លោក កឹម សុខា អតីតប្រធានគណបក្សប្រឆាំងនឹងដាក់បណ្តឹងឧទ្ធរណ៍នៅក្នុងសប្តាហ៍នេះប្រឆាំងនឹងការផ្ដន្ទាទោសលោកក្នុងសំណុំរឿងក្បត់ជាតិ ដែលតុលាការក្រុងភ្នំពេញ សម្រេចឃុំខ្លួននៅក្នុងផ្ទះរយៈពេល២៧ឆ្នាំ។ នេះបើតាមការលើកឡើងរបស់មេធាវីលោក។
តុលាការបានទុករយៈពេល៣០ថ្ងៃ ដើម្បីប្តឹងឧទ្ធរណ៍ បន្ទាប់ពីប្រកាសសាលក្រមថ្ងៃទី៣ ខែមីនា។
លោក អាង ឧត្តម និងលោកស្រី ម៉េង សុភារី សហមេធាវីការពារក្តីឲ្យលោក កឹម សុខា បានជួបជាមួយលោក កឹម សុខា កាលពីព្រឹកថ្ងៃអង្គារ បន្ទាប់ពីទទួលបានការអនុញ្ញាតពីព្រះរាជអាជ្ញារសាលាដំបូងរាជធានីភ្នំពេញ។
លោក ឧត្តម បានឲ្យដឹងថា៖ «គ្មានការលើកឡើងអ្វីផ្សេងអំឡុងជំនួបនោះទេ ហើយគ្រាន់តែនិយាយអំពីបណ្តឹងឧទ្ធរណ៍ប៉ុណ្ណោះ។ ពីព្រោះលោកមិនពេញចិត្ត [នឹងការផ្តន្ទាទោសនេះ] ហើយវាអយុត្តិធម៌ចំពោះលោក»។
បន្ទាប់ពីមេធាវីរបស់ កឹម សុខា លើកឡើងថា ខ្លួនត្រូវបានរារាំងមិនឱ្យជួបជាមួយកូនក្តីរបស់ខ្លួនកាលពីថ្ងៃទី១៦ ខែមីនា លោក កឹម សុខា បានសរសេរលិខិតមួយទៅកាន់ព្រះរាជអាជ្ញានៅថ្ងៃទី២២ ខែមីនា ដើម្បីស្នើសុំការអនុញ្ញាតឱ្យជួបមេធាវីរបស់លោក ដើម្បីពិភាក្សាអំពីបណ្តឹងឧទ្ធរណ៍។
លោក កឹម សុខា បានសរសេរថា៖ «ខ្ញុំត្រូវការជួបជាមួយមេធាវីរបស់ខ្ញុំ ដើម្បីបន្តនីតិវិធីតាមផ្លូវតុលាការ។ ខ្ញុំត្រូវការពិគ្រោះយោបល់ជាមួយមេធាវី ដើម្បីប្តឹងឧទ្ធរណ៍ឲ្យទាន់ពេលកំណត់»។ លិខិតរបស់លោកត្រូវបានបង្ហោះលើហ្វេសប៊ុកជំនួយការផ្ទាល់របស់លោក។
សាលក្រមរបស់សាលាដំបូងរាជធានីភ្នំពេញបានរារាំងលោក កឹម សុខា មិនឱ្យចាកចេញពីផ្ទះ ឬទំនាក់ទំនងដោយផ្ទាល់ ឬតាមប្រព័ន្ធអ៊ីនធឺណិតជាមួយបុគ្គលណាទាំងអស់ក្រៅពីសមាជិកគ្រួសារ លើកលែងតែមានការអនុញ្ញាតពីព្រះរាជអាជ្ញា។ លោក កឹម សុខា ក៏ត្រូវបានហាមមិនឲ្យធ្វើនយោបាយអស់មួយជីវិតផងដែរ។
សភាអ៊ឺរ៉ុបបានអំពាវនាវដល់អាជ្ញាធរកម្ពុជាកាលពីថ្ងៃទី១៦ ខែមីនា ឱ្យដោះលែងលោក កឹម សុខា អតីតមេបក្សប្រឆាំង និងអនុញ្ញាតឲ្យគណបក្សសង្គ្រោះជាតិដែលត្រូវបានរំលាយដោយតុលាការនោះ ដំណើរការឡើងវិញ ដើម្បីចូលរួមក្នុងការបោះឆ្នោតឆ្នាំ២០២៣ បើមិនដូច្នេះទេ នឹងប្រឈមមុខនឹងការដាក់ទណ្ឌកម្ម និងការដកប្រព័ន្ធអនុគ្រោះពន្ធបន្ថែមទៀត។
លោក ឯម សុវណ្ណារ៉ា អ្នកវិភាគនយោបាយមានប្រសាសន៍ថា ការប្តឹងឧទ្ធរណ៍ទំនងដូចជាជម្រើសតែមួយគត់របស់លោក កឹម សុខា ដើម្បីស្វែងរកយុត្តិធម៌។
លោកថ្លែងថា៖ «លោកត្រូវប្តឹងទៅឧទ្ធរណ៍ព្រោះលោកគ្មានជម្រើស។ ការប្តឹងឧទ្ធរណ៍ គឺជាមធ្យោបាយដ៏ល្អបំផុត ដើម្បីឲ្យមានការទម្លាក់បទចោទឬការបន្ធូរបន្ថយទោស»៕
(រាយការណ៍បន្ថែមដោយ រ៉ាន់ ស្រីដែត)
ប្រែសម្រួលពីអត្ថបទភាសាអង់គ្លេស៖ Kem Sokha to Appeal This Week Against Treason Conviction