មណ្ឌលសុខភាពកំពង់កណ្ដាល ស្ថិតក្នុងក្រុងកំពត កំពុងខ្វះបុគ្គលិកពេទ្យ ដើម្បីបម្រើការងារក្នុងការផ្ដល់សេវាជូនប្រជាពលរដ្ឋឱ្យបានទាន់ពេលវេលា ខណៈក្នុងមួយខែមានពលរដ្ឋមកទទួលសេវាចន្លោះពី៥០០ទៅ៦០០នាក់។
វិស័យសុខាភិបាលត្រូវបានរដ្ឋាភិបាលចាត់ទុកថា ជាវិស័យអាទិភាព ដែលក្នុងមួយឆ្នាំៗរដ្ឋបានបញ្ចេញកញ្ចប់ថវិកាជាច្រើនសម្រាប់ប្រើប្រាស់ និងពង្រឹងទៅលើវិស័យនេះនៅតាមតំបន់គោលដៅនានា។
ជាក់ស្ដែង មណ្ឌលសុខភាពកំពង់កណ្ដាល ដែលស្ថិតនៅក្រុងកំពត កំពុងត្រូវការគ្រូពេទ្យបន្ថែម ដើម្បីបម្រើសេវាជូនប្រជាពលរដ្ឋឲ្យបានទាន់ពេលវេលា និងមានប្រសិទ្ធិភាព។ បើតាមអ្នកស្រី ពៅ សម្ភស្ស ជាប្រធានមណ្ឌលសុខភាពកំពង់កណ្ដាល ដែលស្ថិតមិនឆ្ងាយប៉ុន្មានពីក្រុងកំពត ឲ្យដឹងថា មណ្ឌលសុខភាពកំពង់កណ្ដាល ពិតជាមានតម្រូវការគ្រូពេទ្យបន្ថែម ដើម្បីសម្រួលការងារដល់បុគ្គលិកបច្ចុប្បន្ន ដែលកាន់ការងារច្រើន ហើយអាចបម្រើសេវារហ័សទាន់ចិត្តជូនអ្នកជំងឺ ដែលមកទទួលសេវា។
ជុំវិញកង្វះខាតផ្នែកបុគ្គលិកនេះ អ្នកស្រីសម្ភស្ស ប្រាប់ថាធ្លាប់ស្នើសុំតាមរយៈការិយាល័យសុខាភិបាល ស្រុកប្រតិបត្តិកំពត ហើយទន្ទឹមនឹងកង្វះខាតផ្នែកបុគ្គលិក អ្នកស្រីក៏ចង់បានឧបករណ៍ពិនិត្យឈាមថ្មី និងការកែប្រែហេដ្ឋរចនាសម្ព័ន្ធមណ្ឌលសុខភាពផងដែរ។
អ្នកស្រី សម្ភស្ស បញ្ជាក់ថា៖ «យើងធ្លាប់ស្នើទៅកាន់OD(ប្រតិបត្តិប្រចាំក្រុងកំពត) ប៉ុន្តែមិនទាន់មានវិធានការអ្វីទេ។ ខ្វះរយៈពេល៣ខែចុងក្រោយ ហើយអត់មានអ្នកជួយធ្វើការ ការយាមមានតែគ្នាពីរនាក់យើងត្រូវរត់ទៅរត់មក»។
មណ្ឌលសុខភាពកំពង់កណ្ដាល បម្រើសេវា២៤ម៉ោង និងមានគ្រូពេទ្យយាមជាប្រចាំ ហើយក្នុងមួយខែមានអ្នកជំងឺមកទទួលសេវាចន្លោះពី៥០០ទៅ៦០០នាក់។ ដោយសារតែបុគ្គលិកមានតិច រីឯអ្នកជំងឺច្រើន ទើបធ្វើឱ្យការបំពេញការងារមានភាពយឺតយ៉ាវ។
អ្នកស្រី សម្ភស្ស បន្តថា៖ «ការងារវាច្រើនអត់មានអ្នកជួយកាន់របាយការណ៍ ខណៈការងារសុទ្ធតែបញ្ចូលក្នុងប្រព័ន្ធទាំងអស់។ ហើយអ៊ីចឹង ការទទួលសេវាអតិថិជនក៏វាយឺត ដោយសារតែបុគ្គលិកតិច។ ពលរដ្ឋរអ៊ូគឺរអ៊ូហើយ តែខ្ញុំប្រាប់គាត់ថាធ្វើការតាមលេខរៀងយើងទៅធ្វើម៉េចទាន់ចិត្តគាត់ បើគាត់មកម្ដងដប់ ម្ភៃនាក់ ខណៈបុគ្គលិកយើងមានតែប៉ុន្មាននាក់ហ្នឹង»។
ស្ដង់ដារបុគ្គលិកពេទ្យនៅតាមមណ្ឌលសុខភាព គឺចន្លោះពី៨ ទៅ១២នាក់ ខណៈបុគ្គលិកនៅមណ្ឌលសុខភាពកំពង់កណ្ដាលមានត្រឹមតែ៦នាក់ប៉ុណ្ណោះ តែទោះជាយ៉ាងនេះក្ដី អ្នកស្រី សម្ភស្ស អះអាងថា មណ្ឌលសុខភាពនៅតែប្ដេជ្ញាបំពេញសេវាជូនប្រជាពលរដ្ឋឱ្យអស់ពីលទ្ធភាព។
អ្នកស្រី សម្ភស្ស បន្ថែមថា៖ «ខ្ញុំត្រូវការពេទ្យទូទៅ គិលានុបដ្ឋាក២នាក់ និងឆ្មបមួយទៀត យើងយាមជាប់២៤ម៉ោង»។
បុគ្គលិកបម្រើការនៅមណ្ឌលសុខភាពកំពង់កណ្ដាល ផ្នែកឆ្មប គឺអ្នកស្រី ពៅ ចាន់និមល់ ថ្លែងប្រាប់ ខេមបូចា ថា ការបន្ថែមបុគ្គលិកពេទ្យឱ្យគ្រប់ស្ដងដារ នឹងជូយសម្រួលការងារនៅក្នុងមណ្ឌលសុខភាព រីឯអ្នកជំងឺនឹងមានឱកាសទទួលសេវាប្រកបដោយទំនុកចិត្ត ទាន់ពេលវេលា ចំណេញពេល ហើយក្រុមគ្រូពេទ្យអាចធ្វើការងារទៅតាមមុខងារ និងតួនាទីរៀងៗខ្លួន។ ពោល គឺមិនធ្វើការចម្រុះច្រើនមុខ ឬឆ្លងការងារគ្នា។
អ្នកស្រី និមល់ បន្តថា៖ «ការស្នើសុំបុគ្គលិកបន្ថែម គឺមានភាពងាយស្រួលធ្វើឱ្យអតិថិជនទទួលសេវាបានឆាប់រហ័ស។ ការលំបាក ពេលអតិថិជនមកផ្ទួនៗ គឺមានការរង់ចាំបន្តិចបន្តួច គ្រាន់តែថាបើបានគ្រប់ស្ដង់ដារ គឺជួយសម្រួលការងារគ្នា បានលឿន»។
ដោយសារតែបុគ្គលិកតិច ហើយអ្នកជំងឺមកព្យាបាលច្រើន ពេលខ្លះអ្នកស្រី និមល់ ត្រូវធ្វើការលើសម៉ោង និងលះបង់ពេលវេលាផ្ទាល់ខ្លួនដើម្បីជួយការងារមិត្តរួមការងារនៅពេលដែលមានអ្នកជំងឺមកច្រើន។ តែអ្នកស្រីថា ជាការល្អប្រសិនបើមណ្ឌលអ្នកស្រី អាចមានបុគ្គលិកបន្ថែមទៀត។
អ្នកស្រីថា៖ «ឆ្នាំនេះបុគ្គលិកតិចយើងធ្វើការបត់បែនទៅតាមហ្នឹង ពលរដ្ឋមកទទួលសេវាចម្រុះ»។
បើតាមអ្នកស្រី ផន ចិន្តា (ឈ្មោះអ្នកសារព័ត៌មានដាក់ឱ្យ) ជាពលរដ្ឋរស់នៅសង្កាត់កំពង់កណ្ដាល បានឲ្យដឹងថា កាលដែលមណ្ឌលសុខភាពមានសម្ភារៈ មានថ្នាំសង្កូវ និងមានបុគ្គលិកបម្រើការងារជូនប្រជាពលរដ្ឋ គ្រប់គ្រាន់ និងទាន់ពេលវេលា គឺជារឿងសំខាន់។
អ្នកស្រី ចិន្តា ឱ្យដឹងថា៖ «សំខាន់ គឺសំខាន់ហ្នឹងហើយ ឲ្យតែមានថ្នាំបរបូរណ៍ វាមិនចេះអត់សំខាន់ទេ។ នៅកន្លែងពេទ្យត្រូវតែមានគ្រូពេទ្យគ្រប់គ្រាន់ បើមិនគ្រប់គ្រាន់គឺខ្វះខាត»។
យោងតាមរបាយការណ៍របស់ក្រសួងសុខាភិបាល ឱ្យដឹងថា រវាងឆ្នាំ២០១៨-២០២២ ចំនួន មណ្ឌលសុខភាពបានកើនឡើងពី ១ ២០៥កន្លែង ដល់ ១ ២៨៨កន្លែង និងចំនួនមន្ទីរពេទ្យបានកើនពី១២៣កន្លែង ដល់ ១៣២កន្លែង។ ចំណែកចំនួនមន្ត្រីរាជការសុខាភិបាលទូទាំងប្រទេស បានកើនឡើងពី ២៥ ៤៣៨ នាក់ នៅឆ្នាំ២០១៨ ដល់ ៣២ ២៤០នាក់ នៅឆ្នាំ២០២២។
លោក ទី វុទ្ធី ចៅសង្កាត់កំពង់កណ្ដាល ថ្លែងឱ្យដឹងថា លោកពិតជាបានជ្រាបអំពីបញ្ហានេះ ហើយតែងតែចូលរួមជួយមណ្ឌលសុខភាពទៅតាមលទ្ធភាព ដែលសង្កាត់មានមិនដែលអាក់ខានឡើយ។ ហើយចំពោះបញ្ហាខ្វះបុគ្គលិកពេទ្យ លោក វុទ្ធី ថា គប្បីតែមានបន្ថែម ហើយបាន ឬមិនបានគឺអាស្រ័យលើកាចាត់ចែងរបស់ថ្នាក់លើ។
លោក វុទ្ធី ថ្លែងថា៖ «មណ្ឌលខ្វះបុគ្គលិក ត្រូវចាក់ដីផង ត្រូវសង់បន្ទប់ចាក់វ៉ាក់សាំង និងសង់អគាររង់ចាំសម្រាលផង។ យើងជួយហូរហែទៅតាមលទ្ធភាពដែលយើងមាន ហើយទាល់តែម្ចាស់ទីតាំងសន្សំដែរបានទៅរួច»។
លោកចៅសង្កាត់រំពឹងថា មណ្ឌលសុខភាពកំពង់កណ្ដាលនឹងទទួលបានបុគ្គលិកពេទ្យបន្ថែម ហើយលោកក៏បានកោតសរសើរមណ្ឌលសុខភាពនេះផងដែរ ដែលមានអ្នកមកទទួលសេវាច្រើនជាងមណ្ឌលសុខភាពផ្សេងៗ។
លោកចៅសង្កាត់បន្ថែមថា៖ «សង្កាត់ផ្សេងក៏នៅតែមកប្រើសេវានៅមណ្ឌលនេះដែរ ដោយសារតែគាត់មានសីលធម៌ល្អ មានការប្រចាំការ២៤ម៉ោង និងការបង់សេវាតាមតារាងតម្លៃជាដើម»។
រវាងឆ្នាំ២០១៨-២០២២ ថវិកាជាតិវិភាជន៍សម្រាប់វិស័យសុខាភិបាលមានកំណើន ៥.១%។ ការចំណាយថវិកា ទាំងនៅថ្នាក់ជាតិ និងថ្នាក់រាជធានី-ខេត្ត បានតម្រង់ឆ្ពោះទៅគាំទ្រដល់ដំណើរការផ្តល់សេវាសុខភាព ការអភិវឌ្ឍ និងការពង្រីកសេវាសុខាភិបាល និងការកែលម្អគុណភាព។ ការចំណាយលើឱសថបរិក្ខារ វ៉ាក់សាំង ប្រតិករ ឧបករណ៍ពេទ្យ បច្ចេកវិទ្យាបានកើនឡើងគួរឱ្យកត់សម្គាល់ ជាពិសេសក្នុងឆ្នាំ២០២១ ក្នុងដំណាក់កាលប្រយុទ្ធនឹងជំងឺកូវីដ-១៩។
ជុំវិញបញ្ហានេះ លោក យង់ គិមអេង មានប្រសាសន៍ថា វិស័យសុខាភិបាល គឺជាសេវាសាធារណៈមួយដ៏សំខាន់ ដែលរដ្ឋាភិបាលត្រូវយកចិត្តទុកដាក់ ដោយធ្វើយ៉ាងណាឱ្យមានគ្រូពេទ្យ សម្ភារៈ និងការផ្គត់ផ្គង់ផ្សេងៗទៀតសមស្របទៅតាមតម្រូវការប្រជាជន ដោយមិនអាចខ្វះបាន។ ប្រសិនបើប្រជាពលរដ្ឋជាច្រើនកំពុងត្រូវការគ្រូពេទ្យព្យាបាល ហើយសេវាព្យាបាលនៅមានកម្រិត នោះពលរដ្ឋនឹងបាត់ទំនុកចិត្តទៅលើសេវាសាធារណៈ ហើយពួកគេនឹងមានអារម្មណ៍រងារ ត្បិតពលរដ្ឋពឹងអាស្រ័យទៅលើរដ្ឋាភិបាល។
លោក គិមអេង ថ្លែងថា៖ «មនុស្សឈឺមានរាល់ថ្ងៃ តាំងពីកើតរហូតដល់ស្លាប់ គឺត្រូវការពេទ្យទាំងអស់ អ៊ីចឹងបើសិនជាពេទ្យខ្វះបុគ្គលិក ថាតើបញ្ហានឹងទៅជាយ៉ាងណា? ម្យ៉ាងមកដល់ពេលនេះហើយ មិនគួរមានពាក្យថាខ្វះទេ គួរតែមានការរើស[ពេទ្យ] ឱ្យបានគ្រប់គ្រាន់ដើម្បីធ្វើឱ្យសេវាសុខាភិបាលមានប្រសិទ្ធិភាព»។
ប្រធានមន្ទីរសុខាភិបាលខេត្តកំពត លោក ញា ប៊ុនថន មិនមានការឆ្លើយតប បើទោះបី ខេមបូចា ព្យាយាមទាក់ទងតាមទូរសព្ទ និងផ្ញើសារតាមប្រព័ន្ធតេឡេក្រាមក៍ដោយ។
លោក ឃុត ឧសភា នាយករដ្ឋបាលខេត្តកំពត បានឱ្យដឹងថា ថ្នាក់ខេត្តតែងតែគិតគូរអំពីបញ្ហាកង្វះខាតបុគ្គលិកថ្នាក់ក្រោមជាតិ ហើយថាបាននឹងរៀបចំផែនការដើម្បីស្នើសុំបុគ្គលិកបន្ថែមទៅតាមតម្រូវការ តែលទ្ធផលយ៉ាងណា អាស្រ័យលើការរៀបចំរបស់ក្រសួងពាក់ព័ន្ធ ដើម្បីឱ្យសមស្របទៅនឹងផែនការថវិកាថ្នាក់ជាតិ។
លោក ឧសភា បញ្ជាក់ថា៖ «រដ្ឋបាលខេត្តនឹងធ្វើផែនការក្របខណ្ឌបញ្ចូនទៅថា្នក់ជាតិ ថ្នាក់ជាតិអ្នកពិនិត្យ និងផ្ដល់ចំនួនតាមរាជធានីខេត្តវិញ ដោយសុទ្ធតែត្រូវមានផែនការ និងឆ្លងក្រសួងមុខងារសាធារណៈ»។
យោងតាមអង្គសន្និបាតកំណត់ទិសដៅការងារឆ្នាំ២០២៣ របស់រដ្ឋមន្ត្រីក្រសួងសុខាភិបាល កាលពីពេលកន្លងទៅបានឱ្យដឹងថា ក្នុងឆ្នាំ២០២៣ និងឆ្នាំបន្ត រដ្ឋាភិបាលធានាឱ្យប្រជាជនគ្រប់រូបរស់នៅប្រកបដោយសុវត្ថិភាព សុខភាព និងសុខុមាលភាពល្អ ផ្តោតលើអាទិភាពចំនួនបីសំខាន់ៗ។
ក្នុងនោះអាទិភាពទី១ គឺផ្ដោតលើការកែលម្អស្ថានភាពសុខភាពប្រជាជនឱ្យកាន់តែប្រសើរឡើងវិញ។ ទី២ ពង្រឹងភាពធន់ និងទំនើបភាវូបនីយកម្មប្រព័ន្ធសុខាភិបាល ជាពិសេសប្រព័ន្ធសន្តិសុខសុខភាព និងប្រព័ន្ធផ្តល់សេវាសុខភាពផ្អែកលើការថែទាំសុខភាពបឋម គុណភាពសេវា និងការពង្រីកការគាំពារសុខភាពសង្គម ដែលជាមូលដ្ឋានគ្រឹះសម្រាប់ការគ្របដណ្ដប់សុខភាពជាសកល ពង្រឹងគុណភាពបណ្តុះបណ្តាល និងការគ្រប់គ្រងធនធានមនុស្ស លើកកម្ពស់ប្រព័ន្ធផ្គត់ផ្គង់ឱសថសម្ភារៈ បរិក្ខារពេទ្យ ឧបករណ៍ពេទ្យ និងការប្រើប្រាស់បច្ចេកវិទ្យាឌីជីថល និងទី៣ ពង្រឹងយន្តការអភិបាលកិច្ចល្អ និងការងារនិយ័តកម្ម ការតាមដាន និងវាយតម្លៃសមិទ្ធផលប្រព័ន្ធសុខាភិបាល និងលើកកម្ពស់ការសិក្សាស្រាវជ្រាវ៕
