សមាគមសម្ព័ន្ធអ្នកសារព័ត៌មានកម្ពុជា

គណបក្សនយោបាយសន្យាលុបបំបាត់ការជួញដូរគ្រឿងញៀនខុសច្បាប់ក្នុងឱកាសឃោសនាបោះឆ្នោតឃុំ-សង្កាត់

អាជ្ញាធរកំពុងរៀបចំដុតបំផ្លាញគ្រឿងធាតុញៀនខុសច្បាប់ ក្នុងឱកាសទិវាអន្តរជាតិប្រឆាំងការជួញដូរសារធាតុញៀនខុសច្បាប់ ក្នុងរាជធានីភ្នំពេញ។ រូបភាពថតកាលពីថ្ងៃទី២៦ ខែមិថុនា ឆ្នាំ២០១៩។ ខេមបូចា/ព្រីង សំរាំង
អាជ្ញាធរកំពុងរៀបចំដុតបំផ្លាញគ្រឿងធាតុញៀនខុសច្បាប់ ក្នុងឱកាសទិវាអន្តរជាតិប្រឆាំងការជួញដូរសារធាតុញៀនខុសច្បាប់ ក្នុងរាជធានីភ្នំពេញ។ រូបភាពថតកាលពីថ្ងៃទី២៦ ខែមិថុនា ឆ្នាំ២០១៩។ ខេមបូចា/ព្រីង សំរាំង

នៅ​តំបន់មុខ​មន្ទីរ​ពេទ្យ​មិត្ត​ភាព​កម្ពុជា-ចិន ក្នុង​ភូមិបុរីកម្មករ សង្កាត់ទឹក​ថ្លា រាជធានី​ភ្នំពេញ គឺ​ជា​សហគមន៍​មួយ​ក្នុង​ចំណោម​សហគម​ន៍ផ្សេង​ទៀត​ដែល​កំពុង​ប្រឈម​នឹង​ការ​កើន​ឡើង​ចំនួន​អ្នក​ប្រើ​ប្រាស់​ និង​លក់​ថ្នាំ​ញៀន​។​ ដោយ​សារតែ​ប្រជា​ពល​រដ្ឋ​មើល​ឃើញ​ពី​ផល​ប៉ះពាល់​លើ​សុខភាព និង​សុវត្ថិភាព សារនយោបាយ​ជា​ច្រើន​បាន​លើក​ឡើង​ពី​ការ​លុប​បំបាត់​ការ​ជួញដូរ​គ្រឿង​ញៀន​​ ដែលជា​សារ​នយោបាយ​សំខាន់​បំផុត​សម្រាប់​ការ​បោះ​ឆ្នោត​ឃុំ-សង្កាត់​នៅ​ថ្ងៃទី​៥ ខែមិថុនា ខាង​មុខ​នេះ​។​

អ្នកស្រី យស់ ធារី វ័យ ៥៥​ឆ្នាំ​បាន​លើក​ឡើង​​ថា៖ «អ្នក​ភូមិ​ផ្សេង​ទៀត​ចង់​ឲ្យ​មាន​ការ​លុប​បំបាត់​បញ្ហា​ការ​ជួញដូរ​គ្រឿង​ញៀន​ឲ្យ​បាន​ទាំង​ស្រុង…វា​ជា​រឿង​ល្អ​ដែល​គ្រប់​គណបក្ស​នយោបាយ​មាន​គោល​នយោបាយ​លុប​បំបាត់​គ្រឿង​ញៀន ពីព្រោះយើងចង់បានតែសន្តិសុខទេ»។​​

អ្នកស្រី​ឲ្យ​ដឹង​ទៀត​ថា ស្ទើរ​តែ​រាល់​ថ្ងៃ​ អ្នកស្រី​បាន​ឃើញ​នគរបាល​បង្រ្កាប​អ្នក​ប្រើ​ប្រាស់​គ្រឿង​ញៀន​ខុស​ច្បាប់។ យ៉ាង​ណា​អ្នកស្រី​ថា បញ្ហា​នៅ​តែ​បន្ត​កើត​មាន​ដដែល​។​

អ្នកស្រីបន្ថែម​ថា៖ «ខ្ញុំ​​អាណិត​ក្មេងៗ​ដែល​ប្រើ​គ្រឿង​ញៀន​​ណាស់។ ខ្ញុំ​តែង​តែ​ឃើញ​ក្មេងៗ​ពាក់​អាវសិស្ស​សាលាមក​ទី​នេះ​ដើម្បី​ទិញ​ថ្នាំ​ញៀន…​[ប៉ុន្តែ​]​ការឃុបឃិតរវាងប៉ូលិស និងអ្នកលក់គ្រឿងញៀន គឺជាហេតុផលមួយដែលនាំឱ្យមានការចរាចរគ្រឿងញៀននៅក្នុងភូមិ»។​​

ជាមួយ​នឹង​សញ្ញា​ដែល​អាច​ថា​កម្ពុជា​កំពុង​ក្លាយ​ជា​ប្រទេសមាន​ការ​លួច​​ផលិត​សារធាតុ​ញៀន ក៏​ដូច​ជា​កន្លែង​ដែល​គ្រឿង​ញៀន​ឆ្លង​កាត់។ បញ្ហានេះបានធ្វើឲ្យ គណបក្ស​នយោបាយ​​ដែល​ចូល​រួម​ប្រកួត​ប្រជែង​ការ​បោះ​ឆ្នោត​ឃុំ-សង្កាត់​ខាង​មុខ​នេះ​បាន​បង្ហាញ​ការ​តាំង​ចិត្ត​របស់​ខ្លួន​ក្នុង​ការ​លុប​បំបាត់ការ​ប្រើ​ប្រាស់ និង​ការ​ជួញ​ដូរ​សារធាតុ​ញៀន​ខុស​ច្បាប់​ពី​ថ្នាក់​មូល​ដ្ឋាន​។​

លោក ថាច់ សេដ្ឋា អនុប្រធាន​គណបក្ស​ភ្លើង​ទៀន មាន​ប្រ​សាសន៍​ថា​បញ្ហា​គ្រឿង​ញៀន​ខុស​ច្បាប់​គឺ​ជា​បញ្ហា​គួរ​ឲ្យ​បារម្ភ​មួយ​សម្រាប់​ប្រជា​ពល​រដ្ឋ​កម្ពុជា​។​

លោក​បន្ថែម​ថា៖ «វាគ្រោះ​ថ្នាក់​បំផុត ប៉ះពាល់​ជីវិត​ប្រចាំ​ថ្ងៃ អនាគតយុវជន និង​បង្ក​បញ្ហា​អសន្តិសុខ​នៅ​មូល​ដ្ឋាន»។​

អ្នកគាំទ្រ​គណបក្ស​ភ្លើង​ទៀន​ចូល​រួមយុទ្ធនាការ​​ឃោស​នា​រកសំឡេង​ឆ្នោត​សម្រាប់​ការ​បោះ​ឆ្នោត​ឃុំ​-សង្កាត់​ក្នុង​រាជធានី​ភ្នំពេញ។ រូបភាព​ថត​កាលពី​ថ្ងៃទី​៣១ ខែឧសភា ឆ្នាំ​២០២២។ ខេមបូចា/ព្រីង សំរាំង​

លោក ថាច់ សេដ្ឋា លើក​ឡើង​ទៀត​ថា ការ​ប្រយុទ្ធប្រឆាំង​នឹង​គ្រឿ​ញៀន​ខុស​ច្បាប់​នៅ​ថ្នាក់​មូល​ដ្ឋាន​ទាម​ទារ​ឲ្យ​មានការ​ពង្រឹង​សមត្ថភាព​នគរបាល​មូលដ្ឋាន ផ្ដល់​ប្រាក់​ខែ​ល្អ​ប្រសើរ និង​បង្កើន​ការ​អនុវត្ត​ច្បាប់​​ការ​ពារ​កុំ​ឲ្យ​មាន​អំពើ​ពុក​រលួយ។

លោកមានប្រសាសន៍ថា៖ «វា​ជា​រឿង​សំខាន់​ណាស់​ដែល​អាជ្ញាធរ​ត្រូវ​ជា​អ្នក​ស្អាត​ស្អំ និង​មិន​ពុក​រលួយ ដូច​នេះ​យើង​អាច​បង្ក្រាប​បាន​ហើយ»។​

លោក សាម អ៊ីន អគ្គលេខាធិការ​គណបក្ស​ប្រជា​ធិបតេយ្យ​មូលដ្ឋាន មាន​ប្រសាសន៍​ដែរ​​ថា ការ​យក​ចិត្ត​ទុក​ដាក់​លើ​បញ្ហា​រាល​ដាន​​​គ្រឿង​ញៀន​គឺជា​នយោបាយ​អាទិភាព​មួយ​ក្នុង​ចំណោម​គោល​នយោបាយ​ផ្សេង​ទៀតរបស់​បក្ស​លោក​​។​ លោក​ក៏​បាន​លើក​ឡើង​ដែរ​ថា អំពើ​ពុក​រលួយជា​បញ្ហា​ចម្បង​បំផុត​មួយ​។​

លោក​មានប្រសាសន៍​ថា៖ «​អំពើ​ពុក​រលួយ​ជាមួល​ហេតុ​សំខាន់​នៅ​ពីក្រោយ​ការ​រាល​ដាន​នៃការ​ប្រើ​ប្រាស់ និងជួញ​ដូរ​គ្រឿង​ញៀន​ទៅ​កាន់​ភូមិនានា និង​ឃុំសង្កាត់» ដោយលោកបន្ថែមថា៖ «យើងត្រូវប្រយុទ្ធប្រឆាំងនឹងអំពើពុករលួយ ជាពិសេសយើងត្រូវចាប់ផ្ដើមពីខ្លួនយើង គឺជាមេឃុំចៅសង្កាត់ល្អ និងស្អាតស្អំ គឺយើងមិនត្រូវសហការ ឃុបឃិត និងមិនត្រូវយកលុយ ពីឈ្មួញដែលជួញដូរគ្រឿងញៀនទេ»។​

លោក​បន្ត​ថា​មេឃុំ​របស់​គណបក្ស​ប្រជា​ធិបតេយ្យ​មូល​ដ្ឋាន ​នឹង​បង្កើត​គណៈកម្មការ​តាម​ដាន​មួយ​ដែល​មាន​ការ​ចូល​រួម​ពី​ប្រ​ជា​ពល​រដ្ឋ​នៅ​គ្រប់​ឃុំ ដើម្បី​តាម​ដាន​ឃ្លាំមើល​ការ​គ្រប់​គ្រង​ការ​ងារ​ផ្សេងៗ​របស់​ថ្នាក់​ដឹក​នាំ​ឃុំ​។​

គណបក្ស​ប្រជា​ធិបតេយ្យ​មូល​ដ្ឋាន​កំពុង​ឃោស​នា​រក​សំឡេង​ឆ្នោត​សម្រាប់​ការ​បោះ​ឆ្នោត​ឃុំ​-សង្កាត់​នៅក្នុង​ខេត្ត​កណ្ដាល​។ រូបភាព​ថត​កាលពី​ថ្ងៃ​ទី​២១​ ខែឧសភា ឆ្នាំ​២០២២។ ខេមបូចា/​សុវណ្ណ ស្រីពេជ្រ

ជាមួយ​គ្នា​នេះដែរគណបក្ស​ប្រជា​ជន​កម្ពុជា ដែល​កាន់​កាប់​អាសនៈ​ក្រុម​ប្រឹក្សា​ឃុំ​សង្កាត់​នៅ​ទូទាំង​ប្រទេស ក្រោយ​គណបក្សសង្រ្គោះជាតិ​ត្រូវ​បាន​រំលាយ​កាល​ពី​ឆ្នាំ​២០១៧ ហើយ​អាសនៈ​របស់​បក្ស​នេះ​ត្រូវ​បែង​ចែក​ទៅ​កាន់​បក្ស​ផ្សេងៗ​ទៀតនោះ ក៏​បាន​សន្យាការពារ​មិន​ឲ្យ​មាន​គ្រឿង​ញៀន​រាល​ដាល​ក្នុង​សហគមន៍​នោះទេ​បើ​សិនជា​បក្ស​ខ្លួន​បាន​ជាប់​ឆ្នោត​ជាថ្មី​។​​

អ្ន​ក​នាំពាក្យ​គណបក្ស​កាន់​អំណាច លោក សុខ ឥសាន មាន​ប្រសាសន៍​ថា​គណបក្ស​បាន​ពង្រឹង​គោល​នយោបាយ «ភូមិឃុំមាន​សុវត្ថិភាព» ដើម្បី​ធានា​សន្តិ​សុខ សុវត្ថិភាព​ជូន​ដល់​ប្រ​ជាពល​រដ្ឋ​ក្នុង​មូល​ដ្ឋាន​។​

លោក​មានប្រសាសន៍​ថា​៖ «​យើង​បាននិងកំពុង​ចាត់​វិធានការគ្រប់រូបភាព​ទៅ​នឹង​សកម្មភាព​គ្រឿង​ញៀន​ខុស​ច្បាប់។ យើង​មិន​បាន​ព្រងើយ​កន្តើយ​នឹង​បញ្ហា​ទេ»។​

លោកបន្ត​ថា៖ «គណបក្ស​កាន់​អំណាច​មិន​លើក​លែង​រាល់​សកម្មភាព​ទាក់​ទង​នឹង​​គ្រឿង​ញៀន​ខុស​ច្បាប់ ហើយ​អាជ្ញាធរ​របស់​យើង​បាន​តាម​មើល​ជា​ប្រចាំ ហើយ​បើ​មាន​ករណី​គ្រឿង​ញៀន​កើត​ឡើង អាជ្ញាធរ​ក៏​បង្ក្រាប​»។​

គណបក្សប្រជា​ជនកម្ពុជា​ដំឡើង​តង់សម្រាប់​រៀបចំឃោសនា​រកសំឡេង​ឆ្នោត​ក្នុង​សង្កាត់​បឹង​កក់២ ខណ្ឌ​ទួល​គោក រាជធានីភ្នំពេញ។ រូបភាព​ថតកាលពី​ថ្ងៃទី​១ ខែមិថុនា ឆ្នាំ​២០២២។ ខេមបូចា/ព្រីង សំរាំង

ប៉ុន្តែ លោក ញឿន រ៉ាដែន ​អ្នកនាំពាក្យ​គណបក្ស​ហ្វុនស៊ិនប៉ិច បាន​កត់​សម្គាល់​ឃើញ​ថា ​​ទោះ​ជាមាន​គោល​នយោបាយ​ភូមិ​ឃុំមាន​សុវត្ថិភាព​ក្ដី តែ​ការ​រាល​ដាល​គ្រឿង​ញៀន​​នៅ​តែកើត​មាន ពិសេស​នៅ​តំបន់​ដាច់​ស្រយាល និង​សហគមន៍​ក្រី​ក្រ​។​

លោក​បន្ថែម​ថា៖ «អំពើ​ពុក​រលួយ​នៅ​មូលដ្ឋាន​ គឺ​ជា​បញ្ហា​ដែល​យើង​​ត្រូវ​រួម​គ្នា​ទប់​ស្កាត់​…យើង​ត្រូវ​តែ​លុប​បំបាត់​អំពើ​ពុក​រលួយ ពិសេស​បក្ស​ពួក​និយមដែល​រារាំង​ដល់​ការ​អភិវឌ្ឍ​សហគមន៍​»​។​​

បើ​តាមអង្គការ​ UNODC កម្ពុជា​បាន​ក្លាយ​ជា​ប្រទេស​សម្រាប់​ការចរាចរ​​ឆ្លង​កាត់​សារធាតុ​ញៀន​ខុស​ច្បាប់។ នៅ​លើ​វិបសាយ​របស់​ខ្លួន UNODC បាន​សរសេរ​ថា «ចំនួន​អ្នក​ប្រើ​ប្រាស់​ថ្នាំ​ញៀន ពិសេស​ប្រភេទ​អំហ្វេតតាមីនសម្រាប់​រំញោច​អារម្មណ៍ បាន​កើន​ឡើង​យ៉ាង​ខ្លាំង»។

កាល​ពី​ថ្ងៃទី​១៩ ខែឧសភា មន្ត្រី​ប្រឆាំង​ការជួញ​ដូរ​គ្រឿង​ញៀន បាន​រក​ឃើញរោងចក្រ​ផលិត​សារធាតុ​ញៀន​ចំនួន​បី​កន្លែងនៅ​ខេត្ត​កំពង់​ស្ពឺ និង​ភ្នំពេញ ដោយ​រឹប​អូស​បាន​សារធាតុ​ញៀន​ ១ ៤០០​គីឡូក្រាម និង​សារធាតុ​គីមីផ្សេង​ទៀត​ជាង​ ១១​តោន ព្រម​ទាំង​បាន​ចាប់​ខ្លួន​ជនជាតិចិន​​តៃ​វ៉ាន់ចំនួន​បួន​នាក់​ពាក់​ព័ន្ធ​នឹង​ករណី​នេះ​។​

រដ្ឋមន្ត្រីក្រ​សួង​មហាផ្ទៃ លោក ស ខេង​ កាល​ពី​ដើ​ម​ឆ្នាំ​នេះ បាន​បញ្ជា​ទៅ​កាន់​អាជ្ញាធរ​ឲ្យ​បង្កើន​កិច្ច​ខិត​ខំ​ប្រឹង​ប្រែង​ប្រឆាំង​ការ​ជួយដូរ​ថ្នាំ​ញៀន​។​

ការ​កើនឡើង​ការ​ផលិត​សារធាតុ​ញៀន​ក្នុង​ស្រុក និង​ការជួញ​ដូរ បាន​នាំ​ឲ្យ​មានការ​កើន​ឡើង​បទល្មើស​ផ្សេងៗ​ក្នុង​ចំណោម​អនីតិជន​។​ លោក ស ខេង កត់​សម្គាល់​ថា នៅ​ឆ្នាំ​២០២១  ក្មេង​មិន​គ្រប់​អាយុ​ចំនួ​ ១ ៤២២​នាក់​ត្រូវ​បាន​ចាប់​ខ្លួន ហើយ​ពួកគេភាគ​ច្រើនពាក់​ព័ន្ធនឹង​គ្រឿង​ញៀន​។ បើ​តាម លោក ស ខេង អាជ្ញាធរ​កម្ពុជា​បាន​ចាប់​ខ្លួន​មនុស្ស​ ១៣ ៩៧៩​នាក់ ក្នុង​សំណុំរឿង​ថ្នាំ​ញៀន​ចំនួន ៦ ៣០៨​ករណី នៅឆ្នាំ​២០២១​។​

សមាជិក​គណបក្ស​ហ្វុនស៊ិនប៉ិចម្នាក់​កំពុង​បង្ហាញ​រូប​ប្រធាន​គណបក្ស​ទៅ​កាន់​ប្រជា​ពល​រដ្ឋ​នៅពេល​ចូល​រួម​ការ​ឃោស​នា​រក​សំឡេង​ឆ្នោត​សម្រាប់​ការ​បោះ​ឆ្នោតឃុំ-សង្កាត់ ក្នុង​រាជធានីភ្នំពេញ។ រូបភាព​ថត​កាលពី​ថ្ងៃទី​១ ខែមិថុនា ឆ្នាំ​២០២២។ ខេមបូចា/ព្រីង សំរាំង

លោក សន ជ័យ ប្រធានអង្គការ​សម្ព័ន្ធ​គណនេយ្យភាពសង្គម​កម្ពុជា​ ហៅ​កាត់​ថា ANSA មានប្រ​សាសន៍​ថា បើ​តាម​របាយការណ៍​ថ្មីៗនេះរបស់​​អាជ្ញាធរ​ជាតិ​ប្រយុទ្ធប្រឆាំង​គ្រឿង​ញៀន គ្រឿង​ញៀន​ខុស​ច្បាប់​នៅ​តាម​ភូមិ​មាន​ការ​កើន​ឡើង​។​

លោកបន្ថែម​ថា​ ការ​បង្កើត​ឲ្យ​មាន​គោលនយោបាយ​ច្បាស់លាស់​នៅ​ថ្នាក់​មូល​ដ្ឋាន​សម្រាប់​ប្រឆាំង​នឹង​ការ​ប្រើ​ប្រាស់​គ្រឿង​ញៀន​ខុសច្បាប់​​ និង​ការ​ជួញដូរ គឺ​ជារឿង​ចាំ​បាច់​បំផុត​។​

លោក​បានបន្ថែមថា៖ «​ប្រជា​ពល​រដ្ឋ​បារម្ភ​ខ្លាច​កូន​ចៅ​ពាក់​ព័ន្ធ​នឹង​គ្រឿង​ញៀន…​ការចរាចរគ្រឿងញៀន ក៏ដូចជាល្បែងស៊ីសង នៅឯមូលដ្ឋាន គឺពិតជាមានទំនាក់ទំនងជាមួយនឹងអំពើពុករលួយ»

ប្រែសម្រួលពីអត្ថបទភាសាអង់គ្លេស៖ Political parties pledge to eliminate illegal drug trafficking ahead of commune election

192 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម