សាលាឧទ្ធរណ៍រាជធានីភ្នំពេញ នៅថ្ងៃអង្គារនេះបានសម្រេចតម្កល់សាលក្រមសាលាដំបូងលើសំណុំរឿងរបស់មេដឹកនាំសហជីព លោក ម៉ម រិទ្ធី។ មេធាវី លោក ម៉ម រិទ្ធី និងសហជីពផ្សេងទៀតដែលបានចូលរួមស្ដាប់សវនាការចាត់ទុកការសម្រេចនេះថាជារឿងអយុត្តិធម៌។
លោក ម៉ម រិទ្ធី ត្រូវបានសាលាដំបូងរាជធានីភ្នំពេញ «កាត់ទោស»កំបាំងមុខកាលពីខែឧសភា ឆ្នាំ២០២៤ ប៉ុន្តែលោកបានប្ដឹងទាស់ទៅតុលាការឱ្យជំនុំជម្រះសំណុំរឿងរបស់ក្នុងខែធ្នូឡើងវិញ។ ទោះយ៉ាងណា សាលាឧទ្ធរណ៍បានសម្រេចតម្កល់សាលក្រមរបស់សាលាដំបូង ដែលបានកាត់ទោសឲ្យលោកជាប់ពន្ធនាការព្រៃសចំនួន១៨ខែ ដោយចោទពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទធ្វើឱ្យបាត់បង់ជំនឿលើសេចក្តីសម្រេចរបស់តុលាការ ព្រមទាំងពិន័យជាប្រាក់២លានរៀល។
លោក ម៉ម រិទ្ធី ជាប្រធានសហព័ន្ធសហជីពវិស័យទេសចរណ៍សេវាកម្មកម្ពុជា (CTSWF) និងជាអនុប្រធានសហព័ន្ធសហជីពកម្ពុជា (CLC) ផងដែរ។ លោកត្រូវបានចាប់ខ្លួន និងចោទប្រកាន់នៅក្នុងរាជធានីភ្នំពេញកាលពីខែឧសភា ឆ្នាំ២០២៤ តាមមាត្រា៤៩៤ ៤៩៥ និង៥២៣ នៃក្រមព្រហ្មទណ្ឌ។
ការចាប់ខ្លួននេះធ្វើឡើងដោយម្ចាស់ក្រុមហ៊ុនចិន ជីនប៉ី គ្រុប។ លោក រិទ្ធី តាមរយៈហ្វេសប៊ុករបស់លោកបានលើកឡើងថាលោកបាន «បាត់ជំនឿលើការសម្រេចរបស់តុលាការ» ក្រោយពីបុគ្គលិកកាស៊ីណូម្នាក់ត្រូវបានចោទប្រកាន់ពីការប្រព្រឹត្តបទល្មើសព្រហ្មទណ្ឌកាលពីឆ្នាំ២០២២។
ក្នុងវីដេអូផ្សាយផ្ទាល់របស់ខ្លួន លោកបានរិះគន់កាស៊ីណូជីនប៉ី២ ដែលបានចោទបុគ្គលិកកាស៊ីណូជាស្រ្តីម្នាក់ថាបាន«ជួយ»ឲ្យអវិថិជនឈ្នះល្បែង១៨ ០០០ដុល្លារ និង «មិនអនុញ្ញាត» ឲ្យអតិថិជនរូបនោះចូលលេងទៀតឡើយ។ លោកក៏បានរិះគន់ចំណាត់ការរបស់តុលាការដែលបានឃុំខ្លួនបុគ្គលិកជាស្រ្តីរូបនោះទាំងដែលមិនមានភស្តុតាង។
មេធាវីការពារក្ដីឲ្យលោក ម៉ម រិទ្ធី គឺលោក សំ ចំរើន បាននិយាយថាសេចក្ដីសម្រេចរបស់តុលាការលើកូនក្ដីរបស់លោកមិនយុត្តិធម៌នោះទេ។ យ៉ាងណា មេធាវីរូបនេះបដិសេធធ្វើអត្ថាធិប្បាយច្រើនជាងនេះ។
ភរិយាលោក ម៉ម រិទ្ធី គឺអ្នកស្រី គង់ សុដា បាននិយាយថា ការសម្រេចរបស់សាលាឧទ្ធរណ៍មិនបានផ្ដល់យុត្តិធម៌ដល់ស្វាមីអ្នកស្រីទេ។ អ្នកស្រីបន្តថានឹងពិភាក្សាជាមួយមេធាវីដើម្បីប្ដឹងសារទុក្ខទៅកាន់តុលាការកំពូលទៀត។ អ្នកស្រីលើកឡើងថា អ្វីដែលប្ដីអ្នកស្រីបានបង្ហោះលើហ្វេសប៊ុកគឺមិនមានចេតនាធ្វើឱ្យបាត់បង់ជំនឿលើសេចក្តីសម្រេចរបស់តុលាការ ឬញុះញង់បុគ្គលណាឡើយ។
អ្នកស្រីអះអាងថា៖ «អ្វីដែលគាត់បានផ្សាយលើហ្វេសប៊ុកគឺមានចេតនាចង់ឲ្យមានដំណោះស្រាយចំពោះបុគ្គលិកកាស៊ីណូជាស្រ្តីរូបនោះ»។
អ្នកស្រីបន្តថា៖ «ខ្ញុំសុំឱ្យតុលាការមេត្តាពិចារណា[សាលដីការ]ឡើងវិញ និងដោះលែងគាត់ពីពន្ធនាគារ ព្រោះថាគាត់គ្មានចេតនាធ្វើឱ្យបាត់បង់ជំនឿលើសេចក្តីសម្រេចរបស់តុលាការទេ»។
អ្នកស្រីបញ្ជាក់ថា គ្រួសារកំពុងជួបការលំបាក ពេលស្វាមីជាប់ឃុំបែបនេះ ដោយអ្នកស្រីត្រូវរ៉ាប់រងបន្ទុកដ៏ធ្ងន់ក្នុងការមើលថែកូនបួននាក់ដែលមានវ័យពី៦ដល់២០ឆ្នាំ។
អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ ដែលបានចូលរួមស្ដាប់សវនាការនោះដែរ បានបង្ហាញការខកចិត្តចំពោះសាលដីការរបស់សាលាឧទ្ធរណ៍ និងបានចាត់ទុកថាការសម្រេចចិត្តនេះមិនយុត្តិធម៌សម្រាប់សហជីព។
លោកបានថ្លែងថា៖ «ខ្ញុំគិតថាវាជារឿងទាក់ទងនឹងជម្លោះការងារដែលពាក់ព័ន្ធនឹងសហជីព នឹងកម្មករ ហើយវាមិនគួរត្រូវដោះស្រាយតាមផ្លូវតុលាការទេ»។
លោកបន្តថា៖ «ពេលដែលតំណាងសហជីពបញ្ចេញមតិដើម្បីការពារសមាជិករបស់ខ្លួន ហើយក្រោយមកបែរជាត្រូវចាប់ខ្លួន វានឹងបំបាក់ទឹកចិត្តពួកគេក្នុងការការពារកម្មករនៅពេលខាងមុខ ហើយទុកឱ្យនិយោជករំលោភបំពានកម្មករដោយសេរី»។
លោកបន្ថែមថា លោក រិទ្ធី ក៏មិនបានរៀបចំធ្វើការតវ៉ាអ្វីដែរ បើទោះបីជាពេលនោះលោកថានឹងធ្វើក៏ដោយ។ លោកថាមិនមានសកម្មភាពណាមួយក្នុងឆ្នាំនោះដើម្បីអាចធ្វើជាមូលដ្ឋានចោទប្រកាន់ពីបទញុះញង់នោះទេ។ លោកបន្តទៀតថា៖ «ក្នុងនាមជាមេដឹកនាំមួយរូប គឺមានសិទ្ធិតស៊ូមតិដើម្បីស្វែងរកដំណោះស្រាយលើបញ្ហាដែលកម្មករជួបប្រទះ»។
ជាមួយគ្នានោះដែរ សាលាឧទ្ធរណ៍មិនបានអនុញ្ញាតឲ្យអ្នកសារព័ត៌មានខេមបូចាចូលស្ដាប់សវនាការរបស់លោក រិទ្ធី នោះទេ ដោយអះអាងថា «បន្ទប់សវនាការពេញហើយ»។ សាលាឧទ្ធរណ៍មិនបានអនុញ្ញាតឲ្យអ្នកសារព័ត៌មានចូលស្ដាប់សវនាការចំនួនបីដងមកហើយទាក់ទងនឹងសំណុំរឿងអតីតមេដឹកនាំអតីតគណបក្សសង្គ្រោះជាតិ លោក កឹម សុខា ដែលបានជំនុំជម្រះកាលពីឆ្នាំមុន ដោយបានលើកឡើងនូវហេតុផលប្រហាក់ប្រហែលគ្នានេះរាល់លើក។
សវនាការដាច់ដោយឡែកមួយទៀត សាលាឧទ្ធរណ៍ក៏បានតម្ដល់សាលក្រមរបស់សាលាដំបូងរាជធានីភ្នំពេញដែរ។ សវនាការនោះគឺជំនុំជម្រះបណ្ដឹងឧទ្ធរណ៍របស់អ្នករិះគន់រដ្ឋាភិបាល លោក នី ណាក់ ដែលតុលាការរកឃើញថាមានពិរុទ្ធ និងកាត់ទោសឲ្យជាប់ពន្ធនាគាររយៈពេលពីរឆ្នាំពីបទញុះញង់ឱ្យមានការរើសអើង និងបទបរិហារកេរ្តិ៍ជាសាធារណៈ។
លោក នី ណាក់ រងបទចោទនេះ ក្រោយពីលោកបានរិះគន់លើម្ចាស់គណនីហ្វេសប៊ុកមួយឈ្មោះថា «ហេង សួរ» ដោយថាលោក ហេង សួរ កាន់កាប់ដី៩១ហិចតា។ អ្នកនាំពាក្យក្រសួងការងារបដិសេធថាគណនីហ្វេសប៊ុកឈ្មោះ «ហេង សួរ» ដែលរងការចោទប្រកាន់នោះមិនមែនជារបស់រដ្ឋមន្ត្រីក្រសួងការងារ លោក ហេង សួរ នោះទេ។
សំណុំរឿងដាច់ដោយឡែកមួយទៀត ចៅក្រមសាលាឧទ្ធរណ៍ក៏បានច្រានចោលសំណើសុំនៅក្រៅឃុំ របស់លោក ជិន ប៊ុណ្ណរ័ត្ន មន្ត្រីគណបក្សកម្លាំងជាតិ ដែលត្រូវបានចាប់ខ្លួនកាលពីខែវិច្ឆិកា ឆ្នាំមុន ក្រោមបទចោទញុះញង់ផងដែរ។
លោក ជូង ជូងី មេធាវីការពារក្ដីឲ្យលោក ប៊ុណ្ណារ័ត្ន និងលោក នី ណាក់ បានបង្ហាញការខកចិត្តជាមួយនឹងសេចក្ដីសម្រេចរបស់ចៅក្រមសាលាឧទ្ធរណ៍ដែលតម្កល់សាលក្រមរបស់សាលាដំបូងរាជធានីភ្នំពេញ ដែលការណ៍នេះធ្វើឲ្យកូនក្ដីរបស់លោកត្រូវបន្តជាប់ឃុំ។
លោកលើកឡើងថា៖ «ខ្ញុំសោកស្ដាយដែលតុលាការមិនផ្ដល់យុត្តិធម៌សម្រាប់ពួកគាត់»។ យ៉ាងណា លោកបដិសេធអត្ថាធិប្បាយច្រើនទៀតអំពីសំណុំរឿងទាំងពីរនេះ។
ភរិយាលោក នី ណាក់ គឺអ្នកស្រី សុខ ស៊ីណែត ដែលបានចូលស្ដាប់សវនាការដែរនោះ បានបង្ហាញការខកចិត្តដូចគ្នា និងថាមិនមានយុត្តិធម៌សម្រាប់ស្វាមីអ្នកស្រីនោះទេ។ អ្នកស្រីលើកឡើងថា៖ «អ្វីដែលគាត់បានបង្ហោះលើហ្វេសប៊ុករបស់គាត់ គឺគ្រាន់តែជាការអនុវត្តសិទ្ធិបញ្ចេញមតិក្នុងនាមជាពលរដ្ឋម្នាក់»៕
ប្រែសម្រួលពីអត្ថបទភាសាអង់គ្លេស៖ Appeal Court Upholds Convictions Against Union Leader Morm Rithy and Govt Critic Ny Nak
