មន្ទីរការងារខេត្តសៀមរាបព្រមានមេដឹកនាំសហជីពជុំវិញការតវ៉ា

បុគ្គលិករបស់សណ្ឋាគារ ឡឺ ម៉េរីឌាន អង្គរ តវ៉ានៅក្រៅសណ្ឋាគារកាលពីថ្ងៃទី៧ ខែសីហា ដោយសារជម្លោះការងារពាក់ព័ន្ធការកាត់បន្ថយប្រាក់ឈ្នួលនិងការបណ្តេញសកម្មជនសហជីពបីរូប។ រូបភាព៖ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

មន្ទីរការងារ​ខេត្តសៀមរាប​កាលពីថ្ងៃទី​៦ខែសីហា​ បាន​ព្រមាន​មេដឹកនាំ​​សហជីព​ការងារ​ចំនួន​ពីរ​រូបថា ពួកគេ​បាន​រំលោភច្បាប់​សហជីព​ដោយ​រៀប​ចំ​ការតវ៉ា​នៅសណ្ឋាគារ ឡឺ ម៉េរីឌាន អង្គរ​ ដែលកំពុង​ជាប់គាំងក្នុង​ជម្លោះការ​ងារ​ចាប់តាំងពី​មាន​ការ​បណ្តេញ​បុគ្គលិក​ជា​សកម្មជនសហជីព​បីរូប​​កាល​ពីខែ​កក្កដា​។

លោក ទូច កុសល ប្រធាន​សហព័ន្ធ​សហជីពកម្មករ​និយោជិតវិស័យ​ទេសចរណ៍​កម្ពុជា​ (CTWUF) បាន​មានប្រសាសន៍ថា មន្ទីរការងារ​បាន​ផ្ញើ​លិខិតដូច​គ្នា​​មក​រូបនេះ​ និងលោក លី លីនដា ជា​ប្រធាន​សហជីពប្រចាំនៅ​សណ្ឋាគារ​​ឡឺ ម៉េរីឌាន អង្គរ​ ដោយ​ព្រមាន​អ្នក​ទាំង​ពីរ​ថា បាន​រៀបចំ​កូដកម្ម​ខុស​ច្បាប់​និង​បិទផ្លូវ​សាធារណៈនៅ​មុខ​សណ្ឋាគារ ហើយថា សកម្មភាព​ទាំង​ពីរ​នេះ​បាន​រំលោភច្បាប់​សហជីព។

លិខិតព្រមាន​នេះ​បាន​សរសេរ​ថា៖ «ក្នុងករណីពុំមានការប្រែប្រួល ឬផ្គើនចំពោះលិខិតព្រមាននេះ​ អង្គការ​វិជ្ជាជីវៈរបស់​លោក​​អាចនឹងត្រូវ​ប្តឹង​រំលាយ​ចោល​​ឬទទួលនូវ​វិធានការផ្សេងៗ​តាមកំណត់​ច្បាប់​ជាកំហិត»

លោក ទូច កុសល បាន​អះអាងថា បាតុកម្មនេះមិន​បាន​រំលោភច្បាប់​ណាមួយទេ។

លោក កុសល បាន​មានប្រសាសន៍ថា៖ «​ខ្ញុំគិតថា ការ​ព្រមានមកលើសហព័ន្ធឬសហជីព​គឺមិន​ត្រឹម​ត្រូវ​ទេ ពីព្រោះ​គាត់ចោទប្រកាន់​យើង​ថា បិទផ្លូវ​សាធារណៈចូល​សណ្ឋាគារ​ ប៉ុន្តែ​តាម​ពិត​យើងមិន​បាន​បិទផ្លូវ​នោះទេ» ដោយ​លោក​បាន​បន្ថែម​ថា បុគ្គលិក​សណ្ឋាគារ​បាន​តវ៉ានៅ​ក្នុងបរិវេណសណ្ឋាគារ។

លោក កុសល បាន​លើកឡើងថា លិខិតនេះ​ក៏បាន​ចោទប្រកាន់​សហជីព​ថា បាន​រៀប​ចំកូដកម្មខុស​ច្បាប់​ផងដែរ ប៉ុន្តែ​មេដឹកនាំ​សហជីព​ទាំងពីរ​បាន​អះអាងថា ពួកគាត់បាន​ជូន​ដំណឹងមុន​៧​ថ្ងៃ មុន​ចាប់ផ្តើមកូដកម្ម​នៅថ្ងៃទី​៦ ខែសីហា​ដូចមាន​ចែង​ក្នុងច្បាប់​សហជីព។

លោក​បាន​បន្ថែមថា មន្ទីរការងារ​ខេត្តបានអញ្ជើញ​សកម្មជនសហជីព​បីរូប​ទៅចរចាជាមួយ​តំណាងសណ្ឋាគារ​កាលពីថ្ងៃទី​៧ ខែសីហា​ ប៉ុន្តែ​ការ​ចរចាបាន​បរាជ័យ​នៅពេល​បុគ្គលិក​បន្តទាមទារ​ឲ្យ​មន្ទីរការងារខេត្ត​បញ្ចូល​ករណីរបស់​សមា​​ជិកសហជីពទាំងបីរូប​​នេះជាផ្នែក​មួយនៃ​បញ្ហារួម​ជុំវិញការតវ៉ាប្រាក់ឈ្នួល​ ជាជាងចាត់ទុក​ជា​ជម្លោះ​បុគ្គល។

កាលពីថ្ងៃទី​៣​ ខែសីហា មន្ទីរការងារខេត្ត​បាន​រៀប​ចំជំនួប​ស្រដៀងគ្នានេះ​​ប៉ុន្តែ​​មិន​អាចរកដំណោះ​ស្រាយ​ផងដែរ។

លោក ទូច កុសល បាន​មានប្រសាសន៍ថា៖ «បុគ្គលិក​បាន​ចេញតវ៉ានៅមុខ​សណ្ឋាគារតាំងពីព្រឹក​រហូត​ដល់ល្ងាច​ កាលពីថ្ងៃទី​៧ ខែ​សីហា​»។

កាល​ពីថ្ងៃទី​៩ និង​ទី​១០ ខែ​កក្ក​ដា​ សណ្ឋាគារ​នេះ​បាន​បណ្តេញ​សកម្ម​ជន​សជីព​បីររូប​ជា​សមាជិក​សហជីព​​ ឡឺ ម៉េរីឌាន អង្គរ​ ដោយ​ចោទប្រកាន់​ពួកគេ​ថា បាន​ញុះញង់​បុគ្គលិក​ បន្ទាប់ពី​អ្នក​ទាំងបី​បាន​ប្រមូល​ស្នាមមេដៃ​ដោយ​ស្នើ​ឲ្យ​កាត់​ប្រាក់ឈ្នួល​របស់ពួកគេត្រឹម​២០ភាគរយ​ជំនួស​ឲ្យ​ការតាត់​៣៥ភាគរយ​ដោយ​សារការខាតបង់ចំណូលបណ្តាលមក​ពី​វិបត្តិវីរុសកូវីត១៩នោះ។

លោក ផេង ឈាងលី ប្រធាន​ការិយាល័យអធិការកិច្ច​និងដោះស្រាយ​វិវាទការងារនៅមន្ទីរ​ការ​ងារខេត្តសៀមរាប​ដែល​បាន​ផ្ញើលិខិតព្រមាន​ទៅ​កាន់មេដឹក​នាំ​​សហជីព​ទាំងពីរ​នេះបាន​និយាយថា កូដកម្ម​របស់បុគ្គលិក​នាពេលនេះ​គឺខុស​ច្បាប់​ ដោយ​សារ​ថា បុគ្គលិកមិនអាចធ្វើ​កូដកម្មបានទេ លុះត្រាពួកគេ​មាន​ការសន្និដ្ឋានបឋមនៅក្នុងកិច្ច​ពិភាក្សា​ជាមួយ​មន្ទីរ​និង​សណ្ឋាគារសិន​។

លោក​មានប្រសាសន៍ថា បុគ្គលិក​បាន​ចូលរួម​ការចរចា​នៅមន្ទីរការងារ​ ប៉ុន្តែ​បាន​ដើរ​ចេញ​ពី​បន្ទប់ចរចា​ ដើម្បី​តវ៉ា​នៅ​ក្រៅអគារនោះទៅវិញ។

លោក ផេង ឈាងលី​ មានប្រសាសន៍ថា៖ «​នៅ​ព្រឹកនេះ​ ពួកគេ​ចេញ​តវ៉ា​នៅ​មុខ​មន្ទីរ​ការងារ​ខេត្តជា​ថ្មី…​ហើយ​បន្ទាប់មក​បន្ត​ធ្វើ​ការតវ៉ា​នៅ​មុខសណ្ឋាគារទៀត»។​

លោក​បាន​បន្ថែម​ថា៖ «​សូម​បុគ្គលិក​ទាំងអស់​មុន​ពេល​ធ្វើ​កូដកម្ម​ ពួកគេត្រូវ​តែ​ពិនិត្យ​មើល​ច្បាប់​ការងារជាមុន​សិន​»។ 

លោក ឈាងលី បាន​និយាយថា មន្ទីរ​ការងារ​មិន​ទាន់​សម្រេចកិច្ច​ព្រមព្រៀង​រវាងបុគ្គលិក​និង​ថ្នាក់​ដឹកនាំសណ្ឋាគារ​នៅ​ឡើយ​ទេ ខណៈ​ពេល​បុគ្គលិក​ទទូច​ឲ្យ​​បញ្ចូល​បញ្ហា​ប្រាក់ឈ្នួល​និង​ការបណ្តេញ​សមាជិកសហជីព​​ទៅក្នុង​ជម្លោះរួម​​។

លោក ឈាងលី បាន​មានប្រសាសន៍ថា៖ «​យើង​ពិនិត្យ​មើល​​ករណី​នេះ​ដោយ​ផ្អែក​លើ​ច្បាប់​…​ជម្លោះសមូហភាពគឺជា​ជម្លោះសមូហភាព ហើយ​ជម្លោះបុគ្គលគឺជា​ជម្លោះបុគ្គល​ ពីព្រោះ​យើង​មិន​អាច​បញ្ចូល​ករណីបុគ្គល​ទៅ​ក្នុងករណី​សមូហភាព​បានទេ»។

លោកកត់សម្គាល់ថា ប្រសិនបើ​មន្ទីរការងារមិន​អាចដោះ​ស្រាយ​ករណី​នេះបាន​ បុគ្គលិក​ត្រូវ​ដាក់ពាក្យ​បណ្តឹងទៅ​តុលាការ​ខេត្ត​ពាក់ព័ន្ធនឹង​ជម្លោះ​សមូហភាព​ជុំវិញ​ប្រាក់ឈ្នួល​ ចំណែក​ជម្លោះបុគ្គល​ជុំ​វិញការ​បណ្តេញ​ចេញ​សកម្មជន​សហជីព​ នឹង​ត្រូវ​បញ្ជូន​ទៅ​ក្រុម​ប្រឹក្សា​អាជ្ញាកណ្តាល។

លោក លី លីនដា ប្រធាន​សហជីព​នៅ​សណ្ឋាគារ​ ឡឺ ម៉េរីឌាន អង្គរ​បាន​និយាយថា មន្ទីរ​ការងារ​ខេត្ត​គ្មាន​សិទ្ធិ​ចេញ​លិខិត​ព្រមាន​លោក​ទេ ដោយ​សារសហជីព​របស់​លោក​បាន​គោរពតាម​ច្បាប់​។

លោក​បាន​និយាយថា កាល​ពី​ថ្ងៃទី​៧​ ខែសីហា​​ មាន​បុគ្គលិក​ប្រហែល​២០​​នាក់​បាន​លើក​បដា​នៅមុខ​មន្ទីរ​ការងារ​ខេត្ត​មុន​ពេលងាក​មក​ធ្វើ​ការ​តវ៉ា​នាពេល​រសៀល​ថ្ងៃដដែល​នៅ​សណ្ឋាគារ​ ​ហើយទីនោះ​មាន​​បុគ្គលិក​ប្រហែល​៣០​នាក់ផ្សេងទៀត​បាន​ចូលរួម​ជាមួយ​ពួកគេ។​

លោក លីនដា បាន​និយាយថា៖ «យើង​នឹង​បន្ត​តវ៉ា​ដោយ​សារតែ​យើង​ចង់​បាន​ដំណោះ​ស្រាយ​។ បុគ្គលិក​៩៦​នាក់​​ក្នុងចំណោម​​បុគ្គលិកសរុប​ ​១៧០​នាក់​ [ សរុប​ទាំង​អស់នៅសណ្ឋាគារ​ ] បាន​ផ្តិតមេដៃ​ទាម​ទារ​ឲ្យ​ទទួល​យក​សកម្មជនសហជីពបីនាក់​ត្រឡប់​ចូល​ធ្វើ​ការវិញ»។

លោក លីនដា បាន​និយាយថា៖ «​ក្នុង​នាមគាត់ [ មន្ទីរ​ការងារខេត្ត​ ] គឺជា​អាជ្ញាធរ​និង​ជាអាណាព្យាបាល​ គាត់​ត្រូវ​ចុះទៅមើល​ដោយ​ខ្លួន​ឯង​ ពីព្រោះ​គាត់មិន​ត្រូវ​ស្តាប់តែ​អ្នក​​រាយ​ការណ៍​ប្រាប់ពួកគាត់​នោះទេ។ យើង​នៅតែ​ទាមទារ​ឲ្យ​មន្ទីរ​ការ​ងារ​ខេត្ត​ពិចារណា​ជម្លោះ​នេះ ជា​ជម្លោះ​សមូហភាព​ ប៉ុន្តែ​ពួកគាត់​មិន​ព្រម»។

លោក​​ស្រី សាប៊្រីណា ចាកុប (Sabreena Jacob) ​អគ្គនាយ​ក​នៅសណ្ឋាគារឡឺ ម៉េរីឌាន អង្គរ បាន​ឲ្យដឹង​តាម​អ៊ីម៉េល​ថា ដោយ​សារសណ្ឋាគារ​នេះ​បានបិទ​ដំណើរ​ការតាំងពី​ខែមេសា​ដល់ខែមិថុនា​ ដូច្នេះ​ការកាត់បន្ថយ​ប្រាក់​ឈ្នួល​គឺផ្អែក​លើ​អតីត​ភាព​ការងារ​ ហើយកញ្ចប់​ចូល​និវត្ត​ដោយ​ស្ម័គ្រចិត្ត​គឺជា​វិធាន​ការ​ចាំ​បាច់​ដែល​បុគ្គលិក​ភាគច្រើន​អាចទទួល​យក​បាន។

លោក​ស្រីបាន​បន្ថែម​ថា សមាជិក​សហជីពបីរូប​ដែល​ត្រូវ​បាន​បណ្តេញ​ចេញនោះ​បាន​រំលោភច្បាប់។

លោក​ស្រី​បានឲ្យ​ដឹង​តាម​អ៊ីម៉េល​កាលពីថ្ងៃទី​៧ ខែសីហា​ថា៖ «បុគ្គលិកដែលត្រូវ​បាន​បណ្តេញចេញ​ទាំង​បីនាក់នោះ​បាន​រំលោភច្បាប់​ក្រុម​ហ៊ុននិង​បញ្ញត្តិ​មួយចំនួន​នៅ​ក្នុង​ច្បាប់​ការងារ​កម្ពុជា​»។​

លោកស្រី លើកឡើងថា៖ «បើទោះបីជា​ទទួល​បាន​ការ​ជូន​ដំណឹងពី​​សណ្ឋាគារ​និង​អាជ្ញាធរថា សកម្ម​ភាពចូល​​រួម​របស់​ពួកគេ​នាំឲ្យ​មានជា​សកម្មភាព​ខុស​ច្បាប់​ក៏ដោយ ក៏​បុគ្គលិក​ដែល​ត្រូវ​បានបណ្តេញចេញ​ទាំងបីនាក់នេះ​នៅតែ​បន្ត​ចូល​រួម​សកម្មភាព​ខុស​ច្បាប់ដ​ដែ​ល»។​

លោក​ស្រីបន្តថា៖ «​យើង​ខកចិត្ត​ដែល​ពួកគេ​សម្រេចចូល​រួម​កូដកម្ម​ខុស​ច្បាប់​ជាជាងធ្វើ​ការ​ពិភាក្សាជាមួយ​ក្រុម​ហ៊ុននិង​អាជ្ញាធរ​រដ្ឋ​នៅ​ពេល​ត្រូវ​បាន​អញ្ជើញ​ឲ្យមក​ពិភាក្សា​។ ក្រុមហ៊ុន​របស់​យើង​គោរព​និង​អនុវត្តតាម​ច្បាប់​ការ​ងារកម្ពុជា​ជុំវិញ​បញ្ហា​នេះ​»។​

កាល​ពី​ថ្ងៃទី ៤ ខែសីហា​ លោក ង៉ូវ សេងកាក់​ ប្រធាន​មន្ទីរ​ទេសចរណ៍​ខេត្ត​សៀម​រាប​បាន​មាន​ប្រសាសន៍​ថា មាន​សណ្ឋាគារ​តែ​៦៤​ក្នុង​ចំណោម​សណ្ឋាគារ​២៣០​ កន្លែងនិង​ផ្ទះ​សំណាក់​៨៥​ក្នុងចំណោម​ផ្ទះសំណាក់​២០៤​កន្លែង​ក្នុងខេត្ត​នេះ​នៅដំណើរ​ការនៅឡើយ​​ ហើយថា ការបើកដំណើរ​ការឡើងវិញ​អាស្រ័យ​លើ​ការធ្លាក់ចុះនៃ​ករណី​វីរុស​កូវីដ​១៩៕

29 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »