ប្រទេសកម្ពុជាទំនងនឹងមិនត្រូវដាក់ឲ្យស្ថិតនៅក្រោមស្ថានភាពប្រកាសអាសន្នដោយសារវីរុសកូវីដ១៩ ដោយប្រើប្រាស់អំណាចថ្មីរបស់រដ្ឋាភិបាលនៅឡើយទេ ក៏ប៉ុន្តែ ការឈប់សម្រាកបុណ្យចូលឆ្នាំថ្មីប្រពៃណីខ្មែរនៅសប្ដាហ៍ក្រោយនេះ ច្បាស់ណាស់ នឹងត្រូវលើកពេល។ នេះបើយោងតាមលោកនាយករដ្ឋមន្ត្រី ហ៊ុន សែន ។
ថ្លែងនៅក្នុងសន្និសីទសារព័ត៌មានមួយកាលពីព្រឹកថ្ងៃអង្គារ នៅឯអគារវិមានសន្តិភាព នៅក្នុងរាជធានីភ្នំពេញ លោកនាយករដ្ឋមន្ត្រីបានមានប្រសាសន៍ថា ការឈប់សម្រាកបុណ្យចូលឆ្នាំថ្មីប្រពៃណីខ្មែរជាផ្លូវការ ដែលនឹងត្រូវថ្ងៃទី១៣-១៦ ខែមេសា នេះ នឹងត្រូវលើកពេល ហើយទាំងស្ថាប័នរដ្ឋ និងទាំងស្ថាប័នឯកជន នឹងត្រូវបន្តធ្វើការងារជាធម្មតា ។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា ថ្ងៃឈប់សម្រាកសងនឹងត្រូវប្រកាសពេលក្រោយ ដើម្បីអនុញ្ញាតឲ្យឈប់សម្រាកជំនួសថ្ងៃដែលបានលុបចោល ។ លោកនាយករដ្ឋមន្ត្រីក៏បានបន្ថែមទៀតផងដែរថា លោកមិនរំពឹងថា នឹងប្រើប្រាស់អំណាចពង្រីកបន្ថែមរបស់លោកនៅក្រោមច្បាប់ស្ដីពីការគ្រប់គ្រងប្រទេសស្ថិតក្នុងភាពអាសន្ន ក្នុងពេលឆាប់ៗណាមួយនោះទេ – ប៉ុន្តែ បាននិយាយថា អាចនឹងមានលទ្ធភាពនៃការប្រកាសបម្រាមគោរច។
លោកនាយករដ្ឋមន្ត្រី ហ៊ុន សែន មានប្រសាសន៍អំពីភាពបន្ទាន់នៃការអនុម័តច្បាប់ យ៉ាងដូច្នេះ ៖ «ខ្ញុំដឹងថា វាមិនទាន់ដល់ពេលត្រូវប្រកាសភាពអាសន្ននោះទេ ប៉ុន្តែ ខ្ញុំចាំបាច់ត្រូវមានឧបករណ៍នេះនៅក្នុងដៃ ដូច្នេះ ក្នុងពេលមានភាពអាសន្ន យើងអាចប្រកាសបានភ្លាមៗ »។
លោកនាយករដ្ឋមន្ត្រី ហ៊ុន សែន បានបន្ថែមថា លោកបានគិតយ៉ាងទូលំទូលាយអំពីការប្រើប្រាស់អំណាចរបស់លោក និងបានណែនាំប្រជាពលរដ្ឋកុំឲ្យខ្ជះខ្ជាយពេលវេលាបន្ថែម ក្នុងការនិយាយអំពីរឿងនេះទៀត ។ លោកនាយករដ្ឋមន្ត្រីបានមានប្រសាសន៍ថា កន្លងមក ប្រទេសកម្ពុជាគ្រប់គ្រងស្ថានការណ៍វិបត្តិវីរុសកូរ៉ូណាបានល្អហើយ ដូច្នេះ ការដាក់កម្ពុជាឲ្យស្ថិតក្នុងស្ថានភាពអាសន្នក្នុងពេលនេះ នឹងជាការអនុវត្តលើស ។
ប្រសិនបើប្រជាពលរដ្ឋមិនស្ដាប់ការណែនាំឲ្យរក្សាគម្លាត លាងសម្អាតដៃ និងពាក់ម៉ាស់ទេនោះ លោកនាយករដ្ឋមន្ត្រី ហ៊ុន សែន មានប្រសាសន៍ថា កម្ពុជាអាចនឹងត្រូវដាក់ឲ្យស្ថិតក្នុងភាពអាសន្នរយៈពេលបីខែ ដើម្បីប្រយុទ្ធប្រឆាំងនឹងវីរុសនេះ ។
លោក ហ៊ុន សែន ថ្លែងយ៉ាងដូច្នេះ «លទ្ធភាពនៃការប្រើប្រាស់ច្បាប់នេះ គឺវាតិចតួចណាស់ ប៉ុន្តែ ទោះបីលទ្ធភាពតិចតួចក្ដី យើងចាំបាច់ត្រូវតែមានច្បាប់នៅក្នុងដៃ ។ ផ្អែកតាមបទពិសោធន៍របស់ខ្ញុំជាង ៤០ឆ្នាំមកនេះ ភាគរយលទ្ធភាពដែលយើងនឹងប្រកាសដាក់ប្រទេសឲ្យស្ថិតក្នុងស្ថានភាពអាសន្ន គឺវាតូចណាស់ »។
លោកបានបន្ថែមថា៖ «លុះណាតែយើងនិយាយទៅ គេមិនស្ដាប់សោះ នោះយើងនឹងប្រកាសវា»។
ដើម្បីបង្ការវិបត្តិធំ ខណៈដែលប្រជាជនអាចនឹងនាំគ្នាសម្រុកធ្វើដំណើរទៅកាន់ស្រុកកំណើតដើម្បីប្រារព្ធពិធីបុណ្យចូលឆ្នាំថ្មីប្រពៃណីខ្មែរ បុណ្យនេះនឹងត្រូវលើកពេល ។
លោកនាយករដ្ឋមន្ត្រីមានប្រសាសន៍យ៉ាងដូច្នេះ៖ «ខ្ញុំសូមអំពាវនាវដល់បុគ្គលិក កម្មករ និងមន្ត្រីរាជការ សូមបន្តធ្វើការងារដូចធម្មតា ហើយរដ្ឋាភិបាលនឹងផ្ដល់ថ្លៃឈប់សម្រាក ៥ថ្ងៃ ដើម្បីសងថ្ងៃឈប់សម្រាកបុណ្យចូលឆ្នាំខ្មែរ នៅពេលវេលាណាមួយសមស្រប នៅពេលក្រោយ»។
លោកនាយករដ្ឋមន្ត្រីបានមានប្រសាសន៍បន្តទៀតថា លោក ប៊ិន ឈិន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងលោករដ្ឋមន្ត្រីហិរញ្ញវត្ថុ អូន ព័ន្ធមុនីរ័ត្ន នឹងចេញសេចក្ដីណែនាំអំពីរឿងនេះ ។
រឿងដាច់ដោយឡែកមួយទៀត លោកនាយករដ្ឋមន្ត្រី ហ៊ុន សែន បានមានប្រសាសន៍ផងដែរ ថា រដ្ឋាភិបាលនឹងចាប់ផ្ដើមបើកប្រាក់ឧបត្ថម្ភឲ្យកម្មកររោងចក្រដែលត្រូវបានបញ្ឈប់ពីការងារ ឬព្យួរការងារ ចំនួន ៤០ដុល្លារក្នុងមួយខែ ដោយថៅកែរោងចក្រត្រូវគេរំពឹងថា នឹងផ្ដល់ឲ្យកម្មករ ៣០ដុល្លារ នៅក្រោយពេលដែលសមាគមរោងចក្រកាត់ដេរនៅកម្ពុជា (GMAC) បាននិយាយថា រោងចក្រមួយចំនួនបាននិងកំពុងជួបប្រទះការលំបាកក្នុងការបើកប្រាក់ឈ្នួលឲ្យកម្មករ ។
នៅមុននេះ ថៅកែរោងចក្រដែលបញ្ឈប់ការងារកម្មករដោយសារតែការធ្លាក់ចុះនូវការបញ្ជាទិញ បានយល់ព្រមផ្ដល់សំណងដល់កម្មករនូវទឹកប្រាក់ ៤០% នៃប្រាក់ឈ្នួលអប្បបរមាប្រចាំខែ ដោយរដ្ឋាភិបាលជួយឧបត្ថម្ភបន្ថែម ២០% ទៀត ។
លោក នី សុខា ប្រធានផ្នែកតាមដានសិទ្ធិមនុស្ស នៃអង្គការសិទ្ធិមនុស្ស អាដហុក បាននិយាយថា ប្រសិនបើរដ្ឋាភិបាលពិតជាមិនមានផែនការប្រើប្រាស់ច្បាប់ស្ដីពីការគ្រប់គ្រងប្រទេសជាតិស្ថិតក្នុងភាពអាសន្នសម្រាប់ការគំរាមកំហែងនៃវីរុសកូរ៉ូណាទេនោះ វាជារឿងចម្លែក ដែលរដ្ឋាភិបាលធ្វើច្បាប់នេះយ៉ាងប្រញាប់ប្រញាល់ ។
ច្បាប់នេះផ្ដល់អំណាចដ៏ទូលំទូលាយដល់រដ្ឋាភិបាល ដើម្បីទប់ស្កាត់ប្រជាជនមិនឲ្យធ្វើការប្រមូលផ្ដុំគ្នា ធ្វើដំណើរ រិះគន់អាជ្ញាធរ ឬចែករំលែកដំណឹង ហើយថែមទាំងចែងនូវបញ្ញត្តិស្រពេចស្រពិល ដែលនឹងអនុញ្ញាតឲ្យដាក់ពន្ធនាគារមនុស្សរហូតដល់ ១០ឆ្នាំ ។
លោក សុខា មានប្រសាសន៍ថា៖ «ប្រសិនបើសេចក្ដីព្រាងច្បាប់នេះមិនទាន់អនុម័តទេ ខ្ញុំសូមស្នើទៅរដ្ឋាភិបាល ថាមិនគួរបញ្ជូនសេចក្ដីព្រាងច្បាប់នេះ[ឆ្លងកាត់ដំណាក់កាលនានា] យ៉ាងប្រញាប់ប្រញាល់ពេកនោះទេ ហើយរដ្ឋាភិបាលគួរតែពិភាក្សាច្បាប់នេះឲ្យបានល្អិតល្អន់ថែមទៀត»។
លោក នី សុខា បានបន្ថែមទៀតថា រដ្ឋាភិបាល ប្រសិនបើខ្លួនឃើញការគំរាមកំហែងនៃការឆ្លងវីរុសពីការធ្វើដំណើរនៅពេលបុណ្យចូលឆ្នាំថ្មីខាងមុខនេះ ក៏គួរពិចារណាអំពីកម្មករកាត់ដេរ ដែលត្រូវបង្ខំឲ្យបន្តធ្វើការងារនៅសប្ដាហ៍ក្រោយទាំងពួកគេកំពុងភ័យខ្លាចផងដែរ។
លោក នី សុខា លើកឡើថា៖ «ខ្ញុំមិនច្រានចោលវិធានការរបស់រដ្ឋាភិបាលទេ ប៉ុន្តែ រដ្ឋាភិបាលគួរតែអនុវត្តវិធានការទាំងនេះឲ្យមានលក្ខណៈស្មើភាពគ្នា»។
លោក មាស នី អ្នកវិភាគសង្គមដ៏លេចធ្លោមួយរូប បានបន្ថែមថា លោកជឿថា រដ្ឋាភិបាលគ្មានជម្រើសដើម្បីអនុម័តការដាក់ប្រទេសស្ថិតក្នុងភាពអាសន្ននៅពេលនេះឡើយ ពីព្រោះប្រជាជនជាច្រើនពឹងផ្អែកទៅលើការងារប្រចាំថ្ងៃដើម្បីរកកម្រៃចិញ្ចឹមជីវិត ។
លោក មាស នី បានថ្លែងថា ប្រសិនបើវិធានការរឹតត្បិតការធ្វើដំណើរ និងការបិទក្រុមហ៊ុនអាជីវកម្មនានា ត្រូវបានអនុវត្តមែននោះ ប្រជាជនជាច្រើននឹងមិនមានលទ្ធភាពរ៉ាប់រងការចំណាយប្រចាំថ្ងៃរបស់ខ្លួនបានទេ ហើយនឹងត្រូវបង្ខំចិត្តឲ្យងាកទៅរកកន្លែងផ្សេងទៀតដើម្បីស្វែងរកការជួយឧបត្ថម្ភ ក្នុងនោះរាប់ទាំងការធ្វើដំណើរទៅស្រុកកំណើតវិញ ផងដែរ ។
លោក មាស នី បានមានប្រសាសន៍ថា៖ «ខ្ញុំគិតថា រដ្ឋាភិបាលមិនអាចដាក់ឲ្យអនុវត្តច្បាប់គ្រប់គ្រងប្រទេសស្ថិតក្នុងភាពអាសន្នបានទេ ពីព្រោះរដ្ឋាភិបាលមិនមានធនធានគ្រប់គ្រាន់ដើម្បីទ្រទ្រង់ជីវភាពប្រជាជនឡើយ។ ប្រសិនបើរដ្ឋាភិបាលដាក់ប្រទេសស្ថិតក្នុងភាពអាសន្នមែន ប្រជាជនអាចនឹងជួបបញ្ហាអត់ឃ្លាន»។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា រដ្ឋាភិបាលកំពុងលេងហ្គេមដ៏លំបាកមួយ ដោយព្យាយាមបង្កើតនូវការឆ្លើយតបមួយដែលត្រឹមត្រូវ ហើយវីរុសកូរ៉ូណាបាននិងកំពុងបង្ខំប្រជាជនជាច្រើនឲ្យធ្វើការជ្រើសរើសដ៏លំបាកៗ ។
នៅមុនបន្តិចនៃការចាប់ផ្ដើមសន្និសីទសារព័ត៌មាន លោកនាយរដ្ឋមន្ត្រី ហ៊ុន សែន បានបញ្ជាមិនឲ្យគេអនុញ្ញាតឲ្យជើងហោះហើរមួយមកពីប្រទេសម៉ាឡេស៊ី ដែលដឹកពលរដ្ឋខ្មែរ ១៥០នាក់ ចុះចតនៅក្នុងទីក្រុងភ្នំពេញឡើយ ដោយសារខ្លាចថា អ្នកដំណើរខ្លះអាចនឹងមានឆ្លងវីរុសកូរ៉ូណា ។
ការផ្ទុះការឆ្លងវីរុសកូវីដ១៩ទ្រង់ទ្រាយធំលើកដំបូងបង្អស់នៅក្នុងប្រទេសកម្ពុជា បានកើតមានឡើងកាលពីចុងខែមុន នៅក្នុងចំណោមពលរដ្ឋកម្ពុជាដែលធ្វើដំណើរវិលត្រឡប់មកពីទីក្រុងកួឡាឡំពួ [ប្រទេសម៉ាឡេស៊ី] បន្ទាប់ពីពួកគេបានទៅទីនោះដើម្បីចូលរួមពិធីបុណ្យសាសនាអ៊ិស្លាម ។
លោកនាយករដ្ឋមន្ត្រី ហ៊ុន សែន ថ្លែងយ៉ាងដូច្នេះថា៖ «ការសម្រេចចិត្តរបស់ខ្ញុំ កាលពីព្រឹកមិញ គឺជាការឈឺចាប់មួយ ពីព្រោះខ្ញុំគ្មានជម្រើសទេ ដូច្នេះ សូមប្រជាពលរដ្ឋកម្ពុជាដែលកំពុងស្ថិតនៅប្រទេសម៉ាឡេស៊ី សូមយោគយល់ផង»។
លោកនាយករដ្ឋមន្ត្រីបានកត់សម្គាល់ថា ពលករចំណាកស្រុក ៦ម៉ឺននាក់ បានវិលត្រឡប់ពីប្រទេសថៃចូលមកកម្ពុជាវិញ បន្ទាប់ពីប្រទេសថៃក៏មានបញ្ហាវីរុសកូរ៉ូណាផ្ទាល់ខ្លួនដែរនោះ ប៉ុន្តែ លោកបាននិយាយថា រដ្ឋាភិបាលបានស្នើសុំឲ្យពលករចំណាកស្រុកទាំងអស់ «ធ្វើចតាឡីស័ក» នៅផ្ទះ ឲ្យបាន ១៤ថ្ងៃ ។ លោកនាយករដ្ឋមន្ត្រីបានបន្តទៀតថា វាមិនសមហេតុផលទេ ក្នុងការព្យាយាមបិទច្រកព្រំដែនជាមួយប្រទេសថៃ មិនឲ្យពលរដ្ឋកម្ពុជាដែលចង់វិលត្រឡប់មកវិញចូលបាននោះ ដោយសារតែមានច្រកមិនផ្លូវការជាច្រើន ដែលពុំមានកម្លាំងរដ្ឋាភិបាលយាមការពារ ។
លោក ហ៊ុន សែន បានមានប្រសាសន៍យ៉ាងដូច្នេះ៖ «ខ្ញុំសង្ឃឹមថា ពលករចំណាកស្រុកយើងដែលមានការងារត្រឹមត្រូវ នឹងមិនវិលត្រឡប់មកវិញទេ ក្នុងអំឡុងពេលបុណ្យចូលឆ្នាំថ្មីខាងមុខនេះ ។»
លោកនាយករដ្ឋមន្ត្រីក៏បានបន្តទៀតថា លោកព្រួយបារម្ភខ្លាចមានការឆ្លងនៅក្នុងសហគមន៍ ប្រសិនបើកម្មករជាច្រើនវិលត្រឡប់ចូលមកកម្ពុជាវិញ ដោយមធ្យោបាយធ្វើដំណើររួមគ្នា ។
នៅក្នុងសុន្ទរកថាដ៏វែងនិងនិយាយច្រើនរឿង លោកនាយករដ្ឋមន្ត្រី ហ៊ុន សែន ក៏បាននិយាយផងដែរថា លោកបានចុះកិច្ចសន្យាជាមួយក្រុមហ៊ុនឯកជនចំនួន ២ ដើម្បីឲ្យផលិតទឹកអាល់កុលលាងសម្អាតដៃ ដែលមានតម្លៃថោក សម្រាប់យកមកប្រើប្រាស់សម្រាប់ការសម្លាប់មេរោគ និងថា លោកក៏បើកចំហទទួលធ្វើជាម្ចាស់ផ្ទះនៃលំហាត់យោធានៅក្នុងប្រទេសកម្ពុជា ជាមួយបណ្ដាប្រទេសនានានៅជុំវិញពិភពលោក ផងដែរ ក្នុងនោះរាប់បញ្ចូលទាំងសហរដ្ឋអាមេរិក និងអូស្ត្រាលី ៕
