សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋរស់នៅជាប់បឹងតាមោកបានតវ៉ាជាច្រើនថ្ងៃជាប់គ្នាដើម្បីស្នើឱ្យអាជ្ញាធរចេញប្លង់កម្មសិទ្ធិ

ប្រជាពលរដ្ឋរស់នៅជាប់បឹងតាមោកកំពុងឈរតវ៉ាដោយលើករូបថតថ្នាក់ដឹកនាំ នៅខាងមុខបឹងតាមោកនៅភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ។ រូបថតនៅថ្ងៃទី ២៣ ខែមិថុនា ឆ្នាំ២០២២។ ខេមបូចា/ វ៉ា សុភានុត
ប្រជាពលរដ្ឋរស់នៅជាប់បឹងតាមោកកំពុងឈរតវ៉ាដោយលើករូបថតថ្នាក់ដឹកនាំ នៅខាងមុខបឹងតាមោកនៅភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ។ រូបថតនៅថ្ងៃទី ២៣ ខែមិថុនា ឆ្នាំ២០២២។ ខេមបូចា/ វ៉ា សុភានុត

ប្រជាពលរដ្ឋប្រមាណ១០០នាក់តំណាងឱ្យពលរដ្ឋចំនួន២៥០គ្រួសារដែលរស់នៅភាគ​ខាងជើងនៃបឹងតាមោក ស្ថិតក្នុង​ភូមិ​សំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ ដែលកំពុងប្រឈមនឹង​ការ​បណ្ដេញ​ចេញ បានធ្វើការតវ៉ាអស់រយៈពេល​មួយសប្ដាហ៍មកហើយ​ដើម្បីស្នើសុំឱ្យអាជ្ញាធរពាក់ព័ន្ធ​ចេញ​ប្លង់កម្មសិទ្ធិស្របច្បាប់។

អ្នកស្រី សឿន ស្រីសុទ្ធ អាយុ៣២ឆ្នាំ បានរៀបរាប់ថា ហេតុដែលអ្នកស្រីសម្រេចធ្វើការតវ៉ានេះ ព្រោះអាជ្ញាធរ​បាន​ចាក់ដីលុបបឹងកាន់តែខិតជិតនឹងផ្ទះរបស់អ្នកស្រី ខណៈអាជ្ញាធរ​នៅពុំទាន់​មានការឆ្លើយតបទៅនឹងការស្នើសុំរបស់ប្រជាពលរដ្ឋនៅឡើយ។

អ្នកស្រី ស្រីសុទ្ធ និយាយថា៖ «ខ្ញុំឈឺចាប់ក្នុងនាមខ្ញុំជាប្រជាពលរដ្ឋរស់នៅសង្កាត់​សំរោង​ហ្នឹង ខ្ញុំមិនមែនទើបមកនៅ ខ្ញុំនៅតាំឆ្នាំ១៩៩៨។ គាត់អត់ព្រមចេញប្លង់កម្មសិទ្ធិ សៀវភៅ​គ្រួសារ​ឱ្យ​ពួកខ្ញុំជាប្រជាពលរដ្ឋ ខ្ញុំឈឺចាប់ ព្រោះអីខ្ញុំជាប្រជាពលរដ្ឋខ្មែររស់លើដីខ្មែរ»។

ស្ត្រីប្រកបរបរនេសាទនិងចិញ្ចឹមត្រីរូបនេះ ស្នើសុំអាជ្ញាធរឱ្យពន្យាពេល៨ខែក្នុងការចាក់ដីលុប​បឹង ព្រោះអ្នកស្រីត្រូវការប្រមូលផលពីការចិញ្ចឹមត្រីក្នុងបឹង។

ប្រជាពលរដ្ឋម្នាក់ទៀត អ្នកស្រី ខេង សាអយ អាយុ៣៦ឆ្នាំ បាននិយាយថា អ្នកស្រីនឹង​ធ្វើ​ការ​ទាមទាររហូតទាល់តែមានដំណោះស្រាយណាមួយដែលអាចទទួលយកបាន។

អ្នកស្រីឱ្យដឹងថា៖ «ពួកខ្ញុំស៊ូស្លាប់នៅកន្លែង គឺខ្ញុំអត់ចេញទេ​។ ឱ្យដោះដូរទៅណាបើពួកខ្ញុំតស៊ូ ទម្រាំបានផ្ទះប៉ុណ្ណឹងនៅ ខ្ញុំទៅយកដីក្បាល១០ម៉ែត្រ៥ម៉ែត្រអី ខ្ញុំម៉េចសុខចិត្ត ផ្ទះខ្ញុំមានស្រាប់ ខ្ញុំធ្លាប់រស់នៅ២០ទៅ៣០ឆ្នាំហើយ។ កន្លែងនេះមានមន្ទីរពេទ្យ សាលារៀន ឱ្យខ្ញុំទៅ​នៅក្នុង​ព្រៃខ្ញុំអត់ទៅទេ»។

ប្រជាពលរដ្ឋនិងអាជ្ញាធរកំពុងប្រឈមមុខដាក់គ្នា នៅពេលប្រជាពលរដ្ឋចុះហាម​កុំឱ្យមានការចាក់ដីលុបស៊ងចិញ្ចឹមត្រីពួកគាត់ក្នុងបឹងតាមោក​។ រូបថតនៅថ្ងៃទី២១ ខែមិថុនា ឆ្នាំ២០២២។ ​រូបភាពផ្ដល់ឱ្យ

អ្នកស្រី ផន សុខុម  ដែលជាតំណាងប្រជាពលរដ្ឋ បានថ្លែងថា ប្រជាពលរដ្ឋ​បាន​បដិសេធ​ក្នុងការស្នើសុំដោះដូរដីពីសំណាក់អាជ្ញាធរ ព្រោះកន្លែងថ្មីនោះ ពុំអាចប្រកបរបរ​ចិញ្ចឹម​ជីវិតបានឡើយ។ អ្នកស្រីឱ្យដឹងទៀតថា ក្នុងចំណោមប្រជាពលរដ្ឋ​ចំនួន​២៥០គ្រួសារ ក្នុងនោះមាន៣០គ្រួសារបានរស់នៅតាំងពីអំឡុងទសវត្សរ៍ទី៩០មក ខណៈអ្នកផ្សេងទៀត បានមកតាំងទីលំនៅជាបន្តបន្ទាប់។

អ្នកស្រី សុខុម បានសង្កត់ធ្ងន់ថា អាជ្ញាធរបានចាក់ដីលុបស៊ងចិញ្ចឹមត្រីរបស់ប្រជាពលរដ្ឋ​អស់​ចំនួន២ ក្នុងចំណោមស៊ងចំនួន១០០ ដែលនេះក៏នាំឱ្យមានការផ្ទុះការតវ៉ាផងដែរ។ អ្នកស្រី​បន្ថែម​ថា សំណង់បុរីមួយដែលទើបសាងសង់នៅក្បែរផ្ទះប្រជាពលរដ្ឋ ហើយជាតំបន់ដី​ស្រែ​ប្រាំង​​ដូចគ្នា ប៉ុន្តែមានប្លង់កម្មសិទ្ធិ។

អ្នកស្រី ប្រាប់ថា៖ «គាត់[បុរី]មានលុយគាត់មានឋានៈខ្ពស់ ចឹងគាត់ធ្វើបានទាំងអស់​[ប្លង់កម្ម​សិទ្ធិ] កុំថាឡើយកន្លែងជាប់ខ្ញុំ សូម្បីនៅពីក្រោយខ្ញុំ[មានទឹក]ក៏មានរីសតដែរ។ រីសតរបស់​ដណ្លងអភិបាលក្រុងឃួងស្រេង»

ទោះយ៉ាងណា បើតាមតំណាងពលរដ្ឋ អ្នកស្រី សុខុម  បានឱ្យដឹងថា កាលពីថ្ងៃទី២១ ខែមិថុនា អាជ្ញាធរនិងពលរដ្ឋបានប៉ះទង្គិចគ្នា ខណៈពលរដ្ឋព្យាយាមទៅហាមឃាត់គ្រឿងចក្រ​ដែល​កំពុង​ចាក់ដីលុបលើស៊ងចិញ្ចឹមត្រីពួកគាត់ ហើយអាជ្ញាធរបានចោទប្រកាន់ពលរដ្ឋថា​រឹងរូស​នៅតែបន្តការតវ៉ា ព្រមទាំងគំរាមចាប់ដាក់គុកថែមទៀត។

អ្នកស្រី សុខុម បានបន្ថែមថា៖ «គាត់[អាជ្ញាធរ]ថាពួកយើងក្បាល​រឹងណាស់ គេហាមឃាត់​ហើយ​យើងនៅតែខំប្រឹងយកឈ្នះ។ គាត់នៅតែចាក់(ដី) (អាជ្ញាធរថា)អត់មានអ្នកណា​មកហាម​ឃាត់គាត់បានទេ បើប្រជាពលរដ្ឋណាហ៊ានតតាំងគាត់ចាប់ដាក់គុកទាំងអស់»

បើតាមតំណាងពលរដ្ឋរូបនេះ នៅថ្ងៃព្រហស្បតិ៍ សប្ដាហ៍ក្រោយ​ប្រជាពលរដ្ឋនឹងឡើង​ទៅតវ៉ា​ដល់ផ្ទះលោកនាយករដ្ឋមន្ត្រី ហ៊ុន សែន។

គិតមកដល់ពេលបច្ចុប្បន្ន ផ្ទៃដីជិត២ពាន់​ហិកតានៃទំហំសរុបជាង៣ពាន់ហិកតារបស់​បឹងតាមោក ត្រូវបានផ្ទេរដោយអនុក្រឹត្យនានាទៅកាន់ក្រុមហ៊ុន និងបុគ្គល​ដែលមានទំនាក់​ទំនង​​ល្អ​ជាមួយរដ្ឋាភិបាលកម្ពុជាដើម្បីធ្វើការអភិវឌ្ឍ។

អាជ្ញាធរឡើងទៅទាញប្រជាពលរដ្ឋឱ្យចុះពីគ្រឿងចក្រ បន្ទាប់ពីពួកគេឡើងទៅហាម​អ្នកបើកគ្រឿងចក្រកុំឱ្យឈូសឆាយដីលុបបឹងតាមោក។ រូបថតនៅថ្ងៃទី២១ ខែមិថុនា ឆ្នាំ២០២២។ រូបភាពផ្ដល់ឱ្យ

អ្នកសារព័ត៌មានខេមបូចាពុំអាចសុំការអត្ថាធិប្បាយពីលោក យិន អ៊ីម ចៅសង្កាត់សំរោង, លោក សុខ សម្បត្តិ អភិបាលខណ្ឌ​ព្រែកព្នៅ និងលោក ម៉េត មាសភក្ដី អ្នកនាំពាក្យរដ្ឋាបាលរាជធានីភ្នំពេញបានទេ ដោយ​ខល​ពុំមានអ្នកលើកទូរសព្ទ ខណៈលោកស៊ីម សុផង់ នាយករដ្ឋបាលខណ្ឌព្រែកព្នៅ បាន​បដិសេធ​ឆ្លើយតាមទូរសព្ទ។

ចំណែកលោក ហែម ឫទ្ធី នាយករងរដ្ឋបាលខណ្ឌព្រែកព្នៅ នៅពេលសួរថាតើអាជ្ញាធរមាន ដំណោះស្រាយយ៉ាងដូចម្ដេចចំពោះការស្នើសុំរបស់ប្រជាពលរដ្ឋ។ លោក ឫទ្ធី បាន​ប្រាប់​អ្នកសារព័ត៌មានខេមបូចា ឱ្យពិនិត្យមើលករណីចាក់ស្ដែងថាតើពលរដ្ឋទាំងនោះរស់នៅ​កន្លែងណា?។

លោក ឫទ្ធី និយាយថា៖ «ឥឡូវអូនមើលជាក់ស្ដែងគាត់នៅមាត់ផ្លូវចំណីសាធារណៈចឹង។ អ្វីដែលផ្សេងទៀតខ្ញុំមិនទាន់ដឹងថាយ៉ាងម៉េចទេព្រោះមិនទាន់មានអ្វីអនុញ្ញាតឱ្យខ្ញុំឆ្លើយ​ជាមួយសារព័ត៌មានពីថ្នាក់លើមក។

ក្រោយពេលប្រាប់ថា ពលរដ្ឋអះអាងថាបុរីដែលនៅក្បែរនោះបានធ្វើលើដីប្រភេទស្រែប្រាំង​ដូចគ្នាប៉ុន្តែមានប្លង់កម្មសិទ្ធិ ខណៈពួកគាត់រស់នៅតាំងពីទសវត្សរ៍៩០នៅតែពុំមានប្លង់។

លោក ឫទ្ធី ឆ្លើយតបថា៖ «អូនស្រាវជ្រាវផ្នែកផ្លូវច្បាប់ទៀតទៅ បងមិនឆ្លើយទេ»។

ជុំវិញការតវ៉ាស្នើសុំប្លង់កម្មសិទ្ធិនេះ លោក ឃួង ស្រេង អភិបាលរាជធានីភ្នំពេញ បានមាន​ចម្ងល់​ថាហេតុអ្វីបានជាប្រជាពលរដ្ឋទាំងនោះធ្វើការតវ៉ា ទាំងដែលអាជ្ញាធរពុំបានធ្វើអ្វី ដែល​បង្កឱ្យមានការគំរាមកំហែងឡើយ។

លោក ស្រេង មានប្រសាសន៍ថា៖ «មានអីត្រូវតវ៉ាគេអត់មានធ្វើអីគាត់ផង គាត់មានរឿងអី​ត្រូវតវ៉ា»

បន្ទាប់ពីប្រាប់ថាមានការចាក់ដីខិតកាន់តែជិតផ្ទះប្រជាពលរដ្ឋរស់នៅ ព្រមទាំងបានលុប​ស៊ងចិញ្ចឹមត្រីរបស់ប្រជាពលរដ្ឋ ទូរសព្ទត្រូវបានផ្ដាច់ ខណៈខលទៅម្ដងទៀត អភិបាលក្រុង​រូបនេះប្រាប់ថាកំពុងនៅក្នុងតំបន់ដាច់ស្រយាល។

លោក ស៊ាង មួយឡៃ ប្រធានគម្រោងសិទ្ធិលំនៅឋាន និងស្រាវជ្រាវនៃអង្គការ​សមាគម​ធាង​ត្នោត មានប្រសាសន៍ថា តាមការចុះស្រាវជ្រាវពលរដ្ឋដែលរស់នៅតំបន់នោះ ពុំមែន​ទើបតែ​មកតាំងទីលំនៅថ្មីៗឡើយ  ហើយអាជ្ញាធរថ្នាក់ក្រោមត្រូវផ្ដល់ព័ត៌មាន​ពិតទៅ​កាន់​ថ្នាក់​ដឹកនាំ​ជុំវិញករណីនេះ ដើម្បីឱ្យប្រជាពលរដ្ឋអាចទទួលបានប្លង់កម្មសិទ្ធិស្របច្បាប់។

លោក មួយឡៃនិយាយថា៖ «ផ្ទៃបឹងតាមោកដែលស្ថិតនៅក្រោយផ្ទះប្រជាពលរដ្ឋមានការ​កាត់​ផ្ទៃ​បឹងជាហូរហែ ចឹងមានការសាកសមអត់ដែលយើងឱ្យប្រជាពលរដ្ឋចាកចេញ ហើយយក​ដីយើងឱ្យអ្នកថ្មីបន្តទៀតជាអ្នកមានលុយ។ សម្រាប់ខ្ញុំ វាមិនសមទំនងនិងយុត្តិធម៌ សម្រាប់​ប្រជាពលរដ្ឋនិងសង្គមរបស់យើង»

343 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម