សមាគមសម្ព័ន្ធអ្នកសារព័ត៌មានកម្ពុជា

អ្នកប្រើប្រាស់ទូរសព្ទមួយចំនួនបារម្ភពីការលួចថតសំឡេងសន្ទនាឯកជនមកផ្សព្វផ្សាយជាសាធារណៈ

បុរសម្នាក់កំពុងនិយាយទូរស័ព្ទនៅទីសាធារណៈមួយកន្លែងក្នុងរាជធានីភ្នំពេញ។ រូបថតនៅថ្ងៃទី៦ ខែមេសា ឆ្នាំ២០២៣។ អាន វិចិត្រ/ ខេមបូចា
បុរសម្នាក់កំពុងនិយាយទូរស័ព្ទនៅទីសាធារណៈមួយកន្លែងក្នុងរាជធានីភ្នំពេញ។ រូបថតនៅថ្ងៃទី៦ ខែមេសា ឆ្នាំ២០២៣។ អាន វិចិត្រ/ ខេមបូចា

អ្នក​ប្រើប្រាស់ទូរសព្ទមួយចំនួន​បារម្ភពីការ​លួចថតសំឡេងសន្ទនាជាលក្ខណៈឯកជន​ ក្រោយ​ពីមានការ​បែក​ធ្លាយសំឡេងទំនាក់ទំនងជាលក្ខណៈឯកជនជាបន្តបន្ទាប់​ហើយករណីខ្លះ​ឈាន​​ដល់ការវាយប្រហារ ឬចោទប្រកាន់ផ្សេងៗ។​

និស្សិតម្នាក់កំពុងសិក្សានៅរាជធានីភ្នំពេញ​លោក អេង នីន ឱ្យដឹង​ថា​ រូបលោកចាប់អារម្មណ៍​ថា​ មានការលួចថត​សំឡេងសន្ទនាឯកជន​តាំង​ពីមានការផ្សព្វផ្សាយសំឡេង​សន្ទនា​រវាង​លោក ​កឹម សុខា និងនារីម្នាក់ឈ្មោះស្រីមុំ​។​ លោក​បន្តថា​ ក្រោយមក​ក៏​មានការ​បែកឆ្លាយ​សំឡេង​សន្ទនាជា​លក្ខណឯកជន​របស់អ្នក​ផ្សេងៗ​ទៀតក្រៅពីលោក កឹម សុខា ធ្វើឱ្យរូបលោក​មានការព្រួយបារម្ភពេលនិយាយតាមទូរសព្ទម្តងៗ។​

លោក អេង នីន លើកឡើងថា៖ «វាប៉ះពាល់ឯកជនភាពរបស់យើង នៅពេលយើងនិយាយ​រឿងរ៉ាវអ៊ីចឹងទៅ យើងអត់ចង់ឱ្យអ្នកណាដឹង ដល់ពេលគេផ្សព្វផ្សាយឱ្យអ្នកផ្សេងដឹង ទី១​ប៉ះពាល់​ដល់កិត្តិយស។ មិនត្រឹមតែកិត្តិយសយើងទេ ពេលខ្លះវាប៉ះពាល់ដល់គ្រួសារ ឬដៃគូ​សន្ទនាជាមួយយើងផងដែរ»។

សកម្មជនដីធ្លីម្នាក់នៅខេត្តត្បូងឃ្មុំ លោក ផុន សុផល ថ្លែងថា​ លោកខ្លាចក្នុងការនិយាយតាម​ទូរសព្ទ សូម្បីតែរឿងធម្មតា ឬដែលមិនមានអ្វីប្រឈមក៏ដោយ ព្រោះលោកមានអារម្មណ៍ថា ការនិយាយរបស់លោក​មិនមានលក្ខណៈឯកជនគឺមានគេស្តាប់បានគ្រប់គ្នា។​

លោក ផុន សុផល ឱ្យដឹងថា៖ «ការងារឯកជនភាពពេលខ្លះទំនាក់ទំនងស្នេហា ទំនាក់ទំង​អីផ្សេង​ក៏យកមកបែកធ្លាយដើម្បីកេងចំណេញដែរ។ ​យើងឃើញថា វាប្រឈមហានិភ័យ​ខ្ពស់​ចំពោះអ្នកប្រើប្រាស់ទូរសព្ទហ្នឹងសូម្បីតែនិយាយជាមួយបងក៏មានការ​បារម្ភដែរ»។​

ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា​ (CYN) លោក ហេង គឹមហុង សង្កេតឃើញថា​ ការ​បែកធ្លាយសំឡេងបន្តបន្ទាប់ បានធ្វើឱ្យលោកបារម្ភ និង​មានអារម្មណ៍ថា មិន​មានសុវត្ថិភាពពេលនិយាយតាមទូរសព្ទ។​ លោក​ជំរុញឱ្យស្ថាប័ន​ពាក់ព័ន្ធ​យកចិត្តទុកដាក់ក្នុងការរក្សាសុវត្ថិភាពដល់ការសន្ទនាជាលក្ខណៈឯកជន​ដែលច្បាប់ការពារ។​

លោក ហេង គឹមហុង ថ្លែងថា៖ «បើសិនជារឿងនេះមិនប៉ះពាល់ដល់សន្តិសុខជាតិ ឬ បង្កមហន្តរាយធ្ងន់ធ្ងរដល់ជាតិទេ ត្រូវរក្សាឯកជនភាពដល់ពលរដ្ឋ ឬ អតិថិជនទាំងអស់»។​

ការបែកធ្លាយសំឡេងសន្ទនាជាលក្ខណៈឯកជនបានផ្ទុះឡើងរវាង​លោក កឹម សុខា និង ស្ត្រីម្នាក់ដែលអ្នកកាត់សក់ដែលគេស្គាល់ឈ្មោះថា ស្រីមុំ កាលពីឆ្នាំ២០១៦ ដែលពេលនោះមានការចាប់អារម្មណ៍​ខ្លាំង​ពី​មហាជន។ ក្រោយមកក៏មានការទម្លាយសារសំឡេងសន្ទនាជាលក្ខណៈឯកជនបន្តបន្ទាប់ដែរ។​

នៅក្នុងដើមឆ្នាំ២០២៣នេះ មានការផ្សព្វផ្សាយសំឡេងទំនាក់ទំនងស្នេហា លាយលំពាក្យ​អាសអាភាសផងដែលមានការបញ្ជាក់ថា ជាអតីតអគ្គលេខាធិការបក្សភ្លើងទៀន​លោក​ លី សុធារ៉ាយុទ្ធ។  ដោយឡែកនៅ​ក្នុងខែមេសានេះ ក៏មានការបែកធ្លាយសំឡេងអភិបាលខេត្ត បាត់ដំបង​លោក សុខ លូ និយាយគ្នាតាមទូរសព្ទវាយប្រហារទៅប្អូនស្រីបង្កើត​លោកនាយក​រដ្ឋមន្ត្រី ហ៊ុន សែន គឺលោកស្រី ហ៊ុន ស៊ីណាត ជុំវិញករណីអំពើពុករលួយ​នៅច្រកដូង។​

ជុំវិញបញ្ហាព្រួយបារម្ភពីការលួចថតសំឡេងនិយាយគ្នាតាមទូរសព្ទនេះ អ្នកនាំពាក្យគណបក្ស​ប្រជាជនកម្ពុជា លោក សុខ ឥសាន លើកឡើងថា ជាបញ្ហាតិចតួចមួយនៅកម្ពុជា​មិនមាន​អ្វី​គួរ​ឱ្យព្រួយបារម្ភទេ។ លោក​បន្តថា បើម្ចាស់ខ្លួនយល់ថា ខ្លួនរងគ្រោះពីការថតសំឡេង​នេះអាច​ដាក់​ពាក្យប្តឹងទៅតុលាការ។​

លោក សុខ ឥសាន្ត បន្ថែមថា៖ «បើសិនជាសាមីជនយល់ថាការផ្សាយ​ប៉ះពាល់អាចប្តឹង​ទៅ​អង្គភាពសារព័ត៌មាន ឬ អ្នកផ្សព្វផ្សាយហ្នឹងឱ្យគេស្រាវជ្រាវទៅ»។​

ចំពោះសារព័ត៌មាន និងបណ្តាញទំនាក់ទំនងសង្គមមួយចំនួនយកសំឡេងនេះយក​ទៅ​ចុះ​ផ្សាយ​នោះ លោក សុខ ឥសាន្ត ថ្លែងថា រដ្ឋាភិបាលមិនមានវិធានការ​ទប់ស្កាត់ទេ គឺជា​សេរីភាព​សារព័ត៌មាន ។​

ទោះជាលោក សុខ ឥសាន្ត លើកឡើងថា នេះជាបញ្ហាតូចមួយក៏ដោយ ក៏លោកនាយក​រដ្ឋមន្ត្រី ហ៊ុន សែន ថ្លែងនៅក្នុងខែមេសា ឆ្នាំ២០២៣ ថា លោកមិនហ៊ាននិយាយគ្នាតាម​ទូរសព្ទ​ទេ ព្រោះខ្លាច​មានការលួចថតសំឡេងគឺលោកជ្រើសរើសការទំនាក់ទំនងតាម អ៊ីនធើណេត។​

លោក ហ៊ុន សែន៖ «អាស្មាតហ្វូតហ្នឹងជំនាញត្រូវរៀនមុនគេគឺទំនាក់ទំនងតែម្តង។ ហើយខ្ញុំ សូមប្រាប់ឱ្យហើយអ្នកទូរសព្ទមកខ្ញុំគឺខ្ញុំអត់ទទួលទេ។ ប៉ុន្តែបើតេមកតាម WhatUp Line Telegram Viber Signal អាហ្នឹងខ្ញុំទទួល។​ ឱ្យតែមកតាមអ៊ីនធើណេតខ្ញុំទទួល ប៉ុន្តែបើតាម​ហ្វូនខ្ញុំអត់ទទួលទេ។​ ខ្ញុំអត់និយាយទេព្រោះសំឡេងខ្ញុំត្រូវគេចាប់»

ប្រជាពលរដ្ឋកំពុងធ្វើដំណើរឆ្លងកាត់មុខក្រសួងប្រៃសណីយ៍ និងទូរគមនាគមន៍ តាម​បណ្តោយ​​មហាវិថីព្រះមុនីវង្ស រាជធានីភ្នំពេញ។ រូបថនៅថ្ងៃទី៦ ខែមេសា ឆ្នាំ២០២៣។ អាន វិចិត្រ/ ខេមបូចា​

របាយការណ៍របស់ស្ថាប័នទិន្នន័យ Statista បង្ហាញថា គិតត្រឹមឆ្នាំ២០២១ ក្នុង​ចំណោម​ពលរដ្ឋ​ប្រមាណ​១៦លាននាក់​មានចំនួនលេខទូរសព្ទប្រើប្រាស់ជិត​២០លាន​(១៩,៩លានលេខ)​​គឺពលរដ្ឋខ្លះប្រើលេខទូរសព្ទលើសពី១។​

ក្នុងរបាយការណ៍របស់អង្គការសង្គមស៊ីវិលក្នុងស្រុកដាក់ទៅអង្គការសហប្រជាជាតិកាលពីឆ្នាំ២០១៨ បញ្ហាលួចថតសំឡេងសន្ទនាជាលក្ខណៈឯកជនក៏ត្រូវបានដាក់បញ្ជូលជាចំណុចមួយ​ក្នុងចំណោម​ក្តីបារម្ភពីការរំលោភសិទ្ធិមនុស្សផ្សេងៗទៀតដែរ។​

នាយិកាមជ្ឈមណ្ឌលសិទ្ធិមនុស្សកម្ពុជាលោកស្រី ចក់ សុភាព ចាត់ទុកការលួចស្តាប់ការ​សន្ទនា​​តាមទូរសព្ទនេះខុសទាំងច្បាប់ និងបំពានសិទ្ធិឯកជនអ្នកប្រើប្រាស់។ ទន្ទឹមនឹង​ការ​ជំរុញ​ឱ្យស្ថាប័នរដ្ឋ និងក្រុមហ៊ុនទូរសព្ទពង្រឹងសុវត្ថិភាពដល់អ្នកប្រើប្រាស់ លោកស្រី ចក់ សុភាព ក៏រំឭកអ្នកប្រើប្រាស់ខ្លួនឯងឱ្យមានការប្រុងប្រយ័ត្នដែរ។​

លោកស្រី ចក់ សុភាព ថ្លែងថា៖ «រដ្ឋត្រូវធានាប្រព័ន្ធទូរគមនាគមន៍ហើយក្រុមហ៊ុនទៀត​សោត​ក៏ត្រូវធានាសុវត្ថិភាពដល់អតិថិជន ហើយអតិថិជនខ្លួនឯងអ្នកប្រើប្រាស់ហ្នឹងមានការ​ប្រុង​ប្រយ័ត្នក្នុងការប្រើប្រាស់បច្ចេកវិទ្យានៅសម័យបច្ចុប្បន្ន»។​​

មេធាវី សុក សំអឿន ពន្យល់ថា សមត្ថកិច្ចនគរបាលដែលអ្នកធ្វើការតំណាងឱ្យរដ្ឋាភិបាល​ជាអ្នកទប់ស្កាត់បទល្មើសលួចថតសំឡេងនេះ​។ លោក​បន្តថា បើនគរបាលអសកម្ម​នោះ​ធ្វើ​ឱ្យពលរដ្ឋឈានដល់មិនទុកចិត្តរដ្ឋាភិបាល។​

លោក សុក​ សំអឿន បានបញ្ជាក់ថា៖ «ប៉ូលិស និងរដ្ឋាភិបាលហ្នឹងហើយជាអ្នកទប់ស្កាត់។ ​បើរដ្ឋាភិបាលមិនទប់ស្កាត់ ប្រជាពលរដ្ឋមានការភ័យខ្លាច ហើយប្រជាពលរដ្ឋអាចមិនទុកចិត្ត​រដ្ឋាភិបាលទៅវិញ [អ៊ី]ចឹងរដ្ឋាភិបាលត្រូវគិតគូរឿងហ្នឹងឡើងវិញ»។​

អ្នកជំនាញផ្នែកបច្ចេកវិទ្យាឌីជីថលនៃអង្គការសង់ត្រាល់ លោក ម៉េង អ៊ីដែត លើកទឹកចិត្ត​ឱ្យ​សាធារណជនប្រើប្រាស់អ៊ីនធើណេតតាមកម្មវិធីមួយចំនួនដែលមានសុវត្ថិភាពក្នុងការទំនាក់​ទំនង។​

លោក ម៉េង អ៊ីដែត លើកឡើងថា៖ «បើយើងអាចប្រើប្រាស់នូវកម្មវិធីទំនាក់ទំនងគ្នាបានដូចជា​ Signal App ឬ​ WhatsApp app គឺជាប្រការដ៏ល្អបំផុត​ ព្រោះថាកម្មវិធីទាំង២នេះជាប្រភេទ​ End-to-end encryption ដែលវាមានសមត្ថភាពបំលែងសារ​ ក៏ដូចជាសំឡេងសន្ទនា​របស់​យើង​​​ទៅអ្វីផ្សេងមួយទៀតនៅមុនរាល់ពេលបញ្ជូនចេញទៅអ្នកម្ខាងទៀត»

អ្នកនាំពាក្យក្រសួងប្រៃសណីយ៍ និងទូរគមនាគមន៍ លោក សូ វិសុទ្ធី ហៅទូរសព្ទចូល​ប្រាប់​ឱ្យផ្ញើសំណួរវិញ​ តែពេលផ្ញើសំណួរទៅប្រមាណ១សប្តាហ៍​មកនេះមិនមានការឆ្លើយទេ។ រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត និងអ្នកនាំពាក្យដទៃទៀតក៏មិនអាចសុំការបកស្រាយបានទេជុំវិញករណីនេះ។​

រដ្ឋធម្មនុញ្ញ​ដែល​ជា​ច្បាប់​កំពូល​នៃ​ប្រទេសបានការពារសិទ្ធិនៃការទំនាក់ទំនង​ជាលក្ខណៈ​ឯកជន​។ មាត្រា​៤០នៃរដ្ឋធម្មនុញ្ញ មិន​ត្រឹម​តែ​ការពារ​ពលរដ្ឋ​កម្ពុជា គ្រប់​រូប​ពី​ការ​លប​ថត​សំឡេង​និយាយ​សន្ទនាគ្នា​ប៉ុណ្ណោះ​ទេ ប៉ុន្តែ​ថែម​ទាំង​ធានា​ការពារ​អាថ៌កំបាំង​នៃ​ការ​ឆ្លើយឆ្លង​តាម​លិខិត តាម​សារ​ទូរលេខ ទូរពុម្ព ទូរគមនាគមន៍​របស់​ពលរដ្ឋ​ទៀត​ផង។

ចំណែក​ច្បាប់​ស្ដីពី​ទូរគមនាគមន៍​បញ្ជាក់​យ៉ាង​ច្បាស់​ថា ទាំង​អ្នក​លប​ថត​សំឡេង​គេ ទាំង​អ្នក​យក​សំឡេង​លប​ថត​នោះ​ទៅ​ផ្សព្វផ្សាយ ត្រូវ​មាន​ទោស​ស្មើ​គ្នា។ មាត្រា​៩៧នៃច្បាប់នេះ ចែង​ថា ការ​លប​ស្តាប់ ឬ​ការ​លប​ថត​ការ​សន្ទនា​ដោយ​ការ​ប្រើប្រាស់​ប្រព័ន្ធ​ទូរគមនាគមន៍ ដោយ​បុគ្គល​ដែល​ពុំ​មែន​ជា​ភាគី​នៃ​ការ​សន្ទនា ត្រូវ​ផ្ដន្ទាទោស​ដាក់​ពន្ធនាគារ​ពី១​ខែ​ទៅ១​ឆ្នាំ និង​ទទួល​​ពិន័យ​ជា​ប្រាក់​ពី១​សែន​រៀល​ទៅ២​លាន​រៀល។ បញ្ញត្តិ​កថាខណ្ឌ​ទី​១ ខាង​លើ​នេះ មិន​ត្រូវ​យក​មក​អនុវត្ត​ទេ​ក្នុង​ករណី​ដែល​ការ​ស្តាប់ ឬ​ការ​ថត​ការ​សន្ទនា​នោះ ធ្វើ​ឡើង​ដោយ​មាន​ការ​យល់ព្រម​ពី​បុគ្គល​ដែល​មាន​ការ​ពាក់ព័ន្ធ ឬ​ដោយ​មាន​ការ​អនុញ្ញាត​ពី​អាជ្ញាធរ​ធម្មានុរូប៕

434 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម