សមាគមសម្ព័ន្ធអ្នកសារព័ត៌មានកម្ពុជា

ប្រជាសហគមន៍ឧត្តមស្រែពស់៧នាក់ ត្រូវបានសាលាដំបូងខេត្តកំពង់ស្ពឺសាកសួរពាក់ព័ន្ធនឹងទំនាស់ដីធ្លី

ប្រជាពលរដ្ឋទៅគាំទ្រ​ និងលើកទឹកចិត្តតំណាងសហគមន៍ឧត្តមស្រែពស់របស់ពួកគាត់ត្រូវបានសាកសួរនៅសាលាដំបូងខេត្តកំពង់ស្ពឺ កាលពីថ្ងៃទី១៨ ខែតុលា ឆ្នាំ២០២៣។ (រូបភាពផ្តល់ឱ្យ)
ប្រជាពលរដ្ឋទៅគាំទ្រ និងលើកទឹកចិត្តតំណាងសហគមន៍ឧត្តមស្រែពស់របស់ពួកគាត់ត្រូវបានសាកសួរនៅសាលាដំបូងខេត្តកំពង់ស្ពឺ កាលពីថ្ងៃទី១៨ ខែតុលា ឆ្នាំ២០២៣។ (រូបភាពផ្តល់ឱ្យ)

ប្រជាពលរដ្ឋ៧នាក់ ដែលជាអ្នកការពារព្រៃឈើនៃសហគមន៍«ឧត្តមស្រែពស់» ត្រូវបាន​តុលាការ​ខេត្តកំពង់ស្ពឺសាកសួរកាលពីថ្ងៃ​ទី​១៨ ខែតុលា ជុំវិញទំនាស់ដីធ្លីមួយកន្លែង​ជាមួយ​​មន្ត្រីទាហានកង​ពលតូច​«ង៧០»ស្ថិត​ក្នុង​ឃុំ​ត្រពាំង​ជោរ ស្រុក​ឱរ៉ាល់ ខេត្តកំពង់ស្ពឺ យោងតាមប្រជាសហគមន៍ និងដីកាកោះសាលាដំបូងខេត្ត។

ព្រះរាជអាជ្ញារងនៃអយ្យការ​អម​សាលាដំបូង​ខេត្ត​កំពង់​ស្ពឺ លោក រ៉ែន នរិន្ទ បានចេញដីកា នៅថ្ងៃទី១៥ កញ្ញា ឆ្នាំ២០២៣ កោះហៅពលរដ្ឋចំនួន៧នាក់ នៅភូមិ​ពោធិ៍​មាស ឃុំត្រ​ពាំង​ជោរ ឱ្យចូលបំភ្លឺនៅថ្ងៃទី១៨ ខែតុលា ​ក្រោមបទចោទដូចៗគ្នា ​រួម​មាន«ធ្វើឱ្យខូចខាតដោយចេតនា​មានស្ថានទម្ងន់ទោស រំលោភ រំលោភលើកម្មសិទ្ធិ គំរាម​សម្លាប់ និងជេរប្រមាថ» យោង​តាម​បណ្ដឹង​របស់​បុគ្គល​ឈ្មោះ អៀម ម៉ៅ ដែលពលរដ្ឋអះអាងថា​ជាមន្ត្រីទាហាន ខណៈពួកគាត់​ទើបតែ​ទទួលបានដីកា​កោះមុនមួយថ្ងៃប៉ុណ្ណោះ។

អ្នកនាំពាក្យតុលាការខេត្តកំពង់ស្ពឺ លោក ផេង ស៊ីភ័ណ្ឌ បានឱ្យដឹងថា បន្ទាប់ពី​បញ្ចប់ការ​សាក​សួរ​ពីម្សិលមិញនេះ គឺតុលាការពុំទាន់មាននីតិវិធីបន្តទៀតនោះទេ ដោយថា​តុលាការកំពុង​ប្រមូល​ព័ត៌មាន​បន្ថែម។

សមាជិកសហគមន៍ម្នាក់ដែលត្រូវបានកោះហៅ​ គឺលោក ឃន សារិទ្ធ អាយុ៤២ឆ្នាំ ថ្លែងប្រាប់ ខេមបូចា នៅថ្ងៃពុធនេះថា រូបលោកនិងពលរដ្ឋមិនបានគំរាមសម្លាប់ និងរំលោភកម្មសិទ្ធិ ជេរ​ប្រមាថ ដូចទៅនឹងដីកាឲ្យចូលខ្លួនបំភ្លឺ ដែលមានដើមបណ្ដឹងជាទាហាន ឈ្មោះ អៀម ម៉ៅ នោះទេ។ ចំពោះបណ្ដឹងនេះ លោកបញ្ជាក់ថា តុលាការក៏មិនទាន់សម្រេចចោទ​ប្រកាន់​រូប​លោក​ទាំង៧នាក់ដែរ។

 លោក សារិទ្ធ ពន្យល់ថា ពលរដ្ឋបានដាំកូនឈើទៅលើដីដែលនៅក្បែរវត្តមេត្តាធម្មជាតិ ត្បិត​ទីនោះ​មាន​សត្វព្រៃ​ឆ្លងកាត់ និងចង់ថែរក្សាដើម្បីជាប្រយោជន៍ជាតិ ខណៈកន្លងទៅធ្លាប់មាន​ក្រុមការងារ​អតីតនាយករដ្ឋមន្ត្រីធ្លាប់ចុះមកអន្តរាគមន៍ ថានឹងជួយកាត់ដីដែលនៅក្បែរ​វត្ត​ទុក​ឲ្យ​សហគមន៍ថែរក្សា ក្នុងនោះក្រសួងដែនដី​ក៏ធ្លាប់ចេញលិខិតមកអភិបាលខេត្តជុំវិញ​បញ្ហា​ដី​សហគមន៍នេះដែរ។ ដូច្នេះទើបពលរដ្ឋសុំការពារដីដែលបានដាំកូនឈើ​រួចព្រោះជាដី​ដែល​សហគមន៍​ថែរក្សាកន្លងមក បើទោះបីដីនោះស្ថិតក្នុងដីដែលត្រូវកាត់ឆ្វៀលក៏ពិតមែន។

ប្រជាសហគមន៍រូបនេះថ្លែងថា៖ «ដីនោះគេឈូសហើយ តែវានៅក្នុងបរិវេណវត្តមេត្តាធម្មជាតិ​ដូច្នេះពួកយើងសុំដីម្ដុំហ្នឹងដោយសារមានព្រះ ដើម្បីដាំដើមឈើឡើងវិញ ម្យ៉ាងទៀតយើង​បាន​ធ្វើ​លិខិត​ទៅ​ក្រសួងជាច្រើនដើម្បីសុំដំណោះស្រាយ ដូច្នេះបានជាយើងឃាត់គាត់​[ទាហាន] ឲ្យចាំដំណោះស្រាយសិន។ យើងចង់សុំមួយចំណែកទុកតំបន់ហ្នឹង​ជាទី​សក្ការៈ​បូជា»

ចំណែកលោក ឈន ធា ប្រជាសហគមន៍ឧត្តមស្រែពស់ ដែលត្រូវបានតុលាការកោះហៅ ថ្លែងថា ជារឿងដ៏អយុត្តិធម៌ចំពោះរូបលោកនិងប្រជាសហគមន៍ផ្សេងទៀត ដែលគ្រាន់តែ​ការពារ​ដីព្រៃ​សហគមន៍សម្រាប់សម្បត្តិរដ្ឋ និងជាប្រយោជន៍រួម មិនមែនដើម្បីប្រយោជន៍​បុគ្គល បែរជាត្រូវរងបណ្ដឹងពីមន្ត្រីទាហាន«ង៧០» ពីបទគំរាមសម្លាប់ និងជេរប្រមាថទៅវិញ  ត្បិតកន្លងមកពលរដ្ឋទេ ដែលរងការគំរាម និងហិង្សាពីក្រុមទាហាន។

លោក ធា បញ្ជាក់ថា៖ «ពាក្យបណ្ដឹងមកលើពួកខ្ញុំទាំង៧នាក់គឺមានភាពអយុត្តិធម៌ ព្រោះពួកខ្ញុំ​ថែរក្សាធនធានធម្មជាតិ មិនមែនយកជាកម្មសិទ្ធិបុគ្គល បែរជាគាត់ចោទពួកខ្ញុំ៧នាក់ វា​អយុត្តិធម៌​សម្រាប់ពួកខ្ញុំ»

លោក ធា បន្ថែមឲ្យដឹងថា ប្រជាពលរដ្ឋទាំងអស់នៃសហគមន៍ឧត្តមស្រែពស់ បានដាំកូនឈើ​ប្រមាណ​១ម៉ឺនដើម ដើម្បីស្ដារព្រៃឡើងវិញ ដោយសង្ឃឹមថា​នឹងជាប្រយោជន៍​សម្រាប់​សង្គម​ជាតិ ពិសេសជាជម្រកសត្វព្រៃផងដែរ។ ប៉ុន្តែក្រុមទាហាននៅតែមក​ឈូសឆាយបំផ្លាញដី​ដែល​​​ពលរដ្ឋដាំកូនឈើ ខណៈដីនោះនៅមិនទាន់មានដំណោះស្រាយនៅឡើយ ត្បិត​ពលរដ្ឋ​បានស្នើសុំដីនោះជាដីសហគមន៍។

ប្រជាសហគមន៍ឧត្តមស្រែពស់មួយចំនួនដែលចូលទៅឆ្លើយនៅ​សាលាដំបូង​ខេត្តកំពង់ស្ពឺ យោងតាម​ដីកាកោះពាក់ព័ន្ធនឹងពាក្យបណ្តឹងរបស់មន្ត្រីទាហានម្នាក់។ រូបថតនៅថ្ងៃទី១៨ ខែតុលា​ ឆ្នំា២០២៣។ (រូបភាពផ្តល់ឱ្យ)

លោកបានលើកឡើងថា៖ «យើងខ្ញុំមិនបានប្រព្រឹត្តធ្វើឲ្យខូចខាត ឬគំរាមសម្លាប់ រំលោភ​កម្មសិទ្ធិនោះទេ គាត់ឈ្មោះអៀម ម៉ៅ ដែលប្ដឹងខ្ញុំគឺជាទាហាននៅ ង៧០ គាត់មកឈូស​កូនឈើ​​ដែលពលរដ្ឋដាំ ហើយគាត់ថាជាដីរបស់គាត់។​ ដីនោះស្ថិតក្នុងទំនាស់ជាមួយ​សហគមន៍ សហគមន៍គ្រាន់តែហាម[ឃាត់]កុំឲ្យឈូសដើម្បីស្ដាព្រៃឡើងវិញ»។​

លោក ធា បន្តថា កន្លងទៅអភិបាលខេត្តកំពង់ស្ពឺ និងមន្រ្តីពាក់ព័ន្ធធ្លាប់ចុះមកអន្តរាគមន៍ដែរ ប៉ុន្តែមិនទាន់បានកំណត់ព្រំដីឲ្យច្បាស់លាស់រវាងដីសម្រាប់សហគមន៍ និងដីដែលកាត់ឲ្យ​ក្រុម​ទាហាននោះទេ។
លោក ធា បន្ថែមថា៖ «ពួកខ្ញុំស្នើឲ្យស្ថាបនរដ្ឋដោះស្រាយឲ្យសហគមន៍កុំឲ្យមាន​ទំនាស់​ជាមួយ​ទាហាន ដើម្បីស្ដារព្រៃឡើងវិញ»

អ្នកស្រី ឃន ខន ជាប្រជាសហគមន៍ឧត្តមស្រែពស់ អាយុ៦៧ឆ្នាំ ឲ្យដឹងថា ពួកគាត់មិន​បាន​រំលោភបំពាន គំរាមសម្លាប់ទៅលើមន្រ្តីទាហាន ដែលមានកាំភ្លើងនោះទេ គឺពួកគាត់ការពារ​ដីព្រៃ និងដាំដើមឈើដើម្បីស្ដារព្រៃឡើងវិញ នៅលើដីដែលនៅក្បែរវត្តមេត្តាធម្មជាតិ​ប៉ុណ្ណោះ។

ស្រ្តីចំណាស់រូបនេះ ថ្លែងបន្តថា ប្រជាសហគមន៍មិនមានអំណាច ឬអាវុធទៅគំរាមសម្លាប់​មន្រ្តី​​ទាហានឡើយ ហើយអ្វីដែលពលរដ្ឋធ្វើកន្លងមកគឺដើម្បីការពារដីព្រៃសម្រាប់ប្រយោជន៍ជាតិ​ប៉ុណ្ណោះ។

អ្នកស្រី ខន បាននិយាយថា៖ «ខ្ញុំឆ្ងល់ថាពួកខ្ញុំជាប្រជាពលរដ្ឋ ខំថែរក្សាដីព្រៃ​ទុកឲ្យ​ក្មេង​ជំនាន់​ក្រោយ​មើល ទៅជាខុសវិញ។ ឯគាត់[ទាហាន]អ្នកឈូសឆាយ ពួកខ្ញុំឃាត់ថាឲ្យចាំមាន​ដំណោះ​​​ស្រាយ​សិន ខ្ញុំពិបាកណាស់អ្នកគ្រូ ឃាត់ថ្ងៃ យប់ឡើងលួចឈូស»

អ្នកស្រី ខន សំណូមពរទៅរដ្ឋាភិបាល និងតុលាការឲ្យជួយរកដំណោះស្រាយ​ជូន​ប្រជាសហគមន៍ ជាជាងយកប្រព័ន្ធតុលាការមកដាក់គំនាបពលរដ្ឋ ខណៈពលរដ្ឋ​ទាំងអស់​តស៊ូ​ការពារព្រៃ លះបង់ពេលវេលា និងប្រឈមបញ្ហាជីវភាពយ៉ាងលំបាក។

អ្នកស្រីថ្លែងទៀតថា៖ «សូមគ្រប់ស្ថាប័នជួយប្រជាពលរដ្ឋយើងខ្ញុំ ជួយរកដំណោះ​ស្រាយ​ឲ្យ​យើងខ្ញុំផង ឥឡូវកំពុងពិបាកវេទនាខ្លាំងណាស់ ពួកខ្ញុំមិនបានធ្វើអីខុសទេ គ្រាន់​តែ​ការពារ​ដី​ទុកជាសម្បត្តិរដ្ឋ ទុកឲ្យក្មេងជំនាន់ក្រោយមើលផងនៅតិចតួចហ្នឹង»

ព្រះតេជគុណ ព្រំ សុជាតិ ជាព្រះសង្ឃគង់នៅវត្តព្រៃមេត្តាធម្មជាតិ មានសង្ឃដីកាថា ប្រជាពលរដ្ឋ​​សហគមន៍ការពារព្រៃមេត្តាធម្មជាតិនៃសហគមន៍ឧត្តមស្រែពស់ រងបណ្ដឹង​ពី​ក្រុម​ទាហាន ខណៈក្រុមទាហានចូលភ្ជួរបំផ្លាញចោលកូនឈើចម្រុះ ដែលប្រជាសហគមន៍​បានដាំ​ក្នុង​ពេលកន្លងមកចំនួនប្រមាណជា ៤ ០០០ដើម ដោយក្រុមទាហាន​បានយកដើមចេក​​មកដាំ​នៅ​លើដីនោះវិញ។

ព្រះតេជគុណ មានសង្ឃដីកាថា៖ «អាត្មាបានដឹងបានឮ បានឃើញ ព្រឹត្តិការណ៍អស់​ហ្នឹង​បាន​ប៉ះពាល់ដល់អាត្មា គេវាយ គេបាញ់ គេដុតកុដិ តែយើងជាអ្នកបួសមិនកាន់ការធំដុំ»។

លោក ទេព ណែម មេឃុំត្រពាំងជោរ លើកឡើងថា រដ្ឋាភិបាលបានកាត់ដីតំបន់នោះឲ្យ​ទៅ​កងទ័ព​កាលពីឆ្នាំកន្លងទៅហើយ ចំពោះការតវ៉ារបស់ពលរដ្ឋ និងក្រុមទាហាន លោកមិនទាន់​ដឹងច្បាស់នៅឡើយទេ ត្បិតកន្លងមកធ្លាប់មានការចុះវាស់វែងពីអភិបាលខេត្តម្ដងមកហើយ។

លោក ណែម ថ្លែងថា៖ «ខ្ញុំក្ដាប់មិនបានដែរ បើដីក្នុងវត្តដែលគេឈូស គេមានព្រំប្រទល់អស់​ហើយ តែគេ​ធ្វើអី​ទៀតខ្ញុំអត់យល់ដែរ»

ប្រជាពលរដ្ឋទៅគាំទ្រ​ និងលើកទឹកចិត្តតំណាងសហគមន៍ឧត្តមស្រែពស់របស់ពួកគាត់​ត្រូវ​បាន​សាកសួរនៅ​សាលា​ដំបូង​ខេត្តកំពង់ស្ពឺ កាលពីថ្ងៃទី១៨ ខែតុលា ឆ្នាំ២០២៣។ (រូបភាពផ្តល់ឱ្យ)

ខេមបូចា មិនអាចស្វែងរកការឆ្លើយតបពីលោក ច័ន្ទ ថេតថានរៈ ប្រធានមន្ទីរបរិស្ថាន​ខេត្តកំពង់ស្ពឺ បានឡើយនៅថ្ងៃពុធនេះ។

អភិបាលខេត្តកំពង់ស្ពឺលោក វ៉ី សំណាង ប្រាប់ ខេមបូចា ថា លោកមិនបានជ្រាបអំពីព័ត៌មាន​ថាប្រជាសហគមន៍ឧត្តមស្រែពស់ ត្រូវបានកោះហៅទៅតុលាការជុំវិញវិវាទរវាងសហគមន៍ និងមន្រ្តីទាហានឡើយ។ ហើយចំពោះបញ្ហាដែលពលរដ្ឋស្នើសុំឲ្យកាត់ឆ្វៀលដី​ដើម្បី​ទុកជា​ដី​សហគមន៍ និងសម្បត្តិរដ្ឋ លោកនឹងជំរុញឲ្យមន្រ្តីពាក់ព័ន្ធដោះស្រាយ តែចំពោះបណ្ដឹងដល់​តុលាការ​លោកមិនអាចលូកដៃបានទេ។

លោក សំណាង ថ្លែងថា៖ «ចុះរាល់ដងដែលគ្រវាត់ចោលពួកគាត់ឯណា ប្រជាជនយើងហ្នឹង​ មិន​ចោលពីណាទេ ឲ្យតែជាពលរដ្ឋល្អស្លូតត្រង់យើងនៅខាងគាត់ជានិច្ច។ ខ្ញុំនឹងជំរុញមន្រ្តី​ពាក់​ព័ន្ធ​ខិតខំសម្របសម្រួលដោះស្រាយរឿងហ្នឹង។ ចំណែកការកោះហៅ ជានិតិវិធី​តុលាការ​»

គួរជម្រាបថា កាលពីខែសីហា ឆ្នាំ២០២១ រដ្ឋាភិបាល បានចេញអនុក្រឹត្យ​មួយដោយ​ធ្វើ​អនុប្បយោគ​ផ្ទៃដីទំហំ២៦២,២៤ហិកតា ក្នុងដែនជម្រកសត្វព្រៃភ្នំឱរ៉ាល់ នាភូមិសាស្ត្រ​ភូមិ​ពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ជាទ្រព្យសម្បត្តិឯកជនរបស់រដ្ឋ ដើម្បី​ធ្វើប្រទានកម្មជាកម្មសិទ្ធិជូនក្រុមគ្រួសារយោធិនបញ្ជាការដ្ឋានរថក្រោះកងទ័ពជើងគោក ចំនួន​៤១គ្រួសារ សម្រាប់សាងសង់លំនៅឋាន និងបង្កបង្កើនផល។

ក្រោយអនុក្រឹត្យចេញជាផ្លូវការ អ្នកភូមិជាច្រើននាក់បានតវ៉ាប្រឆាំងនឹង​សេចក្តីសម្រេចនេះ​ជាបន្ត​បន្ទាប់ នៅពេលដែលទាហានមួយក្រុមមកពីអង្គភាពបញ្ជាការដ្ឋានរថក្រោះ​បានមក​បោះ​បង្គោលព្រំដែនដី ហើយបានចាប់ផ្តើមឈូសឆាយព្រៃដោយប្រើគ្រឿងចក្រ។ ក្រោយ​ការ​តវ៉ា អ្នក​ភូមិ​៦​នាក់​ត្រូវ​បាន​កោះ​ហៅ​មក​សាកសួរកំឡុងខែកុម្ភៈ។

ប៉ុន្តែបើតាមប្រជាសហគមន៍ឧត្តមស្រែពស់ អះអាងថា មកទល់ពេលនេះ ពួកគេមិនឃើញ​មាន​គ្រួសារក្រីក្រ ឬគ្រួសារកងទ័ពណាមកសង់ទីលំនៅ កសាងគ្រួសារលើដីដែលរដ្ឋាភិបាល​បាន​កាត់ឆ្វៀលប៉ះចំដីសហគមន៍ថែរក្សានោះទេ។

ខេមបូចា មិនអាចរកការឆ្លើយតបពីដើមបណ្ដឹង ឈ្មោះ អៀម ម៉ៅ ដែលពលរដ្ឋអះអាងថា ជា​មន្រ្តី​​ទាហាននោះទេ ខណៈអ្នកនាំពាក្យអគ្គបញ្ជាការដ្ឋាន លោក ថោង សូលីម៉ូ បដិសេធ​មិន​ធ្វើការ​អធិប្បាយនោះទេ ដោយលោកថាកំពុងនៅក្រៅប្រទេស និងក្ដាប់ព័ត៌មានមិនបាន។

អ្នកនាំពាក្យបញ្ជាការដ្ឋានកងទ័ពជើងគោក លោក ម៉ៅ ផល្លា បដិសេធមិនធ្វើអត្ថាធិប្បាយអំពី​ករណីនេះទេ ហើយគាត់បានឱ្យទៅសួរ លោក​ ថោង សូលីម៉ូ ជំនួសវិញ។

ទោះជាយ៉ាងនេះក្តី លោក ហេង គឹមហុង អ្នកគ្រប់គ្រងកម្មវិធីស្រាវជ្រាវ និងតស៊ូមតិនៅ​បណ្តាញ​​​​យុវជនកម្ពុជា ថ្លែងថានេះជារបត់ថ្មីមួយ ខណៈ​ប្រជាពលរដ្ឋ​ជា​អ្នកការពារ​ព្រៃឈើ​រង​បណ្ដឹង​ពីក្រុមទាហាន ដែលប្រើប្រាស់ហិង្សា ឬអាវុធ គំរាមសម្លាប់ប្រជាសហគមន៍ លោក​បន្តថា តុលាការគួរផ្ដល់យុត្តិធម៌ដល់ប្រជាពលរដ្ឋ។

លោក គឹមហុង ថ្លែងថា៖ «តុលាការមេត្តាពិនិត្យ និងទម្លាក់បទចោទ ហើយធ្វើការទៅលើពាក្យ​បណ្ដឹងដែលសហគមន៍ធ្លាប់ដាក់កន្លងមក ផ្ទុយទៅវិញទាហានដែលប្រព្រឹត្តហិង្សា ប្រើប្រាស់​អាវុធគំរាមប្រជាពលរដ្ឋ ប្ដឹងទៅតុលាការទៅវិញ»

លោក គឹមហុង ចង់ឃើញរដ្ឋាភិបាលអនុម័តច្បាប់អនុប្រយោគជាមុនសិន មុននឹងបន្តឆ្វៀល​ដី​ទៅ​​ឲ្យក្រុមហ៊ុនវិនិយោគ ឬបុគ្គលកាន់កាប់ ជៀសវាងជម្លោះកើតឡើ់ង និងការរំលោភ​សិទ្ធិ​មនុស្ស​។

លោក គឹមហុង បន្ថែមថា៖ «អាចធ្វើឲ្យមា​នការរំលោភសិទ្ធិមនុស្សកើតឡើងដែរ បើសិនណា​រដ្ឋាភិបាលអត់មានការពិគ្រោះយោបល់ជាមុនកំណត់និតិវិធីអនុប្រយោគជាក់លាក់»

មន្រ្តីអង្កេតការរបស់អង្គការអាដហុកប្រចាំខេត្តកំពង់ស្ពឺ លោក រ័ត្ន ថាវី រំពឹងថា តុលាការនឹង​មិនចោទប្រកាន់​ទៅលើប្រជាសហគមន៍នោះទេ ហើយលោកមានការសោកស្ដាយពលរដ្ឋ​ដែល​​​ការពារព្រៃឈើតែងប្រឈមនឹងច្បាប់។

លោក ថាវី ថ្លែងថា៖ «យើងសង្គមស៊ីវិលស្នើសុំចំណាត់ការឲ្យមានតម្លាភាព ព្រោះការ​ទាម​ទារ​​របស់​ប្រជាពលរដ្ឋ គឺដើម្បីប្រយោជន៍សាធារណៈ»

រាយការណ៍បន្ថែមដោយ ផុន សុទ្ធីរ័ត្ន

158 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម