សមាគមសម្ព័ន្ធអ្នកសារព័ត៌មានកម្ពុជា

ចំពេលកិច្ចប្រជុំកំពូលអាស៊ាន ថៃ និងឥណ្ឌូណេស៊ី ជំរុញឲ្យមានការទប់ស្កាត់ការឆបោកតាមអនឡាញនៅកម្ពុជា

នាយករដ្ឋមន្ត្រីកម្ពុជា លោក ហ៊ុន ម៉ាណែត ជួបជាមួយប្រធានាធិបតីឥណ្ឌូណេស៊ី លោក ចូកូ វីដូដូ (Joko Widodo) ក្នុងអំឡុងកិច្ចប្រជុំកំពូលអាស៊ានថ្ងៃទី៤ ខែកញ្ញា ឆ្នាំ២០២៣។ (រូបភាព៖ ក្រសួងការបរទេស នៃសាធារណរដ្ឋឥណ្ឌូណេស៊ី)
នាយករដ្ឋមន្ត្រីកម្ពុជា លោក ហ៊ុន ម៉ាណែត ជួបជាមួយប្រធានាធិបតីឥណ្ឌូណេស៊ី លោក ចូកូ វីដូដូ (Joko Widodo) ក្នុងអំឡុងកិច្ចប្រជុំកំពូលអាស៊ានថ្ងៃទី៤ ខែកញ្ញា ឆ្នាំ២០២៣។ (រូបភាព៖ ក្រសួងការបរទេស នៃសាធារណរដ្ឋឥណ្ឌូណេស៊ី)

ក្នុង​កិច្ច​ប្រជុំ​កំពូល​អាស៊ាន​នៅ​ទីក្រុង​ហ្សាកាតា លោក​នាយក​រដ្ឋ​មន្ត្រី ហ៊ុន ម៉ាណែត បាន​ជួប​ជាមួយ​ប្រធានាធិបតី​ឥណ្ឌូណេស៊ី លោក ចូកូ វីដូដូ (Joko Widodo) ដែល​ពេល​នោះ​លោក​ប្រធានាធិបតី​បាន​ជំរុញ​ឲ្យ​មាន​ការការពារ​កាន់​តែ​ខ្លាំង​បន្ថែម​ទៀត​លើ​ជនជាតិ​ឥណ្ឌូណេស៊ី ពី​ឧស្សាកម្ម​ឧក្រិដ្ឋកម្ម​តាម​អនឡាញ​។​

ក្រ​សួង​ការបរទេស​ឥណ្ឌូណេស៊ី​បាន​ថ្លែង​កាលពី​ថ្ងៃចន្ទ​ថា លោក វីដូដូ និង​លោក ហ៊ុន ម៉ាណែត បាន​ពិភាក្សា «លើ​ការ​ពង្រឹងកិច្ចសហប្រតិបត្តិការ​ក្នុង​ការពារ​ប្រជា​ពល​រដ្ឋ​ឥណ្ឌូណេស៊ី…​ដែល​បាន​ក្លាយ​ជា​ជនរងគ្រោះ​នៃ​អំពើឆបោក​តាម​អនឡាញ ឬ​ការ​ឆបោក​តាមប្រព័ន្ធ​អ៊ិនធឺណិត» ហើយ​លោក វីដូដូ «បាន​សង្កត់​ធ្ងន់​លើ​សារសំខាន់នៃ​ការ​ពង្រឹង​កិច្ចសហប្រតិបត្តិការ​រវាង​ភ្នាក់​ងារ​អនុវត្ត​ច្បាប់​ប្រទេស​ទាំង​ពីរ​ផង​ដែរ»។​

​គិត​តាំងពី​ខែ​មករា ដល់​ខែ​កក្កដា ឆ្នាំ​២០២៣ នេះ​មាន​ «បទល្មើស​ទាក់ទង​នឹង​ការឆបោកតាម​​អនឡាញ» ៥១៥​ករណី​នៅ​កម្ពុជា​។ នេះ​បើតាម​ការ​កត់​សម្គាល់​ក្នុង​សេចក្ដី​ថ្លែង​ការណ៍​របស់​រដ្ឋាភិបាល​ឥណ្ឌូណេស៊ី​។​

ក្នុង​ខែ​សីហា អាជ្ញាធរ​ឥណ្ឌូណេស៊ី​បាន​រាយការណ៍​ពី​ការជួយ​សង្គ្រោះ និង​ធ្វើ​មាតុភូមិ​និវត្តន៍​ជនជាតិខ្លួន​ចំនួន​៤១​នាក់​ដែល​បាន​ជាប់​នៅ​ក្នុង​ឧស្សាហកម្ម​ឆបោក​តាម​អនឡាញ​នៅ​ប្រទេស​កម្ពុជា​។ ​ប៉ុន្តែ​អាជ្ញាធរ​កម្ពុជាបាន​លើក​ឡើង​ផ្ទុយ​ពី​នេះ ដោយថា​ជនជាតិ​ឥណ្ឌូណេស៊ី​ទាំង​នោះ​មិន​មែន​ជា​ជនរងគ្រោះ​នោះទេ​។​

កាលពី​សប្ដាហ៍​មុន អង្គការ​សហប្រជាជាតិ​បាន​បង្ហាញ​របាយការណ៍​មួយ​ថា​យ៉ាង​ហោច​ណាស់​មាន​មនុស្ស​ ១០០ ០០០​នាក់​ត្រូវ​បាន​បង្ខំ​ឲ្យ​ជាប់ពាក់​ព័ន្ធ​នឹង​អំពើឆបោក​តាម​អនឡាញ​នៅ​កម្ពុជា​។

​ជា​ការ​ឆ្លើយ​តប លោកស្រី​ ជួ ប៊ុនអេង អនុប្រធាន​អចិន្ដ្រៃយ៍ គណៈកម្មាធិការ​ជាតិ​ប្រយុទ្ធ​ប្រឆាំង​អំពើ​ជួញដូរ​មនុស្ស កាលពី​ពេល​កន្លងទៅ​បាន​សួរ​បក​នឹង​ការ​លើក​ឡើង​នេះ​វិញ​ថា «តើពួកគេ​នៅឯណា?»​

លោកស្រី បាន​បដិសេធក្នុង​ការធ្វើ​អត្ថាធិប្បាយ​បន្ថែម។​

អគ្គស្នងការរងនគរបាលភូមិន្ទថៃ លោក Surachate Hakparn ​​ត្រូវ​បាន​គេ​រាយ​ការណ៍​ថា​ក៏​បាន​ស្វែង​រក​ការ​ជួយ​ពី​សមភាគីកម្ពុជា​ក្នុង​ការ​ជួយ​ទប់ស្កាត់​ឧស្សាហកម្ម​ឆបោក​តាម​អនឡាញដែរ ពេល​រូប​លោក​បាន​ជួប​នឹង​អគ្គស្នងការនគរបាលជាតិ​កម្ពុជាដែលទើបកាន់ដំណែង​ថ្មីគឺ លោក ស ថេត​។​

លោក Hakparn ​ដែល​កន្លង​មក​ធ្លាប់​​បាន​ចោទ​អាជ្ញាធរ​កម្ពុជា​ថា​បាន​បំផ្លាញ​កិច្ច​ខិត​ខំ​ប្រឹង​ប្រែង​របស់​ខ្លួន​ក្នុង​ការ​នាំយក​​ជន​រង​គ្រោះ​ពី​ទី​តាំង​ប្រព្រឹត្តបទល្មើស​ឆបោក​ មិន​បាន​ឆ្លើយ​តប​នឹង​សំណើ​សុំ​ការ​អត្ថាធិប្បាយ​ទេ។

caption: អគ្គស្នងការ​នរគបាលជាតិ​កម្ពុជា លោក ស ថេត និង​អគ្គស្នងការរងនគរបាលភូមិន្ទថៃ លោក Surachate Hakparn ពិភាក្សា​អំពីកិច្ចសហប្រតិបត្តិការ​ប្រឆាំង​ឧក្រិដ្ឋកម្ម​ឆ្លងដែន កាលពីថ្ងៃទី​៤ ខែកញ្ញា ឆ្នាំ​២០២៣។ (រូបភាព៖ អគ្គស្នងការ​ដ្ឋាន​នគរបាល​ជាតិ​កម្ពុជា)

បន្ទាប់​ពី​មាន​ឃាតកម្ម​លើ​មនុស្ស​បី​នាក់​នៅ​ប្រទេស​ថៃ ដែល​គេ​សង្ស័យ​ថា​មាន​ជាប់​ពាក់ព័ន្ធ​នឹង​អំពើ​ឆបោក​ក្នុង​ប្រទេស​កម្ពុជា លោក Hakparn ​ និង​នរគបាល​ថៃ បាន​ស្នើ​ឲ្យ​មាន​កិច្ច​សហការពី​នគរបាល​ជាតិ​កម្ពុជា​ក្នុង​ការ​ស្វែង​រក​ចាប់​ខ្លួន​ជនជាតិ​ចិន​ដែល​មាន​ទីតាំង​ហៅ​ទូរសព្ទ​របស់​ខ្លួន​ក្នុង​ប្រទេស​កម្ពុជា​​ ដែល​ប្រើ​ជា​មូល​ដ្ឋាន​សម្រាប់​ឆបោក​ជនជាតិ​ថៃ។ នេះ​បើ​តាម​ការ​ផ្សាយ​របស់​សារព័ត៌មាន​ថៃ​។ លោក Hakparn បាន​ប្រាប់​សារព័ត៌មាន​ថៃថា លោក​កំពុង​ស្វែង​រក​ការ​ចាប់​ខ្លួន​ជនជាតិ​ថៃប្រាំបួន​នាក់ និង​ជនជាតិ​ចិន ដែល​គេជឿ​ថា​ជា​អ្នក​ពាក់ព័ន្ធ​នឹង​​មណ្ឌលប្រតិបត្តិការ​ឆបោក​អនឡាញ​នេះ​។​​

លោក ស ថេត ដែល​ទើប​តែង​តាំង​ជា​អគ្គស្នងការ​នរគបាលជាតិ​ថ្មី បាន​ប្រាប់​ខេមបូចា​ថា​ លោក​មិន​មាន​ការពិភាក្សាជា​មួយ​លោក Hakparn អំពី​ករណី​ស្លាប់​របស់​ជនជាតិ​ថៃបី​នាក់​នោះទេ​ ហើយលោក​ថា លោក Hakparn មក​កម្ពុជា «ដើម្បី​អបអរ​សារ​ទរចំពោះ​រូប​លោក»។​

លោក​បន្ថែម​ថា ភាគី​ថៃ​ក៏​បាន​ពិភាក្សា​អំពី​ការ​ពង្រឹង​កិច្ចសហប្រតិបត្តិការ តែ​លោក​មិន​បាន​ផ្ដល់​ព័ត៌មាន​លម្អិត​នោះទេ។ លោក មានប្រសាសន៍​ស្រដៀង​នឹង​សេចក្ដី​ថ្លែង​ការណ៍​របស់​អគ្គស្នងការនរគបាលជាតិ​ដែរ ថាភាគីទាំងពីរ​​នឹង​ធ្វើ​ការ​រួម​គ្នា​ដើម្បី​ប្រឆាំង​នឹង​បទល្មើស​ឆ្លង​ដែន​។​​

ពេល​សួរ​ទាក់ទង​នឹង​សេចក្ដី​រាយការណ៍​ពី​ភាគីថៃថា​មាន​ឃាតកម្ម​លើ​ជន​ជាតិ​ថៃបី​នាក់ ដែល​ឃាតកម្ម​នោះ​ត្រូវ​គេសង្ស័យ​ថា​មាន​ជាប់​ពាក់​ព័ន្ធ​នឹង​បទល្មើស​ឆបោក​នៅ​កម្ពុជា លោក​ថា «ខ្ញុំ​មិន​ដឹងថា​ពិត​ ឬអត់ទេ វា​អាស្រ័យ​លើ​ភាគី​ថៃ»។

ស្ថាន​ទូតថៃ និង​ស្ថានទូត​ឥណ្ឌូណេស៊ី​ប្រចាំ​ទីក្រុង​ភ្នំពេញ មិន​អាច​ទាក់ទង​សុំ​ការ​អត្ថាធិប្បាយ​បាន​ទេ​៕

ប្រែសម្រួលពីអត្ថបទភាសាអង់គ្លេស៖ Amidst ASEAN Summit, Thailand and Indonesia Urge for Protection from Online Scams in Cambodia

179 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម