ពលរដ្ឋប្រហែល៥០នាក់តំណាងឱ្យ៦ភូមិស្មើនឹងជាង១ពាន់គ្រួសារលើកគ្នាទៅតវ៉ាដល់សាលាស្រុក និងដល់ទីតាំងក្រុមហ៊ុនឯកជនមួយ ដើម្បីស្នើសុំអាជ្ញាធរអន្តរាគមន៍ឱ្យក្រុមហ៊ុន បញ្ឈប់សកម្មភាពកាយអូរបូរាណដើម្បីបូមយកខ្សាច់ដោយគ្មានច្បាប់នៅចំណុចទួលតាស្វាយ ភូមិច្រនៀង ឃុំគោកឃ្មុំ ស្រុកថ្មគោល ខេត្តបាត់ដំបង នាព្រឹកថ្ងៃទី១០ ខែកក្កដាឆ្នាំ ២០២៣។
នៅពេលដែលពលរដ្ឋតវ៉ាដល់មុខសាលាស្រុកថ្មគោល មន្រ្តីសាលាស្រុកបានចេញមកប្រាប់ពលរដ្ឋឱ្យនាំគ្នាទៅមូលដ្ឋានវិញភ្លាមៗ ដោយសន្យាថា អាជ្ញាធរនឹងចុះទៅដោះស្រាយដល់ទីតាំងក្រុមហ៊ុនតែម្តង។
ប្រជាពលរដ្ឋលោកប៉ាក់ ឈៀន បានថ្លែងថា ពួកខ្ញុំឡើងមកតវ៉ានេះដោយព្រួយបារម្ភថាក្រុមហ៊ុនធ្វើសកម្មភាព បូមខ្សាច់អាចធ្វើឱ្យបាក់ច្រាំង ប៉ះពាល់ផ្ទះសម្បែងពួកគាត់ដែលនៅជាប់មាត់អូរ និងប៉ះពាល់ដល់ប្រជាពលរដ្ឋច្រើនភូមិ ដែលកំពុងប្រើប្រាស់ទឹកនិងស្រោចស្រពដំណាំពីអូរបូរាណនេះជាយូរមកហើយ។
លោក ឈៀន បន្ថែមថាក្រុមហ៊ុននេះបានមកជួលដីអ្នកភូមិមួយកន្លែងក្នុងទីតាំងខាងលើដាក់គ្រឿងចក្រ និងមានសម្ភារៈបូមខ្សាច់ប្រហែលមួយខែមកហើយ ដោយប្រជាពលរដ្ឋមិនស្គាល់ឈ្មោះក្រុមហ៊ុនទេសូម្បីអាជ្ញាធរ ភូមិឃុំ ក៏មិនដឹងនោះដែរ។ ពលរដ្ឋបន្តថា មេការក្រុមហ៊ុននេះប្រាប់អ្នកភូមិថាម្តងគេថាបូមខ្សាច់ ម្តងថាស្តារអូរ ធ្វើផ្លូវ មិនដឹងគោលបំណងអ្វីច្បាស់ លាស់នោះទេធ្វើឱ្យប្រជាពលរដ្ឋ មានការសង្ស័យ និងព្រួយបារម្ភ ដេកមិនលក់។
លោក ឈាន ឱ្យដឹងថា៖ «បើសិនរដ្ឋចុះមកស្តារអូរពួកខ្ញុំយល់ព្រម តែនេះក្រុមហ៊នមានអេស្ការមួយគ្រឿង និង សម្ភារៈបូមខ្សាច់ ដើរកាយអូរចំណុចនេះបន្តិចចំណុចនោះបន្តិច ហើយកាយដីបិទមុខទឹកមិនឱ្យហូរទៀត ម្តងគេថាបូមខ្សាច់ ម្តងថាកាយស្តារអូរមិនច្បាស់លាស់ ខ្ញុំសំណូមពរដល់អាជ្ញាធរជួយដោះស្រាយដល់ពលរដ្ឋផង»។
កាលពីថ្ងៃទី១៩ ខែមិថុនា ឆ្នាំ២០២៣ ប្រជាពលរដ្ឋបីភូមិប្រហែលជិត១០០នាក់មានភូមិតាស្វាយ ភូមិច្រនៀង និងភូមិតាមាឃឃុំគោកឃ្មុំ ស្រុកថ្មគោល ខេត្តបាត់ដំបង បានលើកគ្នាតវ៉ាដល់សាលាឃុំគោកឃ្មុំ និងសាលាស្រុកថ្មគោល សុំអន្តរាគមន៍ឱ្យក្រុមហ៊ុនដកគ្រឿងចក្រចេញពីមូលដ្ឋានម្តងហើយ តែមកទល់ពេលនេះ ក្រុមហ៊ុននៅបន្ត សកម្មភាពដដែល។
ប្រជាពលរដ្ឋអ្នកស្រី ហ៊ីង ដែលមានផ្ទះជាប់មាត់អូរបាននិយាយថាគាត់ និងអ្នកភូមិមានការ ព្រួយបារម្ភខ្លាចគេបូម ខ្សាច់ ធ្វើឱ្យបាក់ច្រាំងប៉ះពាល់ផ្ទះសម្បែងពួកគាត់។ អ្នកស្រីបន្ថែមថា កន្លងមកពេលអ្នកភូមិតវ៉ា ក្រុមហ៊ុនបានយល់ព្រមដកម៉ាស៊ីនបូមខ្សាច់ធុនធំចេញ ដោយគេប្រាប់ពលរដ្ឋថាស្តារអូរ និងធ្វើផ្លូវសងខាង៤ម៉ែត្រឱ្យពលរដ្ឋប្រើប្រាស់ ប៉ុន្តែមកទល់ពេលនេះមួយខែហើយមិនឃើញស្តារអូរនោះទេ ឃើញតែកាយកន្លែងនេះបន្តិចកន្លែងនោះបន្តិច ។
អ្នកស្រី ហ៊ីង បន្ថែមថា៖ «យើងព្រួយបារម្ភរឿងម៉ាស៊ីនតែមួយប៉ុណ្ណោះ ពីមុនគេដាក់ម៉ាស៊ីនធំមក តែក្រោយតវ៉ាគេដាក់ម៉ាស៊ីនតូចមក មិនដឹងបូមអីទៀតទេ ហើយប៉ុន្មានថ្ងៃនេះគេដើរជួលដីអ្នកភូមិក្បែរមាត់អូរបន្ថែមទៀត និងដាក់ស្លាកហាមប្រជាពលរដ្ឋមិនឱ្យចូលទៀតផង ពួកខ្ញុំមិនហ៊ានចូលទេ មិនដឹងក្នុងហ្នឹងក្រុមហ៊ុនគេធ្វើអីគេ មានតែ ហៅអាជ្ញាធរមកចូលមើលដើម្បីឱ្យដកគ្រឿងចក្រចេញ»។
អ្នកស្រី យ៉ង់ ឌៀ ដែលជាម្ចាស់ដីដែលជួលឱ្យក្រុមហ៊ុនខាងលើបោះទីតាំង បាននិយាយថា មុនដំបូង តំណាងក្រុមហ៊ុនម្នាក់មិនស្គាល់ឈ្មោះ បានមកចចារសុំជួលដីរបស់អ្នកស្រី ដើម្បី ដាក់គ្រឿងចក្រស្តារអូរ ពេលនោះដោយ អ្នកស្រីគិតថាបានគេមកស្តារអូរឱ្យជ្រៅ ដើម្បីមានទឹកប្រើប្រាស់ផង គាត់ក៏យល់ព្រមជួលឱ្យ១ខែ៣០ម៉ឺនរៀល ប៉ុន្តែគាត់មិនទាន់បានទទួលលុយនោះទេ។
អ្នកស្រី យ៉ង់ ឌៀ បន្ថែមថា៖ «បើគេស្តារអូរទៅបានទឹកប្រើ ព្រោះអីខ្ញុំដាំដំណាំអីអត់បានទេទឹកលិចរហូត ព្រោះវារ៉ាក់ ដល់ពេលគេថាស្តារអូរឱ្យជ្រៅហើយ ធ្វើផ្លូវ៤ម៉ែត្រសងខាងអូរបានធ្វើដំណើរស្រួលទៀត ខ្ញុំនិងប្អូនក៏យល់ព្រមជួលឱ្យ១ខែ៣០ម៉ឺនរៀលយកលុយមកចែកគ្នា ដើម្បីទិញអង្ករអីហូប ព្រោះរកអីអត់បានផង» ។
ទោះបីយ៉ាងណា ជាងដែកម្នាក់ឈ្មោះ រិទ្ធ រតនា ដែលកំពុងផ្សារដែកនៅក្នុងការដ្ឋានក្រុមហ៊ុនខាងលើនេះបាននិយាយថា គាត់មិនស្គាល់ឈ្មោះក្រុមហ៊ុននេះដែរ ហើយគាត់ត្រូវបានមេការក្រុមហ៊ុនជួលមកផ្សារជើងទម្រម៉ាស៊ីនដើម្បីបណ្តែតលើទឹករយៈពេល១០ថ្ងៃមកហើយ។
លោក រិទ្ធ រតនា បញ្ជាក់ថា៖ «គេជួលខ្ញុំមួយថ្ងៃ៥ម៉ឺនរៀល ដោយគេប្រាប់ថាឱ្យផ្សារជើងទម្រសម្រាប់ដាក់ម៉ាស៊ីនបូមខ្សាច់ ខ្ញុំមិនដឹងក្រុមហ៊ុនឈ្មោះអីនោះទេ»។
យ៉ាងណាក៏ដោយក្រោយពីពលរដ្ឋឡើងមកតវ៉ានេះ ឃើញមានវត្តមានអាជ្ញាធរស្រុក ឃុំ ភូមិ និងសមត្ថកិច្ចបានចុះមកកាន់ទីតាំងក្រុមហ៊ុនខាងលើនេះ ដើម្បីធ្វើការដោះស្រាយភ្លាមៗដែរ។
លោក ភួង ស៊ីល្យា អភិបាលរងស្រុកថ្មគោល ដែលដឹកនាំមន្រ្តីចម្រុះមកដោះស្រាយបានថ្លែងថា អូរនេះជាអូរបូរាណ ដែលមានទទឹង៤០ម៉ែត្រ តែដោយសារបាក់ច្រាំងធ្វើឱ្យកន្លែងខ្លះរួមតូចកន្លែងខ្លះធំ ដែលពលរដ្ឋអាស្រ័យផលច្រើនភូមិក្នុងស្រុកថ្មគោល ។
លោកបន្តថា ក្រុមហ៊ុនខាងលើនេះបានមកបោះទីតាំងដាក់គ្រឿងចក្រដោយមិនទាន់មានច្បាប់អនុញ្ញាតិនោះទេ ប៉ុន្តែកន្លងមកក្រុមហ៊ុននេះបានដាក់ពាក្យស្នើសុំទៅខេត្តហើយ និងមានតំណាងខេត្ត មន្ទីរជំនាញ និងស្រុកបាន ចុះមកពិនិត្យម្តងហើយ តែមិនទាន់មានការសម្រេចយ៉ាងណានៅឡើយទេ ។
ចំពោះគោលបំណងក្រុមហ៊ុននេះធ្វើអ្វីពិតប្រាកដយ៉ាងណានោះលោកហាក់មិនច្បាស់ដែរដោយគ្រាន់តែដឹងថា ក្រុមហ៊ុននេះបានស្នើសុំកាយដីពីក្នុងអូរដើម្បីធ្វើផ្លូវបួនម៉ែត្រ សងខាងអូរប្រវែង៨០០ម៉ែត្រ ។
លោកអភិបាលរងស្រុក លើកឡើងថា៖ «គាត់ប្រាប់យើងថាកាយអាចន៍ដីហើយមកធ្វើផ្លូវ៤ម៉ែត្រ ប៉ុន្តែតាមការពិនិត្យជាក់ស្តែងវាអាចទាក់ទងរឿងខ្សាច់ហ្នឹងដែរ ប៉ុន្តែយើងមិនអាចនិយាយបានទេ យើងគ្រាន់តែដឹងថាអូរនេះ វាមានខ្សាច់ប៉ុណ្ណឹងទេ! ប៉ុន្តែយើងមិនទាន់ឃើញសកម្មភាពបូមខ្សាច់នៅឡើយ គ្រាន់តែឃើញកាយអូរខ្លះៗនៅឡើយ»។
ទោះបីយ៉ាងណា លោក ភួង ស៊ីល្យា បានបញ្ជាក់ថា អាជ្ញាធរបានសម្រេចឱ្យក្រុមហ៊ុនខាងលើនេះដកគ្រឿង ចក្រចេញសិន ហាមមិនអោយធ្វើសកម្មភាពអ្វីបន្ថែមទៀតនោះទេ បើសិនគ្មានច្បាប់អនុញ្ញាតត្រឹមត្រូវ។
ក្នុងកំណត់ហេតុរបស់អាជ្ញាធរស្រុកចុះថ្ងៃទី១០ ខែកក្កដា ឆ្នាំ២០២៣ បានកំណត់ឱ្យក្រុមហ៊ុនរើគ្រឿងចក្រចេញពីទីតាំងដែលបានកាយព្រោះគ្មានច្បាប់អនុញ្ញាតិត្រឹមត្រូវ ចាប់ពីពេលនេះតទៅដោយ មិនឱ្យមានជាលើកទីពីរទៀតនោះទេ។ ក្រោយពីចុះណែនាំហើយ ក្រុមហ៊ុនបានឯកភាពរុះរើចេញតាមការកំណត់របស់រដ្ឋបាលស្រុក ដោយក្រុមហ៊ុនសុំរយៈពេល៣ថ្ងៃរើចេញឱ្យអស់ ហើយអាជ្ញាធរស្រុកបញ្ជាក់ថា បើសិនជាគ្មានច្បាប់ អនុញ្ញាតនោះទេ ហាមមិនឱ្យក្រុមហ៊ុនធ្វើសកម្មភាពដាច់ខាតលើដីអូរនេះ។
ទាក់ទងករណីខាងលើនេះ បុរសចំណាស់ម្នាក់លោក រិទ្ធ សាវង់ វ័យ៥០ឆ្នាំ ដែលកំពុងគ្រប់គ្រងសម្ភារៈ និងគ្រឿងចក្រក្រុមហ៊ុនខាងលើ នេះបានអះអាងថា លោកគឺជាឱពុកក្មេករបស់ម្ចាស់ក្រុមហ៊ុននេះដែលមានឈ្មោះ គន្ធា ។ លោកបបញ្ជាក់ថាត្រូវបានកូនប្រសាររបស់គាត់អោយមកគ្រប់គ្រងទីតាំងនេះ នៅពេលដែលគេមិននៅ ដោយកូនរបស់គាត់ជួលដី អ្នកភូមិ ដើម្បីតម្លើងម៉ាស៊ីនបូមខ្សាច់ពីក្នុងអូរនេះ។
លោក រិទ្ធ សាវង់ បានបន្តថា៖ «ខ្ញុំមិនដឹងគម្រោងគេម៉េច ខ្ញុំអត់ដឹងច្បាស់ទេ គ្រាន់តែកូនឱ្យមកមើលការខុសត្រូវជំនួស ដោយគេបានសុំភូមិសុំឃុំធ្វើតេស្ត អូរនេះមានខ្សាច់ រឺអត់ ពេលតេស្តទៅ ឃើញមានខ្សាច់មិនដល់១០០ភាគរយទេ គឺមានខ្សាច់ ៦០ទៅ៧០ភាគរយ ប៉ុណ្ណោះ តែអាចរែងធ្វើអាជីវកម្មបាន»។
លោកបញ្ជាក់ថា កូនប្រសាររបស់គាត់មានមុខរបរដើរបូមខ្សាច់យូរឆ្នាំមកហើយដោយបូមតាមស្ទឹង តាមអូរ តាមទន្លេរនៅខេត្តកំពង់ធំ និងមណ្ឌលគីរី ដោយឡែកខេត្តបាត់ដំបងទើបតែលើកទីមួយនេះប៉ុណ្ណោះ ក្រោយរៀបការនឹងកូនស្រីរបស់លោកបានពីរឆ្នាំ។
ជុំវិញការណែនាំរបស់រដ្ឋបាលស្រុកថ្មគោលនេះលោក បន្ថែមថា កូនប្រសាររបស់លោកយល់ព្រមឱ្យរើគ្រឿងចក្រ និងសម្ភារៈចេញពីទីតាំងខាងលើវិញហើយ រង់ចាំការសុំច្បាប់តាមក្រោយ ។
លោក អ៊ិន គង់ជិត មន្រ្តីសម្របសម្រួលអង្គការលីកាដូរខេត្តបាត់ដំបង និងប៉ៃលិន ដែលចុះអង្កេតករណីនេះ បាន សាទរចំពោះចំណាត់ការរបស់អាជ្ញាធរស្រុកភ្លាមៗនៅពេលដែលពលរដ្ឋឡើងតវ៉ាស្នើសុំឱ្យដោះស្រាយកង្វល់របស់ពួកគាត់ធ្វើឱ្យពលរដ្ឋស្ងប់អារម្មណ៍និងមានទំនុកចិត្តលើរដ្ឋបាលស្រុក។
លោក គង់ជិត ថ្លែងថា៖ «សម្រាប់ក្រុមហ៊ុនចង់ធ្វើអាជីវកម្មបើចង់ផ្តល់ប្រយោជន៍ រឺគុណតម្លៃ ដល់សហគមន៍គួរដាក់ពាក្យទៅអាជ្ញាធរមានសមត្ថកិច្ច មន្រ្តីជំនាញដូចជា បរិស្ថាន ធនធានទឹក និងរ៉ែថាមពល ជាដើម ហើយអ្នកពាក់ព័ន្ធទាំងអស់ គួរនាំគ្នាចុះមកសិក្សា ស្រាវជ្រាវចំពោះសំណើសុំរបស់ក្រុមហ៊ុនថាតើការសុំហ្នឹងសមហេតុផល រឺអត់ ហើយគួរសិក្សាមួយច្បាស់លាស់និងពិគ្រោះយោបល់ជាមួយសហគមន៍ផ្ទាល់» ។
លោក បន្តថា៖ «បើសិនជាលក្ខណៈស្តាររឺអ្វីមួយគួរតែកំណត់ឱ្យមានស្តង់ដាបច្ចេកទេសត្រឹមត្រូវនិងឱ្យ ក្រុមហ៊ុនធ្វើកិច្ចសន្យាជាមួយអាជ្ញាធរដើម្បីបង្ការទៅថ្ងៃក្រោយ»។
សូមបញ្ជាក់ថា អូរខាងលើនេះមានប្រជាជន៦ភូមិក្នុងឃុំគោកឃ្មុំ រស់នៅអមសងខាងអូរ និង ប្រជាជនច្រើនភូមិទៀតនៅឃុំបន្សាយត្រែង ស្រុកថ្មគោល ខេត្តបាត់ដំបង កំពុងប្រើប្រាស់ និងអាស្រ័យផលប្រចាំថ្ងៃ៕
