជើង

លោកនាយករដ្ឋមន្ត្រី ហ៊ុន ម៉ាណែត ថតរូបជាមួយកម្មករកាត់ដេរ ពេលជួប កម្មករជិត២ម៉ឺននាក់ នៅខណ្ឌពោធិ៍សែនជ័យ រាជធានីភ្នំពេញ នៅថ្ងៃទី២៩ ខែសីហា ឆ្នាំ២០២៣។ (ហ្វេសប៊ុករបស់លោកនាយករដ្ឋមន្ត្រី ហ៊ុន ម៉ាណែត)
លោកនាយករដ្ឋមន្ត្រី ហ៊ុន ម៉ាណែត ថតរូបជាមួយកម្មករកាត់ដេរ ពេលជួប កម្មករជិត២ម៉ឺននាក់ នៅខណ្ឌពោធិ៍សែនជ័យ រាជធានីភ្នំពេញ នៅថ្ងៃទី២៩ ខែសីហា ឆ្នាំ២០២៣។ (ហ្វេសប៊ុករបស់លោកនាយករដ្ឋមន្ត្រី ហ៊ុន ម៉ាណែត)

លោក ហ៊ុន ម៉ាណែត នាយករដ្ឋមន្ត្រីថ្មី បានលើកឡើងថា នឹងដំឡើងប្រាក់ឈ្នួលអប្បបរ​​មា​លើប្រាក់ខែបច្ចុប្បន្ន​២០០ដុល្លារក្នុង​មួយខែ​ សម្រាប់វិស័យកាត់ដេរ វាយនភណ្ឌ និងផលិត​​​ស្បែក​ជើងនៅឆ្នាំក្រោយ ក្នុងឱកាសជួបសំណេះសំណាលជាមួយកម្មករ​ជិត​២ម៉ឺននាក់ នៅ​ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃអង្គារ។

លោក ហ៊ុន ម៉ាណែត បានថ្លែងទៅកាន់កម្មករថា៖ «បងប្អូន​គិតថា វាមិនគ្រប់គ្រាន់ទេ [២០០​ដុល្លារ]​។ នេះ​គឺ​ជាការ​ត្រឹមត្រូវ ហើយ​រដ្ឋាភិបាល​បាន​ទទួល​ស្គាល់​បញ្ហា​នេះ​ ​ជា​មូលហេតុ​​ដែល​យើង​ខិតខំ​បង្កើន​វា​ជា​បណ្តើរៗ ប៉ុន្តែ​យើង​ត្រូវតែ​ធ្វើយ៉ាងណាជាជំហាន ដើម្បី​ធានា​ដល់​ការ​ប្រកួតប្រជែង និងរក្សា​កំណើន​របស់​យើង​»

លោក​បាន​បន្ថែម​ថា៖ «តិចឬច្រើន ប្រាក់​ឈ្នួល​អប្បបរមា​ត្រូវ​តែ​ដំឡើង​»

កាលពីដើមខែនេះ ក្រុមប្រឹក្សាជាតិ​ប្រាក់ឈ្នួលអប្បបរមារបស់ក្រសួងការងារបាន​ចាប់ផ្តើម​ពិភាក្សាជាមួយតំណាងសហជីព និងតំណាង​និយោជក ដោយកិច្ចប្រ​ជុំគ្រោងនឹងដំណើរ​ការ​រហូត​ដល់​ខែតុលា។

កម្មករកាត់ដេរ និងមេដឹកនាំសហជីពបានអំពាវនាវជាយូរមកហើយឱ្យដំឡើងប្រាក់​ឈ្នួល​របស់​ពួកគេ ហើយបាននិយាយថា ពួកគេចង់បានការ​ដំឡើង​យ៉ាងហោចណាស់២០ដុល្លារ ដើម្បី​ទប់​ទល់​នឹង​អតិផរណា។

លោក អាត់ ធន់ ប្រធាន​សហភាព​ការងារ​កម្ពុជាបានមានប្រសាសន៍​ថា៖​ «យើង​បាន​​លើក​ឡើង​​ពី​បញ្ហា​ប្រឈម​មួយ​ចំនួន ​ដែល​កម្មករ​ជួប​ប្រទះ ដូចជា​អតិផរ​ណា ប្រាក់​ចំណូល​ទាប តម្លៃ​​ចំណាយ​លើ​ជីវភាព​ប្រចាំថ្ងៃ​​ ថ្លៃ​ទឹកនិងថ្លៃភ្លើង​ខ្ពស់​»

លោក​បាន​បន្ថែម​ថា៖​ «​វា​ជា​ដំណឹង​ល្អ​ ប្រសិន​បើ​ប្រាក់​ឈ្នួល​អប្បបរមា​នឹង​កើន​ឡើង​២០​ដុល្លារ ប៉ុន្តែ​ប្រសិន​បើ​មាន​ការ​ដំឡើង​បន្ថែម​ទៀត វា​កាន់​តែ​ល្អ​ប្រសើរ​សម្រាប់​កម្មករ»

លោក ណាង សុធី អនុប្រធានសហព័ន្ធនិយោជក និងសមាគម​ពាណិជ្ជ​កម្ពុជា ដែល​តំណាង​ឲ្យ​​និយោជកក្នុងកិច្ចចរចាដែល​កំពុង​បន្ត​របស់​ក្រុមប្រឹក្សាជាតិ​ប្រាក់ឈ្នួល​អប្បបរា​បាន​មាន​ប្រសាសន៍ថា៖ «និយោជកបានយល់ព្រមតាមសំណើរបស់ឯកឧត្តម [ហ៊ុន ម៉ាណែត]​តិច​ ឬច្រើនក្តីក្នុង​ការដំឡើងប្រាក់ឈ្នួលអប្បបរមា​នៅឆ្នាំ២០២៤»

លោកបានបន្ថែមថា៖ «និយោជករបស់យើងមើលមិនឃើញចំណុចវិជ្ជមានណាមួយ​​ដែល​ត្រូ​វ​ដំឡើង​ [ប្រាក់ឈ្នួលអប្បបរមា]ទេ ប៉ុន្តែយើងទទួលស្គាល់ការកើនឡើងនៃអតិផរណា​ដែល​កម្មករ​របស់យើងកំពុងប្រឈមមុខ។ ដូច​ដែល​យើង​បាន​​ឃើញ​រោងចក្រ​ខ្លះ​អត់​មាន​អ្នក​ណា​ម្នាក់​​ធ្វើ​ការ​ថែម​ម៉ោងទេ ជួន​កាល​ពួក​គេបាន​​ព្យួរ​ការ​ងារ​កម្មករ ​ដើម្បី​ឲ្យ​រោងចក្រ​មាន​លទ្ធភាព​បន្ត​ដង្ហើម​ [រស់]»

លោកបានចង្អុលបង្ហាញថា ទីផ្សារសកលកំពុងប្រឈមមុខនឹងវិបត្តិសេដ្ឋកិច្ចដ៏លំ​បាក រួម ទាំង​ការធ្លាក់ចុះនៃការបញ្ជាទិញពីអឺរ៉ុប និងសហរដ្ឋអាមេរិក និងការចំណាយលើថ្លៃដឹកជញ្ជូន​ខ្ពស់សម្រាប់ការនាំចេញផលិតផល។

លោក សុធី បានមាន​ប្រសាសន៍​ថា លោកមានការព្រួយបារម្ភអំពីការដំឡើងប្រាក់​ឈ្នួលនៅ​កម្ពុជា​ អំឡុងពេលដែលស្ថានភាព​សេដ្ឋកិច្ចមិន​នឹងន​ ដែលបានធ្វើឱ្យ​ការបញ្ជាទិញពី​យីហោ​អឺរ៉ុប និងសហរដ្ឋអាមេរិកធ្លាក់ចុះ ដែលឈាន​ទៅ​ដល់​​ការបិទរោងចក្រ។

លោក សុធី បានថ្លែងថា៖ «វានឹងពិបាកដែល​មានតម្លៃទីផ្សារប្រកួតប្រ​ជែង ពីព្រោះ​ប្រទេស​ផ្សេង​ទៀតដែលមានប្រាក់ឈ្នួលទាបជាងប្រទេសរបស់យើង ហើយការ​ដឹកជញ្ជូន​របស់​យើង​មានតម្លៃថ្លៃ ដូច្នេះយើងបារម្ភថា អ្នកវិនិយោគនឹងចាកចេញពីប្រទេសរបស់យើង»

លោក កាំង ម៉ូនីកា អគ្គលេខាធិការរងនៃសមាគមវាយនភណ្ឌ សម្លៀកបំពាក់ ផលិត​ស្បែក​ជើង និងសម្ភារធ្វើ​ដំណើរ​នៅកម្ពុជា (TAFTAC) បានបន្ទរពីកង្វល់ទាំងនេះ ដោយលើក​ហេតុ​ផល​ថា តម្លៃពលកម្មទាបនៅ​កម្ពុជា គឺជាការទាក់ទាញដ៏ធំបំផុតសម្រាប់វិនិយោគិន។

លោកបានបញ្ជាក់ថា៖ «តាម​ស្ថានភាព​សេដ្ឋកិច្ច ​មិន​អាច​ដំឡើងបាន​​ទេ។ ការពិភាក្សាបច្ចុប្បន្ន នៃការចរចាគួរតែស្ថិតនៅក្នុងបរិបទនៃរបៀបដែលវិស័យ​នេះ​​អាចងើបឡើងវិញនៅឆ្នាំ២០២៤ ដែលនាំការងារត្រឡប់មកវិញ និងម៉ោងធ្វើការពេញលេញ»

លោក​បាន​បន្ថែម​ថា ឧស្សាហកម្ម​នេះ​អាច​កាត់​បន្ថយ​ការ​ចំណាយ​លើ​​​ការ​ដឹក​ជញ្ជូន​ជាដើម។

លោក ម៉ូនីកា បានលើកឡើង​ថា លោកមិនរំពឹងថា ទស្សនវិស័យរបស់វិស័យ​នេះនឹងមាន​ភាពប្រសើរ​ឡើង​នៅឆ្នាំក្រោយទេ ដោយសារតែកំណើនសេដ្ឋកិច្ចពិភពលោកយឺត ហើយ​នៅតែមានអត្រាអតិផរណាខ្ពស់។

លោក ម៉ូនីកា បានបន្ថែមទៀត​ថា៖ «ប្រសិនបើការបញ្ជាទិញត្រឡប់មកវិញនៅឆ្នាំ២០២៤ យើងក៏ត្រូវដេញថ្លៃប្រជែងនឹងប្រទេសផ្សេងទៀតដែលស្រេកឃ្លានការបញ្ជាទិញផងដែរ» ដោយចង្អុលបង្ហាញថា ប្រាក់ឈ្នួលអប្បបរមានៅ​កម្ពុជាគឺខ្ពស់​ជាងប្រទេសមួយចំនួន​ដូចជា​បង់ក្លាដែស និងឥណ្ឌា។

លោក ជៀន ក្រឹម ដែលធ្វើការនៅរោងចក្រកាត់ដេរមួយ​នៅទីក្រុងភ្នំពេញបាននិយាយថា ប្រាក់បៀវត្សរ៍បច្ចុប្បន្នរបស់​លោក​​​«មិនគ្រប់គ្រាន់សម្រាប់គ្រួសាររបស់ខ្ញុំទេ» ជាពិសេសការ​ឡើងថ្លៃសាំង និងការសិក្សាកូនៗ​របស់​លោក​។ លោក​​រំ​ភើប​ចិត្ត​ពេល​បាន​ឮ​ការ​លើកឡើង​របស់​លោក ​ម៉ាណែត ​ក្នុង​ការ​ដំឡើង​ប្រាក់​ឈ្នួល​។

លោក ក្រឹម បាន​ឱ្យដឹង​ថា៖​ «វា​ជា​ដំណឹង​ល្អ​សម្រាប់​ពួក​យើង​ជា​កម្មករ​រោងចក្រ​ដែល​នេះ​អាច​ជួយ​កម្មករ​ទាំងអស់​ដែល​បានរង​ផល​ប៉ះពាល់​ ពីព្រោះ​​ប្រាក់​ខែ​បច្ចុប្បន្ន​មិន​គ្រប់គ្រាន់​សម្រាប់​គ្រួសារ​ខ្ញុំទេ។ ខ្ញុំចង់បានការដំឡើងប្រាក់ខែពី២៣០ ដុល្លារទៅ២៥០ដុល្លារ ដូច្នេះខ្ញុំអាចមាន​អាហារ​គ្រប់គ្រាន់ លុយសម្រាប់បង់ថ្លៃផ្ទះជួល និងបង់​បំណុលធនាគារទាន់ពេល ថ្លៃទឹក និង​ភ្លើង»

លោក ហេង សួរ រដ្ឋមន្ត្រី​ក្រសួង​ការងារបដិសេធ​មិន​ធ្វើ​អត្ថាធិប្បាយ​ទេ៕

ប្រែសម្រួលពីអត្ថបទភាសាអង់គ្លេស៖ PM Hun Manet Promises to Raise Garment, Textile and Footwear Industry’s Minimum Wage Next Year

151 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម