សមាគមសម្ព័ន្ធអ្នកសារព័ត៌មានកម្ពុជា

រដូវធ្វើប្រហុក៖ តម្លៃត្រីប្រហុកធ្លាក់ចុះ ខណៈបរិមាណត្រីបឹងទន្លេសាបនៅតែបន្តធ្លាក់ចុះ

បុរសម្នាក់ប្រមូលទិញត្រីនៅតាមដងទន្លេសាប ក្នុងខេត្តកណ្ដាល ដើម្បីធ្វើជាប្រហុក កាលពីថ្ងៃទី១៤ ខែធ្នូ ឆ្នាំ២០២១។ ខេមបូចា/ ព្រីង សំរាំង
បុរសម្នាក់ប្រមូលទិញត្រីនៅតាមដងទន្លេសាប ក្នុងខេត្តកណ្ដាល ដើម្បីធ្វើជាប្រហុក កាលពីថ្ងៃទី១៤ ខែធ្នូ ឆ្នាំ២០២១។ ខេមបូចា/ ព្រីង សំរាំង

ប្រហុកជា​ប្រភេទ​អាហារ​ផ្អាប់​ដ៏​ពេញ​និយម​​ក្នុង​ការ​ទទួល​ទាន​សម្រាប់​ប្រ​ជា​ពល​រដ្ឋ​កម្ពុជា ហើយ​ប្រហុក​ក៏​ជា​គ្រឿង​ផ្សំ​មួយ​ក្នុង​អាហារ​ជាច្រើន​មុខ​ផ្សេង​ទៀត​របស់​ខ្មែរ​ផង​ដែរ​។ ប៉ុន្តែ​ឆ្នាំ​នេះ បរិមាណ​ត្រី​ដែល​ចាប់បាន​នៅ​តាម​ដង​ទន្លេ​សាបនៅ​តែបន្ត​ធ្លាក់​ចុះ ដែល​ការធ្លាក់​ចុះ​នេះ​ត្រូវ​គេ​លើក​ឡើង​ថា​មកពី​ការ​កសាង​ទំនប់​វារីអគ្គិសនី​ធំៗ​ជាច្រើន​នៅ​តាម​ដង​ទន្លេង​មេគង្គ ក៏​ដូច​ជា​បញ្ហា​បម្រែ​បម្រួល​អាកាស​ធាតុ​​ផង​ដែរ​។​

ទោះ​ជា​បរិមាណ​ត្រី​ថយ​ចុះ​មែន ប៉ុន្តែ​​ក៏​ជារឿង​ល្អ​មួយ​ដែ​រ​សម្រាប់​អ្នក​ទិញ​ត្រី​ប្រហុក​នៅ​ឆ្នាំនេះ ដោយសារថា​តម្លៃ​ត្រី​ក៏​ទាប​ជាង​ឆ្នាំ​មុន​។​

អ្នកស្រី គឹម សុផល វ័យ​ ៦០​ឆ្នាំ ប្រាប់​ខេមបូ​ចា ថា៖ «ខ្ញុំ​បាន​មក​ទី​នេះ​ជា​រៀង​រាល់​ឆ្នាំ​ដើម្បី​ទិញ​ត្រី​សម្រាប់​ធ្វើ​ប្រហុក ហើយ​តម្លៃ​ត្រី​ឆ្នាំនេះ​​ថោក​ជាង​ឆ្នាំ​មុន»។ អ្នកស្រី សុផល ថ្លែង​ប្រាប់​ ខេមបូចា បែប​នេះ​នៅពេល​អ្នកស្រី​​កំពុង​ចាំទិញ​ត្រី​នៅ​ច្រាំង​ទន្លេ​សាបក្នុង​ស្រុក​ពញាឮ ខេត្ត​កណ្ដាល ជាទី​ដែល​អ្នកស្រី និង​​អ្នក​ផ្សេង​ទៀតកំពុង​រង់​ចាំ​ទូក​ដឹក​ត្រី​ដែល​ចាប់​បាន​យក​មក​លក់​។​​

អ្នកស្រី ឲ្យ​ដឹង​ទៀត​ថា អ្នក​ស្រី​បាន​ទិញ​ត្រី​ចំនួន​ ១០០​គីឡូក្រាម​ក្នុង​តម្លៃ​ត្រឹម​តែ​ជាង ២០​ម៉ឺន​រៀល ឬ​ទាប​ជាង​ឆ្នាំ​មុន​ពាក់​កណ្ដាល​។ ប៉ុន្តែ​ទោះបី​យ៉ាងណា អ្នកស្រី​បារម្ភ​ថាការ​ថយ​ចុះ​បរិមាណ​ត្រី​ជារាង​រាល់​ឆ្នាំ អាច​ធ្វើ​ឲ្យ​ការ​ផលិត​ប្រហុក​មិន​គ្រប់​គ្រាន់​សម្រាប់​ថ្ងៃ​ខាង​មុខ​។​

អ្នកស្រី​បន្ថែម​ថា​៖ «ខ្ញុំ​យល់​ថា​ការ​នេសាទ​ខុស​ច្បាប់ និង​ការ​បំផ្លាញ​ព្រៃលិច​ទឹក​នៅ​តាម​ដង​ទន្លេ បានធ្វើ​ឲ្យ​ចំនួន​ត្រី​នៅ​ក្នុង​ទឹក​កាន់តែថយ​ចុះ»។​

លោក រ៉ាម មុន្នី វ័យ ៣៦​ឆ្នាំ ជា​កសិករ​មកពី​ខេត្ត​កំពង់​ស្ពឺ បាន​កត់​សម្គាល់​ឃើញ​ថា​ត្រីឆ្នាំនេះមានទំហំតូចៗ​ជា​ង​ឆ្នាំ​កន្លង​ទៅ។ ក្រៅពី​ទំហំ​របស់​ត្រី លោក​លើក​ឡើង​ពី​ហេតុ​ផល​មួយ​ដែល​ធ្វើ​ឲ្យ​​តម្លៃ​ត្រី​ថោកជាង​ឆ្នាំ​កន្លង​ទៅ ដោយ​សារតែ​មិនសូវមាន​អ្នក​ធ្វើ​ត្រីប្រហុក​ច្រើន​ដូច​ឆ្នាំទៅ។

លោក បន្ថែម​ថា៖ «តម្លៃ​អាច​នឹង​ឡើង​ថ្លៃ បើ​សិន​ជាមនុស្ស​មក​ទិញ​ច្រើន»។​

លោក សេង ឡុង ជាជន​ជាតិ​វៀតណាម ដែល​ជា​អ្នក​គ្រប់គ្រង «ដាយ​នេសាទ» ក៏​យល់​ឃើញ​ប្រហាក់​ប្រហែលគ្នានេះ​ដែរ។ លោក ប្រាប់​ខេមបូចាថា តម្លៃពិត​ជា​ថោក​ជាង​ឆ្នាំ​កន្លង​ទៅ​មែន ពីព្រោះ​ថា​ត្រី​ចាប់បាន​មានទំហំតូចៗ។ លោកសង្ឃឹម​ថា​នៅ​វគ្គក្រោយ ដែល​នឹង​អាចមក​ដល់​នៅ​ខែ​មករា តម្លៃ​ត្រី​អាច​នឹង​ឡើង​ថ្លៃ​ ព្រោះ​ថា​ត្រីអាចមានទំហំ​ធំ និង​មាន​ច្រើន​សម្រាប់​លក់​។​

យ៉ាងណា លោកទទួល​ស្គាល់​ថា៖ «​រយៈពេល​ប្រាំបី​ឆ្នាំ​ក្នុង​ការ​ធ្វើ​អាជីវកម្ម ដាយត្រីក្នុង​ទន្លេសាប ខ្ញុំ​បាន​កត់​សម្គាល់​ឃើញ​ថា​បរិមាណ​ត្រីបាន​បន្ត​ធ្លាក់​ចុះ ពីព្រោះ​កម្រិត​ទឹក​ទន្លេ​ទាប។ បញ្ហានេះ​ អាច​មកពី​ការ​ធ្វើទំនប់​វារីអគ្គិសនី ដែល​ធ្វើ​ឲ្យបរិមាណ​ទឹក​ធ្លាក់​មកបឹង​​ទន្លេ​សាប​ទាប»។​

បើ​តាម លោក សេង ឡុង នៅ​ពេល​ការចាប់ផ្តើម​រដូវ​ប្រមូល​ត្រីប្រហុកពីដាយ លោក​អាចចាប់បាន​ត្រីប្រមាណ​១៥​តោន​ក្នុង​មួយ​ថ្ងៃ ខណៈ​ឆ្នាំ​​ទៅ​អាច​ចាប់បាន​ត្រី​រហូតដល់ជាង​ ២០​តោន​ក្នុង​មួយ​ថ្ងៃ​។​

​តម្លៃ​ត្រី​ដែល​ឈ្មួញ​កណ្ដាល​ទិញ​ពី​ម្ចាស់ដាយ មាន​តម្លៃ​ចន្លោះពី​ ១ ០០០ ទៅ​១ ៥០០​រៀល​ក្នុង​​មួយ​គីឡូក្រាម ហើយ​លក់​ចេញ​វិញ​ក្នុង​តម្លៃ​ចន្លោះពី​ ២ ០០០ ទៅ​ ២ ៥០០​រៀល​ក្នុង​មួយ​គីឡូក្រាម​។

កាលពីឆ្នាំទៅ តម្លៃត្រីសម្រាប់ធ្វើត្រីប្រហុក​មានតម្លៃពី​៤០០០រៀល ទៅ ៦០០០រៀល​ក្នុងមួយកីឡូក្រាម។

​លោក ឱម សាវ៉ាត ប្រធាន​អង្គការ​សម្ព័ន្ធភាព​ដើម្បី​អភិរក្ស​​ធនធាន​ជលផល​ មាន​ប្រសាសន៍​ថា ការ​ថយ​ចុះ​បរិមាណ​ត្រី ពីមួយឆ្នាំទៅ​មួយឆ្នាំ មាន​កត្តា​រួម​ផ្សំ​ជាច្រើន​ដូច​ជាបញ្ហា​បម្រែ​បម្រួល​អាកាស​ធាតុ គម្រោង​ទំនប់​វារីអគ្គិសនី​នៅ​តាម​ដង​ទន្លេង​មេគង្គ និង​ «ការ​នេសាទ​ខុស​ច្បាប់​នៅ​មាន​ច្រើន»​។​

រដូវ​ធ្វើ​ប្រហុក​​នៅ​កម្ពុជា​ចាប់​ពី​ខែ​វិច្ឆិកា រហូត​ដល់​ខែ​កុម្ភៈ និង​បាន​ពឹង​ផ្អែក​យ៉ាង​ខ្លាំង​លើខ្យល់​ម៉ូសុង និង​ការហូរបញ្ច្រាស​វិញ​​នៃ​ខ្សែទឹក​ចូលបឹង​ទន្លេសាប​។​​ ទឹក​ក្នុង​បឹង​ទន្លេសាប មាន​លំហូរ​ប្រែ​ប្រួល​ក្នុង​រដូវ​នីមួយៗ ដោយ​នៅ​ខែ​វស្សា​ទឹក​ទន្លេ​មេគង្គ​ហូរ​ចាក់​ទៅ​បឹង​ទន្លេសាប និង​នៅ​រដូវ​ប្រាំងទឹក​បឹង​ទន្លេសាប​ហូរ​​ចូល​ទន្លេមេគង្គ​វិញ​។ទំនប់​វារីអគ្គិសនី​ធ្វើ​ឲ្យ​កម្ពស់​ទឹក​នៅ​ក្នុងទន្លេងមេគង្គ​ទាប ជា​ហេតុ​ធ្វើ​ឲ្យ​លំហូរទឹក​បញ្ច្រាស​ពី​បឹង​ទន្លេសាប​ចូមក​វិញ​ក៏​កើត​មាន​យឺត​យ៉ាវ​ពី​មួយ​ឆ្នាំទៅ​មួយ​ឆ្នាំ​ដែរ​៕

ប្រែសម្រួលពីអត្ថបទភាសាអង់គ្លេស៖ Prahok Season: Fish Numbers Are Down But So Are Prices

105 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »