ពលរដ្ឋមួយចំនួនបានសំពះស្រែកយំអង្វរឱ្យអាជ្ញាធរស្រុកឯកភ្នំខេត្តបាត់ដំបងនៅលើភ្លឺស្រែឱ្យបញ្ឈប់ការយកថ្នាំបាញ់ស្មៅទៅបាញ់សម្លាប់ស្រូវពួកគាត់បន្តទៀត នៅចំណុចក្បែរទំនប់តាសោម ក្នុងភូមិព្រៃចាស់ ឃុំព្រៃចាស់ ស្រុកឯកភ្នំ ខេត្តបាត់ដំបង យោងតាមវីដេអូឃ្លីបនិងកា រអះអាងរបស់ពលរដ្ឋ។
យោងតាមប្រជាពលរដ្ឋដែលផ្តល់បទសម្ភាស បានអះអាងថា ពួកគាត់បានធ្វើស្រែនៅទីតាំងនោះរយៈពេលជិត២០ឆ្នាំហើយ ដែលគួរតែរដ្ឋកាត់ឆ្វៀតឱ្យពួកគាត់ជាកម្មសិទ្ធិ ប៉ុន្តែអាជ្ញាធរបានលើកឡើងថា នេះគ្រាន់តែការអះអាងរបស់ពលរដ្ឋ ប៉ុន្តែការពិត គឺពលរដ្ឋធ្វើស្រែនៅក្នុងតំបន់៣ ដែលជាតំបន់ហាមឃាត់ដាច់ខាត។
ពលរដ្ឋម្នាក់លោក ជៀប សារ៉ន អាយុ៥៧ឆ្នាំ រស់នៅភូមិក្របៅ ឃុំភ្នំលាប ស្រុកព្រះនេត្រព្រះ ខេត្តបន្ទាយមានជ័យបានអះអាងថា ស្រូវគាត់ចំនួនបីហិកតា និងអ្នកភូមិម្នាក់ទៀតបីហិកតាដែរដែលផើមដាក់គ្រាប់អស់ទៅហើយនោះត្រូវបានអាជ្ញាធរស្រុកឯកភ្នំ និងមន្រ្តីជលផលយកថ្នាំស្មៅបាញ់សម្លាប់កាលពីថ្ងៃទី១៤ ខែកុម្ភៈ ឆ្នាំ២០២៤។ លោកបន្តថា កាលនោះកុំតែប្រជាពលរដ្ឋនាំគ្នាទៅឃាត់ទាន់ទេ កុំអីស្រូវរបស់គាត់រាប់រយហិកតានឹងត្រូវបំផ្លាញទាំងអស់ដោយអាជ្ញាធរចោទថាធ្វើស្រែលើដីតំបន់៣។
ប្រជាពលរដ្ឋលោក ជៀប សារ៉ន បន្ថែមថា៖ «ព្រឹកមិញ(១៩កុម្ភៈ២០២៤)ពួកខ្ញុំទៅមើលឃើញស្រូវងាប់អស់ ហើយខ្លះឃើញខៀវៗដកមកផុយទាំងឬស គេបាញ់ថ្នាំអា៤៨ថ្នាំបាញ់ស្មៅ បាញ់ភ្លាមមិនទាន់អីទេ តែឥឡូវងាប់ខ្ទេចគេបាញ់ពីថ្ងៃទី១៤យើងនេះ» ។
ប្រជាពលរដ្ឋខាងលើបានអះអាងថា ដីខាងលើនេះពីមុនស្ថិតនៅការគ្រប់គ្រងរបស់អាជ្ញាធរខេត្តបន្ទាយមានជ័យ ប្រជាពលរដ្ឋប្រមាណ៩៧គ្រួសាររស់នៅភូមិក្របៅ ឃុំភ្នំលាបស្រុកព្រនេត្រព្រះ បានទៅធ្វើស្រែទីនោះ៣៤០ហិកតាតាំងពីឆ្នាំ២០០៥ រហូតដល់ឆ្នាំ២០២១បានឈប់នឹងប្រគល់ឱ្យអាជ្ញាធរតាមការប្រកាសដកហូតរបស់រដ្ឋាភិបាលសម័យនោះ។ ប៉ុន្តែក្រោយមកប្រជាពលរដ្ឋបានស្តាប់សារសម្លេងរបស់សម្តេចហ៊ុនសែនអតីតនាយករដ្ឋមន្រ្តីថាដីដែលប្រជាពលរដ្ឋធ្វើលើសពី១០ឆ្នាំកាត់ឆ្វៀលឱ្យប្រជាពលរដ្ឋ ហើយអាជ្ញាធរខេត្តបន្ទាយមានជ័យ បានប្រកាសប្រាប់ពលរដ្ឋនៅមុនបោះឆ្នោតដែរថា ប្រជាពលរដ្ឋអាចទៅអាស្រ័យផលលើដីខាងលើវិញបានដោយសារពួកគាត់បានធ្វើស្រែទីនោះជិត២០ឆ្នាំមកហើយ។
លោកបន្ថែមថានៅឆ្នាំនេះប្រជាពលរដ្ឋប្រមាណជាង៧០គ្រួសារបានយកស្រូវមកព្រោះឡើងវិញតែត្រូវបានអាជ្ញាធរស្រុកឯកភ្នំខេត្តបាត់ដំបងហាមឃាត់នឹងដកហូតពូជស្រូវពួកគាត់ដោយថាដីស្រែខាងលើស្ថិតនៅក្នុងតំបន់៣ក្រោមការគ្រប់គ្រងរបស់ស្រុកឯកភ្នំខេត្តបាត់ដំបង ប៉ុន្តែពលរដ្ឋមិនស្តាប់នោះទេដោយសំអាងថាពួកគាត់បានអាស្រ័យផលទីនេះយូរឆ្នាំមកហើយ។
លោក ជៀប សារ៉ន៖ «គេហាមឃាត់ដែរពលរដ្ឋម៉េចស្តាប់ បើលឺសម្តេចប្រកាសធ្វើលើស១០ឆ្នាំហើយ គាត់ម៉េចស្តាប់ ព្រោះពួកខ្ញុំអត់មានអីពឹងផងនោះ មានអីទៀតបើអស់ស្រែ! បើដីគាត់ទើបធ្វើបីបួនឆ្នាំ គាត់មិនតូចចិត្តទេ ប៉ុន្តែដីគាត់ធ្វើជិត២០ឆ្នាំហើយ បានន័យថាមន្រ្តីធ្វើនេះមានភាពអយុត្តិធម៌ ដល់ប្រជាពលរដ្ឋហើយ»។
លោក មឿន ម៉ុន មេភូមិក្របៅ ឃុំភ្នំលាប ស្រុកព្រះនេត្រព្រះ បានឱ្យដឹងថា ប្រជាពលរដ្ឋក្នុងភូមិរបស់លោក ពិតជាធ្វើស្រែនៅលើដីខាងលើតាំងពីឆ្នាំ២០០៥មកពិតមែនដែលកាលនោះមិនទាន់ដឹងព្រំប្រទល់ត្រឹមណានោះទេ តែក្រោយមកនៅឆ្នាំ២០២១ទើបដឹងថាដីប្រជាពលរដ្ឋ ក្នុងភូមិរបស់លោកប្រមាណ៣០០ ហិកតាបានកាត់ចូលទៅក្នុងស្រុកឯកភ្នំ ខេត្តបាត់ដំបង។ លោកបន្ថែមថាលោកធ្លាប់ដាក់ពាក្យស្នើសុំកាត់ឆ្វៀលដីតំបន់៣ខាងលើទៅអាជ្ញាធរខេត្តបាត់ដំបងច្រើនសារដែរ ប៉ុន្តែមិនបានសម្រចនោះទេមកទល់បច្ចុប្បន្ន។
លោកមេភូមិយល់ថា អាជ្ញាធរស្រុកឯកភ្នំយកថ្នាំស្មៅមកបាញ់លើស្រូវពលរដ្ឋរបស់លោកដូច្នេះ គឺមិនសមហេតុផលនោះទេ គួរណាស់ទុកពេលឱ្យពួកគាត់បានប្រមូលផលស្រូវរួចសិនចាំដោះស្រាយគ្នាទៀត។
លោក មឿន ម៉ុន បន្ថែមថា៖ «ប្រជាពលរដ្ឋជាអ្នកស្រែ បើអត់ស្រែម៉េចរស់ សុំអាជ្ញាធរខេត្តបាត់ដំបង កាត់ឆ្វៀលច្រើនដងហើយមិនបាន ខ្ញុំនឹងធ្វើសំណើរជាថ្មីទៅសម្តេចម្តង ពីរបីថ្ងៃទៀត! បើសុំមិនបាន ទៀតខ្ញុំឈប់សុំហើយ!» ។
ទាក់ទងករណីខាងលើនេះលោក ជួង សុភា នាយខណ្ឌរដ្ឋបាលជលផលខេត្តបាត់ដំបង បានឱ្យដឹងថា ប្រជាពលរដ្ឋបាននាំគ្នាំមកធ្វើស្រែរំលោភចូលដីតំបន់បីដែលជាតំបន់ហាមឃាត់ចាប់ពីចំណុចក្រពើស្គមមកដល់ចំណុចទំនប់តាសោម ឃុំព្រៃចាស់ ស្រុកឯកភ្នំ ប្រមាណជាង៤៥០ហិកតា។ កាលពីចុងខែធ្នូនៅពេលពួកគាត់នាំគ្នាយកស្រូវមកព្រោះអាជ្ញាធរបានហាមឃាត់ពួកគាត់ច្រើនដង និងបានដកហូតពូជស្រូវខ្លះយកមកទុក ប៉ុន្តែដោយពួកគាត់សន្យាបញ្ឈប់មកធ្វើស្រែទីនោះទៀតក៏ប្រគល់ឱ្យ ពួកគាត់វិញ។ លោកបន្តថាក្រោយមកនៅខែមករា ឆ្នាំ២០២៤ ប្រជាពលរដ្ឋបាននាំគ្នាលួចយកស្រូវមកព្រោះ និងបូមទឹកដាក់ស្រែរហូតដុះស្រូវពេញស្រែ បើទោះជាអាជ្ញាធរ និងមន្រ្តីជំនាញហាមឃាត់និងណែនាំច្រើនដងក៏ដោយ។
លោក ជួង សុភា បញ្ជាក់ថា ក្រោយលោកបានចូលរួមសន្និបាតក្រសួងកសិកម្មរុក្ខាប្រមាញ់ និងនេសាទថ្មីៗនេះ លោកនាយករដ្ឋមន្រ្តីបានដាក់បញ្ជាឱ្យពង្រឹងនិងទប់ស្កាត់ការបំផ្លាញធនធានជលផលពិសេសការទន្រ្ទានដីតំបន់ព្រៃលិចទឹក និងសុំយោបលពីលោកអភិបាលខេត្ត គណៈបញ្ជាការឯកភាពស្រុកបានប្រជុំ ឯកភាពគ្នាលើកដៃយកគោលការណ៍រួមមួយ ដោយសម្រេចបាញ់សម្លាប់ស្រូវប្រជាពរដ្ឋជាង៤៥០ហិកតានេះទាំងអស់ ។
លោកជួង សុភា បន្ថែមថា៖ «ជាគោលការណ៍យើងមិនចង់បំផ្លាញទ្រព្យសម្បត្តិប្រជាជនទេ តែធ្វើម៉េច កុំឱ្យគាត់បង្កបង្កើនផលបាន យើងសុំគោលការណ៍គណៈបញ្ជាការ ឯកភាពគ្នាជាធ្នុងមួយ សុំឱ្យមន្រ្តីជំនាញបាញ់សម្លាប់ស្រូវ បើប្រើវិធានការចាប់វាពិបាកមើលពេក បាញ់នេះដើម្បីហាមឃាត់គាត់ យើងមិនចង់ចាប់ចងគាត់ ដាក់ទោសគាត់ទេ វាពិបាក យើងប្រើវិធានការនេះដើម្បីឱ្យគាត់រាងចាល»។
លោក ជួង សុភា លើកឡើងថា ក្រោយពីឯកភាពគ្នាកាលពីថ្ងៃទី១៤ ខែកុម្ភៈ កម្លាំងរដ្ឋបាលស្រុកឯកភ្នំ ដឹកនាំដោយអភិបាលរងស្រុក កម្លាំងជលផលដឹកនាំដោយលោកផ្ទាល់ អាជ្ញាធរឃុំ កម្លាំងប្រដាប់អាវុធ មាន មកពីស្នងការខេត្ត អធិការស្រុក និងប្រជាការពារសរុបជាង៤០នាក់ បានចុះបាញ់ថ្នាំសម្លាប់ស្រូវនៅតំបន់ ដែលពលរដ្ឋធ្វើរំលោភទន្រ្ទានលើដីតំបន់បីដែលហាមឃាត់ខាងលើ។ លោកបន្តថា ដោយមានការតវ៉ាពីប្រជាពលរដ្ឋអាជ្ញាធរបានសម្រេចដកកម្លាំងមកវិញសិន។
លោក ជួង សុភាព បន្ថែមថា៖ «យើងបានបាញ់ស្រូវខូចខាតជាង២ហិកតា ក្រោយមកតាមប្រសាសន៍ ឯកឧត្តមអភិបាលខេត្តឱ្យដកឃ្លាចេញពីទីនោះសិន ដើម្បីរកដំណោះស្រាយសិន»។
ខេមបូចា មិនអាចទំនាក់ទំនងសុំបំភ្លឺពីលោក សុខ លូ អភិបាលខេត្តបាត់ដំបង តាមទូរសព្ទបានទេ កាលពីល្ងាចថ្ងៃទី១៩ ខែកុម្ភៈ និងមិនមានការឆ្លើយតបតាមសារតេឡេក្រាមជុំវិញនឹងការបាញ់សម្លាប់ស្រូវពលរដ្ឋខាងលើ។
ចំណែកលោក សឿម ប៊ុនរិទ្ធ អភិបាលរងខេត្តបាត់ដំបង និងជាអ្នកនាំពាក្យរដ្ឋបាលខេត្ត បានបដិសេធមិនធ្វើអត្ថាធិប្បាយដោយលោកបានឆ្លើយតបតាមសារតេឡេក្រាមយ៉ាងខ្លីនៅព្រឹកថ្ងៃទី២០ ខែកុម្ភៈ ថា៖ «លោកអភិបាលស្រុកឯកភ្នំ កំពុងបំភ្លឺព័ត៌មានហើយ ចាំខ្ញុំផ្ញើជូន»។
លោក ម៉ឹល សុផល អភិបាលស្រុកឯកភ្នំ បានឱ្យដឹងថា ករណីខាងលើនេះជាវិធានការបង្រ្កាបបទល្មើស ធនធានធម្មជាតិដែលកន្លងមកអាជ្ញាធរបានទៅឃាត់ និងទៅដេញពួកគាត់កុំឱ្យមកធ្វើស្រែនៅតំបន់នោះច្រើនដង ប៉ុន្តែពួកគាត់នៅតែលួចមកធ្វើទៀត។ លោកបញ្ជាក់ថា នេះជាសកម្មភាពចុងក្រោយ ហើយដែលគណៈបញ្ជាការឯកភាពស្រុកសហការជាមួយខណ្ឌជលផលខេត្តចុះទៅបង្រ្កាបបទល្មើសនេះឱ្យខានតែបាន។
លោក ម៉ឹល សុផល បញ្ជាក់ថា៖ «ព្រោះបទល្មើសនេះវាស្ថិតនៅតំបន់បីដែលជាតំបន់ហាមឃាត់ដាច់ខាត តំបន់ការពារធនធានធម្មជាតិ យើងអនុវត្តតាមតួនាទីភារកិច្ចរបស់ខ្លួន»។
លោកអភិបាលស្រុកបន្ថែមថាខណៈដែលចុះទៅបង្រ្កាបនេះអាជ្ញាធរក៏បានហៅប្រជាពលរដ្ឋមកសាកសួរដើម្បីស្រង់ព័ត៌មាន ចង់ដឹងថា ប្រជាពលរដ្ឋណាធ្វើបានប៉ុន្មាន? ប្រជាពលរដ្ឋណាធ្វើបានប៉ុន្មាន? ប៉ុន្តែមានតែប្រជាពលរដ្ឋជាង២០នាក់ប៉ុណ្ណោះមកបំភ្លឺចំណែកមួយចំនួនធំទៀតពួកគាត់បានវិលចូលភូមិវិញអស់ទៅ។
លោក ម៉ឹល សុផល បន្ថែមថា៖ «ចឹងរូបភាពនេះយើងមិនទាន់កំណត់បានថាតើមានឈ្មួញ នៅពីក្រោយប៉ុណ្ណា? ប្រជាពលរដ្ឋអាស្រ័យផលប៉ុណ្ណានោះទេ?»។
ទាក់ទងការអះអាងរបស់ពលរដ្ឋថា ធ្វើស្រែតំបន់នោះតាំងពីឆ្នាំ២០០៥មកលោកអភិបាលស្រុកបានឆ្លើយតបថា វាជាការអះអាងរបស់ពលរដ្ឋប៉ុណ្ណោះ ប៉ុន្តែដីទាំងនេះ គឺវាស្ថិតនៅតំបន់៣ដែលហាមឃាត់ដាច់ខាត ជាដីដែលមិនបានកាត់ឆ្វៀលជូនប្រជាពលរដ្ឋនោះទេ។
លោកបញ្ជាក់ថា ពីដើមមកពួកគាត់ចូលមកធ្វើស្រែដោយសំអាងថាទឹកដីនេះជាដីខេត្តបន្ទាយមានជ័យ ប៉ុន្តែផ្អែកតាមព្រំប្រទល់រដ្ឋបាល គឺស្ថិតនៅក្នុងខេត្តបាត់ដំបងនោះទេ និងបានពិនិត្យមើលព្រំប្រទល់ រដ្ឋបាលទាំងអស់គ្នាហើយ ក្រោយពីសម្តេចប្រកាសតាំងពីឆ្នាំ២០២១ ឱ្យប្រគល់ដីជូនរដ្ឋវិញ។
លោក អភិបាលស្រុក បន្ថែមទៀតថា៖ «ករណីខាងលើនេះ យើងបានធ្វើរបាយការណ៍ជូនឯកឧត្តមអភិបាលខេត្តរួចហើយ យើងផ្អាកសិនដើម្បីសុំគោលការណ៍បន្តពីថ្នាក់លើទៀត»។
លោក អ៊ិន គង់ជិត មន្រ្តីសម្រេបសម្រួលអង្គការសិទ្ធិមនុស្ស លីកាដូ ប្រចាំខេត្តបាត់ដំបង និងខេត្តបន្ទាយមានជ័យ ដែលតាមដានរឿងនេះបានឱ្យដឹងថា ការបាញ់ថ្នាំសម្លាប់ស្រូវប្រជាពលរដ្ឋខាងលើជារឿងមិនត្រឹមត្រូវនោះទេ វាជាការបំផ្លិចបំផ្លាញទ្រព្យសម្បត្តិប្រជាពលរដ្ឋ។
លោកបន្តថា ប្រជាកសិករគាត់រំពឹងថានឹងបានផលលក់ដើម្បីទូទាត់ថ្លៃដើមដូចជា ថ្លៃភ្ជួរ ថ្លៃជី និងការថែទាំ ជាដើម ថ្វិត្បិតតែតំបន់នេះជាតំបន់៣អាជ្ញាធរគួរតែទុកឱកាសឱ្យប្រជាពលរដ្ឋលោកប្រមូលផលរួចសិន ចាំចាត់វិធានការក៏មិនទាន់ហួសពេលដែរ។
លោក គង់ជិត លើកឡើងថា៖ «វាជាការផ្តាច់ផ្តិលទៅលើជីវភាពរស់នៅពួកគាត់ប្រចាំថ្ងៃដែលពួកគាត់សង្ឃឹមលើទិន្នផលស្រូវនេះ។ ក្នុងនាមអាជ្ញាធរជាអ្នកអនុវត្តច្បាប់ បើសិនប្រជាពលរដ្ឋរឹងទទឹងមិនស្តាប់ គួរតែអនុវត្តតាមប្រព័ន្ធតុលាការទៅ សុំដីការអនុវត្តដោយបង្ខំទៅមិនគួរបាញ់ថ្នាំសម្លាប់ស្រូវពលរដ្ឋទេ»។ លោកបន្ថែមថា៖« ករណីនេះជាការបំផ្លិចបំផ្លាញផលស្រូវប្រជាពលរដ្ឋ អាជ្ញាធរត្រូវផ្តល់សំណងសងដល់ប្រជាពលរដ្ឋវិញ»។
លោក គង់ជិត បានលើកជាយោបល់ថា នៅពេលដែលប្រជាពលរដ្ឋប្រមូលផលរួច នាយខណ្ឌជលផល គួរតែយកបង្គោលមកបោះព្រំប្រទល់ និងដាក់បង្ហាញផែនទីមួយធំឱ្យពលរដ្ឋមើលរួចដាក់បម្រាមសរសេរមាត្រាច្បាប់លើហ្នឹង បើសិនជាបំពានអាចមានទោសប៉ុន្មានអីប៉ុន្មានទៅ? ។ លោកបន្ថែមថា ចំណែកអាជ្ញាធរ គួរហៅប្រជាពលរដ្ឋមកធ្វើកិច្ចសន្យាឱ្យបញ្ឈប់ធ្វើស្រែនៅតំបន់៣ដែលជាកន្លែងអភិរក្សសម្រាប់ត្រីពងកូនអីចឹងទៅ និងគួរតែជជែកចរចាគ្នាមិនគួរប្រើវិធានការខាងលើទៀតនោះទេ បន្ថែមពីនោះគួរបង្កើត វេទិការពិគ្រោះយោបល់ក្នុងសហគមន៍ដើម្បីផ្សព្វផ្សាយបន្ថែម។
សូមបញ្ជាក់ថា តាមអនុក្រឹត្យលេខ៩០របស់រាជរដ្ឋាភិបាលចុះថ្ងៃទី៣ ខែឧសភា ឆ្នាំ២០២៣ ស្តីពីការកាត់ឆ្វៀលផ្ទៃដីតំបន់៣ និងការកែសម្រួលផ្ទៃដីតំបន់៣ ស្ថិតក្នុងភូមិសាស្រ្តស្រុកចំនួនបួន ក្នុងខេត្តបាត់ដំបង ជាប់បឹងទន្លេសាប។ក្នុងនោះមាត្រា១សម្រេចកាត់ឆ្វៀលផ្ទៃដីទំហំ ១ ៣៥៣ហិកតា៣៤អា ស្ថិតនៅភូមិសាស្រ្ត ឃុំកោះជីវាំង និងឃុំព្រៃចាស់ ស្រុកឯកភ្នំចេញពីតំបន់បី នៃតំបន់ទន្លេសាប ធ្វើអនុប្រយោគ ជាដីឯកជនរបស់រដ្ឋ និងផ្តល់ជាកម្មសិទ្ធិជូនប្រជាពលរដ្ឋចំនួន ២ ៤០៨គ្រួសារ។ មាត្រា២ កែសម្រួលផ្ទៃដី ពីតំបន់៣បញ្ចូលមកតំបន់២ទំហំ ១០ ៤៣០ហិកតា១៧អា ស្ថិតក្នុងភូមិសាស្រ្តស្រុកថ្មគោល ស្រុកសង្កែ ស្រុកឯកភ្នំ និងស្រុកមោងឬស្សី ផ្តល់ជូនប្រជាពលរដ្ឋ ២ ៤០៨គ្រួសារបន្តប្រើប្រាស់និងអាស្រ័យផល៕
