ពលរដ្ឋឃុំរាមមានការព្រួយបារម្ភកាលពីខែមុន បន្ទាប់ពីតំបន់ដែលពួកគេរស់នៅបានក្លាយជាផ្នែកមួយនៃសម្បទានដីធ្លីចំនួន ៦០០ហិកតាផ្តល់ទៅឲ្យគ្រួសារលោកឧកញ៉ា លី យ៉ុងផាត់ ដ៏មានឥទ្ធិពល។ ដោយក្រឡេកមើលរឿងរ៉ាវផ្សេងៗពីមុន ពលរដ្ឋទាំងនោះដឹងថា មានលទ្ធភាពខ្ពស់ដែលពួកគេអាចត្រូវជម្លៀសចេញពីផ្ទះសម្បែងរបស់ខ្លួននៅខេត្តព្រះសីហនុ ហើយអាចត្រូវជម្លៀសដោយបង្ខំក៏ថាបាន។
ប៉ុន្តែស្របពេលមានដំណឹងល្អថា ពួកគេអាចទទួលបានដំណោះស្រាយមួយទៅលើជម្លោះដីធ្លីនោះ ភូមិចំនួនបីក្នុងឃុំរាមឥឡូវនេះកំពុងស្ថិតនៅក្រោមការព្រួយបារម្ភពីការចម្លងវីរុសកូរ៉ូណា បន្ទាប់ពីមន្រ្តីរដ្ឋាភិបាល ដែលត្រូវធ្វើចត្តាឡីស័ក បានធ្វើដំណើរទៅឃុំរបស់ពួកគេដែលស្ថិតជាប់បណ្តោយមាត់សមុទ្រ។
តំណាងបួនរូបសម្រាប់គ្រួសារចំនួន៥៩ ដែលរស់នៅជុំវិញបឹងកោងកាងនៅក្នុងខេត្តព្រះសីហនុ បានជួបជាមួយនឹងក្រុមមន្រ្តីពីក្រុងភ្នំពេញ ដែលក្នុងនោះរួមមានលោក ដួង តារា ជំនួយការផ្ទាល់របស់លោកនាយករដ្ឋមន្រ្តី ហ៊ុន សែន។
បញ្ហាត្រង់ថា លោក ដួង តារា ដែលជាអ្នកកាន់បណ្តាញសង្គមរបស់ លោកនាយករដ្ឋមន្រ្តី ហ៊ុន សែន ជាមួយនឹងមន្រ្តីដទៃទៀត ត្រូវធ្វើចត្តាឡីស័ក បន្ទាប់ពីប្រាស្រ័យទាក់ទងដោយផ្ទាល់និងដោយប្រយោលជាមួយនឹងរដ្ឋមន្រ្តីហុងគ្រី ដែលត្រូវបានរកឃើញថា បានឆ្លងវីរុសកូរ៉ូណាកាលពីសប្តាហ៍កន្លងទៅ។
តំណាងពលរដ្ឋចំនួនបួននាក់ និងបុគ្គលិកក្រុមហ៊ុនម្នាក់ត្រូវបានដាក់ក្រោមចត្តាឡីស័ក។
អ្នកស្រី គឹម ចន្ធី អាយុ ៤១ឆ្នាំ តំណាងអ្នកភូមិម្នាក់ក្នុងចំណោមបួននាក់ បាននិយាយថា អ្នកស្រីបានជួបជាមួយនឹងតំណាងមន្រ្តីរដ្ឋាភិបាល ដែលចង់ពិភាក្សាលក្ខខណ្ឌពាក់ព័ន្ធនឹងដំណោះស្រាយស្នើឡើងសម្រាប់ជម្លោះដីធ្លី ប៉ុន្តែអ្នកស្រីមិនបានដឹងពីដំណឹងឲ្យមានការប្រុងប្រយ័ត្នពីជំងឺកូវីដ១៩ នៅក្រុងភ្នំពេញនោះទេ។
អ្នកស្រីចន្ធី បាននិយាយថា៖ «ឥឡូវនេះ យើងមិនមានបញ្ហាដីធ្លីទៀតនោះទេ ប៉ុន្តែយើងកំពុងជួបប្រទះ[ស្ថានភាព]ជំងឺកូវីដ១៩។ ខ្ញុំបានទៅធ្វើតេស្ត ហើយខ្ញុំកំពុងរង់ចាំលទ្ធផល»។
នាពេលបច្ចុប្បន្ន តំណាងអ្នកភូមិរូបនេះកំពុងធ្វើចត្តាឡីស័កនៅក្រុងសីហនុ ហើយកំពុងព្រួយបារម្ភថា គ្រួសារអ្នកស្រីអាចឆ្លងជំងឹកូវីដ១៩ ប្រសិនបើអ្នកស្រីត្រូវធ្វើតេស្តរកឃើញថា វិជ្ជមាន។
ដំណោះស្រាយ ដែលអ្នកស្រី ចន្ធី កំពុងធ្វើការចរចាគឺ ពាក់ព័ន្ធនឹងតំបន់ដីកម្មសិទ្ធិរដ្ឋធំមួយផ្តល់ទៅឲ្យលោកសេង ញ៉ក់ និងលោកស្រី លី អាផណ ដែលជាកូនស្រីរបស់លោក លី យ៉ុងផាត់។ នេះបើយោងទៅតាមអនុក្រឹត្យចុះហត្ថលេខាដោយលោកនាយករដ្ឋមន្រ្តីហ៊ុន សែនកាលពីខែមិថុនា។
រដ្ឋមន្ត្រីក្រសួងកសិកម្ម លោក វេង សាខុន បានមានប្រសាសន៍កាលពីខែតុលាថា កិច្ចសន្យាជួលដីរយៈពេល ៥០ឆ្នាំត្រូវបានផ្តល់សម្រាប់តំបន់ព្រៃកោងកាង និងតំបន់ព្រៃឈើនៅស្រុកព្រៃនប់ និងស្ថិតនៅគម្រោងអភិវឌ្ឍធំៗដទៃទៀតនៅឃុំរាម និងឃុំបិតត្រាង។
សហគមន៍អ្នកនេសាទ ដែលពឹងផ្អែកលើសមុទ្រ បានប្រឈមនឹងភាពស្រពិចស្រពិលពាក់ព័ន្ធនឹងផ្តល់ដីនៅទីតាំងថ្មី ដោយគ្រាន់តែមានពាក្យចចាមមរ៉ាមពីការផ្តល់សំណង និងទីតាំងថ្មីប៉ុណ្ណោះ ដែលការណ៍នេះធ្វើឲ្យអ្នកស្រុកមួយចំនួនព្រួយបារម្ភថា ពួកគេនឹងត្រូវជម្លៀសចេញនៅពេលណាមួយ។
មានករណីជម្លៀសចេញដោយបង្ខំជាច្រើនករណីនៅកម្ពុជា បន្ទាប់ពីក្រុមហ៊ុនឯកជនមួយចំនួនទទួលបាននូវកិច្ចសន្យាជួលដី ឬដីសម្បទានសេដ្ឋកិច្ចធំៗសម្រាប់ការអភិវឌ្ឍ ឬកសិកម្ម។ ក្រុមអង្គការគាំពារសិទ្ធិបានតវ៉ាប្រឆាំងនឹងការផ្តល់ដីសម្បទាន និងស្នើឲ្យរដ្ឋាភិបាល និងក្រុមហ៊ុនពាក់ព័ន្ធផ្តល់សំណងសមស្របដល់ពលរដ្ឋដែលត្រូវបានជម្លៀស បើទោះជាការស្នើនេះមិនសូវបានជោគជ័យក៏ដោយ។
បន្ថែមពីលើនេះទៀត លោក លី យ៉ុងផាត់ ដែលជាសមាជិកព្រឹទ្ធសភាមកពីគណបក្សប្រជាជនកម្ពុជា ធ្លាប់ជាប់ក្នុងរឿងចម្រូងចម្រាស់ពាក់ព័ន្ធនឹងដីសម្បទានធ្វើស្ករអំពៅនៅខេត្តកំពង់ស្ពឺ និងខេត្តកោះកុងជុំវិញការបណ្តេញពលរដ្ឋចេញដោយបង្ខំ។ កាលពីខែកក្កដា ក្រុមអង្គការសង្គមស៊ីវិលបានស្នើឲ្យរដ្ឋាភិបាលដកអាជ្ញាបណ្ណផ្តល់ឲ្យតំបន់សេដ្ឋកិច្ចពិសេសរបស់លោកលី យ៉ុងផាត់ នៅខេត្តកោះកុងដើម្បីអភិវឌ្ឍតំបន់កោះកុងក្រៅនៅខេត្តនេះ ដោយលើកឡើងពីការគំរាមកំហែងធ្ងន់ធ្ងរទៅលើធនធានធម្មជាតិនៅតំបន់នោះ។
អ្នកស្រីចន្ធី តំណាងអ្នកភូមិ បាននិយាយថា អ្នកភូមិមានបំណងនឹងផ្លាស់ទៅកន្លែងថ្មី ដែលស្រដៀងនឹងភូមិរបស់ពួកគេជាមួយនឹងសំណងសមរម្យជាសាច់ប្រាក់។ អ្នកស្រីបានបន្តថា អ្នកភូមិព្រមទទួលយកនូវសំណងពីសំណាក់ក្រុមហ៊ុន ពីព្រោះពួកគេព្រួយបារម្ភពីការបន្តរស់នៅលើដីរដ្ឋ។
អ្នកស្រីចន្ធី បាននិយាយថា៖ «យើងបានព្រៀមព្រៀងផ្លាស់ទៅកន្លែងថ្មី ពីព្រោះក្រុមហ៊ុនយល់ព្រមផ្តល់សំណងចំនួន ៤០០០ដុល្លារ និងដីមួយប្លង់ដល់ពួកយើង ដែលមានទំហំ ១០ម៉ែត្រគុណនឹង២០ម៉ែត្រសម្រាប់គ្រួសារនីមួយៗ»។
អ្នកស្រីបានបន្តថា៖ «យើងមិនអាចប្រឆាំងនឹងគោលនយោបាយរបស់រដ្ឋនោះទេ ហើយយើងកំពុងរស់នៅលើដីរដ្ឋ។ យើងជាគ្រួសារក្រីក្រ ដូច្នេះវាសមរម្យសម្រាប់ពួកយើង»។
គ្រួសារពលរដ្ឋខាងលើយល់ព្រមផ្លាស់ទៅទីតាំងថ្មីមួយទៀតនៅឃុំទួលទទឹង ស្ថិតនៅស្រុកព្រៃនប់ដូចគ្នា។ ទីតាំងថ្មីនេះក៏ស្ថិតនៅជាប់មាត់សមុទ្រ និងមានហេដ្ឋារចនាសម្ព័ន្ធដូចជា ផ្លូវ ប្រព័ន្ធទឹក និងអគ្គិសនីផងដែរ។
CamboJA មិនអាចទាក់ទងលោក សេង ញ៉ក់ កូនប្រសារលោកលី យ៉ុងផាត់ កាលពីថ្ងៃអង្គារកន្លងទៅនេះបានទេ ដើម្បីបញ្ជាក់លម្អិតពីដំណោះស្រាយលើជម្លោះដីធ្លីនេះ។ លោកសេងញ៉ក់ជានាយកក្រុមហ៊ុន The Premier Land ដែលត្រូវបានផ្តល់ដីសម្បទាន។
លោក លីន សារិន មេឃុំរាម បាននិយាយលោកមិនបានដឹងពីការចរចានោះទេ ប៉ុន្តែលោកបាននិយាយថា អាជ្ញាធរបានគ្រប់គ្រងស្ថានភាពពាក់ព័ន្ធវីរុសកូរ៉ូណាដោយជោគជ័យ។ អាជ្ញាធរបានដាក់ចត្តាឡីស័កពលរដ្ឋភូមិអុងក្រៅចំនួនបួននាក់ និងតំណាងក្រុមហ៊ុនម្នាក់ ដែលបានប្រាស្រ័យទាក់ទងជាមួយនឹងមន្រ្តីពីក្រុងភ្នំពេញ។
លោកដួង តារា បានការពារសេចក្តីសម្រេចរបស់លោកនៅក្នុងការចុះទៅឃុំរាម ពីព្រោះលោកត្រូវបានធ្វើតេស្តរកឃើញថា អវិជ្ជមានចំនួនពីរលើករួចមកហើយ និងមិនបានប្រាស្រ័យទាក់ទងផ្ទាល់ជាមួយនឹងរដ្ឋមន្រ្តីហុងគ្រីនោះទេ។ លោកបាននិយាយថា បណ្តាញផ្សព្វផ្សាយបានចែករំលែកព័ត៌មានក្លែងក្លាយដែលថា លោកកើតជំងឺកូវីដ១៩ ប៉ុន្តែលោកមិនបានផ្តល់ការអធិប្បាយហេតុអ្វីបានជាលោកចាកចេញពីការធ្វើចត្តាឡីស័កមុនការកំណត់នោះទេ។
រដ្ឋាភិបាលកម្ពុជា និងលោកនាយករដ្ឋមន្រ្តីហ៊ុន សែនបានស្នើឲ្យក្រុមមន្រ្តីធ្វើចត្តាឡីស័ក ឬស្នាក់នៅដោយឡែកដាច់ពីអ្នកដទៃរយៈពេល ១៤ថ្ងៃ។
លោកដួង តារា បានថ្លែងកាលពីថ្ងៃពុធថា៖ «សូមកុំព្រួយបារម្ភពីបញ្ហានេះ ហើយប្រសិនបើប្រជាជនមានការព្រួយបារម្ភ ពួកគេអាចមកពិនិត្យសុខភាពនៅមជ្ឈមណ្ឌលសុខភាពនៅជិតផ្ទះរបស់ពួកគេ»។
លោកបានបញ្ជាក់ថា គ្រួសារចំនួនប្រហែល ៥០នៅឃុំនោះបានទទួលយកសំណងស្នើឡើងដោយរដ្ឋាភិបាល។
លោក ឃាង ភារម្យ អ្នកនាំពាក្យសាលាខេត្តព្រះសីហនុ បាននិយាយថា លោកបានដឹងថា ដីសម្បទានត្រូវបានផ្តល់ឲ្យក្រុមហ៊ុន The Premier Land ប៉ុន្តែលោកមិនបានដឹងពីការចរចារវាងក្រុមហ៊ុន និងអ្នកភូមិនោះទេ។ យ៉ាងណាក្តី លោកគាំទ្រដំណោះស្រាយដោយសន្តិវិធីលើបញ្ហានេះ។
លោកបាននិយាយថា៖ «វាជារឿងល្អ ពីព្រោះនៅពេលដែលអ្នកភូមិត្រូវរងផលប៉ះពាល់ យើងត្រូវដោះស្រាយបញ្ហាជាមុនសិន ដើម្បីធានាថា គម្រោងអភិវឌ្ឍន៍នឹងដើរទៅមុខដោយរលូន»។
លោក ភារម្យ បានបញ្ជាក់ថា លោក ដួង តារា និងមន្រ្តីរដ្ឋាភិបាលដទៃទៀតបានទៅភូមិនានានៅស្រុកព្រៃនប់ និងបាននិយាយទៅកាន់អ្នកភូមិ ហើយបានថ្លែងការពារសេចក្តីសម្រេចរបស់លោកតារានៅក្នុងការធ្វើដំណើរទៅស្រុកនោះ។
លោកបាននិយាយថា៖ «គាត់មានសុខភាពល្អ ហើយគាត់បានធ្វើតេស្តរកជំងឺកូវីដ១៩ ចំនួនពីរដង ដោយទទួលបានលទ្ធផលអវិជ្ជមាន»។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា បាននិយាយថា វាជាបញ្ហាព្រួយបារម្ភមួយដែលរដ្ឋាភិបាលផ្តល់នូវដីរដ្ឋចំនួន ៦០០ហិកតា ដើម្បីផលប្រយោជន៍ឯកជន។
លោកស្រីបានបន្តថា ប្រសិនបើសហគមន៍ពេញចិត្តនឹងដំណោះស្រាយ នោះវាជាការសំខាន់ដែលរដ្ឋាភិបាលត្រូវគោរពតាមការសន្យាដែលបានធ្វើឡើងជាមួយអ្នកភូមិ។ លោកស្រីបានបន្ថែមថា ការចរចា និងដំណោះស្រាយផ្សេងៗគួរតែត្រូវបានធ្វើមុនពេលការឲ្យផ្តល់ដីទៅក្រុមហ៊ុនឯកជន។ លោកស្រី ចក់ សុភាព មានប្រសាសន៍ថា៖ «វាជាការសំខាន់ដែលគ្រួសារពលរដ្ឋទទួលបានសំណងដោយសមធម៌ និងយុត្តិធម៌ ស្របជាមួយនឹងបទដ្ឋានសិទ្ធិមនុស្សអន្តរជាតិ»៕