សមាគមសម្ព័ន្ធអ្នកសារព័ត៌មានកម្ពុជា

ព្រលានយន្តហោះសៀមរាបបញ្ចុះតម្លៃលើការធ្វើដំណើរលើផ្លូវចេញនិងចូល បន្ទាប់ពីចរចា

តារាងតម្លៃនៃប្រភេទយានយន្តដែលឆ្លងកាត់ផ្លូវចូលទៅព្រលានយន្តហោះខេត្តសៀមរាបថ្មី ដែលកសាងឡើងដោយក្រុមហ៊ុនចិន និងគ្រប់គ្រងរយៈពេល៥៥ឆ្នាំ។ រូបថតថ្ងៃទី៤ ខែមករា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)
តារាងតម្លៃនៃប្រភេទយានយន្តដែលឆ្លងកាត់ផ្លូវចូលទៅព្រលានយន្តហោះខេត្តសៀមរាបថ្មី ដែលកសាងឡើងដោយក្រុមហ៊ុនចិន និងគ្រប់គ្រងរយៈពេល៥៥ឆ្នាំ។ រូបថតថ្ងៃទី៤ ខែមករា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)

ក្រុមហ៊ុនចិនគ្រប់គ្រងព្រលានយន្តហោះថ្មីនៅខេត្តសៀមរាបបានបញ្ចុះតម្លៃពី៣៣ភាគរយទៅ៥០ភាគរយនៃតម្លៃធ្វើដំណើរឆ្លងកាត់ផ្លូវ​​ចូលព្រលាន ខណៈអ្នកបើតាក់ស៊ីអះអាងថា នៅតែទទួលបានផល​​ចំណេញតិចតួច។

សេចក្តីប្រកាសរបស់ទីស្តីការគណៈរដ្ឋមន្ត្រីចុះថ្ងៃទី១១​ ខែមករា គណៈកម្មការចម្រុះដែលបង្កើត ឡើង​ដោយរដ្ឋាភិបាលបានសម្របសម្រួលជាមួយភាគីពាក់ព័ន្ធឈានដល់ការបញ្ចុះតម្លៃអ្នកធ្វើ​ដំណើរ​លើផ្លូវចូល និងចេញពីអាកាសយានដ្ឋានអន្តរជាតិសៀមរាប-អង្គរ បានសម្រេច​បញ្ចុះ​តម្លៃ​ពី​៣៣ភាគរយរហូតដល់​៥០​ភាគរយ​ទៅ​តាមប្រភេទរថយន្ត។ តម្លៃពីមុនរថយន្តឆ្លងកាត់ផ្លូវចូល និង​ចេញ​ពីព្រលាន​​យន្តហោះចម្ងាយជាង២០គីឡូម៉ែត្រ​ត្រូវ​បែង​ចែករថយន្តជា៤ប្រភេទ ដែលថ្លៃ​បង់​ថ្លៃ​ចន្លោះពី៣ដុល្លារដល់១២ដុល្លារ ក្នុងពេលធ្វើដំណើរឆ្លងកាត់ម្តង ប៉ុន្តែចាប់ពីថ្ងៃទី១៥ ខែមករា តម្លៃ​នឹង​ធ្លាក់មកនៅត្រឹមចន្លោះពី២ដុល្លារទៅ៨ដុល្លារវិញ។

សម្រាប់អ្នកបើកតាក់ស៊ីដឹកភ្ញៀវនៅអាកាសយានដ្ឋានអន្តរជាតិសៀមរាប-អង្គរ បានសាទរចំពោះ​ការ​​សម្រេចនេះ។ ប៉ុន្តែពួកគេលើក ឡើងថា បច្ចុប្បន្នពួកគេរកបានចំណូលបានទាប ហើយ​រដ្ឋាភិបាល​គួរ តែចរចាជាមួយក្រុមហ៊ុនចិនឈប់យកថ្លៃធ្វើដំណើរឆ្លងកាត់ផ្លូវទុកតែថ្លៃចំណត​នៅ​ក្នុង​ព្រលានបានហើយ។

អ្នកបើកតាក់ស៊ីម្នាក់លោក យិប ភារម្យ ថ្លែងថា អ្នកបើកតាក់ស៊ីដែលប្រើប្រាស់ប្រេងសាំង ឬ​ម៉ាស៊ូត​ដូចក្រុមរបស់លោក គឺដឹកក្នុង​១ជើងអាចសល់តែ៥ដុល្លារតែប៉ុណ្ណោះ ដោយមិនទាន់​គិតលើចំណី​អាហារ​ផង។

លោក យិម ភារម្យ ថ្លែងថា៖«ខាងអូតែលគាត់ឱ្យថោកពេក ត្រឹម២០ ឬ ២៥ដុល្លារ ចឹងទៅ! ឡានដូច​ខ្ញុំទទួលអត់បាន។ អ៊ីចឹងទៅ! បង​ឯងគិតមើលថាគ្រាន់តែផ្លូវត្រូវចំណាយអស់៦ដុល្លារហើយ ហើយ​រឿង​កន្លែងចតហ្នឹងថា១ម៉ឺនរៀលទៀតទៅ រឿងប្រេងទៀតអស់​១០​ដុល្លារ​ល្មមហ្នឹងឯង ហើយ​នៅ​សល់​​​ប្រមាណ៥ដុល្លារ។ វាយ៉ាប់ពេលខ្ញុំមានតែឱ្យពួកម៉ាកហ្នឹងឯងផ្សេង បោះឱ្យ​ពួកម៉ាក​ផ្សេង​ដែល​ប្រើ​ឡានហ្គាសវិញ»

អ្នកបើកតក់ស៊ីម្នាក់ទៀតលោកសែន ស៊ិនបូណា ថ្លែងថា អ្នកធ្វើការងារលើសេវាទេសចរណ៍នៅ​ក្នុង​ខេត្តសៀមរាបជួបការលំបាកខ្លាំង ដែលក្នុងស្ថានភាពនេះ​រដ្ឋាភិបាល​គួរគិតអនុគ្រោះឱ្យ​បាន​ច្រើន។

លោក សែន ស៊ិនបូណា ថ្លែងថា៖«វិស័យទេសចរណ៍នៅសៀមរាបមានការយ៉ាប់យឺនខ្លាំង ហ្នឹង​ហើយ​! ទាមទារឱ្យមានការយកចិត្តទុកដាក់ និងផ្តល់នូវការអនុគ្រោះដល់​អ្នករកទទួលទាន​ពាក់ព័ន្ធ​នឹងវិស័យទេសចរណ៍ហ្នឹង។ អ្នករកស៊ីពាក់ព័ន្ធនឹងវិស័យទេសចរណ៍ដូចជា​ផ្ទះសំណាក់ សណ្ឋាគារ​អីហ្នឹងណា គ្នាទើបតែងើបប្រឹះៗតិចៗ បើយើងមកបន្ថែមបន្ទុកពីលើទៀតទៅវាហាក់ដូចជាប៉ះពាល់​ដល់អារម្មណ៍ពួគាត់ច្រើន ប៉ះពាល់ខ្លាំ ប៉ះពាល់ទាំងអារម្មណ៍ ប៉ះពាល់ទាំងជីវភាពរបស់​ពួកគាត់​»។​

សម្រាប់មគ្គុទេ្ទសក៍ទេសចរណ៍លោក ពេជ្រ ឆដា ថ្លែងថា រដ្ឋាភិបាលគួរសម្របសម្រួល លុបចោល​ការ​យកថ្លៃធ្វើដំណើរចូល និងចេញពីព្រលានយន្តហោះខេត្តសៀមរាបនេះ ដើម្បីជួយលើកកម្ពស់​ជីវភាពពលរដ្ឋក៏ដូចជាការកាត់បន្ថយការចំណាយរបស់ភ្ញៀវទេសចរណ៍។

លោក ពេជ្រ ឆដា ថ្លែងថា៖«ដូចខ្ញុំឧទាហរណ៍ខាងដើមអ៊ីចឹង វាមិនដែល​អាណា​ធ្វើបុរីធ្វើ​ផ្ទះ​ល្វែង​លក់​ឱ្យអតិថិជន ហើយពេលអតិថិជនចូលទៅក្នុងបុរីហ្នឹងតម្រូវឱ្យបង់លុយថ្លៃផ្លូវទេ។ ប្រសិន​ជា​អាច​ខ្ញុំចង់សំណូមពរទៅគណៈកម្មការចំពោះកិច្ចហ្នឹងឱ្យលើកលែងការបង់ថ្លៃផ្លូវ ថ្លៃចំណតរក្សា​ធម្មតា​អត់​​មានបញ្ហាទេ មិនជាបញ្ហាចោទ។ វាហួសហេតុចំពោះការបង់ថ្លៃផ្លូវ ទោះបីបញ្ចុះ​តម្លៃ​រយៈពេល​២ឆ្នាំ​ក៏ដោយ វាអត់សម ខ្ញុំគិតថាវាអត់សម»

ផ្លូវចូលអាកាសយាន្តដ្ឋានអន្តរជាតិសៀមរាប ដែលតភ្ជាប់ពីផ្លូវជាតិលេខ៦​ឆ្ពោះ​ទៅ​ព្រលានយន្តហោះខេត្តសៀមរាបថ្មី។ រូបថតថ្ងៃទី៤ ខែមករា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)

អ្នកនាំពាក្យអាកាសចរណ៍ស៊ីវិលលោក ស៊ិន ចាន់សេរីវុត្ថា មានប្រសាសន៍ថា លោកដឹងពីការ​ត្អួញ​ត្អែរ​របស់អ្នករត់តាក់ស៊ី ប៉ុន្តែលោក​ថា ការដោះស្រាយត្រូវធ្វើឡើងជាជំហានៗ។ លោកបន្តថា ការ​ចរចាឈានដល់ការសម្រេចនូវការបញ្ចុះតម្លៃនៅថ្ងៃទី១១ ខែមករានោះមានការលំបាក​ច្រើន​ណាស់។

លោក ស៊ិន សេរីវុត្ថា ថ្លែងថា៖«ពី១០០មកដល់៥០ពាក់កណ្តាលហ្នឹងវាល្មមដែរ វាអត់ដែលកន្លែង​ណាគេ​ប្រើទទេទេ អត់ដែលមានម៉ង បើទទេមានតែរបស់រដ្ឋទេ របស់មានការ​ចូលរួមពីការ​វិនិយោគ​វិស័យឯកជន វាតែងតែមានការបង់ថ្លៃខ្លះហើយ។ ពីដំបូងយើងចរចាមាន​​​ភាពតឹងតែងដែរ ខាង​វិនិយោគិន​គេមានការគណនាពីចំណូលពីចំណាយរបស់គេ ហើយពេលចរចាទៅដោយសារ​ហៅថា​ដើម្បី​ផលប្រយោជន៍ជាតិ ផលប្រយោជន៍ប្រជាជន ក្រុមហ៊ុនក៏បានចុះរយៈពេល២ឆ្នាំសិន អ៊ីចឹង​បន្ទាប់​ពីពីរឆ្នាំ ចាំយើងទៅចរចាទៀត»

ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វ៉ន ពៅ ស្នើរដ្ឋាភិបាល​ពិចារណា​លុបចោលការយកថ្លៃលើផ្លូវចូលព្រលានយន្តហោះនៅខេត្តសៀមរាប។ ទន្ទឹមនឹងនេះ លោកក៏ស្នើឱ្យរដ្ឋាភិបាលរៀបចំគោលនយោបាយទម្លាក់ទុនបន្ថែមជួយដល់អ្នកប្រកបរបរសេដ្ឋកិច្ចក្រៅប្រព័ន្ធក្នុងស្ថានភាពវិបត្តិសេដ្ឋកិច្ចនេះ។​

លោក វ៉ន ពៅ លើកឡើងថា៖«ជាទូទៅបើសិនក្នុងស្ថានភាពបែបនេះរដ្ឋគួរតែធ្វើការឧបត្ថម្ភធន​បន្ថែម​ទៀតទៅដល់អ្នកប្រកបមុខរបរទាំងអស់នោះ ដើម្បីគាត់មានប្រាក់ចំណូល មានធានា​ទៅ​ដល់​និរន្តរភាពសេដ្ឋកិច្ចរបស់ពួកគាត់ ហើយរដ្ឋគួរតែអន្តរាគមន៍មន្ថែមទៀតទៅក្រុមហ៊ុនឯកជន​ទាំង​អស់ដែលធ្វើការជាមួយអ្នកប្រកបមុខរបរសេដ្ឋកិច្ចក្រៅប្រព័ន្ធដូចជាអ្នកដឹកជញ្ជូនភ្ញៀវជាដើមហ្នឹងត្រូវFree​ជូន (អត់គិតថ្លៃ)ព្រោះអ្នកសេដ្ឋកិច្ចក្រៅប្រព័ន្ធប្រកបមុខរបរទាំងអស់ហ្នឹងគឺអ្នករងគ្រោះ​ដំបូង​មុនគេ»

អ្នកស្រាវជ្រាវពីការអភិវឌ្ឍន៍សង្គម​លោក មាស នី មានប្រសាសន៍ថា បញ្ហាស្មុគស្មាញនៅព្រលាន យន្ត​ហោះ​ខេត្តសៀមរាបនេះ ដោយសារតែរដ្ឋាភិបាលខ្វះខាតហើយពឹងគម្រោងសាងសង់​អាកាស​យានដ្ឋាន​អន្តរជាតិសៀមរាប-អង្គរនេះលើរដ្ឋាភិបាលចិន។ លោក​បន្តថា ករណីនៅព្រលានយន្ត ក៏ដូចជា ករណីជម្លៀសពលរដ្ឋ ចេញពីតំបន់អង្គរដែរគឺជាមេរៀន​សំខាន់ដែលរដ្ឋាភិបាលត្រូវ​ស្រាវ​​ជ្រាវ​​ឱ្យបានច្បាស់លាស់មុនដាក់ចេញគម្រោងណាមួយនៅពេលក្រោយ។

លោក មាស នី មានប្រសាសន៍ថា៖«បញ្ហានៅប្រលានយន្តហោះសៀមរាបនេះ ខ្ញុំគិតថា​ជាមេរៀន​មួយ ដែលរដ្ឋត្រូវតែគ្រោងទុកជាមុន​សម្រាប់ការវិនិយោគទុនដទៃទៀតនៅពេលខាងមុខ កុំឱ្យចាំ​មាន​​ប្រតិកម្មពីពលរដ្ឋបានយើងទៅដោះស្រាយនាំឱ្យពលរដ្ឋមានការ​រិះគន់។ ស្រដៀងគ្នានឹង​បញ្ហា​អាជ្ញាធរអប្សារានៅពេលដែលយើងចង់បានស្អីដែលដាក់ចូលបេតិកភណ្ឌយើងចេះតែនាំគ្នាសម្បាយចង់បានមោទនភាព ប៉ុន្តែពេលដេញពលរដ្ឋខ្លួនឯងចេញពីហ្នឹងទាំងភូមិៗ​នុះដែលធ្វើឱ្យ​ពលរដ្ឋមាន​ប្រតិកម្ម​មិនសប្បាយចិត្តនោះ សុទ្ធតែជមេរៀន»

អាកាសយានដ្ឋានអន្តរជាតិសៀមរាប-អង្គរសាងសង់អស់តម្លៃប្រមាណ១ពាន់ ១រយលានដុល្លារ​អាមេរិក ក្រោមគម្រោងក្រវ៉ាត់ផ្លូវពាណិជ្ជកម្មរបស់ចិន(BRI) បានដាក់ឱ្យប្រើប្រាស់ជាផ្លូវការនៅ​ខែវិច្ឆិកា ឆ្នាំ២០២៣។ គម្រោងនេះសាសង់ក្នុងទម្រង់ផ្ទេរ ឬ ហៅថា BOT បានន័យថា ព្រលាន​យន្តហោះនឹងប្រគល់ឱ្យរដ្ឋាភិបាលកម្ពុជាគ្រប់គ្រងវិញនៅឆ្នាំ២០៧៣ ក្រោមការគ្រប់គ្រងទាំង​ក្រុមហ៊ុន​ចិនរយៈពេល៥០ឆ្នាំ៕

489 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម