ក្រសួងសុខាភិបាលឲ្យដឹងថាពលករខ្មែរវ័យ២១ឆ្នាំម្នាក់តេស្តវិជ្ជមានវីរុស COVID-19 បន្ទាប់ពីបានវិលត្រឡប់ពីប្រទេសម៉ាឡេស៊ីមកដល់កម្ពុជាថ្ងៃទី១៦ ខែមិថុនា ដែលនេះជាករណីឆ្លងទី១២៩នៅកម្ពុជា គិតចាប់ពីថ្ងៃទី២៨ ខែមករា មក។
បុរសខាងលើគឺជាពលករម្នាក់ក្នុងចំណោមពលករ១១៥នាក់ផ្សេងទៀតដែលបានធ្វើដំណើរតាមជើងហោះហើរ Malaysian Airlines MH 762 ពីទីក្រុងកូឡាឡាំពួមកកាន់អាកាសយាន្ដដ្ឋានអន្តរជាតិភ្នំពេញនៅល្ងាចថ្ងៃទី១៦ ខែមិថុនា។ ពលករខ្មែរទាំងនេះបានជាប់គាំងនៅប្រទេសម៉ាឡេស៊ីជាច្រើនខែដោយសារការផ្ទុះវីរុស COVID-19។
ក្នុងសេចក្ដីថ្លែងការណ៍ចុះថ្ងៃទី១៨ ខែមិថុនា ក្រសួងសុខាភិបាលបញ្ជាក់ថាបុរសខាងលើតេស្តវិជ្ជមានវីរុសCOVID-19 កាលពីថ្ងៃទី១៧ ខែមិថុនា ហើយបុរសនេះជាអ្នកស្រុកស្រែអំបិល ខេត្តកោះកុង។ បើតាមសេចក្ដីថ្លែងការណ៍បុរសរូបនេះត្រូវបញ្ជូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត ដែលជាកន្លែងទទួលព្យាបាលអ្នកជំងឺ COVID-19 នៅកម្ពុជា។
អ្នកនាំពាក្យក្រសួងសុខាភិបាលលោកស្រី ឱ វណ្ណឌីន បានបញ្ជាក់ថាបុរសនោះពិតជាមានវិជ្ជមានវិរុស COVID-19 មែន។
លោកស្រីមានប្រសាសន៍ថា៖ «គាត់ជាអ្នកនៅក្នុងក្រុមអ្នកទើបហោះមកពីម៉ាឡេស៊ី។ ចំពោះអ្នករួមដំណើរផ្សេងទៀតគឺមានលទ្ធផលតេស្តអវិជ្ជមាន ហើយយើងនឹងរៀបចំដាក់ពួកគាត់ឲ្យនៅដាច់ដោយឡែករយៈពេល១៤ថ្ងៃនៅខេត្តរបស់ពួកគាត់»។ ទោះយ៉ាងណាលកស្រីមិនបានបញ្ជាក់ពីឈ្មោះខេត្ត ឬក៏ចំនួនមនុស្សប៉ុន្មាននាក់ក្នុងចំណោម២១២នាក់ក្នុងជើងហោះហើរជាមួយគ្នានោះត្រូវចាកចេញពីភ្នំពេញនោះទេ។
បើតាមលោកស្រី វណ្ណឌីន ក្រុមការងារក្រសួងសុខាភិបាលបានរៀបចំឲ្យអ្នកដំណើរតាមជើងហោះហើរកាលពីថ្ងៃទី១៦ ខែមិថុនា នោះនៅដាច់ដោយឡែករយៈពេល១៤ថ្ងៃ។ លោកស្រីថាអ្នកទាំងនោះអាចជ្រើសរើសថាគួរនៅដាច់ដោយឡែកនៅភ្នំពេញ ឬក៏អាចទៅនៅដាច់ដោយឡែកនៅខេត្តរបស់ខ្លួនក៏បាន ដែលតាមខេត្តទាំងនោះមានការរៀបចំកន្លែងធ្វើចត្តាឡីស័កនៅតាមមន្ទីរពេទ្យបង្អែក ក៏ដូចជាសណ្ឋាគារ ឬផ្ទះសំណាក់ផងដែរ។
លោកស្រី ក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ និងការពារខ្លួនពីការឆ្លងរាលដាលវីរុសនេះ។
ក្រុមពលករខ្មែរដែល ទើបត្រឡប់មកស្រុកកំណើតវិញក្នុងសប្ដាហ៍នេះបានជាប់គាំងនៅប្រទេសម៉ាឡេស៊ីដោយគ្មានការងារ និងមិនមានលទ្ធភាពជួលផ្ទះ ឬទិញម្ហូបអាហារនៅម៉ាឡេស៊ីតាំងពីថ្ងៃទី៧ ខែមេសា មកម្លេះ។ ការជាប់គាំងនេះបន្ទាប់ពីលោកនាយករដ្ឋមន្ត្រី ហ៊ុន សែន បានសម្រេចបិទជើងហោះហើរពីប្រទេសម៉ាឡេស៊ី។ ការបិទជើងហោះហើរនេះគឺធ្វើឡើងបន្ទាប់ពីរកឃើញមានករណីឆ្លងវីរុសCOVID-19 ជាច្រើនករណីក្នុងចំណោមអ្នកដែលបានទៅចូលរួមពិធីសាសនាក្នុងទីក្រុងកូឡាឡាំពួ។
លោក ទូល័ស សាអ៊ីត វ័យ៣៨ឆ្នាំ ជាកម្មករសំណង់នៅម៉ាឡេស៊ី បាននិយាយពីមណ្ឌលចត្តាឡីស័កនៅសង្កាត់ចោមចៅដែលលោកបាននៅដាច់ដោយឡែក ថាលទ្ធផលតេស្ត លោកមិនមានវីរុសCOVID-19 នោះទេ ហើយថាលោកនឹងទៅបន្តធ្វើចត្តាឡីស័កនៅឯមណ្ឌលចត្តាឡីស័កខេត្តត្បូងឃ្មុំបន្តទៀត។
លោកឲ្យដឹងថា៖ «លទ្ធផលបង្ហាញថាខ្ញុំអវិជ្ជមានវីរុស COVID-19 ហើយឥឡូវនេះខ្ញុំកំពុងរៀបចំអីវ៉ាន់ ដើម្បីទៅធ្វើចត្តាឡីស័ក១៤ថ្ងៃបន្តនៅខេត្តត្បូងឃ្មុំ»។
លោកបន្តថា៖ «ខ្ញុំសប្បាយចិត្តណាស់ដែលលទ្ធផលចេញមកអវិជ្ជមាន ហើយខ្ញុំនឹងអនុវត្តតាមការណែនាំរបស់ក្រសួងធ្វើចត្តាឡីស័កចំនួន១៤ថ្ងៃ»៕
