អាជ្ញាធរក្រុងប៉ោយប៉ែតបានឃុំខ្លួនអ្នកបញ្ជាម៉ាស៊ីនស្ទូច ដែលបានបាក់រលំនៅការដ្ឋានសំណង់មួយកាលពីថ្ងៃទី១២ ខែសីហា កន្លងទៅនេះ ដោយបានសម្លាប់មនុស្ស ០៥នាក់ និងបង្ករបួសដល់មនុស្ស០៤ផ្សេងទៀត ដែលរស់នៅជិតការដ្ឋានសំណង់នោះ។
មេបញ្ជាការកងរាជអាវុធហត្ថក្រុងប៉ោយប៉ែតលោក នួន នីណារ៉ូ បានថ្លែងថា នគរបាល និងកងរាជអាវុធហត្ថបានទៅដល់កន្លែងកើតហេតុស្ថិតនៅឃុំផ្សារកណ្តាល បន្ទាប់ពីមានឧបទ្ទវហេតុខាងលើ ហើយបានឃុំខ្លួនអ្នកបញ្ជាម៉ាស៊ីនស្ទូច ឈ្មោះ ទុត លីវីន អាយុ ២០ឆ្នាំ ដើម្បីយកមកសាកសួរនៅបញ្ជាការដ្ឋានកងរាជអាវុធហត្ថ។
លោក នីណារ៉ូ បានមានប្រសាសន៍ថា៖ «យើងបានឃុំខ្លួនអ្នកបញ្ជាដងស្ទូច។ យើងកំពុងសាកសួរគាត់ ហើយអាជ្ញាធរយើងកំពុងស៊ើបអង្កេតលម្អិតលើរឿងនេះ»។
លោកបានបន្តថា អ្នកបញ្ជាម៉ាស៊ីនស្ទូចឈ្មោះ លីវីន បានបញ្ជាក់ថា នៅពេលដែលគាត់កំពុងបញ្ជាម៉ាស៊ីនស្ទូចនៅម៉ោងប្រមាណ ៣ រសៀល ស្រាប់តែមានខ្យល់បក់ខ្លាំងភ្លាមៗ និងដីក្រោមម៉ាស៊ីនស្ទួចបានស្រុតនិងផុង ដោយធ្វើឲ្យម៉ាស៊ីនស្ទូចដួលរលំ។
មេបញ្ជាការកងរាជអាវុធហត្ថក្រុងប៉ោយប៉ែតលោក នួន នីណារ៉ូ បានលើកឡើងថា នៅពេលដែលម៉ាស៊ីនស្ទួចបាក់រលំ បន្ទះបេតុងបានធ្លាក់មកលើផ្ទះអ្នកជិតខាង ដោយបានសម្លាប់ស្រ្តីចំនួនប្រាំនាក់ ដែលកំពុងអង្គុយលេងបៀរលើគ្រែឈើនៅខាងមុខផ្ទះ។
របាយការណ៍នគរបាលបានកំណត់អត្តសញ្ញាណអ្នកស្លាប់តាមឈ្មោះ ឈាង ហុង អាយុ ៤៩ឆ្នាំ ឡៅ លី អាយុ ៥០ឆ្នាំ ឡឹក ស្រី អាយុ៦៦ឆ្នាំ សេង មុយគា អាយុ ៥៧ឆ្នាំ និង ដឹម ស្រីណាក់ អាយុឆ្នាំ ៣៦ ខណៈ ផន សុខធីដា អាយុ ៣០ឆ្នាំ កា សុម៉ាមាន អាយុ ៣៧ឆ្នាំ សៅ រិទ្ធ អាយុ ៤០ឆ្នាំ និង ខាន់ ស្រីឌី អាយុ២៧ឆ្នាំ បានរងរបួស។
លោក នីណារ៉ូ បានមានប្រសាសន៍ថា៖ «អ្នករងរបួសពីរនាក់ត្រូវបានបញ្ជូនទៅព្យាបាលនៅមន្ទីរពេទ្យបង្អែកក្រុងប៉ោយប៉ែត អ្នករងរបួសធ្ងន់ពីរនាក់ទៀតត្រូវបានបញ្ជូនទៅមន្ទីរពេទ្យមង្គលបុរី ហើយអ្នករងរបួសធ្ងន់ម្នាក់ទៀតត្រូវបានបញ្ជូនទៅមន្ទីរពេទ្យមួយនៅក្រុងភ្នំពេញ»។
យោងទៅតាមរបាយការណ៍ ម៉ាស៊ីនស្ទូចនោះមានប្រវែង ៤០ម៉ែត្រ និងកំពុងលើកបន្ទះបេតុងទំហំបួនម៉ែត្រការ៉េ កម្រាស់ ១២សង់ទីម៉ែត្រ នៅពេលដួលរលំ។ បន្ទះបេតុងនោះត្រូវបានស្ទូចឡើងនៅកម្ពស់ប្រហែល ២០ម៉ែត្រ នៅពេលមានឧបទ្ទវហេតុ។
អធិការនគរបាលក្រុងប៉ោយប៉ែតលោក ធិន ស៊ិនដេត បានបញ្ជាក់ពីហេតុការណ៍ខាងលើនេះ ប៉ុន្តែបានបដិសេធមិនធ្វើការអធិប្បាយបន្ថែម។
លោក ចូវ សុភឿត ប្រធានការិយាល័យសុរិយោដីក្រុងប៉ោយប៉ែត បាននិយាយថា សំណង់អគារស្នាក់នៅ ដែលកើតមានឧបទ្ទវហេតុខាងលើ ស្ថិតក្រោមការគ្រប់គ្រងរបស់ក្រុមហ៊ុន The Park City ដែលជាក្រុមហ៊ុនរបស់ជនជាតិខ្មែរម្នាក់រស់នៅក្រុងភ្នំពេញ។
លោកបានថ្លែងថា៖ «កាលពីម្សិលមិញ [ថ្ងៃពុធ] ប្រធានមន្ទីរសុរិយោដីខេត្ត [លោក អាង ណារិទ្ធ] និងខ្ញុំបានទៅពិនិត្យកន្លែងកើតហេតុ ហើយបានឃើញថា មានបញ្ហាប្រើប្រាស់គ្រឿងចក្រខុសបច្ចេកទេស»។
លោក សុភឿត បានបន្តថា ក្រុមហ៊ុនត្រូវតែទទួលខុសត្រូវលើឧបទ្ទវហេតុនេះ ខណៈបន្ថែមថា ក្រុមហ៊ុនទទួលបានអាជ្ញាបណ្ណដើម្បីធ្វើការសាងសង់ក៏ដោយ។
លោកបានមានប្រសាសន៍ថា៖ «ក្រុមហ៊ុនត្រូវទទួលខុសត្រូវ [លើបញ្ហានេះ]» ស្របពេលពន្យល់ថា ក្រុមហ៊ុនមិនមានការប្រុងប្រយ័ត្ន និងមិនអើពើពីការគ្រប់គ្រងនៅការដ្ឋានសំណង់។
លោក សុភឿត បានលើកឡើងបន្តទៀតថា ទោះបីជាលោកតែងតែទៅពិនិត្យការដ្ឋានសំណង់នានានៅក្រុងប៉ោយប៉ែត និងបានផ្តល់ជាមតិវាយតម្លៃទៅកាន់ក្រុមហ៊ុនផ្សេងៗពាក់ព័ន្ធនឹងច្បាប់សំណង់ក៏ដោយ ក៏មានតែក្រុមហ៊ុនសំណង់មួយចំនួនតែប៉ុណ្ណោះដែលធ្វើតាមការណែនាំរបស់លោក និងគោរពច្បាប់។
លោក សុភឿត បានមានប្រសាសន៍ថា៖ «ខ្ញុំបានសហការជាមួយនឹងមន្រ្តីមន្ទីរគ្រប់គ្រងដែនដី ដែលតែងតែចុះទៅផ្សព្វផ្សាយព័ត៌មាននៅតាមការដ្ឋានសំណង់នានាកាលពីពេលមុនៗ»។
ក្រុមហ៊ុន The Park City បានផ្តល់ប្រាក់ឧបត្ថម្ភចំនួន ៣០០ដុល្លារទៅដល់ក្រុមគ្រួសារអ្នកដែលបាត់បង់ជីវិតនីមួយៗ ហើយអភិបាលខេត្តបន្ទាយមានជ័យ លោក អ៊ុំ រាត្រី បានផ្តល់ថវិកាចំនួន ២៥០ដុល្លារក្នុងមួយគ្រួសារ និងឧបត្ថម្ភបន្ថែមជា អង្ករ និងគ្រឿងសម្ភារៈមួយចំនួនទៀត។ នេះបើយោងទៅតាមលោក សុភឿត ។
កាលពីថ្ងៃទី១២ ខែសីហា លោក អ៊ុំ រាត្រី អភិបាលខេត្តបន្ទាយមានជ័យ បានចុះទៅពិនិត្យកន្លែងកើតហេតុភ្លាមៗ បន្ទាប់ពីមានហេតុការណ៍ខាងលើ ហើយបានបញ្ជាឲ្យមន្រ្តីបិទការដ្ឋានសំណង់នោះជាបណ្តោះអាសន្ន ដើម្បីធ្វើការស្រាវជ្រាវបន្ថែម។ នៅពេល ខេមបូចា ទូរសព្ទចូលនៅថ្ងៃបន្ទាប់ លោកបានបដិសេធមិនធ្វើការអធិប្បាយ ដោយនិយាយថា លោកជាប់រវល់ប្រជុំ។
លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជា បានមានប្រសាសន៍ថា ស្ថាប័នពាក់ព័ន្ធត្រូវតែជួយលើកកម្ពស់សុវត្ថិភាពនៅតាមការដ្ឋានសំណង់ និងត្រូវគោរពតាមច្បាប់ស្តីពីសំណង់ ដែលត្រូវបានអនុម័តដោយរដ្ឋសភាកាលពីខែវិច្ឆិកាឆ្នាំមុន។
លោក សុខ គីន បានមានប្រសាសន៍ថា៖ «តាមអ្វីដែលខ្ញុំបានឃើញ អាជ្ញាធរពាក់ព័ន្ធមានចន្លោះខ្វះខាតនៅពេលចុះពិនិត្យមើលថាតើការដ្ឋានសំណង់គោរពតាមច្បាប់ និងថាតើការដ្ឋានគោរពតាមបទដ្ឋានសំណង់ផ្អែកលើច្បាប់ឬទេ»។
លោក សុខ គីន បានបន្តថា ផ្នែកសន្តិសុខ និងសុវត្ថិភាពរបស់ក្រុមហ៊ុនសំណង់ត្រូវធ្វើការប្រជុំប្រចាំថ្ងៃ ដើម្បីផ្តល់ការណែនាំដល់កម្មករ មុនពេលអនុញ្ញាតឲ្យពួកគេចូលធ្វើការនៅការដ្ឋាន ហើយត្រូវផ្តល់គ្រឿងប្រដាប់ការពារសុវត្ថិភាពឲ្យមានគ្រប់គ្រាន់ទៅដល់នយោជិក។
លោក សុខ គីន បានមានប្រសាសន៍ថា៖ «អ្នកដែលមានការទទួលខុសត្រូវធំជាងគេនៅក្នុងករណីនេះគឺក្រុមហ៊ុនសំណង់» ដោយបន្ថែមថា កម្មករមិនគួរត្រូវរងការដាក់ពិន័យចំពោះកំហុសបច្ចេកទេសដោយអចេតនានោះទេ ប៉ុន្តែពួកគេត្រូវទទួលការព្រមាន និងការអប់រំជំនួសវិញ។
ខេមបូចា មិនអាចទាក់ទង់សុំការអធិប្បាយពីស្នងការនគរបាលខេត្តបន្ទាយមានជ័យលោក អាត់ ខែម បានទេ។
បុគ្គលិកផ្នែកលក់របស់ក្រុមហ៊ុន The Park City ប្រចាំនៅក្រុងប៉ោយប៉ែត ដែលសុំមិនបញ្ចេញឈ្មោះបាននិយាយថា ក្រុមហ៊ុននឹងដោះស្រាយករណីគ្រោះថ្នាក់ខាងលើ ប៉ុន្តែមិនបានដឹងព័ត៌មានលម្អិតនោះទេ។
កាលពីដើមឆ្នាំនេះ ក្រសួងរៀបចំដែនដី នគរូបនីយកម្ម និងសំណង់បានចេញសេចក្តីប្រកាសទូទាំងប្រទេសមួយ ដោយដាក់បម្រាមលើសំណង់ណាដែលមិនមានអាជ្ញាបណ្ណ និងហាមឃាត់កម្មករសំណង់មិនឲ្យស្នាក់នៅការដ្ឋាន។
ការរីកចម្រើននៃវិស័យសំណង់នៅកម្ពុជាបាននាំឲ្យមានគ្រោះថ្នាក់រហូតដល់មានការបាត់បង់ជីវិតនៅតាមការដ្ឋានសំណង់នានាចាប់តាំងពីឆ្នាំ ២០១៩មក។
កាលពីខែមិថុនាឆ្នាំមុន ហេតុការណ៍បាក់សំណង់អគារប្រាំពីរជាន់ដែលមានម្ចាស់ជាជនជាតិចិននៅខេត្តព្រះសីហនុ បានសម្លាប់មនុស្ស ២៨នាក់ និងបង្កឲ្យ ២៦នាក់ទៀតរងរបួស។ អាជ្ញាធរបាននិយាយថា សំណង់អគារនោះមិនមានអាជ្ញាបណ្ណត្រឹមត្រូវ ហើយមន្រ្តីមូលដ្ឋានបានបញ្ជាឲ្យមានការផ្អាកដំណើរការសាងសង់ប៉ុន្មានដងរួចមកហើយ ប៉ុន្តែអ្នកគ្រប់គ្រងការដ្ឋានមិនបានស្តាប់ការណែនាំនោះទេ។ ជនសង្ស័យពាក់ព័ន្ធនឹងគ្រោះថ្នាក់នោះចំនួនប្រាំនាក់ រួមមាន ជនជាតិចិនចំនួន ៤នាក់ និងជនជាតិវៀតណាមចំនួនមួយនាក់ ត្រូវបានផ្តន្ទាទោសឲ្យជាប់ពន្ធនាគាររហូតដល់បីឆ្នាំ កាលពីថ្ងៃទី៣០ ខែកក្កដា ឆ្នាំនេះ។
កាលពីដើមឆ្នាំនេះ សំណង់អគារចំនួនប្រាំពីរជាន់មួយទៀតបានបាក់រលំនៅក្រុងកែប ខេត្តកែប ដោយបានសម្លាប់មនុស្ស ៣៦នាក់ ក្នុងនោះរួមមានកុមារផងដែរ និងបង្កឲ្យ២៣នាក់ទៀតរងរបួស។ គ្មាននរណាផ្សេងទៀតត្រូវបានចោទប្រកាន់តាមផ្លូវច្បាប់នោះទេនៅក្នុងករណីគ្រោះថ្នាក់នេះ បន្ទាប់ម្ចាស់ជនជាតិខ្មែរពីរនាក់ត្រូវបានដោះលែងឲ្យស្ថិតនៅក្រៅឃុំ។
កាលពីខែធ្នូ ឆ្នាំ២០១៩ មនុស្សបីនាក់បានស្លាប់ ហើយជាង១០នាក់ទៀតបានរងរបួសធ្ងន់ បន្ទាប់ពីមានឧបទ្ទវហេតុបាក់ព្រះវិហារក្នុងបរិវេណវត្តអារាមមួយនៅក្រុងសៀមរាប ខេត្តសៀមរាប៕
